Eikaafe geh!

Guder Daag Blog Leser! Heit sin mei Fraa un ich eikaafe gange. ‘Sis normal fer uns ee Mol der Woch eikaafe zu geh un ich glaab ‘sis aa so fer viel annere Leit do in Amerikaa. Ich weess as in Deitschland is sell net normal. Viel Leit in Deitschland geh zwee odder drei Mol der Woch eikaafe. Es gebt viel Ursache dafer awwer sell will ich net heit iwwerschreiwe.

Mei Fraa un ich gehne eikaafe bei Giant. Sell is en grosse Schtor, der net so weit weg vun unsrem Haus is. Der Giant hot alles: Gaardesach, Obscht, Kaes, Fleesch, Fisch, viel verschiddlich Esssach die in Kanne sin un die die gfrorne sin, Chips un Bretzels, Millich, Eier, Brot un viel verschiddliche Sache zu drinke. Dann hen sie aa Sache fer es Haus wie Briwwibabier, Schnuppdicher, Seef, Sache fer eier Haus zu butze, Arznei un viel viel Anneres. In unser Schtor gebt es aa en gleene Chinese Essblatz, en grosse Selaatbar, en Bank un en Zeidingschtand. Ya, mer kann schier gaar alles datt kaafe.

Yaahre zerick waar es net so. Es hot ken grosse Schtors gewwe. Die Leit hen gemisst nooch viele “Mammi un Daadi Schtors” zu geh. Leit hen gemisst nooch em Butscher, en Schtor fer Haussache, un nooch viel annere Bletze zu geh um alles zu kaafe. Heitzudaage is alles unnich een Dach. Nau kenne mir unser eikaafe schneller duhe.

Ich weess net was besser is. Ich winsch as es nooch viel Mammi un Daadi Schtors gebt awwer ich glaab sie sin dod un waerre nimmi zerickkumme. Frieher hemmer gewisst wu vun unsere Sache hiekumme sin. Heitzudaage mit de grosse Schtors, wisse mir net meh wu vun alles hiekummt un aa net was waricklich drin is. Frieher hemmer der Butscher gekannt un er hot uns aa vun Naame gekannt. Sell is schunn lang vorbei. Unser Gsellschaft will net nooch fimf verschiddliche Schtors faahre, sie will alles zammehawwe. Es Lewe is arrig zu viel schnell heitzudaage. Ich glaab sell is aa die Ursach fer was Leit kenne net meh mitenanner schwetze. Mir hen ken Zeit da fer. Sell find ich barmlich. Wie waerr alles so ausseh dreissig Yaahre vun nau? Ei, es dut mir leed, ich bin vun em Topic weggange…mannichmol fang ich aa iwwer eppes zu schreiwe odder schwetze un mei Schtimm geht in en annere Weg. Ich will yuscht ee annere Ding iwwer eikaafe saage: alles is zu deier! Mei Fraa un ich hen $110 heit ausgewwe…un mir hen yuscht gkaaft was mir gebraucht hen! Ich weess net wie en Familye mit viele Kinner es schaffe kann. Ich denk yeder Woch geht die Breise heecher!

Well ich fiehl besser nau as ich sell uff mei Bruscht abkumme hab. Was denkt eich vun eikaafe?

Do is en Audio Klip: Eikaafe geh!

Published in: on 30/07/2011 at 12:13  Leave a Comment  

En grosse Motorcycle Versammling!

Guder Daag Blog Leser! As viel vun eich schunn wisst, faahr ich gaarn Motorcycle. Ich bin schunn meh as 12 Yaahre am faahre, un ich waerr viel lenger aa faahre! Heitzudaage hawwich en BMW Motorcycle. Ya, ich weess, en gude Hochdeitsche Motorcycle. ‘Sis schunn mei zwette BMW un ich lieb es. Leit, die BMWs faahre, sin net dypische Motorcycle Leit. Viel Amerikaaner denke an Harleys un die Harley Kuldur as Motorcycle Kuldur, awwer sell is net vollig recht. Leit die BMWs faahre, draage Koppschitzer, Faahrwammes, Faahrhosse un Faahrhensching. Mir sin allsfatt ready fer en Unfall un hoffetlich waerr es ken gewwe!

BMWfaahre hen aa ihr eegne Klub die heesst: BMW Motorcycle Owners vun Amerikaa. Alle Yaahr hemmer en grosse Versammling ariyets in Nadd-Amerikaa. Mir saage yuscht: der National. Selles Yaahr waar es endlich in Pennsylvaania! Die Versammling waar in Bloomsburg, uff der Fairgrounds. Leit vun alliwwer es Land un Kanadaa un aa mannichmol ee paar Leit vun Europe kumme fer baut vier Daage fer die Versammling. Viel Leit campe un die annere finne Hotelschtubbe die net so weit weck vun de Fairgrounds sin.

Datt sin viel BMW Motorcycles!

Was duhne mir fer vier Daage zamme? Well, es gebt gude Seminars mit viel Information iwwer Motorcycle Sicherheit, Reese die mer mache kenne, wie fer Beischpiel: Peru un Machu Pichu un alles uff dei Motorcycle! Es gebt aa Seminars iwwer wie mer uff dei eegne Motorcycle schaffe kenne un Motorcycle Unnerhalt.

Sell is wie viel Leit campe.

Aa uff em Versammling gebt es viel Verkaafer. Sie hen all die neieste Motorcyclegleeder un Dinge fer dei Motorcycle. ‘Sis hatt zu glaawe wie viel es gebt zu kaafe…un wie viel Geld epper ausgewwe kenne! Alle Yaahr bringe viel Leit ihr alde BMW Motorcycles um zu weisse. Selles Yaahr hen es widder viele alde Motorcycles gewwe un sie waare all so schee!

Sell is en alde BMW Motorcycle vun baut 1923, 'sis arrig schee, gell?

‘Sis allsfatt gut mit annere Motorcycle Leit Zeit zu verbringe. Ich hab viel Gschpass ghatt aa wann es arrig heess un schmodig waar! Naegschdes Yaahr is die Versammling in Missouri, ich weess net ob ich dattgeh odder net, muss mol sehne.

Do is en Audio Klip: En grosse Motorcycle Versammling!

Published in: on 24/07/2011 at 14:05  Leave a Comment  

Mei Bossdaage – Aadeel 3!

Guder Daag Blog Leser! Well selle Woch will ich mei Bossdaage Rees Gschicht faddig verzaehle. Nooch unsre Zeit in Yosemite un Bryce sin mir nooch Arizona gfaahre um es Grosse Loch zu sehne un dann allsfatt Oscht  nooch Pennsylvaania faahre.

Es Grosse Loch – is en Kanyon, es vun re Colorado Rewwer gschnitte waar. ‘Sis baut 277 Meils lang, 18 Meils breet un glee bissel meh as een Meil dief. Die Schtee vun em Grosse Loch sin arrig schee zu sehne. Sie sin rot, aarensch un mannichmol glee bissel gehl. Mir hen datt zwee Owede gecampt un hen aa en wunnerbaare Laaf nunner im Loch gemacht. ‘Sis waar arrig hees, awwer mir hen Wasser mitgebrocht un hen aa viel Sunneschitz uff unsre Haut gschmiert.

Die Jessica un ich in em Grosse Loch.

Nooch unsre Zeit in Arizon sin mir nooch Nei Mexiko gfaahre. Mir sin datt zwee Daage in Santa Fe gebliwwe. Ich hab Santa Fe arrig gut gegliche. Es gebt viel Kunscht un Gschicht datt. Sell Schtadt is arrig alt. Es waar aerscht vun der Spanische Conquistador Don Juan de Oñate in 1598 gfunne. Die Baukunscht in Santa Fe is arrig schee, all die Gebeier sin in Adobeschteil gebaut. In Santa Fe hemmer der Bil Linzie fer Owedesse gedroffe. Er is en Mann der mei Blog schunn vun Aafang aa gelese hot. Mir hen im Internet un uff em Telefon mitenanner gschwetzt un hen en Owedesse zamme geblannt. Der Bil hot es Essblatz gsaat: La Choza. Es Esse waar so appeditlich awwer aa gewaerzich. Ich denk es Nei Mexiko Esse is zu gewaerzich fer en dypikal Pennsylvaanisch Deitsche Zung…awwer ich hab es gegliche. Der Bil hot uns viel iwwer em Nei Mexiko sei Gschicht un die Leit die datt wuhne. Es waar alles so indressant.

Der Bil un ich in La Choza...aye es Esse waare gewaerzich!

Suddlich vun Santa Fe is der Carlsbad Hehl National Park. Die Hehl is arrig gross! Mer kann entweder mit en Elevator 750 Fuus nunner faahre, odder mer kann vun em Natural Entrance baut een Meil laafe. Mir sin geloffe. Ich kann eich net recht saage wie gross selle Hehl is. Ich kann eich die Nummer gewwe awwer mer misse es sehne zu glawwe! Die Schtee Formations sin so schee un farewellich.

Nooch Nei Mexiko hemmer ee paar Daage in Texas gebrocht. Mir hen en Schulfreind vun der Jessica in San Antonio bsucht. Sell is en scheene Schtadt. Mir hen die Alamo bsucht un sin aa uff em Rewwerlaaf gange. Der Rewwerlaaf waar cool. Es gebt viel Essbletz un aa viel Schtors. Texas waar schee awwer zu hees un schmodich fer mich.

Ich var der Alamo in San Antonio, Texas.

Die letschde paar Daage sin mir darrich Louisiana, Mississippi, un Tennessee gfaahre. In Lousiana hemmer en grosse Baawoll Plantation bsucht. Die Plantation waar gross un mir hen en Tour darrich es Gross Haus gemacht. Der Plantation ihr Naame waar Rosedown un die Familye die datt gelebt hot waar arrig reich. In Tennessee hemmer Shiloh National Schlachtfeld bsucht.

Sell is der Rosedown Plantation in St. Francisville, LA.

Endlich sin mir uff em 4. Tschulei widder heem kumme. Mir hen baut 8,000 Meils gfaahre, 19 Schtaate un 11 Naitonal Parks bsucht un viel viel Gas gkaaft. Ich muss echt saage as selle Rees waar arrig wunnerbaar. Mei Fraa un ich hen viel Gschpass ghatt, viel gude Esse gesse, un arrig viel scheene Nadur gesehne.

Do is en Audio Klip: Mei Bossdaage – Aadeel 3

Published in: on 17/07/2011 at 12:25  Comments (4)  

Mei Bossdaage – Aadeel 2!

Guder Daag Blog Leser. Well, selle Woch will ich meh vun unsre Bossdaage Rees  verzaehle. ‘Sis schee as unsre Rees drei Woch ausgedauert hot, deswege kann ich drei Aadeele schreiwe: een fer yede Woch. Die zwette Woch hot uns warricklich “in em Wilde Wescht” gfunne. Mir hen unsere Zeit selle Woch in Kalifornia, Nevada un Utah rumgebrocht. Un die meischde Zeit waare mir in National Parks.

Yosemite National Park is net der aerschde Naitonal Park, sell waar der Yellowstone in Wyoming, awwer Yosemite waar der aerschde Schtick Grund as der Regiering fer die Leit un fer Preservation weckgschtellt hot. Der Bresident Lincoln hot sell schunn im Yaahr 1864 geduh. Es Yosemite Daal is eppes wie nix was ich nimmie voher gsehne hab. Es nemmt dei Hauch weg. Es gebt viele Wasserfalle, die unglaablich gross un hoch sin! Em Daal seine Mauern sin arrig hoch un fascht Granite. Die Aablicke is wie eppes aus em Paradis. Viel Leit saage as mer der Herrgott in Yosemite finne kann, sell hawwich net geduh, awwer ich kann verschteh ferwas Leit so en Satz saage.

Es Yosemite Daal. Uff em linke Seite is El Capitan un in der Mitt is Halfdome.

Yuscht glee wennich Sudd vun em Yosemite is der Sequoia National Park. Sequoia, as der Naame saagt, is der Heemet vun re Giant Sequoia Beem. Un loss mich dihr saage, sie sin warricklich gross. Die drei greeschde Beem in der Welt sin in Sequoia National Park. Sie henn aa gude Naame wie: der Grizzly Giant, General Grant, un re Welt ihr greeschde Beem: der General Sherman. Der General Sherman Baum is 275 Fuuss hoch un seim Schtamm sei Volume is 52,000 Cubic Fuuss! Mer glaabt as es gschwischich 2,300 un 2,700 Yaahre alt is.

Ich un en Giant Sequoia!

Nooch Sequoia sin mir darrich Death Valley gfaahre. Ich verschteh ferwas sell so benaamt is. ‘Sis so heess un drucke datt as nix wachse kenne. Mir waare datt frieh am Mariye. Es waar var zehe Uhr un es waar schunn 100 Graad Farenheit! Aye yummer waar es hees. Mir sin ee paar Mol gschtoppt fer Pickders zu nemme…awwer mir sin net lang gebliwwe bevor mir waare widder in em Truck…es waar wie en Offe draus.

Es gebt viel Sand in Death Valley.

Dann sin mir nooch der gross Schtadt Las Vegas gfaahre. Mir hen zwee Daage datt rumgebrocht. Las Vegas waar net mei Koppche Tee! Ich hab gross Schtedde gaarn, awwer Las Vegas waar eppes anneres. Es waar yuscht Sex, Veryuxe un Dreck. Was ich arrig unheemlich gfunne hab, waar as so viele Familye mit gleene Kinner datt waare. Die ganze Familye sin darrich die Casinos glaafe un die Kinner hen mit em Videoveryuxemaschine gschpielt…was is sell? Las Vegas is ken Disneyworld, awwer so hot es gfiehlt mit so viele Familye un so viele Lichder!

Nooch em Sin City sin mir widder in die Naduur gfaahre. Mir sin darrich Zion un Bryce Canyon National Parks gfaahre. Die waare arrig schee, abbadich der Bryce. Die Schtee Gschtalte waare wie eppes vun re annere Welt! Bryce waar voll mit Hoodoos. Die Hoodoos sin Schtee Gschtalte die vun der Wind, Wasser un Eis bschaffe waare. Un was so verschiddlich vun Pennsylvaania is, is as alle die Schtee rot un aarensch sin.

Bryce Canyon un sei Hoodoos.

Naegschde Woch waerr ich mei Bossdaage Gschicht faddig verzaehle. Bis dann, macht’s gut alli-epper!

Do is en Audio Klip: Mei Bossdaage – Aadeel 2!

Published in: on 09/07/2011 at 09:47  Leave a Comment  

Mei Bossdaage – Aadeel 1

Guder Daag Blog Leser! Well, ich bin endlich widder zerick do in Pennsylvaania. Was fer en scheene Bossdaage hen ich un mei Fraa ghatt. Die Rees hot 22 Daage ausgedauert un mir hen viel Meils in unsre Truck gfaahre. Es Wedder waar wunnerbaar, yuscht ee Daag mit Rege! Sell is hatt zu glaawe, awwer in em Sudd-Wescht Amerikaa is es arrig drucke.

Ok, ich hab gedenkt as weil mei Rees drei Woche waar, daet ich drei Poschts schreiwe: ee fer yede Woch. So, do is en “Recap” vun unsre aerschde Woch:

Mir hen Pennsylvaania arrig frieh uff em 13. Tschuun verlosse. Mir sin baut 600 Meils  nooch Springfield, Illinois gfaahre. Mir hen nadierlich fer Gas un Kaffie gschtoppt, awwer fer nix meh….mir hen Meils zu duh! Mir sin in Springfield baut 5 Uhr aakumme un mir sin graad zu Hotel gange. Sell waar alles fer der aerschde Daag. Daag 2 hot mit en Bsuch zu em Abraham Lincoln Bresidential Library un Museum aagfange. Es Museum hot dem Lewe der Bresident ausgelegt…un hot es arrig gut gemacht. Nooch em Museum sin mir baut 2 Meils gfaahre nooch em Lincoln sei Graab. Sell waar aa eppes zu sehne!

Mir un die Lincolns!

Nooch Springfield sin mir Wescht gfaahre, iwwer die Mississippi Rewwer un darrich Missouri nooch Kansas. Mir hen in Kansas in en Schtaatpark gecampt. Missouri un Kansas sin glee bissel langweilig…zu flach! Nooch Kansas sin mir in Colorado aakumme…endlich, Bariye: die Rockies! Mir hen en Nacht in Longmont, CO gebracht. Datt lewe zwee vun meinen College Freinds. Mir sin alle zammekumme fer Owedesse. Sell waar Gschpassig! Mir hen gude Esse gesse, gudes Bier gedrunke un alde Gschichte verzehlt!

Ich un mei College Freinds in Colorado.

Der naegschde Daag hemmer unser aerschde National Park bsucht: Rocky Mountain. Es gebt en Schtroos: die Ridge Trail Road. Es geht darrich der Park fer baut 30 Meils. Die Schtroos is eppes! Sie ist glee un wicklich. Mir hen ee paar Elks gsehne un viel Schnee! Ya, es hot viel Schnee nooch uff de Bariye gewwe!

Rocky Mountain National Park.

Nooch Rocky Mountain sin mir allsfatt Wescht darrich Utah un Nevada gfaahre. In Nevada hemmer en annere National Park bsucht: Great Basin. Mir hen sell Park net geblannt, awwer es waar uff re Landkaart so mir sin gange, un mir sin froh as mir hen! Der Park waar schee un es waar ken Leit datt, mir hen der Park zu uns selwer!

Mei Fraa in Great Basin National Park, Nevada.

Naegschte Woch: Aadeel 2: Yosemite, Groose Beem, Death Valley, Poker un Suddutah!

Do is en Audio Klip: Mei Bossdaage – Aadeel 1

Published in: on 06/07/2011 at 06:11  Leave a Comment