En neie Welt!

Guder Daag Blog Leser! Well do bin ich widder am Waddefresser awwer alles iss anners in unser Haus! Ich kann endlich saage as ich nau en Daadi bin. Sell iss glee bissel kariyos zu saage un zu denke.

Unsere Dochder, die Estella Barbara Madenford, iss um 2:30 mariyets uff Dinschdaag der vierunzwanschigde Tschulei uff die Welt kumme. Mir sin schunn um 1 Uhr am Mundaag-Nummidaag ins Grankehaus gange un dann sin mir datt in Labor bis frieh am Dinschdaag gewest. Alles iss arrig gut geloffe. Mei Fraa hot en arrig gude Tschop geduh! Ich bin arrig schtolz uff sie! Die Gschicht iwwer ihr Naame iss: Estella waar meinre Urgrossmudder Madenford ihr Naame un Barbara waar meinre Mudder ihr Naame.

Die Estella, net zu lang nach ihr Aakumme!

Wann mei Dochder gebore waar, waar sie arrig glee, yuscht 4 Pund 4 Ounces. Des hot die Doktors glee bissel gedruwwelt. Sie hen gewollt zu wisse fer was sie so glee waar. Sie iss net en Miss, so die Doktors hen sie sofort zu en Hatzmonitor eighenkt. Sie hen sie in en Schtubb mit re Monitor fer zwee Daage behalde. Dann hot die Doktors gsaat as sie hen gewollt es Kind Medizin zu gewwe, in Fall as sie grank waar. Fer sell zu happen, hen sie gemisst es Kind en IV darrich ihr Fuuss gewwe! Sell waar hatt zu nemme…so en gleene Bobbli un sie hot gemisst mit zwee Nodele gschtoche zu sei! Awwer am End waar alles gut.

Der schtolze Daadi!

Mir sin endlich am Freidaag erlaabt heem zu kumme. Nau sin mir alle zamme do daheem. Alles geht arrig gut. Die Doktors saage as alles gut guckt un ich bin arrig froh fer sell. Mei Fraa un ich hen ausgemacht, unsere Dochder mit Deitsch un Englisch uffzuziehe. Mei Fraa waerr Englisch mit ihr schwetze un ich waerr nadierlich Deitsch mit ihr schwetze. Ich kann aa ehrlich saage as es aerschdes Mol as ich sie in mei Erem gehalde hab, waare mei aerschde Wadde zu ihr uff Deitsch. Sell iss en gude Aafang!

Do iss en Audio Klip: En neie Welt!

Published in: on 28/07/2012 at 10:33  Comments (8)  

Em Mariye sei Drink!

Guder Mariye liewe Blog Leser! Well, do hock ich widder mit meim Wadderfresser. Normally schreib ich mei Poschts uff em Wochend awwer ich bin in Summerferien Wandel. Ya, die Schul iss raus, die Kinner sin am schwimme un schpiele un die Schulmeeschder sin am ausruhe. Mir misse unsere Batteries widder Schwupp gewwe. Awwer Summerferien iss net mei Topic heit.

Do hock ich mit mei normal Mariye Drink: Kaffie. Ya, ich lieb Kaffie. Ich kann mei Lewe mitaus es net eibilde. Die Leit aus England drinke Tee awwer uns Deitsche sin Kaffieleit. Un heit zu Daag hemmer vun so viele Kaffies zu waehle. Kaffie in Amerikaa hot en Kaffie Widdergebott. Denk yuscht mol, var 30 Yaahre hot es yuscht Kaffie do in Amerikaa gewwe. Mir kennte Folgers, Maxwell House odder Chock Full O’Nuts kaafe un drinke. Wann mer in en Essblatz gange iss, kennt mer entwedder Kaffie odder De-Caf Kaffie drinke. Heit zu Daage iss sell net meh so!

Yuscht en Kuppche Kaffie? Sell iss altmodisch!

Nau gebt es Kumpanies wie Starbucks, Dunkin’ Donuts, un McDonalds. Leit sin arrig gedrei zu ihr Kaffie. Do in Pennsylvaania hemmer aa Sheetz. Sheetz iss en Gas Schtation awwer viel viel Leit gehne mol datt fer Kaffie zu kaafe un drinke. Was aa heit anners iss, iss datt mer kennt aa nicht yuscht Kaffie meh drinke, nau kenne mir “fancy” Kaffies drinke wie Cappucinos, Lattes un annere Drinke kaafe. Un yuscht Millich un Zucker? Sell iss altmodisch! Nau kenne mir Soy Millich odder Schlucke vun verschiddliche annere Raahme griege. Ya, Kaffiedrinke iss net meh so eifach…nau muss mer warricklich denke uff was mir hawwe wolle. Un es kann aa deier sei! Mer kann meh as $5 bezaahle fer en Kuppche Kaffie!

Een vun de greeschde Kaffie Kumpanies: Starbucks aus Seattle.

Ich drink een odder zwee Kuppche Kaffie yeder Daag. Bin ich eighenkt? Ich glaab so. Ich kann net en Mariye mitaus Kaffie eibilde. Un fer mich, es muss allsfatt zwee Zucker un Millich drin hawwe. Ab un zu gleich ich en Fancy Kaffie zu drinke awwer sell bassiert net so oft. Wann ich en Freind dreff, dann vielleicht kaaf ich en Cappucino mit Irische Rahm drin. Sell iss gut.

Sell iss en “Fancy Kaffie”, en Cappucino…arrig schee, Gell?

Kaffie iss en arrig grosse Business do in Amerikaa. En Ardickel vun Retailing Today saagt as in es Yaahr 2010, en Amerikaaner drinkt baut 77 Gallunne im Yaahr un meh as 150 Millyonne Amerikaaner drinke Kaffie yeder Daag. Un in en annere Ardikel aus em Huffington Post, en Amerikaaner bezaahlt baut $1,092 per Yaahr fer Kaffie. Sell iss meh as $3 en Daag! So ya, Kaffie iss wichdig net yuscht fer uns awwer fer unser Economie aa.

Siess odder Bitter, Millich odder ken, so iss die Frooge! Wie iss es bei eich? Drinkt dihr aa viel Kaffie odder seid dihr liewe Tee Drinkern?

Do iss en Audio Klip: Em Mariye sei Drink!

 

Published in: on 18/07/2012 at 09:06  Comments (2)  

Zerick in die Heemet!

Guder Daag Blog Leser! Letschde Woch sin ich un mei Fraa widder im Richting Sud-oscht gfaahre. Mir hen viele Ursache nooch Heem zu faahre: es waar der viert Tschulei un es Kutzschteddel Folks Fescht! So mir sin uff em Dinschdaag losgfaahre.

Dinschdaag henn ich un mei Bruder endlich unser Daadi sei Daadisdaag Gschenk gewwe. Mir hen ihn eigelaade Golf mit uns zu schpiele. Sell waar awwer gschpassig. Ich un mei Bruder schpiele Golf oft awwer unser Daadi hot net sidder baut 8 Yaahre gschpielt. Mir waare verzaehlt as zerick in der Daag, waar unser Daadi en echter guder Golfer. Well nooch sei 8 Yaahre Hiatus, kann er allsfatt nooch gut schpiele. Zum Glick hawwich gewunne, awwer der Daadi waar in zwette Blatz, un mei Bruder waar hinnedraa.

Mittwoch waar unser Unabhaengigskeitdaag. Ya, Amerikaa iss nau 236 Yaahre alt. Nadierlich, wie immer, hemmer en Picknick uff re Bauerei ghatt. Mir hen Glamme mit frische Welschkann un frische Grummbiere vun unsre Gaarde gesse. Alles waar so appeditlich. Nooch em Esse, hemmer ee paar Schpiele vun Quoits gschpielt un dann hemmer uns glee bissel ausgeruht. Es waar arrig heess un schmodig! Schpaeder hemmer ee paar Feierwerks aageguckt….sie waar awwer schee.

En Schtross uff em Folks Fescht.

Alte Fraa am gwilte.

Dunnerschdaag waar en grosser Daag fer mich. Alle Yaahr uff em Kutzschteddel Folks Fescht gebt “Es Schreiwer’s Fescht.” Alle Yaahr kumme Leit zamme datt in Kutzschteddel um ihr eegene Schticke in Deitsch laut zu lese. Selles Yaahr waar aa en gudes Yaahr. In die Audience waar baut 20 Leit. Der Ed Quinter waar der Haaptman un er hot all die Leser bekannt gemacht. Der Patrick Donmoyer hot en Gedicht gelese. Der Kevin Sterner hot en arrig luschdige Gschicht gelese vun seinre Vergangeheit. Ich will yuscht saage as er hot en 80 Yaahre alte Sandwich browiert! Der Richard Savage hot aa en Gedicht iwwer sei Daal im Friehyaahr gelese. En alte Fraa, ich kenn ihr Naame net, vun Virginsville hot en luschdige Gschichte iwwer Exercising verzaehlt. Dann hawwich mei Gschicht iwwer Smart Phones gelese.

Der Kevin Sterner am lese.

Ich am lese, mit mei Schtrohhut aa!

Selles Yaahr hemmer aa alles in Deitsch nadierlich gssat un dann am End hemmer uns alles ins Englisch aa iwwersetzt. Bedrauerlichwees kennt ich net die ganze Zeit bleiwe. Es waar arrig hees un sunnig un ich hab mei Grossmudder mitgebrocht. Die Hitz waar zu viel fer sie un wann ich faddig am lese waar, hot sie zu mir gsaat, ich glaab mir misse geh. Sie hot sich net so gut gefiehlt. Leider hawwich der Ben Rader verpasst un vielleicht annere Leser aa. Awwer es gebt allsfatt naegschstes Yaahr!

Ich hoff as all mei Blog Leser viel Gschpass un Relaxation weeich die Viert Tschulei Woch ghatt.

Do iss en Audio Klip: Zerick in die Heemet!

Published in: on 10/07/2012 at 07:44  Leave a Comment