Mei Bossdaage!

Guder Daag Blog Leser! Well, en anneres Schulyaahr is endlich vorbei. Die Kinner sin daheem un die Schulmeeschdern hen ee paar Woch um ihre Batteries widder zu charge. Dem Schulyaahr sei End is fer mich allsfatt bittersiess. Ich bin froh as ich glee wennich Zeit frei vun de Kinner hawwe, awwer ich bin traurig as mei Seniors weggeh. Awwer, so is es, Gell?

So, was mach ich wege mei Summer Freiheit? Well uff em Mundaag faahre ich und mei Fraa uff unsere Bossdaage! ‘Sis baut Zeit! Mir sin zerick in September gheiert awwer dann hemmer net die Zeit uff einre Bossdaage zu geh. Nau (mei Fraa is aa Schulmeeschderin) hemmer Zeit….so nau gehne mir.

Mundaag is der Aafang vun unsere drei-wochige lang Bossdaage. Die Bossdaage waerr en Rees (mit der Maschine) iwwer dem ganze Amerikaa. Mir waerre campe so oft wie meeglich. Mir waerre selle Schtaate bsuche odder darrichfaahre: PA, Ohio, Indiana, Illinois, Missouri, Kansas, Colorado, Utah, Nevada, California, Arizona, Nei Mexiko, Texas, Louisiana, Mississippi, Tennessee, Kentucky un West Virigina.

Mir waerre viel National Parks uff unsere Rees besuche wie: Rocky Mountain, Yosemite, Sequoia, die Grand Canyon, Zion, Bryce Canyon, Carlsbad Caverns un vielleicht ee paar annere. Weil mirĀ  fer 21 Daage fatt sei waerre, waerr es ken neie Blog Poschts gewwe bis mir zerickkumme. Dann waerr ich en grosse Blog Poscht iwwer die Bossdaage schreiwe, un es waerr viel Pickders aa hawwe. Ich hoff as alles gut geht un aa as es Wedder gut sei waerr. Macht’s gut bis ich widder in Pennsylvaania bin!

Do is en Audio Klip: Mei Bossdaage!

Published in: on 11/06/2011 at 06:09  Comments (3)  

En wichdiger Deitscher – Aadeel 3!

Guder Daag Blog Leser! Geschder waar ich in Hershey, Pennsylvaania. Ich hab gedenkt as ich sellre Woch ihr Poscht soll iwwer der wichdige Deitscher: der Milton S. Hershey sei. Der Milton waar uff em 13. September 1857 uff re Bauerei in Derry Church, Dauphin Kaunty, gebore. Er waar der eenigschde Soh vun der Fannie un dem Henry Hershey. Die Hersheys waare Mennischde. Sie sin oft hiegezogge un deswege hot der Milton yuscht das vierde Yaahr vun der Schul faddiggemacht.

Der Milton un sei Fraa Catherine.

Nooch en vier Yaahre lang Brendisschip mit en Zuckersachmacher in Lengeschder, hot der Milton sei aerschde Zuckersachkumpanie in Philadelphie gegrindt. Selle Kumpanie un zwee annere Browiere in Chicago un New York sin darrichgfalle. Er is in 1883 widder zerick nooch Lengeschder kumme un hot die Lengeschder Caramel Kumpanie gegrindt. Selle Kumpanie is schnell en Glick gewest.

Im 1893 hot der Hershey die World’s Columbian Exposition bsucht. Datt hot er en Hochdeitsche Schokolaad Maschien gesehne. Er hot die Maschine gkaaft un bald hot er aagfange Schokolaad zu mache. Er is dann vun Lengeschder zerick nooch Derry Church hiegezogge fer en neie Factory zu baue. Er is nooch Derry Church gange, weil er hot gewisst as er datt viel gude Millich fer sei Schokolaad griege kennt. Hershey’s Millichschokolaad waar die aerschde nationally verkaafte Ardickel vun selle Aart.

Der Milton waar endlich en grosse Glick. Awwer er waar nooch net faddig! Er hot gewollt en gude Blatz hawwe fer seinre Kumpanie ihre Schaffleit. So er hot en Schtadt gebaut: Hershey, Pennsylvaania. Die Schtadt hot en Schul, scheene Heiser un Public Transportation. In 1907 hot er Hershey Park gebaut. Der Park waar en Blatz fer sei Schaffleit ihr Freizeit zu verbringe.

Der Milton un en Waisekind.

Er hot aa die Hotel Hershey, en Gemeeschaftcenter, en Theater un en Schportblatz gebaut. Alle selle Dinge hen Hershey, PA, en grosse Tourist Attraction gemacht. Dem Milton sei Glick hen ihn bewillicht en grosse Menschefreindheit zu duhe. In 1909, er un sei Fraa hen en Schul fer Waisekinner gebaut. Der Milton is im Yaahr 1945 gschtarewe. Er waar 88 Yaahre alt. Seit dann is seine Legacy gewaxe. Alle Yaahr, helft die Hershey Schul meh as 1,100 Kinner. Alle Yaahr kumme dausende vun Leit zu Hershey Park fer die Rollercoasters un annere Rides zu luschdere. Un wer vun eich hett nie en Schtick Hersheys net gesse? Er waar un is en wichdiger Deitscher!

Do is en Audio Klip: En wichdiger Deitscher – Aadeel 3!

 

 

 

 

 

Published in: on 04/06/2011 at 06:34  Comments (2)