Iwwer em Atlantik un zerick!

Guder Daag Blog Leser! Well do bin ich widder am Waddefresser un ich will eich glee bissel iwwer mei Rees nooch Deitschland verzaehle. Uff em 17. Tschunn sin ich un 20 vun meine Schtudente nooch Deitschland gfloge. Mir sin vun Newark, NJ graad nooch Frankfurt gfloge. Es Flug waar arrig gut, awwer ich hab net schlofe kennt.

Sell iss die Eigang vun unser Partnerschul in Deitschland. Sie hen uns arrig gut bewillkummt!

As mir aakumme sin waare unsere Deitsche Freinde datt um uns zu bewillkumme. Mir sin dann baut 2 Schtunn in em Bus nooch die glee Schteddel Buchen gfaahre. Dann hot unsere Zeit in Deitschland aagfange. Im Schpotyaahr hawwich eich verzaehlt as alle zwee Yaahre mache mei Schul un en Schul in Deitschland en Exchange Program. So nau waare mir in Deitschland un meine Schtudente hen ihr Exchange Partner widdergsehne. Alle waare nadierlich froh fer sell. Die Schtudente dann sin mit ihrer neien Familye weggfaahre. Ich find es arrig gut un wichdig as mei Schtudente 10 Daage mit en echde Hochdeitsche Familye wuhne. Was fer en Erfaahring iss sell?!

Em Tilman Rienemschneider sei Handwerk in Rothenburg ob der Tauber.

As mir in Deitschland waare hemmer viel geduh un viel gsehne. Mir hen en Daag in Rothenburg ob der Tauber ghatt. Sell waar gut. Die Kinner hen in en grosse Grischtdaag Schtor eikaaft. Mir hen der Tilman Riemenschneider sei Halliche Blut Altar gsehne. Uff en annere Daag hemmer Stuttgart bsucht. Mir hen en Tour in es Mercedes-Benz Museum gemacht. Sell waar yo eppes zu seh. Die hen Maschiene….viel Maschiene. Sie hen aa die aerschde Maschiene der Welt. Mir sin aa nooch Ludwigsburg gange. Datt iss der Schloss Ludwigsburg. Sell iss wu die keenichliche Familye vun Wüttemberg gewuhnt hen. Sell waar aa eppes zu seh!  Es Haus waar arrig gross un mer kennt seh wie die reiche in de 1700s gewuhnt hen…un es waar viel besser as die Bauern!

Ich un mei Schtudente in Ludwigsburg.

Uff re Wochend hen die Familye eppes mit ihr Amerikanner gemacht. Ich persehnlich bin nooch Würzburg un in die Neckar Daal gfaahre. Zum Glick waar es Wedder arrig gut darich unsere Zeit in Deitschland. Es waar drauerich uff em 27. zerickzufliege. Alle mei Schtudente hen gewollt datt zu bleiwe! Awwer ich hab sie gsaat as ich ihre Familye in Amerikaa verschproche hab sie sicher nooch Amerikaa zerickzubringe!

Ich am faahre in em Mercedes-Benz Museum.

Wie allsfatt waar die Zeit in Deitschland eppes. Gute Freinschafte sin gschtarickt, meine Schtudente hen en annere Kuldur erlebt un sie hen die Meeglichkeit ghatt ihr Hochdeitsch zu yuuse. Nau sin mir widder do in Amerikaa. Ich hab der Sommer mich auszuruh, in mei Gaarde zu arewe un Zeit mit Freinde un Familye zu verbringe.

Ich winsch eich viel Gschpass naegschde Woch uff em 4. Tschulei! ‘Sis widder Zeit zu feiere!

Do iss en Audio Klip: Iwwer em Atlantik un zerick!

Published in: on 29/06/2012 at 07:22  Leave a Comment  

Ee paar Dinge!

Guder Daag Blog Leser! Es dut mir Leed as ich net en neies Blog Poscht letschde Woch gschriwwe hab. Letschde Woch waar die letschde Woch vun em Schulyaahr un ich waar arrig gschefdich. Un dann hot mei Fraa gsaat: “Nau misse mir in em Bobbli ihr Schtubb schaffe. So mir hen ihr neies Bett zammegschtellt un aa en neie Aarichtdisch. Ich hab en Dachwandfan aa ghenkt. Zum Glick misse mir die Schtubb net aaschtreiche! Nau iss die Schtubb schier gaar ready fer Estella. Ya, sell iss der Naame as mir gewaehlt hen. Estella waar meinre Gross-Gross-Mudder ihr Naame. Fer en Mittelnaame hemmer Barbara gewaehlt. Sell waar meinre Mudder ihr Naame. Nau misse mir yuscht waarde bis die Estella rauskummt.

Geb Acht! Es waerr ken neie Blog Poscht fer die naegschde zwee Woch! Uff em Sunndaag faahr ich nooch Deitschland mit 20 vun meine Schtudente. Mir fliege vun Nei Jersey direkt nooch Frankfurt. Dann bleiwe mir do in Buchen in Odenwald fer baut 10 Daage. Wann ich zerrickkum, waerr ich en gude Gschicht iwwer mei Reis schreiwe….un voll mit Pickders.

Bis schpaeder in Tschunn, macht’s gut!

Published in: on 12/06/2012 at 06:48  Comments (2)  

Wann die Weibsleit gschefdich sin, kenne die Mannsleit schpiele!

Guder Daag Blog Leser! Gschdrowed hemmer arrig schtarke Dunnere, Wedderleech un Rege ghatt. Zum Glick hot es kenn Tornados gewwe un aa zum Glick hen uns unser Leckdrick net verlore. Heit Mariye waar die Sunn widder am scheine. Ich glaab as dihr findt sellre Woch ihr Naame glee bissel luschdig. Well, loss mich mol verzaehle!

Heit hot mei Fraa ihr Bobblischauer ghatt. As dihr schunn wisst iss sell eppes fer yuscht die Weibsleit. Sie hen en scheene Party uff unsre Karrich ghatt. Mir hen scheene Gschenke grickt, viel gleene Fracke un Schpielsache.

As die Weibsleit am feiere waare, sin ich, mei Daadi, Grossdaadi un Schweeger uff em Rutsch gange. Alle Yaahr gebt es en grosse alde Tracktor un Maschien Schau bei Penn’s Dracheloch. Mei Familie hot drei alde Tracktors so wann mei Daadi zu so en Schau gehe kann, geht er fer schurr. Die Schau selles Yaahr waar wie all die annere. Es hot viel Tracktors, alde Inscheine un annere alde Bauereimaschiene gewwe. Es hot aa viel gude Essmeeglichkeete gewwe. Selles Yaahr hot es aa en Flohmarick gewwe. Die Verkaafere hen so viel verschiddliche Sache…es waar hatt zu glaawe.

Viel vun de Tracktors! As dihr sehne kennt, es hot viel gewwe.

En Farmall H mit enem Blug.

En alde Dampinschein hatt am schaffe!

Mir sin darrich die Tracktors geloffe un hen mit viel Leit gschwetzt. Mir hen nix kaaft…yuscht glee bissel zu esse. Ich hab gsehne as im Schpotyaahr waerr es en annere Schau gewwe. Vielleicht hen mei Bloglesers Inderesse dohie in die Barriye zu faahre!

Es hot aa gude Ess-sache gewwe! Mmmm Drechter Kuche!

Gebt es aa soddiche Schaue bei eich?

Do iss en Audio Klip: Wann die Weibsleit gschefdich sin, kenne die Mannsleit schpiele!

Published in: on 02/06/2012 at 17:56  Leave a Comment