‘Sis widder Schpotyaahr!

Guder Daag Blog Leser! Well, die Daage sin katzer, die Temperatures sin kiehler un die Beem hen meh Farewe. ‘Sis muss widder Schpotyaahr sei. Ya, fer schurr es is. Officially, es Schpotyaahr is geschder um fimf Uhr in re Mariye do in Nadd-Amerikaa aagfange. Aye, yummer, wu is der Summer gange?

So nau as es Schpotyaahr is, hawwich viel zu duh. Ich muss alles ready mache fer der Winder. Mei Fraa un ich wolle es Haus butze. Mir misse all die Summer Dreck wegduh. Die Fenschdere misse gebutzt sei un die Mickefenschdere misse rausgnumme sei. Mir misse die Winder Qwilts rausbringe un uff de Betts lege. Ich muss aa mei Holzoffe im Keller butze un noochzaehle eb alles ready is fer neie Feiers. Sell is yuscht was mir ins Haus mache misse. Nadierlich gebt es viel drauss aa zu duh.

Heit will ich mei Gaarde ready mache. Ich will all die alde dode Gaardesacheblanze rausnemme un ee Paar Umgraute rausroppe. Zum Glick sin all mei Bledder nooch grien. Sell dauert glee bissel Zeit bis all die Bledder rot, gehl un arange sin. Dann misse mir all die Bledder wegreche. Wann all die Bledder nunnergfalle sin, dann kann ich mei Greewer rausbutze. Ich muss aa all mei Summer Blumme wegschmeise. Awwer es Schpotyaahr bringt neie Blumme wie Chrysanthemums, odder mer kann yuscht ‘Mums’ saage. Die sin so schee un kumme in so viele verschiddliche Farewe.

Was misst eich all duhe fer es Schpotyaahr? Gleicht eich es Schpotyaahr?

Do is en Audio Klip: ‘Sis widder Schpotyaahr!

Published in: on 24/09/2011 at 11:40  Comments (3)  

Grummbiere rausroppe!

Guder Daag Blog Leser! Well selles Wochend bin ich widder heem gfaahre um mei Familye mit eppes wichdig zu helfe. Alle Yaahr in September is es die Zeit unsere Grummbiere rauszuroppe.

Alle Yaahr in Abril blanst mei Daadi iwwer 100 Pounds Grummbiere in unsre Gaarde. Grummbiere sin leicht zu hawwe. Mer blanst sie im Friehyaahr un dann kann mer sie bis Schpotyaahr vergesse . Ya, nadierlich muss mer die Umgraut rausroppe un vielleicht ee paar Grummbierekeffer dodmache, awwer mer muss really net zu viel duh.

Dann kummt es Schpotyaahr un die Zeit um die Grummbiere zu aernde. Wie weess mer as sie ready sin? Wann all die Grummbiereschtengle gschtarewe sin, sin sie ready rauszuroppe. Mer kann sie eifach mit en Grummbieregawwel rausschteche awwer wann mer viel Grummbiere geblanst hot, nemmt sell zu lang. Mei Familye yusst en Traktor un en Grummbiereblug. Unser Blug is arrig alt, ich weess net wie alt er is awwer verdammtsei alt. Alt er is, awwer es geht immernooch.

Ich uff em Traktor un mei Daadi hinnich em Blug.

Normally, faahr ich der Traktor un mei Daadi geht hinnich der Blug. As ich en Kind waar, hab ich gemisst yuscht datt zu schteh un gucke bis die Grummbiere rausgeblugt waare. Awwer nau bin ich der Faahrer. Nooch der Traktor un Blug darrich es Gaarde gange sin, is es die Zeit alle die Grummbiere zu finne. Mer muss der Grund rumkicke um all die Grummbiere zu finne. Dann losse mir sie dattliege um abzudrickle. Dann muss mer all die Grummbiere ufflese.

Mir sin am blugge!

Mei Grossdaadi un mei Bruder gucke fer die Grummbiere.

Wann all die Grummbiere uffgelese sin, gehne sie in em Keller fer es Winder. Nau hot mer Grummbiere zu esse. Selles Yaahr hen unsere Grummbiere net so gut geduh. Der Summer waar zu heess un drucke, un dann hemmer en Hurrikane grickt un es waar zu nass. Geschder wann mir die Grummbiere rausgeroppt hen, waar es arrig schlimm. Der Daadi hot sex Roi geblanst un mir hen yuscht baut vier Buschel grickt! Normally griege mir 2o odder 30 Buschel! Ya, selles Yaahr waar net so gut. Awwer so geht es uff en Bauerei, ‘sis allsfatt en Gamble. Hoffetlich waerd naegschdes Yaahr besser!

Do is en Audio Klip: Grummbiere rausroppe!

Published in: on 18/09/2011 at 09:04  Comments (2)  

Es gebt Hochwasser!

Guder Daag Blog Leser! Well, selles Woch waar viel los do in Pennsylvaania. Vun Mundaag bis Dunnerschdaag hot es arrig viel gereggert. Der Tropical Schtaerm Lee is vun Sudd nooch Nadd-oscht kumme un is iwwer Pennsylvaania gebliwwe. Wann alles vorbei waar hemmer do bei mir baut 10 Inches ghatt awwer nadd-oscht vun mir in der Wyoming Daal hot es meh as 15 Inches ghatt! Ya, sell is viel viel Wasser.

Hochwasser in Herhseypark!

Rege is ee Ding, awwer Hochwasser is yo schlimmer. Der Susquehanna Rewwer fliesst fer 450 Meils darrich Nei Yarrick, Pennsylvaania, un Maryland bis zum Chesapeake Bay. Der Susquehanna is der greeschte Rewwer Oscht vun em Mississippi. Es kann meh as 1 Meil breet sei. Awwer was schlimm is, is as der Rewwer zimmlich eefeldich is. In manche Bletze is es yuscht ee paar Fuus dief! So wammer viel Rege grick, gebt es Hochwasser arrig schnell.

Der National Guard hen gemisst Leit mit em Boot zu befreie.

Es gebt viel gross Schtedde die newwe der Rewwer sin. Scranton, Wilkes-Barre, Bloomsburg, Williamsport, Danville, un Harrisburg sin all graad newwe der Rewwer. Viele vun selle Schtedde nau hen Levies um die Schtedde zu behiede sie vun em Hochwasser. Awwer selle Woch hot es so viel Rege gewwe, as es Rewwer heecher as die Levies waar. Viele Schtedde, gross un glee sin iwwerschwemmt. Viel Leit hen alles verlore, ihr Haus, ihre Maschine, ihre Gleeding, ihr Hausrod…’sis warricklich arrig.

Sell waar en Kaffihaus in Wescht Pittston.

Es Hochwasser waar so hoch un schtarrick as viele Bricke un Schtrosse weckgewescht sin. Mir wisse nooch net wie viel alles koschdet waerd um alles widder richdig zu mache. Ich glaab es waerrd Millyonen vun Millyonen Dollars koschde. Sell is net es aerschde Mol as der Susquehanna iwwerschwemmt waar. Zerick in 1972 hemmer Hurricane Agnus ghatt…sell waar aa arrig schlimm weil viele Schtedde nooch nicht ken Levies ghatt hen. Die Wetterleit hen gsaat as mir meh Rege vun selle Schtaerm grickt hen as vun em Agnus!

Mei Gedenke un Gebete sin mit de Leit die vum em Hochwasser aageriehrt waar.

Do is en Audio Klip: Es gebt Hochwasser!

Published in: on 10/09/2011 at 12:57  Leave a Comment  

Die fimfte Yaahreszeit!

Guder Daag Blog Leser! Well selle Wochend is die fimfte Yaahreszeit do in Pennsylvaania aagfange. Hett eich schunn gewisst as es fimfe Yaahreszeite do in Pennsylvaania gebt? Ya, nadierlich hemmer die usual vier Yaahreszeite: Friehyaahr, Summer, Schpotyaahr un Winder. Awwer dann hemmer die fimfte: Penn State Football Season.

Sell is der Nittany Lion bei em Schpiel.

Ya, warricklich, die Pennsylvania State University Football Manschaft un ihre Season is en echte Yaahreszeit do in Pennsylvaania. Fer viele Leit die naegschte vier Munete meehnt uff em Samschdaag, vor em Guckbax zu hocke un die Schpiele aazugucke. Aa fer viel Leit is es wichdiger datt in em Beaver Schtadium zu sei.

Fer die Leit die nix vun em Penn State Football wisse, muss ich es verzaehle. Selles Yaahr is es 125 Yaahr fer Penn State Football. As en University is ihr Rekord: 819 Siege, 356 Verlosse un 43 Schpiele die gleich waar. Fer die letschte 45 Yaahre hen sie der gleiche Coach ghatt: der Joe Paterno. Der is en echte Cult Figure un en echte Held zu viel Leit. Der Joe is 84 Yaahre alt awwer alle Schpiel is er datt uff em Sideline mit de Schpieler. Er hot am menschde Siege in College Football mit 402!

Sell is der Joe Paterno, awwer fer viel Leit yuscht der JoePa.

Die Nittany Lions schpiele ihre Schpiele in Beaver Schtadium. Beaver Schtadium is gross. Es is der zwett gressde Stadium in Amerikaa. Uff em Babier saagt es as es Schtadium kann 106,000 Leit hawwe, awwer ich weess as mit Schtehblatz kann baut 110,000 Leit reigepackt sei.

De Nittany Lions ihr Haus: der Beaver Schtadium! Arrig gross un en unglaabliche Schtimme!

Selles Yaahr hot die Nittany Lions 12 Schpiele, siwwe davun sin da heem. Normally, die Nittany Lions sin so gut as sie uff em Nei Yaahr en Bowl Schpiel hawwe. Ich glaab selles Yaahr waerd aa so sei. Wann dihr do in Pennsylvaania in Schpotyaahr seid, dihr misst en Schpiel entwedder im Guckbax sehne odder was am beschde is; Lewendig in em Schtadium!

Do is en Audio Klip: Die fimfte Yaahreszeit!

Published in: on 04/09/2011 at 15:18  Leave a Comment