Wie mer Dillgummere macht un weckduht!

Guder Daag Blog Leser! Well letschde Woch hawwich en Poscht iwwer mei Gaarde gschriwwe. Selle Woch hawwich gedenkt as ich eppes meh iwwer mei Gaardesache schreiwe sott. Ee Ding as ich yedes Yaahr blanz sin Gummere. Ich gleich Gummere arrig viel. Sie sin gut as Gummereselaat, as Dillgummere un aa as Siessgummere. Dihr wisst schunn as mer allsfatt eppes siess un eppes sauer uff dem Disch hawwe sott. Fer mei Familye hot es allsfatt Gummere gewwe. So heit will ich beschreiwe wie mer Dillgummere macht un weckduht. Wann mer sie weckduht, dann kann mer gute Gummere in Yenner un Hanning hawwe!

1. Aerscht muss mer Gummere finne! Wann mer ken Gaarde hot, kann mer Gummere in em Supermarrick odder uff en Gaardesachmarrick griege. Geb Acht! Sie misse gewascht sei!

Datt sin die Gummere, frisch aus em Gaarde.

2. Nau muss mer die Gummere abschneide. Mer kennt sie as “Chips” odder as “Schpies” schneide. Es macht nix, die alle schmacke gleich.

Zeit zu schneide. En gutes Messer helft!

3. Wann mer sie weckduh will, muss mer die Glasskanne sauwer mache. Fer sell muss mer sie ins Wasser koche. Net vergesse die Ringe un die Deckele aa zu koche!

Die Kanne sin ready zu koche.

4. Nau muss mer die Brieh koche. Normally, kaaf ich eppes fer mei Brieh, awwer es gebt viel verschiddliche Reseete fer es selwer zu mache. Fer mei Brieh, koch ich Wasser, Essich un die Mischung die ich kaaft hab.

Sell iss was ich fer mei Brieh kaafe. Wolfel un gut!

5. Nau dei Kanne sin sauwer un dei Brieh iss faddig, schtell die Gummere in die Kanne un leffele die Brieh in die Kanne.

Schtell die Gummere in die Kanne!

Nau kummt die Brieh aa rei!

6. Wann alles in die Kanne iss, misse die Kanne widder gekocht sei. Schtell die Ringe un die Deckele uff die Kanne un koche sie fer baut 15 Minudde.

7. Nooch baut 15 Minudde misse sie rausgenumme sei. Wann sie raus sin, zieh die Deckele aa. Schtell sie ariyets wu sie abkiehle kenne. Nau kannscht du fer die “pop” hariche. Wann sie poppe, sin sie faddig un ready fer dei Kaltkellar!

Geb Acht! Sie sin arrig hees. Ich muss mei Hensching aahawwe.

Nau sin sie faddig. Guckt arrig gut, Gell?

Ich hab sell frieher gheert: Was iss die beschde Deel vun en Sandwich? Die Gummere! Ich finn sell arrig richdig.

As ich fleissig an schaffe waar, hot mei Dochder gschlofe!

Do iss en Audio Klip: Wie mer Dillgummere macht un weckduht!

 

 

Published in: on 22/08/2012 at 12:59  Comments (2)  

Baade im Yaahr 1966? Net meh!

Guder Daag Blog Leser! Ya, ich weess, sell iss en kariyose Naame fer en Poscht, awwer sell iss Recht! Mei Fraa un ich hen unser Haus var zwee Yaahre kaaft. Unser Haus waar im Yaahr 1966 gebaut un wann mir es Haus kaaft, waar es Haus immernooch in de Hippy Yaahre. Nadierlich hemmer en Blan gemacht um es Haus im Yaahr 2010 zu bringe. Awwer as viel vun eich schunn wisst, sell koschdet viel Geld un braucht aa viel Zeit. So mir hen mit de gleene Dinge aagfange: neie Farewe uff de Wande, ee paar neie Appliances un so weiter. Ee Schtubb as arrig schlecht waar, waar es Baadschtubb. Aye yummer yeah! Wie viel Baadschtuwwe hot es Tiles uff de Wande. Nooch vattzich Yaahre vun Wasser waare die Wande net so gut. Die Grout gschwischich die Tiles iss schwatz gange, un viel vun die Tiles sin eefach vun de Wande nunnergfalle.

Mei Fraa un ich hen ausgemacht, as selles Schtubb Nummer 1 sei soll. Endlich, nooch ee paar Yaahre vun Geld schpaare, hemmer endlich Geld un Zeit ghatt es Baadschtubb nei zu mache. Mir hen en neie Schauer/Baad kaaft. Sell waar net billig awwer ‘sis aus Plastic gemacht – sell meehnt, ken meh Groz un Milldaa. So nau hemmer was mir braucht.

Mei Daadi iss en Zimmerman/Schreiner so nadierlich hawwich ihn gfroogt zu helfe. Meinre Fraa ihr Onkel iss en Blummer, so mir hen ihn gfroogt all die Wasser Arewet zu duh. Well uff Sunndaag sin mei Daadi un Grossdaadi dokumme un mir hen bletzlich aagfange. Aerscht hemmer die Tiles nunnergedrenne. Dann kummt eppes arrig hatt. Unser alde Baad waar aus Guss gemacht. Un sell iss arrig schwer! Mir hen es aa rausgedrenne un aus em Haus gschleppt. Dann hemmer es neie Schauer neigeduh. Fer mei Daadi waar alles zimmlich eifach. Er hot schier gaar vattzich Yaahre Erfaahring mit soddichem Arewet.  Wann es Neie drin waar, hot Onkel Jim alles mit de Deichele Arewet geduh. Nau iss endlich unser Baadschtubb nei un frisch. Mir sinn arrig froh un dankbaar as mir Leit in unsere Familye hen die so viel wisse! Mit ihr Helf hemmer uns viel Geld gschpaart.

Do iss en Audio Klip: Baade im Yaahr 1966? Net meh!

Un do sin ee paar Pickders vun all de Arewet.

Es alde Baad. As dihr sehne kennt, sin die Wande net gut!

Ich hab die Tiles schunn nunnergedrenne.

Es alde Baad geht aus em Haus!

Ready fer alles Nei!

Yippee! Nau hemmer en neie Schauer! Sell guckt arrig besser as was datt waar!

 

 

 

 

Published in: on 14/08/2012 at 13:45  Leave a Comment  

Was iss Summer zu eich?

Guder Daag Blog Leser! Well do bin ich widder. Ich hab mei aerschde zwee Woch mit meinre neien Dochder iwwerlebt! Gott sei Dank! Ya, ich hab net gut gschloffe, awwer ‘sis eppes waert, Gell? Selle Woch will ich iwwer der Summer schreiwe. In mei Schul die Englischschulmeeschder gewwe die Schtudente Essays zu schreiwe. Mannichmol misse die Schtudente en Froog antwadde awwer eb un zu misse sie en Satz faddig schreiwe un dann es verzaehle. So, selle Woch duh ich aa so. Mei Satz iss: Der Summer iss _______ zu mir. Mei Essay waerd so aafange: Der Summer iss frische Gaardesache zu mir.

Alle Yaahr blanze ich en Gaarde. As ich Kind waar hemmer allsfatt en grosse (eigentlich vier grosse) Gaarde uff unsre Bauerei ghatt. Mir hen so viel verschiddliche Gaardesache ghatt…un alle waare so appeditlich. Do bei mir in die Bariye hawwich net genunk Blatz um en arrig grosse Gaarde zu hawwe, awwer nadierlich hawwich en Gaarde. Selle Woch will ich ee Paar Pickders vun meinre Gaarde deele. Ich denk ‘sis en gude Iewing fer dei Deitsche Wadde zu iewe odder zu lanne!

Do iss mei Gaarde. As dihr sehne kennt, hawwich en grosse Fens. Wann net, kumme viel Hasch darrich der Owed rei! Un dann gebt es net fer mich zu esse!

Es Graut odder der Koppgraut. Ich gleich Graut zu esse abbadich wann mei Familye es as Sauergraut macht.

Die Peffer. Die sin nooch yung. Ken Peffer awwer sie waerre kumme!

Es Welschkann. Manniche Leit gleiche yuscht gehle odder yuscht weisse Welschkann zu esse. Ich gleich allebeed!

Die Rotriewe. Was iss besser as sauere Rotriewe mit Oier? Nix!

Die Gehlriewe. Die sin gut fer die Aage. Hett diht en Haas mit Brille gsehne?

Die Grienbuhne. Die sin aa nooch yung. Nooch net ken Buhne druff, awwer bald!

Es Schparregraas. Es kummt arrig frieh im Summer, mannichmol iss es schunn ready in schpot Friehyaahr. In Deitschland esse die Leit weisse Schpareegraas.

Ich muss ehrlich saage as ich weess net wie mer selle Gaardesach uff Deitsch saagt. Sell iss Kale uff Englisch. In Hochdeitsch saage die Leit Gr√ľnkohl (Griengraut). Wisst epper vun eich es deitsche Wadde fer sell?

Die Gummere. Siess, sauer odder mit Dill? Ich gleich alles!

Do iss widder en Gaardesach as ich yuscht es Englische Naame kennt. Broccoli iss arrig gut un arrig gsund. Wisst epper vun eich en Deitsche Wadde fer sell?

Die Tomats. Aye yummer yeah, gleich ich Tomats. Frisch in en Selaat, in en Spaghettisdunkes machts nichts aus….ich ess alles!

Un endlich, Zwiwwele. Die sin schunn faddig. Ich hab rote un gehle geblanst.

Well, nau iss unsere Rees darrich mei Gaarde faddig. Ich hoff as dihr es gegliche hett. Selles Yaahr hawwich ken Zuchinni odder Grummbiere geblanst. Alle Yaahr iss mei Gaarde anners. Ich kann net waarde bis mir alles kanne kenne. Dann hemmer “frische” Gaardesach im Mitte vun em Winder!

So wie waerrt eich sell Satz faddig schreiwe: Der Summer iss _______ zu mir.

 

 

 

 

 

 

 

 

 

Published in: on 06/08/2012 at 17:29  Comments (3)