Esel Basketballe!

Guder Daag Blog Leser! Well, selle Woch schreib ich iwwer eppes anders. Uff em Dunnerschdaag hawwich eppes erlebt, as ich nimmi vorher erlebt hab. Ich waar bei em Esel Basketballe Schpiel! Ya, du hoscht mich richdig verschtanne…Esel Basketballe.

Sell is mei Fraa mit Polka Dot. Es Schpiel hot nooch net aagfange.

Mei Fraa is en Schulmeeschdern uff en gleene High Schul in Renovo. Renovo is en Schtadt mit baut 4,000 Leit. Die Schul is aa arrig glee mit baut 40 Schuler in en Graduating Klaess. Alle Yaahr, die Schtudent Kounsil hot en Fundraiser fer ihre General Fund. Fer die letschde zwee Yaahre hen sie en Esel Basketballe Schpiel fer die Gemeeschaft ghatt. Alle Yaahr gebt es zwee Mannschafte: die Schtudente gege die Schulmeeschdern.

Sell is in em Schpiel. Die Schulmeeschdern hen die rote Koppschutzer un die Schtudente hen die blohe.

Ich waar glee bissel skeptisch en Basketballe Schpiel mit Esel zu sehe, awwer ich muss ehrlich saage, sell is eppes zu sehe. Es gebt Regeln fer es Schpiel: Yeder Schpieler muss en Esel hawwe. Mer darf entwedder die Esel reide odder die Esel mit der Zammn ziehe. Mer muss uff en Esel sei um en Basket zu schiesse. Sie yuuse ken Saddel, so wann mer uff en Esel hockt, muss mer es “bareback” duhe! All die Schpieler hen gemisst en Koppschutzer zu draage. Der Mann, der die Esel gebrocht hot, hot zu mir gsaat as ab un zu macht er Schpiele mit de Amische! Er hot mir gsaat, as die Amische sin am besten…sie schpiele arrig hatt un sin arrig kompetitive!

Mannichmol hen die Esel net gewollt zu laafe, dann muss mer sie ziehe.

Nadierlich sin die Esel schtoppkeppich, so wann en Schpieler mit dem Balle schnell laafe witt, geht die Esel so schnell wie er odder sie gehe will! Fast all die Schpieler henn gaar ken Erfaahring mit Gediere, so es waar eppes zu wache. Mannichmol, hot en Schpieler gewollt, uff en Esel zu reide, un die Esel hot er odder sie uff ihr Rick gschmisse! Sell hot mich zu lache gemacht. Sie hen vier nein Minudde Periods gschpielt. Am End waar es 19 zu 16 fer die Schulmeeschdern! Die Schportschtubb waar arrig voll mit Zugucker vun der Schtadt. Die Kinner hen arrig viel Gschpass ghatt un alle hen arrig viel gelacht. Ich weess net wie viel Geld die Schtudent Kounsil verdient hot, awwer ich glaab es waar zimlich viel…un sell is gut, Gell?

Do is en Audio Klip: Esel Basketballe!

Published in: on 03/04/2011 at 15:20  Comments (4)  

The URI to TrackBack this entry is: https://deitscheblog.wordpress.com/2011/04/03/esel-basketballe/trackback/

RSS feed for comments on this post.

4 CommentsLeave a comment

  1. So en Schport hawwich dervun gheert awwe nimmi gesehne! Sell waar fer Dich rieli en schee Owwet kenn ich sehne in deinre Beschreiwung drowwe!

    Ass ich in der Hochschul waar, eh schwischde 70-74 waar unser Maeschkott der dreddend Esel. Mir henn eeyentlich zwee Esel fer uffme Fussballfeld inre Halbzeit rausbringe. Ich hab die Beed selewe gekannt, Homer unn Pepino, un ich kann Dir nau saage ‘die waare beesi Gedier.’ Dohmols waarich bang fer uffme saem Bodde mit de Zwee sei. Waahrscheinlich, wann ich ne Geleyeheit fer in so en Schpiel sei, deed ich’s net. Liewwe bleibich mit meine Freinde uffme Guckbenk hocke fer Aagucke. Bin 55 im sellem Yaahr — ich will meini Hift net breche! Eselbaesketball iss fer fer die yingere mit gude, weiche Gnoche wu sich schnell heile kenne!

    bil aus NM

  2. Bil,
    Dei Schulmaschott waar en Esel? Mei waar en Panther. Un sie henn zwee uff em Feld fer die Halbzeit gebrocht? Sell is yo eppes! Mir hen yuscht en Kostume. Na, du hoscht yo recht, es Schpiel waar arrig physical…net fer alte Leute. Die Esel kennte aa bees sei, un dann, harriyummah hen sie die Leit uffgschmisse! Besser sie als mich!

    -Der Doug

  3. Doug,

    Sell waar en arrig gschpassich Schtori!

    -Adam

  4. Adam,

    Gross Dank fer dei Comment. Sell waar en gschpassiche Owed!

    -Der Doug


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: