Gedechtnisdaag iss widder rumkumme!

Guder Daag Blog Leser! Well ‘sis widder Moi un sell mehnt as es widder Gedechtnisdaag Wochend iss. Ich gleich seller Feierdaag. Ich finn es arrig wichdig. Ya, fer viel Leit iss Gedechtnisdaag der Aafang fer der Summer, awwer mir wisse as sell iss net der Grund fer der Feierdaag.

Gedechtnisdaag iss der Daag as mir do in Amerikaa denke un errinere uff all die Soldaade die in Griege gschtarewe sin. Fer mei Familye iss der Daag abadich wichdig. Meinre Grossmudder ihr Bruder waar im Zwette Welt Grieg in Frankreich erschosse un iss datt gschtarewe. Sell waar in Tschuun im Yaahr 1944. Er waar in St. Lo, Frankreich begraabt awwer schpeeder hot mei Familye ihn zerickgefloge un nau iss er in unser Karrichhof begraabt….wu er gheert.

Meinre Grossmudder ihr Bruder sei Graab. Mer kann yuscht glee bissel vun unsre Blumme sehne.

Alle Yaahr ich un mei Grosseldre faahre zu all die Karrichhef wu mei Familye begraabt sin. Datt schtelle mir neie Blume uff die Graawe. Normally kaafe mir rode Gerranne. Die gucke so schee aus. Sell iss yuscht unser Tradition. Selles Yaahr waar wie all die annere. Samschdaag Owed sin mir um Barricks Kaunty gfaahre um die Karrichhef zu bsuche.

Uff em Sunndaag sin mir in die Karrich gange un dann schpeeder hemmer en Picknick ghatt. Ich hoff as all vun mei Blog Lesers glee bissel Zeit uff em Wochend genumme hen un hen gedenkt uff alles was unsere Soldaate fer uns gemacht hen. Ich weess as ich fer schurr hab.

Bis naegschde Woch, bleibt Gsund un schreibt mich eppes! Ich glaab as der Summer warricklich do iss….heit waar es 92 Graad bei mir…un arrig schmodig! Oh yea!

Do iss en Audio Klip: Gedechtnisdaag iss widder rumkumme!

Published in: on 28/05/2012 at 14:59  Leave a Comment  

Glee bissel Deitsch in alde Virginia!

Guder Daag Blog Leser! Well do bin ich widder am schreiwe. Ich bin graad zerick kumme vun en Wochend in alde Virginia. Mei beschde Freind vun meinre Kindheit iss geschder gheiert. Er schafft un wuhnt nau in Virginia un sei Fraa iss en gude Virginia Maedel.

Die Hochzich waar uff die Jasmine Plantation baut 20 Minudde Oscht vun Richmond. Mei Freind, der Bradley, hot mich gfroogt eb ich en Breidichammann sei waerr, nadierlich hawwich YA gsaat! Die Hoschzich waar draussen un es Wedder waar arrig schee. Die Sunn hot gscheint un es waar net zu warm.

Bevor selle Wochend hot der Bradley mich aagerufe un hot mich en Froog bschtellt. Er hot gewollt zu wisse eb ich en Gedicht uff Deitsch fer die Hochzich lese kennt. Sei Familie waare alle Deitsche vun Barricks Kaunty. Unglicklich hot er unser Schprooch net gelannt. Awwer er un sei Braut, die Stephanie, hen gewollt eppes vun seinre Familie ihr Kuldur in die Hochzich hawwe. Nadierlich hawwich “fer schurr” gsaat.

Ich am Deitsch lese.

Do iss die Gedicht as ich gelese hab:

Liewe

Oh glicklich, wer en Hatz gfunne hot,

as yuscht in Liewe denkt un sinnt

un, mit re Liewe recht verbunne,

sei scheenes Lewe aerscht beginnt.

Wu liewe sich zwee Hatzen een,

yuscht eens zu sei in Luscht un Leed,

da musscht re Himmel sei Sunn schein’

un glaar lache yedre Zeit.

Ich hab selle Gedicht in de Mitt vun re Hochzich gelese un ich hab gsehne as dem Bradley sei Mudder un Grossmudder  am brille waare. Nooch re Hochzich sin viel Leit zu mir kumme un hen mich bedankt! Ich waar glee bissel iwwerfalle vun sell. Nooch re Hochzich waar der Reception…un was fer en Reception waar es! Es Esse waar arrig appeditlich, mir hen arrig gude Bier gedrunke un nadierlich hemmer viel gedanzt. Der DJ waar gut un luschdig. Er hot viel gude Myusick gschpielt. In der End waar alles perfekt. Es kennte net besser sei…ehrlich.

Die Braut un der Breidicham.

Nau bin ich widder in Pennsylvaania. Ich vermiss schunn die Siesstee…die iss so gut!

Bis naegschde Woch, macht’s gut un schreib mich eppes!

Do iss en Audio Klip: Glee bissel Deitsch in alde Virginia!

Published in: on 20/05/2012 at 17:43  Leave a Comment  

Was waerr rauskumme?

Guder Daag Blog Leser! Heit waar en wichdiger Daag fer uns die Deitsch schwetze, fer die die Deitsch lanne un fer all die Leit die in die Zukunft unsre Schprooch lanne wolle. Heit waar en Versammling uff re Pennsylvaanisch Deitsch Kuldur Center in Kutzeschteddel. Die Versammling waar fer yunge Leit (unnich 45 Yaahre alt) die die Schprooch behalde wolle. Baut 20 Leit sin zammekumme um neie Ideas iwwerzuschwetze.

Mir hen in re Schulhaus gedroffe. Sell iss en gude Blatz fer Ideas iwwerzuschwetze.

Es waar arrig schee so viele yunge Leit zu dreffe un mit wem ich Deitsch schwetze kennte. Ee paar davun hawwich schunn frieher kennengelannt, awwer ich hab endlich ee paar neie Leit gedroffe, die ich yuscht im Internet kenne! Sell waar eppes, endlich en Gsicht un Schtimm mit en Naame zu hawwe.

Der Bob Reynolds hot aagfange un hot uns bewillkummt.

Die Versammling hot baut 2 Schtunn ausgedauert. Mir hen iwwer viele gude Ideas gschwetzt. Der Michael Werner hot uns verzaehlt wie die Leit im Alsace ihre Schprooch behalde. Er hot gedenkt as mir do in Pennsylvaania aa ee paar vun selle Ideas do aa duhe kenne. Am End hemmer drei Ideas as Ziele gewaehlt:

1. Mir wolle Schtrossschilder in zwee Schprooche haawe. Mir hen gedenkt as mit der College datt in Kutzeschteddel, as mir solle datt aafange. En Mann waar datt vun re Schteddel un er hot gsaat as er waerr die Idea an die Schteddellraad bringe. Mir hen gedenkt as es arrig wichdig iss die Schprooch meh in die Gsellschaft zu bringe. Wann meh Leit sehne unsre Schprooch, waerre sie meh Inderesse hawwe.

2. Fer die Leit die Deitsch lanne wolle, hemmer gewaehlt mit Online Schprooch Klaesse zu mache. Viel Leit hen gsaat as es gebt so viel Videos uff YouTube fer annere Schprooche zu lanne, ferwas gebt es ken fer Deitsch? Mir denke as es net so deier sei waerr, un sie kenne zimmlich schtarrick gemacht sei. Ich glaab as ich un en Freind vun mir waerre damit aafange. Hoffetlich schunn selle Summer.

3. Ee paar Leit hen gsaat as es waerre schee vielleicht en Summer Laager fer Deitschschtudente zu hawwe. Ich find selle Idea arrig gut. Sie kenne ee Wochend odder ee Woch ausdauere. Die Leit die kumme waerr glee bissel Immersion in re Schprooch hawwe. Es kann en Laager fer Aafanger gewwe un es kann en Laager fer Leit die die Schprooch schunn schwetze kenne gewwe. Der Ben Rader hot gsaat as sei Familye en scheene Laager in die Poconos hen un mir kenne uns datt dreffe. Mir misse meh Arewet duh fer selle Idea in die Wirklichkeet zu bringe, awwer ich denk sell waerr eppes schee.

Der Kevin Sterner hot viele gude Ideas ghatt!

Baut zwelf Uhr sin mir drausse gange fer en Drupppickder zu mache. Dann sin mir all heemgfaahre. Sell waar en arrig guder Daag fer uns un abbadich fer unsre Schprooch. Ich kann ehrlich saage as es lebt un es hot en Zukunft mit re Hilf vun viele Leit!

Do is en Audio Klip: Was waerr rauskumme?

Published in: on 12/05/2012 at 20:18  Comments (6)  

Welschhaahne yaage!

Guder Daag Blog Leser! As viel vun eich schunn wisst, bin ich en Yaeger. Ich hab mei ganzes Lewe geyaagt. Mei Daadi, Grossdaadi un mei Bruder sin aa Yaeger. Selle Wochend sin mir widder in der Busch gange um eppes zu schiesse.

Do in Pennsylvaania kann mer zwee Mol im Yaahr Welschhinkel schiesse: im Friehyaahr un im Schpotyaahr. Im Friehyaahr darf mer yuscht en Welschhaahne schiesse, awwer im Schpotyaahr kann mer entwedder en Haahn odder en Hinkel schiesse. Welschhaahne sin abbadich schwer zu yaage weil sie so verdammt gscheit sin! Sie hen arrig gute Aage, die all die Farewe sehne kenne. Deswege muss mer Camouflage draage. Haasch un annere Gediere kenne viele Farewe net sehe, so ‘sis ok wann mer yuscht Arensch draage, awwer sell geht fer schurr net mit Welschhinkel.

Mei Bruder, allsfatt ready!

Im Friehyaahr sin die Welschhaahne in re Laafzeit. Die Haahne versuche die Hinkel zu gewinne, so sie hen glee bissel meh Mut. Was en Yaeger im Friehyaahr duhe muss, iss mer muss der Haahne neirufe. Ya, mer hockt im Busch, in Camouflage un dann muss mer wie en Welschhaahn schpiele. Mei Bruder iss arrig gut mit sell! As er en Kind waar, hemmer oft gsaat: “Aye, Stevie, du bischt en Welschhaahn!”

Mei Daadi bei yaage. Ich glaab as er am schlofe iss.

Geschder, sin ich, mei Bruder un mei Daadi yaage gange. Mir sin schunn um 4 Uhr Wacker! Hemmer glee bissel Kaffie gedrunke un dann sin mir in die Busch gange. Mei Bruder hot en Decoy kaaft. Er hot gedenkt as wann en annere Welschhaahn die Decoy seht, waerr er fer schurr zu uns schpringe um zu wunnerfitze. Well, fer die aerschde Schtunn waar alles schtill. Ich glaab as die Welschhinkel waare nooch im Nescht. As die Sunn uffkumme iss, hot die ganze Busch uffgeweckt. Die Veggel waare am singe, die Eechhaase waare am rumlaafe…alles waar so blessierlich.

Der Busch – frieh am Mariye.

Mei Bruder hot aagfange zu rufe…awwer es hot ken Antwaat gewwe. Er hot baut 15 Minudde gewarde un dann hot er widder browiert. “Hey, ich hab eppes gheert!” hot mei Daadi gsaat. Der Stevie hot widder gerufe. “Gobbel gobbel” hen uns gheert! Bletzlich waar alles uffgeregt! Mei Bruder hot gerufe un der Welschhaahn hot geantwaddet. Yedes Mol hot es gscheint as der Welschhaahn dichter zu uns kumme iss. “Sei ready!” hot mei Bruder gsaat. Ich un mei Daadi waare fer schurr ready. Mir en gewollt er zu schiesse. Hie un her hot mei Bruder un seller Welschhaahn gschwetzt. Sell hot baut 15 bis 20 Minudde ausgedauert. Awwer in die End iss er nett zu uns kumme! Mir hen ihn net gsehne, yuscht gheert. So, mir hen ken Welschhahne zu esse un mir hen aa unsere Flinte net gschosse. So geht es mannichmol bei Yaage! Ich bin am yaage sidder ich 12 Yaahre alt sei…un immernooch hab ich ken Welschhaahne gschosse. Die sin warricklich en Challenge.

Mei Bruder un sei Decoy.

Ich un mei Bruder nooch unsere Zeit im Busch.

Vielleicht waerr es anners im Schpotyaahr sei. Hett eenich-epper vun mei Leser en wilde Welschhaahne gschosse?

Do is en Audio Klip: Welschhaahne yaage!

Published in: on 06/05/2012 at 06:06  Leave a Comment