Was is die Zukumft?

Guder Daag Blog Leser! Selle Woch will ich yuscht eppes katz schreiwe iwwer was zu mir vor ee paar Woch bassiert is. Wu ich wuhn in Mitte-Pennsylvaania gebt es viel Amische. Un die Amische sin am duhe was die Amische am beschte duhe kenne: bauere un Handwarrick schaffe. Es gebt viele gleene Amisch Schtors un Bisnesses do bei mir.

Vor ee paar Woch sin mei Fraa un ich zu en Amische Schtor die Hausrod verkaaft gange. Mir wolle zwee neie Schtiel fer unsre Kich kaafe. Mir sin reigange un hen all die scheene Schtiel aageguckt. Alles waar so gut vun Hand gemacht. Mir hen die Schtyle vun Schtuhl gfunne un sin zu em Besitzer gange um sie zu addere. Ich hab nadierlich graad uffs Deitsch gschwetz. Sell hot ihm verschtaunt…Was? Du kannscht Deitsch schwetze? Wie? Ich hab ihm mei Gschicht verzaehlt un dann hemmer unser Adder gemacht: zwee Schtiehl aus Eeche.

Wann all die Bisness vorbei waar, hot er gewollt meh vun mir lanne. Er hot mich gfroogt wu bei ich kumm. Ich hab Barricks Kaunty gsaat. Er hat gsaat, ya, ich hab sell gewisst as du vun entwedder Barricks odder Lechaa Kaunties kummscht. Ich heer es in dei Akkzent. Er hot uns verzaehlt as sei Familye vun Laengeschder Kaunty is un sin do in 1980 kumme. Dann hawwich gsaat as ich sell Blog alle Woch schreiwe. Er waar allsfat neigierig wie mei Deitsch un sei Deitsch anners waar. Mir hen aagfange Wadde zu saage ins Englisch, dann ich hab es Watt as ich yuuse gsaat un er hot sei Watt gsaat. Mannichmol hemmer die gleiche Wadde geyuust, awwer oft hemmer verschiddliche Wadde gsaat.

Awwer was ich gefunne hab, is das er hot meh un meh Englische Wadde gsaat! Zum Beischpiel, mir hen iwwer “humid” gschwetzt (weil es so schmodig waar). Ich hab graad, schmodig gsaat. er hot sei Kopp gschiddelt, ‘Nee, mir waerre sell net saage, mir saage yuscht humid.’ Sell fin ich net gut. Er hot aa zu mir gsaat, ‘Ya, mir yuuse meh un meh Englisch mit unsre Deitsch….abbadich, die Kinner!’

Ich hoff as selle Trend sich verennert waerd, awwer ich glaab as wann die yungere Leit so schwetze, waerd es so bleiwe. Un sell is leedmiedich. Mir misse yuscht mol waarde un sehne was kummt.

Do is en Audio Klip: Was is die Zukumft?

Published in: on 30/08/2011 at 18:01  Comments (3)  

‘Sis die Zeit widder in die Schul zu geh!

Guder Daag Blog Leser! Well, der Summer ist schier gaar vorbei un alle wisse was sell mehnt: ‘sis die Zeit widder in die Schul zu geh! Viel Kinner hasse selle Zeit, sie gleiche der Summer un all ihre Freizeit. Awwer nau misse sie widder in en Schtubb hocke un zu re Schulmeeschder heere. Schunn lange do bei mir hen sie Schtors ihre “Zerick zu Schul” Absetz. Die Eldre nemme ihre Kinner in die Schtors un kaafe sie neie Gleeder, vielleicht en neie Schulsack un viel Bleipensils, Feddre, Ausgretzer un nadierlich viel Babier. Well, vielliecht is es net so heitzudaage, vielleicht die Eldre kaafe ihre Kinner yuscht en neie Wadderfresser, en iPod odder en fancy iPad. Ya, die Kinner schreiwe ihre Notes nau mit de neie Technology! Vielleicht die Bleipensil un Fedder sin dod? Ich hoff net, awwer es kann bald sei kumme!

‘Sis nix yuscht die Dinge die mer heit kaafe. Die Schul is aa arrig anners as es viel Yaahre zerick waar. Die Daage vun en Een-Schtubb Schulhaus sin lang vorbei. Heitzudaage sin die Schuls gross mit viel viel Schtuwwe un sie koschde millyonen vun Dollars zu baue. Wie die Kinner zu Schul kumme is aa anners. Ich weess as mei Grosseldre hen gemisst zu laafe, un es hot nix gemacht wie es Wedder waar: Schnee, Eis, Rege…macht nix, mer muss zu Schul geh. Heitzudaage gebt es viel Busse die kumme zu de Kinner ihr Haus un dann faahre sie graad zu Schul! Ei, die Kinner hen es arrig leicht heitzudaage, gell?

Well, ich bin en Schulmeeschder un ich bin arrig froh wann selle Zeit widder rumkummt. Ich gleich widder in die Schul zu geh, all die Kinner zu sehne un en neies Yaahr aazufange. Viel Kinner sin uffgeregt ihre Freinde widder zu sehne un aa uffgeregt eppes neies zu lanne. Ich weess sell is net so fer all die Kinner, awwer ich muss ehrlich saage, as viel vun mei Highschul Kinner sin ya uff em aerschde Daag zimmlich uffgeregt!

Wie waare eier Schuldaage? Seid eich in en Een-Schtubb Schulhaus gange? Was hett eich gaarn in die Schul ghatt?

Do is en Audio Klip: ‘Sis die Zeit widder in die Schul zu geh!

Published in: on 22/08/2011 at 08:21  Comments (2)  

Wie macht mer Gummere?

Guder Daag Blog Leser! Ich hab en Froog fer eich: wann eich en Sandwich esst, was kummt allsfatt mit? Dezu Chips, kummt allsfatt en Gummer mit, gell? Awwer wuvun kummt en Gummer? Sie sin leicht in en Schtor zu finne un dann kaafe, awwer en heemgemachte Gummer schmeckt arrig appeditlich! Mei Familye hot alle Yaahr Gummere daheem gemacht. Mir hen Dillgummere un Siessgummere gemacht. Selle Woch hawwich mei eegene Gummere daheem gemacht. Ich hab gedenkt as ich mei Blog Poscht dariwwer es Process schreiwe. Do is was mer mache muss um Gummere zu mache:

1. Geht yuscht in en Schtor un kaaft mol ee paar Guckgummere. Awwer was besser is, is wann mer in sei eegene Gaarde gehe kann un en frische Guckgummere abroppe. Dann muss mer die Guckgummere butze, so as es ken Grund un Dreck druff gebt!

Guckgummere in mei Gummere.

Die Guckgummere sin gebutzt un ready fer schneide.

2. Schneit die Guckgummere fer die Gummere. Es macht nix aus wie mer sie schneide. Ich hab ee paar Schpiess un ee paar gleene Schticker gschnidde. Dihr kennt eier Guckgummere schneide ennichau dihr wollt.

Ich am schneide.

3. Butzt mol die Bumps in heese Wasser. Selle Mol hawwich sex Beintbumps gebutzt. Losst sie mol in em heessen Wasser fer en gude 15 Minudde odder so bleiwe.

Die Bumps im Wasser.

4. Nau muss mer es Dillbrieh mache. Ich hab en Gemasser vun Gewaerzer un Greider gkaaft. Ich hab gemusst, sell mit Wasser un Essich zu koche.

Es Brieh is am koche.

5. Wann alles gekocht is, is es Zeit alles zammezubringe. Mer muss die Guckgummere in die Bumps schtecke un dann es Brieh iwwer alles giesse. Nau schteckt mol die Deckele uff die Bumps. Nau misse sie widder gekocht waerre. Mer kocht sie fer baut 20 Minudde in en grosse Haffe.

Ich giess es Brieh iwwer die Guckgummere.

6. Nooch 20 Minudde, nemmt die Bumps raus un losst sie mol abkiehle. Nau muss mer gut aaheere, alle die Bumps misse en “Pop” mache. Wann sie gepoppt hen, sin sie faddig un sie hen en gude Siegel. Nau kennt dihr sie in Keller nemme odder in en Schank schtelle. Schpeeder im Yaahr kennt eich en gude Gummer esse!

Die Beintbumps am koche.

Nau sin die Gummere faddig un ich muss waarde bis sie poppe!

Do is en Audio Klip: Wie macht mer Gummere?

Published in: on 14/08/2011 at 15:35  Comments (2)  

Es gebt Elk in Pennsylvaania?

Guder Daag Blog Leser! Frieher selle Woch is mei Daadi zu uns kumme fer en Bsuch. Mir hen en gleene Picknick uff em Sunndaag ghatt awwer uff em Mundaag sin mir darrich unser Weltdeel gfaahre. Wu sin mir gange? Nadd un Wescht in die Bariye! Do in Pennsylvaania hemmer viel Gediere in dem Busch wie: Hasch, Baere, Dachs, Bassam, Fix, Koyote, un…Elk. Es gebt Elk in Pennsylvaania? Ya, ich weess sell klingt net recht. Elk sin Gediere die yuscht drauss Wescht sin wie in Colorado odder Wyoming. Well, sell is recht awwer es gebt Elk aa in Pennsylvaania.

Frieher hot es viel Elk do in Pennsylvaania gewwe. In de Mitte vun de 1800s hen die Leit do in Pennsylvaania all die Elk gschosse. Der letschde Elk in Pennsylvaania waar in 1867 gschosse. Gschwischich 1913 un 1926 hen die Pennsylvaania Game Commission browiert die Elk zerickzubringe. Mir hen 170 Elk vun Yellowstone Naitonal Park gkaaft un dohergebrocht. Heitzudaage gebt es meh as 600 Elk in Pennsylvaania. Die Elk wuhne yuscht in ee paar Kaunties: Elk, Cameron, Clinton, McKean, Potter, Centre un Clearfield. Mer kann sie net yaage wie en Haasch, alle Yaahr gebt es en Lottery fer Elk Tags, un yuscht ee paar sin rausgewwe.

Do is en Landkaart vun de Kaunties wu die Elk wuhne.

So, nau sin sie wunnerfitzig…sie wolle die Elk sehne, awwer wie un wu? Well, zum Glick gebt es en neie Elk Country Bsucher Blatz. Sell findt mer in die gleene Schteddel vun Benezette in Elk Kaunty. Es neie Bsucher Blatz is arrig schee un modern. Es gebt en gleene Museum un en echde guder Movie iwwer die Elk in Pennsylvaania. Datt hen sie aa vier Aablickbletz all mit Binoculars un Schpeckdiefe. Mir waare datt uff em Mundaag awwer mir hen ken Elk gsehne. Ich glaab es waar zu heess fer sie un sie waare im Busch unnich en Baam wu es kiehler waar. Schpotyaahr is en gude Zeit fer die Elk zu seh. Dann hen die Bulle die Fuchsgichdere un sie sin meh munder.

Mei Daadi vanne em Bsucher Blatz.

Es Bsucher Blatz is net so leicht zu finne. Benezette is in de Mitte vun nariyets. Awwer ‘sis arrig schee datt in die Bariye zu faahre. Es Blatz koschdet nix reizugeh awwer mer muss $3.00 bezaahle fer es Movie zu seh. Nooch eier Bsuch kennt eich en guder Iems bei em Benezette Hotel kaafe. Sie hen gude Humbarriger un annere Sandwiches un gudes kaldes Bier!

Do is en Pickder vun em Elk in Pennsylvaania!

Wann dihr datt geht un dihr seht en Elk, gebt ach! Sie sin gross un wild. Bleibt weit weg genung fer eier Sicherheit. En gewaxne Bull Elk kann meh as 1,000 Pund wiege un sei Haschharn sin scharf!

Do sin ee paar Links: Elk Country Bsucher Blatz un Meh Information iwwer die Elk.

Do is en Audio Klip: Es gebt Elk in Pennsylvaania?

 

 

 

 

Published in: on 06/08/2011 at 08:47  Leave a Comment