Die Veggel fiedere!

Guder Daag Blog Leser! Well, letschde Sunndaag waar em Friehyaar sei aerschde Daag. Awwer do in Pennsylvaania is es nooch Winder! Selle Woch waar es in der 30’s un uff em Mittwoch hemmer glee wennich Schnee un Eis grickt! Der Wettermann saagt as die naegschde Woch es kalt bleiwe soll. Ich bin arrig ready fer es Friehyaahr un Daage die waarme sin!

Weil es nooch wie der Winder fiehlt, hawwich gedenkt as ich eppes schreiwe soll iwwer eppes was ich alle Winder gaarn duh. Ich gleich die Veggel zu fiedere. Alle Yaahr, baut November, henk ich en Veggelfieder vun meinre Hinnerbortsch. Ich yuus die gleiche Fudder alle Yaahr: schwatze Sunneblumm Kaerne. Es scheint as die Veggel selle Kaerne gaarn fresse. Ich muss die Fieder baut ee mol in der Woch widder aafille. Wu ich wuhn, seh ich verschiddliche Veggel wie:  Tufted Titmice, Schpaerlinge, Hausfinke, Schwatzkeep Chickadees, Cardinals un Downey Schpaechte.

Sell is der Downey Schpaecht. Er is schee, gell?

Ich gleich arrig viel in mei Kich zu hocke, mei Kaffi zu drinke un die Veggel zu wache. Mannichmol gebt es ee paar Veggel die agressive un geizich sin. Selle Veggel losse die annere Veggel net zu re Fieder kumme. Der Downey Schpaecht is gut fer sell. Er is greesser as die annere Veggel, so wann er datt hockt, is er der Boss.

Sell is en Hausfink. Er guckt fer Kaerne die uff em Bodde gfalle sin.

Mei Fraa macht gaarn Pickders un hot en neie Kamera gkaaft. Selle Winder hot sie viele Pickders vun de Veggel gemacht. ‘Sis aa schee die Pickders aazugucke. Sie hot waerricklich viele gude Pickders grickt. Die Kaerne koschdet nett so viel, un es macht Gschpass die Veggel zu wache. Ich glaab meh Leit solle die Veggel im Winder aa fiedere!

Do is en Audio Klip: Die Veggel fiedere!

Published in: on 26/03/2011 at 12:09  Comments (2)  

Schwere Zeite!

Guder Daag Blog Leser! Aerscht muss ich mol saage “Es dut mir leed”. Letschdes Woch hab ich ken Poscht gschriwwe. Ich un mei Fraa sin nooch Heem gange. Heem fer mich is Mohrsville, Barricks Kaunty, wu ich uffgwaxne bin. Mir hen en gleenes Gebottsdaagfescht fer mei Grossmudder ghatt. Nadierlich is es allsfat schee Zeit mit re Familye zu bringe.

Awwer mei Poscht fer selles Woch hot gaar nix mit “schee Zeite” zu duh. Zerick in November hen die Leit in Pennsylvaanien en neie Governor erwaehlt. Der Republikaner, der Tom Corbett, en Lawyer aus Pittsbarrick, hot gewunne. Nau is Pennsylvaanien in Gelddruwwel. Mir sin schier gaar mitaus Geld. So, der neie Governor hot en neie Budget in Matz ausgelegt. Mir hen schunn gewisst as er viel “Schneide” mache wollte…un var letschde Woch hot er endlich gsaat was er schneide meecht.

En grosse Geldschneide kummt vun Education. Er will meh as 50% es Schtaatsgeld weck vun de Schule un Kolleges nemme. As dihr schunn wisst, bin ich en Schulmeeschder un nadierlich hab ich en Broblem mit em Governor sei Blan. Fer was will er Education schmatze? Die Schule in PA hen schunn genunk Brobleme. Die hen net genunk Geld fer neie Bicher oder neie Waddefresser. Mir schwetze gaar net vun Schulmeeschdersalaries do. Der Governor’s Schneide kummt vun Geld, die fer Dinge in die Schule geyuust sin…Dinge die die Schtudente yuuse kenne.

Was nooch arrig schwer is, as viele Schule ihre Taxe net nuffmache kenne. Die Taxe sin schunn zu hoch fer viel Leit. Sell is abbadich wichdig do in Mitte- un Naddpennsylvaanien. Do gebt es nett so viel Leit un viel Leit verdiene un hen net genunk Geld um zu Lewe, sie kenne gaar net meh Taxe bezaale! Die Schneide vun dem Governor waerre die Kinner schamtze…un sell is net gut.

Ich denk as der Governor die neie Marcellus Shale Gas taxe soll. Do in Mitte- un Naddpennsylvaanien gebt es en grosse Natural Gas Industry. ‘Sis en neie Industry, yuscht sidder die letschde drei Yaahre odder so. Selle Industry verdient Billions vun Dallars alle Yaahr…un es gebt ken Tax? Pennsylvaanien kennte un sollte viel Geld vun selle Industry verdiene. Die Industry kummt in Pennsylvanian, vun Texas un Oklahoma, verhaust unser Busch un verschmutz unser Wasser, un mir griege kenn Gled dafer? Was is sell?

Ich bin ken grosee Bolitikalmann, awwer ich bin arrig bees mit alles was nau laaft. Ich hoff as unser Regiering in Harrisbarrick der Governor eischwetze kann. Yuscht mol sehne was rauskummt.

Do is en Audio Klip: Schwere Zeite!

Published in: on 19/03/2011 at 08:02  Leave a Comment  

Die Faaschtzeit is widder do!

Guder Daag Blog Leser! Well, die Faaschtzeit is widder do. Gschder hen ich un mei Fraa 17 Dutzen Faasnachts gmacht. As dihr schunn wisst, sin die Faasnachts allsfatt en wichdige Deel vun Faaschtzeit in unsre Kuldur. Do wu ich wuhn, in de Bariye vun Central Pennsylvaania, sin die Faasnachts net so gut bekannt. Wann ich sie fer Freinde mache, wolle sie die Faasnachts allsfat mit Zucker esse! Fer mich is sell so luschdig. Ich gleich mei Faasnachts mit Budder un Melassich….aye yummer, sie sin so gut selle Weg!

Dinschdaag is der echde Daag fer Faasnachts zu esse, awwer weil ich mei schunn am Samschdaag gemacht hen, hab ich schunn aagfange sie zu esse! Mittwoch is aa arrig wichdig fer uns Deitsche. Mittwoch is Aschermittwoch. Viel vun uns waerre in die Karrich geh um unsere Asche zu griege. Ich waerr fer schurr aa datt. Dann misse mir 40 Daage waarde bis Oschder. Darrich die Faaschtzeit hot mei Karrich en Gottesdinscht alle Mittwochowed. Aerscht fange mir mit en gleene Iems aa, normally esse mir Supp dann gehne mir in die Karrich fer Lieder un Gebete. Ich find es arrig gut mit mei annere Karrichleit die Iems zu esse.

Uns Deitsche hen unsre eigene Traditions bei Faaschtzeit, awwer zerick in Deitschland is es aa en wichdige Zeit. Die Daage var Aschermittwoch is Fasching odder Karnival datt driwwe in em Alde Land. In Schtedt wie Mainz un Kologne gebt’s yo richdige grosse Feschde mit Schtrutze un Kostumes. Ich glaab viel Bier waerrd aa gesoffe! Awwer es Fescht is wichdig weil, darrich die Faaschtzeit kenne sie net so feiere!

Es macht nix aus wu du bischt, ich winsch alli-epper en hallicher Fasching un en wertvolle Aschermittwoch. Esst viel Faasnachts un drinkt glee bissel Bier uff em Dinschdaag!

Do is en Audio Klip: Die Faaschtzeit is widder do!

Published in: on 06/03/2011 at 12:48  Comments (5)