Ich waar net die Aschepuddel!

Guder Daag Blog Leser! Well nau sin mir in re Faschtzeit. Ya, Dinschdaag waar Faschnacht. Uff em Samschdaag hawwich schunn mei Faasnachtkuchli gemacht. Dann hawwich sie die naegschde drei Daag arrig oft gesse. Die waare so appeditlich. Dann is der Aschermittwoch kumme. Nadierlich bin ich in re Karrich gange um mei Asche zu griege. Ich find em Aschermittwoch sei Gottesdinscht arrig beweglich. Wann der Paare saagt “Errinere, as du vun Schtaab kumme bischt, un in Schtaab witt du zerickgeh” muss ich viel uff selle Wadde denke. As en Soh vun re Familye vun Bauere find ich selle Wadde meenigvoll. Nau misse mir 40 Daage waarde bis Oschder. Normally, Leit solle eppes abgewwe darrich die Faschtzeit. Ich un mei Fraa hen ausgemacht, ken Rinsfleesch zu esse. Ich glaab sell waerd net so hart sei.

Awwer Aschermittwoch hot en annere alde deitsche Tradition: die Aschepuddel. Kennt dihr sell? Tradition saagt as der Paerson der am letsch aus em Bett uff em Aschermittwoch kummt iss die Aschepuddel. Die Aschepuddel iss net en gude Ding zu sei. Tradition saagt as die Aschepuddel alle die Hausarewet fer der Daag duhe muss. Un die annere Familyeleit kenne nadierlich der ganze Daag Gschpass mit re Aschepuddel hawwe. In de Alde Zeite wann die Aschepuddel en Kind waar, hen die Aschepuddel aa die Arewet an die Schul duhe muss. Zum Beischpiel hot die Aschepuddel gemisst die Asche rauszunemme.

En annere alde Tradition fer Aschermittwoch waar as der Mann vun em Haus all die Asche zammegrickt hot un dann hot er all die Kieh un annere Gediere mit de Asche aagschpritz. Tradition saagt as wann er sell geduh hot, waerre die Gediere ken Leis griege.

Die zwee Traditions sin schier gaar vergesse. Sie sin mit re Zeit un Yaahre gschtwarewe. Awwer, ich muss saage as ich der aerschde aus em Nescht uff em Aschermittwoch waar. Sell meehnt as mei Fraa die Aschepuddel waar. Un nadierlich hawwich sie sell gsaat un hot sie gemacht all die Hausarewet zu duh. Ich glaab sie waar net so froh fer sell awwer mer muss die Traditions behalde…Gell?

Do is en Audio Klip: Ich waar net die Aschepuddel!

Published in: on 25/02/2012 at 13:57  Comments (4)  

En Bresident aus Pennsylvaania!

Guder Daag Blog Leser! Well, letschde Woch hawwich iwwer der Bresident Lincoln gschriwwe. Mariye is de Bresidents ihr Daag so ich hab gedenk as ich en Blog Poscht iwwer der eenigschde Bresident vun Pennsylvaania, der James Buchanan, schreiwe will.

Der James waar in en Blockhaus in Cove Gap, Franklin Kaunty uff em 23 Abrill, 1791 gebore. Sei Daadi waar en Gschaftsmann un sei Eldre waare Scots-Irish gewest. Sei Daadi is vun Ireland in 1783 nooch Pennsylvaania ausgewandert. Der James waar der zwett vun elf Kinner, drei davun sin as Boppli gschtarewe. Sei Gebottsblatz is nau en Schtaat Park in Franklin Kaunty. In 1797, iss sei Famiye noch Mercersburg gezoge. Der James iss dann nooch em Dickinson College in Carlisle gange wu er Recht gelannt hot. Nooch Dickinson iss er nooch Lengeschder gange un waar en Rechtsmann.

Der James Buchanan as Bresident.

Er hot as Representative un Senator vun Pennsylvaania in Waschington DC gschafft. Er waar aa en Minister zu England fer Bresident Franklin Pierce un der Minister zu Russland fer Bresident Andrew Jackson. In 1856, hen die Demokraate der Buchanan fer Bresident uffgnumme. Er hot die Lektion gewunne. Er waar der eenigschde Bresident der net gheiert waar. Frieher in sei Lewe waar er mit der Anne Coleman engaged, awwer sie iss yung gschtarewe. Wann er Bresident waar, hot sei Schwester die Role vun “re Aerschde Fraa” gnumme.

Sei Bresidential Yaahre waare vun 1857-1860. Darrich sei Bresidential Zeit iss viel bassiert. Der Dred Scott Case: en wichdige Supreme Court Haerrsching fer Schklaaferei, Bloody Kansas: en gleene Grieg in Kansas iwwer Schklaaferei, die Economic Panic vun 1857 un am End, der Aagriff uff Fort Sumter un der Aafang vun em Birgergrieg. Aa darrich sei Zeit in em Weiss Haus sin drei neie Schtaate in em Land kumme: Minnesota, Oregon un Kansas.

Dem Buchanan sei Denkmol in Pennsylvaania.

Der James Buchanan iss uff em aerschde Tschunn in 1868 gschtarewe. Es gebt en Denkmol in Waschington DC un en Schtaat Park in Pennsylvaania fer der Bresident. Aa, kammer sei Haus: Wheatland in Lengschder heitzudaage bsuche. Fer viel Gschichtleit, iss der Buchanan een vun der arigschde Bresidents alle Zeit. Viel Leit saage as ‘sis sei Schuld as der Birgergrieg bassiert iss. Ich weess net eb sell Recht iss odder net. Ich weess as unser Land in arrig viel Druwel waar wann er nooch Waschington kumme iss. Zum Glick iss der Lincoln graad hinnich em Buchanan in em Weiss Haus kumme! Awwer, es macht nix was die Leit saage, ich bin schtolz as en Bu vun Pennsylvaania en Bresident waar. Vielleicht in em Zukunft waerre mir nooch en annere hawwe. Was denkt eich?

Dem Buchanan sei Denkmol in Waschington DC.

Do is en Audio Klip: En Bresident aus Pennsylvaania!

Published in: on 19/02/2012 at 14:25  Leave a Comment  

En grosser Amerikaaner hot en Gebottsdaag!

Guder Daag Blog Leser! Well nau iss es schunn Hanning. Der Grundsau hot gsaat as mir sex Woch meh vun em Winder hawwe waerre. Ich glaab sell is net so schlimm, seller Winder waar warricklich ken Winder. Mir hen yuscht baut 2 Inches Schnee ghatt un die Temperatures sin arrig warm (fer Winder). Mol sehne was schpeeder kummt. Vielleicht greige mir en Oschderschnee?

Awwer selle Woch will ich net iwwer es Wedder schreiwe. Mariye, der 12. Hanning iss en Gebottsdaag fer en grosse Amerikaaner: der 16. Bresident, der Abraham Lincoln.  As viel vun eich schunn wisst, der Lincoln waar en arriger wichdiger Bresident. Er waar in em Weiss Haus darrich em Birgergrieg, er hot die Schklaafe freigelosse, hot der aerschde Schtick Land weckgeschtellt fer der aerschde National Park, un er hot vielleicht die beschde Red aller Zeit gschriwwe: Die Gettysburg Address.

Der Lincoln in en Pickder vun em Yaahr 1860.

Der Abe waar in Kentucky uff em 12 Hanning im Yaahr 1809 gebore. Sei Familye waar zimlich aarm, sie hen in en Blockhaus gewuhnt. Er hot sich selwert gelannt wie mer lest un schpeeder hot er gschafft as en Rechtsmann. Er hot sei Fraa, die Mary Todd, gheiert un sie hen in Springfield, Illinois gewuhnt. Im Yaahr 1846 waar er fer es House of Representatives gewaehlt.

Vun Aafang aa waar der Lincoln gege die Idea vun Schklaaferei. Im Yaahr 1860 iss er fer Bresident geloffe. Er waar mit der Republikaaner Party. Die waar en neie Bolitikal Party un sie hen gefochde fer es End zu Schklaaferei zu bringe. Zum Glick hot der Lincoln die Lecktion gewunne. Im Abrill, 1861, iss Sudd-Carolina un viel annere suddliche Schtaate vun Amerikaa rausgezogge. Sell waar der Aafang vun em Birgergrieg.

Der Grieg waar lang un deier, deier vun Geld un aa vun Lewe. Meh as 600,000 Menner sin entwede gschtarewe odder verletzt darrich der Grieg. Endlich im 1865 iss der Grieg vorbei un der Lincoln un die naddliche Schtaate sin gewunne. Awwer die Feschtzeit iss net lang gewest. Uff em 15. Abrill 1865 iss der Lincoln in Fords Theater gschosse. Er iss am naegschde Daag gschtarewe.

Der Lincoln waar epper der ich glaab unser Land nimmi sehne waerd. Er waar gscheit, mitleidich, un er hot die Leit verschtanne. Hallicher 203 Gebottsdaag Bresident Lincoln!

Do is en Audio Klip: En grosse Amerikaaner hot en Gebottsdaag!

Published in: on 11/02/2012 at 08:48  Comments (1)  

En grosse Neeigkeit un en grosse Unnernemmung!

Guder Daag Blog Leser! Well ich hab eppes gross mit eich heit abzudeele: Ich un mei Fraa erwaarte unser aerschdes Kind in Aaguscht! Ya, ich waerr en Daadi sei! Aye yummer, sell is nau eppes un ich hoff as ich ready bin. Ich glaab so, awwer ich weess aa as en Kind unser Lewe vollig verennere waerrd!

Ich bin schtolz zu saage as mir ausgemacht hen es Kind mit Englisch un Deitsch uffzubringe. Ich glaab sell waerrd fer schurr hatt sei, weil wu mir wuhne, gebt es fast ken Deitschschwetzer. So, es Kind waerrd es Schprooch yuscht mit mir schwetze un yuuse. Mei Fraa kann viel Deitsch verschtehe awwer sie kann es net so gut schwetze. Nadierlich kann mei Familye Deitsch mit em Kind schwetze, awwer sie wuhne 3 Schtunn vun uns weck.

Was mir gedenkt hen, is as mir brauche viele Deitsche Dinge in em Haus zu hawwe. Es aerschde Gedenk: mir brauche Kinnerbicher! Well, as dihr schunn weesst, gebt es net so viele Kinnerbicher uff Deitsch. So, nau bin ich arrig busy. Ich bin nau en grosse Kinnerbicher Iwwersetzer! Mei Fraa hot viel Kinnerbicher grickt un nau hock ich mich in re Kich un browier all die Bicher uff Deitsch iwwerzusetze. Bis nau hawwich yuscht 2 Bicher geduh. Die naegschde fimf Bicher sin vun dem Docktor Seuss gschriwwe. Ich glaab sie waerre arrig hatt sei iwwerzusetze. Ich glaab ich muss ee paar neie Deitsche Wadde mache!

Datt is der beliebte "Die Katz in dem Hut" vun dem Dr. Seuss!

So nau dihr weesst was ich busy am schaffe duh! Ich muss ehrlich saage, as ich viel Gschpass hab wann ich mit de Bicher arewe.

Do is en Audio Klip: En grosse Neeigkeit un en grosse Unnernemmung!

Published in: on 03/02/2012 at 08:33  Leave a Comment