Supp Owed!

Guder Daag Blog Leser!  Selle Woch will ich eppes schreiwe iwwer en yaehrliches Fescht as mei guder Freind hot: Supp Owed. Alle Yaahr uff en Samschdaag in Oktower hot mei guder Freind Supp Owed bei ihm zu Heem. Awwer was is sell? Sell is yuscht was der Naame saagt: en Owed mit Supp. Wann mer zu Supp Owed eigelaade is, muss mer en Crock Pot voll vun Supp mitbringe.

Datt sin ee paar Crock Pots voll mit gude Supp!

Wann mir alle zamme sin hemmer viele viele verschiddliche Types vun Supp. Selles Yaahr hawwich Sauergraut Supp gemacht…oh sell is yo appeditlich. Dazu mei Supp hemmer aa Grummbier un Kaess Supp, Chili, Gaardesach mit Rinsfleesch Supp, Schunkefleesch un Kaess Supp, un Hinkel un Welschkann mit Nudel Supp ghatt. Mei Freind hot aa ee paar Hot Dogs uff em Grill gemacht un es hot ee paar Leeb frisches Brot gewwe. Wann alles faddig un ready is, dann kann mer Supp esse. Usually is es zimmlich kiehl fer Supp Owed, un die heese Supp schmeckt arrig gut gege es kiehle Wedder. Selles Yaahr waar es Wedder net normal. Es waar zimmlich waarm, awwer die Supp hot so wie so gut gschmackt.

Mir esse nix yuscht Supp, normally gebt es aa Schpiele dabei. Geschder hemmer viel Quoits gschpielt. As viel vun eich schunn weescht, is Quoits en gut bekannte Schpiel fer uns Deitsche. Nadierlich hawwich viel Schpiele gewunne! Was kann ich saage, ich hab en guder Partner ghatt.

Do sin mir bei Quoits schpiele. Ich bin am schmeise.

Ich gleich Supp Owed viel. Es gebt allsfat gude Supp, Quoits, Bier un annere gude Drinke un en gude Zeit mit Freinde. Was is besser als sell?

Do is en Audio Klip: Supp Owed

Published in: on 09/10/2011 at 13:54  Comments (4)  

The URI to TrackBack this entry is: https://deitscheblog.wordpress.com/2011/10/09/supp-owed/trackback/

RSS feed for comments on this post.

4 CommentsLeave a comment

  1. Nu bin ich hungrig! Wann du Zeit hoscht, iss es meglig, ass du em Sauergraut Supp sei Recipe do poschte kannscht? Viele Danke!

  2. Ed,

    Gross dank fer dei Poscht. Ya, ich waerr die Recipe bald poschte.

    -Der Doug

  3. Mer schpiele zamme Kubb. Quoits kennich net awwe Kubb, nau doh iss en Schpiel.

    Mer miss 5 Kubb iwwekippe mitme Baton unn naegscht unn Keenich iwwekippe.

    Total Bleddsinn wie Huffeise awwe fiel Gschpass fer duh. http://de.wikipedia.org/wiki/Kubb

    Die Aamisch die mache scheeni Kubbschbiele aus Esche unn Eiche.
    Ein Kubbspiel wird traditionell selbst gebaut, ist aber auch käuflich erhältlich. Es besteht aus folgenden Figuren aus Holz:
    1 König ca. 9 × 9 × 30 cm
    10 Kubbs ca. 7 × 7 × 15 cm
    6 Wurfhölzer ca. 4,4 × 30 cm
    4 Eckstäbe ca. 2 × 2 × 30 cm
    Aufgrund der hohen Beanspruchung sollte dabei Hartholz verwendet werden.

    Macht fiel Gschpass. Am beschte iss ass mer braacht fiel ‘Zielwasser’ (‘s heest annerseits ‘Bier’) fer’s zer duh. ‘S iss ee Schpiel fer die Erwaxene unn net fer die Hochschiele awwe.

    Arrich populaer imme alde Lann, unn Deenemark, Norwegian, usw.

    der bil aus nattoscht NM

  4. Bil,

    Gross dank fer dei Poscht. Selles Schpiel is nei zu mir. Ich hab es nimmi vorher gheert. Wu hoscht du es gelannt? Hoscht du es schunn gschpielt? Sell guckt arrig Gschpassig aus…nau will ich aa schpiele!

    Die Daage sin nau kiehler un katzer do in Pennsylvaania. Die Bledder sin aa am falle. Wie is es bei dir in Nei Mexiko?

    -Der Doug


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: