En deitsche Bresident!

Guder Daag Blog Leser! Selle Woch hab ich en Buch gelese un wann ich faddig waar hab ich gedenkt as ich en Blog Poscht dariwwer schreiwe sott. Es Buch waar baut der Dwight D. Eisenhower. Vun was ich weess, is er der eenzigschde amerikaanische Bresident mit Pennsylvaania Deitsche Voreldre.

Heit will ich glee bissel iwwer dem Eisenhower sei Familye Gschichte auslege. Der aerschde Voreldre vun em Eisenhower der nooch Amerikaa kumme is, waar der Hans Nicholas Eisenhauer. Er is im Yaahr 1741 vun Eiterbach, Rheinland nooch Pennsylvaania eigewandert. Er un sei Familye sin in Bethel Taunschip, Barricks Kaunty hiegeblanst. Im Yaahr 1753, hot der Hans en 168 Acker Bauerei gkaaft un hot viel Kinner mit seinre Fraa. Zu seller Zeit waar die Familye Mennischde.

Sell is der Dwight wann er Bresident waar.

Dem Hans sei Soh, John Peter is uffgwaxe un hot sei Familye nooch Fredricksburg, Lebanon Kaunty hiegezogge. Sei Soh, der Frederick hot die Mennsichde Karrich verlosse un hot die Rewwer Brudder Karrich aagschtosse. Sei Soh, der Paare Jacob Eisenhower un sei Familye sin nooch die Lykens Daal hiegezogge un dann im Yaahr 1878,  sin die Familye mit viel annere Rewwer Brieder nooch Dickinson Kaunty, Kansas hiegezogge. Ich weess net ferwas der Jacob die Familyenaame verennert hot.

Dem Jacob sei Soh, der David hot net gewollt en Bauer zu sei, so er is uff em Lane University gange. Datt hot er die Ida Stover begegnet un schpeeder sin sie geheiert. Der David un sei Familye sin im Yaahr 1888 nooch Denison, Texas hiegezogge. Es waar datt wu der Dwight uff em 14. Oktower, 1890 gebore waar.

Der Eisenhower waar aa gewaehlt fer sei Gsicht uff em Dollar Coin zu sei!

Mir wisse viel vun dem Dwight sei Lewe. Er is im Yaahr 1911 uff em West Point Military Academy gange. Er waar en grosse General in em Zwette Welt Grieg un er waar der Haaptman vun em D-Day Invasion. Nooch em Grieg, im Yaahr 1953 waar er zu Bresident (Republikaner) gewaehlt. Er  waar der 34. Bresident un waar in em Weiss Haus bis Yaahr 1963.

Sell is wie er sei Naame gschriwwe hot.

Vun was mir wisse, sei Familye nadierlich hen Deitsch gschwetzt. Mir wisse net fer schurr eb der Dwight die Mudderschprooch verschtehe kennt odder net. Awwer mir kann mit viel Schtolz saage, as er en Deitscher waar!

Do is en Audio Klip: En deitsche Bresident!

Published in: on 30/04/2011 at 19:59  Comments (2)  

En Oschder Poscht fer alli-epper!

Guder Daag Blog Leser! Selle Woch is der Oschder ihr Fescht so ich hab gedenkt as en guder Poscht waerre die Gschicht vun dem Yesus sei Dod un sei Ufferschtehing. Letschdes Yaahr hawwich iwwer mei Familye ihre Oschder Traditions gschriwwe awwer selles Yaahr denk ich mir solle an die Grund fer es Fescht denke. So, do is dem Yesus sei Gschicht vun de varzehte, fimfzehte un sechzehte Kabiddel em Evangelium vum Markus. Selle Iwwersetzing is vun der Ralph Charles Woods. Er hot es im Yaahr 1968 fer die Pennsylvaania Deitsche Gsellschaft geduh. Viel Gschpass bei Heere!

Do is en Audio Klip: Dem Yesus sei Gschicht.

Ich winsch all mei Blog Leser en halliche Oschder!

Published in: on 23/04/2011 at 07:25  Comments (1)  

Dies un Das!

Guder Daag Blog Leser! Selle Woch is eppes bassiert, as ich hab gedenkt nimmi bassiere waerre. Sell Blog hot sei 10,000 “Schlag”. Ich bin arrig erschtaunt mit sellem Blog, un vun dem Aafang aa. Ich hab sell Blog in Yenner 2009 aagfange fer zwee Reasons: 1. So as es eppes anneres uff em Internet gebt fer Leit Deitsch zu lese un heere, 2. So ich mei Deitsch yuuse kennt un es net verliere. Ich hab nimmi gedenkt as ich zwee Yaahre schpeeder noch am schreiwe sei waerre, awwer do bin ich, un ich bin arrig froh as ich do bin!

Do sin ee paar Facts vun em Blog:

1. Zur Zeit waar der Blog 10,225 Mol besucht.

2. Sell Poscht is mei 100. Poscht.

3. Ich hab 304 Comments grickt vun Leit, die in der ganze Welt wuhne. Leit vun Pennsylvaania, Nei Mexiko, Nevada, Michigan, Kanada, Deitschland, die Schweiz un viel annere Bletze!

4. Ee College Schtudent in Deitschland hot ihre Magisterschrift iwwer mei Deitsch un selle Blog gschriwwe!

Was am hatteste zu glaawe is, as so viel Leit vun so viel verschiddliche Bletze sell Blog lese. ‘Sis waerricklich unglaablich. Mei Blan is weiter zu schreiwe un ich browier alle Woch en neie Poscht zu schreiwe. Gross Dank an alle mei Leser un ich hoff as eich glee bissel Frehlichkeit griegt allemol as dihr der Blog lest.

Eppes Nooch! Selle Woch is Heilige Woch un sell meehnt zwee alde deitsche Traditions/Supersitions zu folye:

1. Uff em Griedunnerschdaag muss mer eppes grien esse!

2. Uff em Karfreidaag muss mer nix blanze un gaar nix mit em Grund schaffe!

Do is en Audio Klip: Dies un Das!

Published in: on 17/04/2011 at 06:02  Comments (2)  

En grosses Yehrlichfescht!

Guder Daag Blog Leser! As eich vun em Titel sehe kennt, is 2011 en grosses Yehrlichfescht, awwer fer was? Ich saag dihr: 2011 is en 150. Yehrlichfescht vun em Amerikaanische Birgergrieg sei Aafang. Un selle Woch hot alles in Abrill 1861 mit em aerschten Schoss aagfange.

Es waar frieh am Mariye uff em 12. Abrill 1861, wann der Confederate General, Pierre Beauregard hot sei Kannons uff em Fort Sumter in Charleston Harbor gschosse. Der Fort waar vun Amerikaanische Soldaate un der General Robert Anderson gewehrt. Sell waare die aerschde Schosse vun em Grieg. In Diesember 1860, sin Sudd Carolina devun em USA gange. Sudd Carolina waar net froh as der Abraham Lincoln zur Bresident in 1860 erwaehlt waar. Der Lincoln un die neie Regiering hen gewollt mit em Gschlaaferei wegzuduhe. Sudd Carolina un annere sudde Schtaate hen gedenkt as ihre Rechte  vun re Regiering weggnumme waerre. So sie hen ausgemacht ihr eigene Land zu schaffe: die Confederate Schtaate vun Amerikaa.

Sell is en Pickder vun em Schlacht uff Fort Sumter.

Der Aagriff uff em Fort Sumter waar ihr Weck zu zeige as sie Bisness gemehnt hen! Zum Glick waar nimmi in em Aagriff dodgemacht. Awwer sell waar yuscht der Aafang vun em vier yaahrelang Grieg mit Amerikaaner gschwischich Amerikaaner. Am End im Yaahr 1865 sin meh as 620,000 Soldaate  vun Schlachde odder vun Grankheet gschtarewe.

Sell is en Pickder vun dem Bresident Lincoln un Union Soldaade.

Es Yaahr 2011 is aa es Yehrlichfescht vun annere grosse un wichdiche Schlachde: der aerschde Bull Run un Wilson’s Creek. Die greese Schlachde sin in die drei schpeedere Yaahre. Vielleicht kann ich meh iwwer selle Schlachde schreiwe wann es ihre Yehrlichfescht is.

Ich bin en grosse Birgergrieg Fan. As ich en Kind waar hawwich viel davun gelese un hab alle Birgergrieg Movies schunn gsehne. Ich hab viel Schlachdefelder bsucht un ich will meh bsuche. Seller Summer faahr ich nooch Tennesse um em Shiloh sei Schlachfeld zu bsuche.  Die Birgergrieg is en arrige wichdiche Aadeel vun unsre Gschichte.

Die Deitsche henn aa en Aadeel in der Grieg gschpielt. Es hot viele deitsche Regiments gewwe. Wann dihr meh iwwer die Deitsche in der Birgergrieg lanne wollt, sei so gut un lest mol es Buch: Damn Dutch vun dem Dr. David Valuska. Sell is en Buch iwwer die Deitsche in em Gettysburg sei Schlacht im Yaahr 1863. Sell is en wunnerbaar gudes Buch. Mer kann es bei Amazon.com fer baut $15 kaafe.

Datt is es Buch: Damn Dutch vun dem David Valuska.

Uff em 12. Abrill, nemm mol en Moment un denkt yuscht uff em Soldaade un die schwatze Yaahre die Amerikaaner darrich unser Land ausgfochde hot.

Do is en Audio Klip: En grosse Yehrlichfescht!

Published in: on 09/04/2011 at 13:26  Comments (3)  

Esel Basketballe!

Guder Daag Blog Leser! Well, selle Woch schreib ich iwwer eppes anders. Uff em Dunnerschdaag hawwich eppes erlebt, as ich nimmi vorher erlebt hab. Ich waar bei em Esel Basketballe Schpiel! Ya, du hoscht mich richdig verschtanne…Esel Basketballe.

Sell is mei Fraa mit Polka Dot. Es Schpiel hot nooch net aagfange.

Mei Fraa is en Schulmeeschdern uff en gleene High Schul in Renovo. Renovo is en Schtadt mit baut 4,000 Leit. Die Schul is aa arrig glee mit baut 40 Schuler in en Graduating Klaess. Alle Yaahr, die Schtudent Kounsil hot en Fundraiser fer ihre General Fund. Fer die letschde zwee Yaahre hen sie en Esel Basketballe Schpiel fer die Gemeeschaft ghatt. Alle Yaahr gebt es zwee Mannschafte: die Schtudente gege die Schulmeeschdern.

Sell is in em Schpiel. Die Schulmeeschdern hen die rote Koppschutzer un die Schtudente hen die blohe.

Ich waar glee bissel skeptisch en Basketballe Schpiel mit Esel zu sehe, awwer ich muss ehrlich saage, sell is eppes zu sehe. Es gebt Regeln fer es Schpiel: Yeder Schpieler muss en Esel hawwe. Mer darf entwedder die Esel reide odder die Esel mit der Zammn ziehe. Mer muss uff en Esel sei um en Basket zu schiesse. Sie yuuse ken Saddel, so wann mer uff en Esel hockt, muss mer es “bareback” duhe! All die Schpieler hen gemisst en Koppschutzer zu draage. Der Mann, der die Esel gebrocht hot, hot zu mir gsaat as ab un zu macht er Schpiele mit de Amische! Er hot mir gsaat, as die Amische sin am besten…sie schpiele arrig hatt un sin arrig kompetitive!

Mannichmol hen die Esel net gewollt zu laafe, dann muss mer sie ziehe.

Nadierlich sin die Esel schtoppkeppich, so wann en Schpieler mit dem Balle schnell laafe witt, geht die Esel so schnell wie er odder sie gehe will! Fast all die Schpieler henn gaar ken Erfaahring mit Gediere, so es waar eppes zu wache. Mannichmol, hot en Schpieler gewollt, uff en Esel zu reide, un die Esel hot er odder sie uff ihr Rick gschmisse! Sell hot mich zu lache gemacht. Sie hen vier nein Minudde Periods gschpielt. Am End waar es 19 zu 16 fer die Schulmeeschdern! Die Schportschtubb waar arrig voll mit Zugucker vun der Schtadt. Die Kinner hen arrig viel Gschpass ghatt un alle hen arrig viel gelacht. Ich weess net wie viel Geld die Schtudent Kounsil verdient hot, awwer ich glaab es waar zimlich viel…un sell is gut, Gell?

Do is en Audio Klip: Esel Basketballe!

Published in: on 03/04/2011 at 15:20  Comments (4)