En Laaf darrich en Karrichhof!

Guder Daag Blog Leser! Well, as ich letschde Woch gschriwwe hab, selle Wochend waar Gedechtnisdaag do in Amerikaa. Ich un mei Fraa sin nooch Heem gfaahre um mei Familye zu sehne. Yeder Gedechtnisdaag Wochend geh ich mit meinre Grosseldre uff viele verschiddliche Karrichhoffe fer Blumme uff em Greewer zu schtelle.

Selles Yaahr sin mir zu de normal Greewer un ee paar annere aa gange. Meim Grossdaadi sei Eldre sin in Shillington begraabt. Mir gehne datt alle Yaahr. Dann sin mir nooch Molltown gange fer meinre Grossmudder ihr Grosseldre, Eldre, ihr Bruder, un mei Mudder.

Ee paar Yaahre zerick hawwich viel Geneology geduh un ich hab viele vun meinre Voreldre gefunne. Mei Gross-Gross-Grosseldre uff mei Grossdaadis Seide sin in en alde Karrichhof in Reading begraabt. Mir sin aa dattgange um sie widder zu finne. Fer schurr hemmer sie gefunne, awwer die Karrichhof waar net so schee. Viele Graabschtee sin iwwergfalle un die Grass waar aa net so gut gemaeht. Sell finn ich arrig schlecht, awwer was kann mer duh?

Datt sin die Greewer vun meinre Gross-Gross-Grosseldre in Reading.

Nooch unser Rees darrich Reading sin mir nooch Virginville gfaahre. Datt sin mei Gross-Gross-Grosseldre vun meinre Grossmudder begraabt. Sie sin in Dunkels Karrichhof begraabt. Selle Karrich is nix meh. Die Karrich is datt awwer die Gemee sin schunn lang fattgange. Die Karrichhof seht gut aus, awwer die Karrich net so viel. Sell hawwich drauerich gefunne, en alde Karrich, un kee Gottesdinscht meh.

Sell is die Dunkels Karrich in Virginville. Unglicklicherweis gebt es ken Gemee datt.

Mir sin aa in ee paar alde Karrichhoffe gange, die waare so alt, as sie viel Graabschtee vun em 1700s ghatt hot! Viel vun die Graabschtee waare in Hochdeitsch gschriwwe. Ich hab viel Greewer vun Revolutionary un Civil Grieg Soldaade gsehne. Nadierlich, hen sie all ganz neie Faahne newwe sie.

Sell sin alde Graabschtee uff re Hill Karrich in Pikeville. Die waare arrig alt!

Ich gleich arrig viel uff en Karrichhof rumzulaafe. Mer seht Gschichte, alde Naame un alde Soldaade. Gleicht eich aa darrich en Karrichhof zu laafe?

Do is en Audio Klip: En Laaf darrich en Karrichhof.

Published in: on 30/05/2011 at 12:47  Comments (4)  

Eppes fer der Gedechtnisdaag!

Guder Daag Blog Leser! Well naegschde Mundaag is der Gedechtnisdaag do in Amerikaa. Der Gedechtnisdaag is der Daag as mir do in Amerikaa unsere Soldaate ihre Greewer schmucke. Es waar aerscht beliebt nooch em Civil Grieg in de 1860s. Dann nooch em Aerschte Welt Grieg waar es noochemol wichdig. Der Feierdaag waar aerscht as Decoration Daag benaamt awwer dann schpeeder waar der Naame zu  Gedechtnisdaag verennert. Viel Leit waerre aa der amerikaanische Faahne zu halwe Mascht fliege.

Ich hab gedenkt as selle Woch waerr es gut wann ich eich eppes geb, so as dihr eppes hett naegschte Woch zu saage! Do is die Verschprechnis zum Fahne in Deitsch:

Ich verschprech gedrei zu sei, zu dem Fahne von de Vereinigte Schtaate vun Amerikaa un das Land, fer das es schteht; een Land, unnich Gott, ewich vereinicht, mit Freiheit un Gerechtigkeit fer Alle.

Un do is en Lied as dihr singe kennt: Amerikaa!

Mei Land, ich sing vun dir. Sies is die Freiheit mir, do will ich sei;

So wie die alte Leit, so viel ich aa nooch heit. Sin dir zu yedre Zeit, allsfatt gedrei!

Ich hoff as alle vun eich glee wennich Zeit uff em Mundaag finne kennt um en Gebet fer all unsere Soldaate saage. Ich waerr es fer schurr duhe.

Do is en Audio Klip: Eppes fer der Gedechtnisdaag!

Published in: on 22/05/2011 at 13:38  Leave a Comment  

Nooch en annere deitsche Bresident!

Guder Daag Blog Leser! Well, var letschde Woch hawwich mei Blog Poscht iwwer der Dwight Eisenhower gschriwwe. Ich hab gsaat as er der eenzigschde amerikaanische Bresident mit deitsche Voreldre waar. Frieher selle Woch hawwich en EPoscht vun dem Frank Kessler grickt. Er hot mich gsaat as es en annere US Bresident mit deitsche Voreldre gebt: der Herbert Hoover. Nooch glee bissel Research, hawwich gefunne as der Frank Recht hot! So heit will ich glee bissel iwwer dem Herbert Hoover sei deitsche Familyegschichte schreiwe.

Dem Herbert Hoover sei Gross-gross-grossdaadi waar der Andreas Huber. Der waar am 23. Yenner im Yaahr 1723 in Ellerstadt, Deitschland gebore. Er is uff em Schiff: “Two Sisters” as er yuscht 15 Yaahre alt waar nooch Amerikaa kumme. Er waar aerscht in Lancaster Kaunty wu er sei Fraa, die Margaret Catherine Pfoutz gheiert hat. Er un sei Fraa hen ihr aerschdes Haus in Fredrick Kaunty, Maryland ghatt. Baut Yaahr 1750, hot der Andreas sei Naame zu Andrew Hoover verennert. Im Yaahr 1772 hot dem Andrew sei Familye mit en Oxenwaagli nooch Randolph Kaunty, Nadd Carolina gebracht. Die Hoovers hen datt en Kunnemiehl gebaut. Es waar en wichdige Miehl darich die Revolutionary Grieg.

Datt is der Herbert Hoover, der 31. Bresident.

Viel Yaahre schpaeder is en annere Hoover aa wichdig: der Herbert Hoover. Er waar uff em 10. Auguscht 1874 in Iowa gebore. Er waar der 31. Bresident gschwischich die Yaahre 1929 un 1933. Nooch em aerschde Welt Grieg waar er unnich dem Bresident Woodrow Wilson der Secretary vun Commerce un er hot Bisnesse ermuntert sie selwer zu reggeliere. Der Hoover waar en Republikaner der fer sei Rechtschaffeheit bekannt waar. Er waar im Weiss Haus wann der Stock Maket in 1929 zammegegracht hot. Un mir wisse as sell waar der Aafang vun der Great Depression. Er hot in “Rugged Individualism” geglaabt un sell meent as er die Leit ken direkt Hilfe darich die Great Depression gewwe hot. Mir wisse aa as in die Leckschun vun 1932, as der Franklin Roosevelt  der Hoover geglobb hot.

Sell is wie der Herbert sei Naame gschriwwe hot.

Do is en Audio Klip: Nooch en annere deitsche Bresident!

Published in: on 15/05/2011 at 11:30  Leave a Comment  

Wie weess ich as es Friehyaahr is?

Guder Daag Blog Leser! Viel Leit kenne saage was ihre Leibyaahreszeit is. Well, ich kann so en Decision net mache. Ich gleich all vier Yaahreszeite: es Friehyaahr hot Blumme, der Summer hot waarme Daage un viel Gudes in em Gaarde zu esse, es Schpotyaahr hot scheene Daage un die Bledder sin arrig farevoll, un der Winder is kalt mit Eis un Schnee awwer ich gleich darrich der Schnee rumzulaafe.

Awwer nau is es Friehyaahr do in Nadd-Amerikaa. Wie weess mer as es warricklich Friehyaahr is? Mer kann saage, well die Daage sin lenger un die Daage un Necht sin warmer. Die Veggel sin am singe un es Grass waerr griener. Ya, sell is recht, awwer fer mich drei Dinge saage Friehyaahr zu mir: Biddere Selaat, Pingschtblumme un Rhabarbraa.

Biddere Selaat is eppes der frieh im Friehyaar gesse waerr. Gwehnlich kann mer baut Oschderzeit in em Grass fer es yaage. Mannichmol muss mer hatt yaage, un manichmol gebt es so viel im Grass as mer net so hatt gucke muss. Nooch em Yaag muss mer es butze un dann kann mer es esse. Ich gleich Biddere Selaat arrig viel. Do in Pennsylvaanisch Deitschland esse mir Biddere Selaat allsfatt mit heisse Schpeckdunkes. Aye yummer is sell awwer gut! Ich hab oft gelese as mer net so viel Biddere Selaat esse sott, es gebt zu viel Vitamins un Folic Acid. Awwer wann mer yuscht en normal Portion hot, is es wunnerbaar gsund.

Do is en gaanze Blanz vun Biddere Selaat. Bass mol uff, ich ess die Blumme nicht!

Ah, Pingschtblumme! Uff der Bauerei wu ich uffgwaxne bin hot es viel Pingschtblumme gewwe. Ich glaab sie sin mei Leibblumme. Sie rieche so siess un guckt so schee aus. Viel annere Leit misse ihr Schmack aa gleiche. Wann mer eikaafe geht gebt es viel verschiddliche Reichdrobbe mit Pingschtblumme as ihr Schmack! Zum Glick, draagt mei Fraa oft Pingschtblumm Reichdrobbe. Wann sie so duht, dann hock ich mich glee bissel naekschde aa!

Ah, Pingschtblumme...ich kann sie schier gaar darrich es Waddefresser rieche.

Es gebt en Blanz die allsfatt im Friehyaahr rauskummt. Viel Leit wolle es net esse, awwer ich fer schurr. Rhabarbraa guckt glee wennich luschdig aus, awwer schmeckt arrig gut! Was ich arrig gaarn ess, is en Rhabarbraa un Aebeer Pei. Mei Grossmudder macht aa en Dunkes aus Rhabarbraa, es arrig gut uff Eisraahm is!

Do is Rhabarbraa, ready zu geh. Kennt eich en warmes Schtick Pei schmecke?

Selle Woch as eich rumfaahrt, sei so gut un gucke mol fer die drei Dinge. Geh am yaage fer glee bissel Biddere Selaat, robbt ee paar Pingschtblumme un bringt sie im Haus, un kaaft ee wennich Rhabarbraa un backt mol en Pei. Ich bin sicher as alle vun eich saage waerrt as es fer schurr Friehyaahr is!

Do is en Audio Klip: Wie weess ich as es Friehyaahr is

Published in: on 07/05/2011 at 07:07  Comments (8)