Frische Farewe in unsre Kich!

Guder Daag Blog Leser! As viel vun eich schunn wisst, hen ich un mei Fraa zerick in Moi 2010 en Haus gkaaft. Unser Haus hot drei Schlofschtuwwe, en Wuhnschtubb, un en Kich un Essschtubb. Darich der Summer un Schpotyaahr hemmer viel in em Haus nei geduh. Unser Haus waar in em Yaahr 1966 gebaut un ich muss ehrlich saage, wann mir em Haus gkaaft hen, waar es nooch in em Yaahr 1966. Alles drin waar altmodisch un die Farewe in de Schtuwwe waare direkt aus de 1960s un 1970s.

Zum Glick hemmer net gemisst viel grosse Projeckts zu duhe. Awwer mir hen ausgemacht, as all die Schtuwwe  nei aagschtriche waerre misse. Mir hen schunn die drei Schlofschtuwwe aagschtriche un selles Wochend hemmer gsaat, nau kummt der Kich.

Datt is die Wand mit so viel Lecher. Die hemmer schunn geblaschdert.

Die Kich/Esschtubb waar weiss un en Wand waar pastelgrien. Die griene Wand waar abbadich gfress. Die Wande hen aa viel Lecher un aa viel Grache ghatt. Nadierlich hemmer die mit Blaschder gebessert. Sell hemmer am Freidaagowed gemacht, es ausdauert en Nacht fer die Blaschder zu daerre. Aa am Freidaagowed hemmer “Painter’s Tape” geyuust so die Fareb net uff em Holz un Diere kumme sei.

Ich mit der Painter's Tape.

Am Samschdaagmariye, nooch ich mei Kaffi gedrunke hab, hemmer aagfange aazuschtreiche. Mei Fraa, die en Kunschtschulmeeschderin is, hot die Farewe gewaehlt. Sie hot beige un schokolaad gewaehlt. Sie hot gewollt en Wand as en “Accent Wand” zu sei. Un dihr wisst schunn, wann die Fraa eppes hawwe will, waerd es so sei!

Mei Fraa mit der Roller. Sell is die Accent Wand.

Mir hen aerschtens mit zwee Pensils all die “Eischneide” gemacht. So hemmer all die Grens aagschtriche, zum Beischpiel, wu die Wand un die Dachwand zammekummt un aa wu die Wand un der Bodde sich aadrefft. Wann mir faddig mit sell waare, hemmer die Wande mit em Roller aagschtriche. Wann mir faddig waare, hot die Kich arrig anders ausgsehne. Alles waar frisch un nau unsre Kich is in em Yaahr 2011. Wann alle die Farewe darich waar, hemmer unsre Kunscht widder ghenkt.

Nau is es faddig un alles zerick wu es geht.

Do kann mer die annere Wand mit der beige Fareb sehne.

Ich bin arrig froh as es endlich vorbei is un aa froh mit wie gut es guckt.

Do is en Audio Klip: Frische Farewe in unsre Kich!

Published in: on 27/02/2011 at 12:35  Leave a Comment  

De Bresidents ihr Daag!

Guder Daag Blog Leser! Well ich muss en annere Blog Poscht iwwer en Feierdaag, der in Hanning do in Amerikaa is. Mundaag is Bresidents Daag, es gebt ken Poscht, ken Schul un die Baenks sin aa nett uff.

Im Yaahr 1880, hot unser Kongress  der dritte Hanning en Feierdaag gemacht. Zur selle Zeit waar es dem Waschington sei Gebottsdaag benaamt. Darrich die 1900s hot Kongress gewollt nicht yuscht dem Waschington zu ehre, awwer aa all die annere Bresidents, awwer nix is vun sell auskumme. Es waar in de 1980s wann Kumpanies hen aagfaange “Bresidents Daag Sales” zu hawwe. Vun was ich gelese hab, hot die Regiering es Naame vun dem Waschington sei Gebottsdaag zu Bresidents Daag nimmi officially ge-ennert.

Do sin ee paar Facts iwwer die Bresidents un ihre Gebottsdaage:

1. Zwee wichdige Bresidents hen ihre Gebottsdaage in Hanning: der Waschington un der Lincoln.

2. Es gebt zwee annere Bresidents mit em Hanning Gebottsdaag: der William Henry Harrison un der Ronald Reagan.

3. Zur Zeit hemmer 44 Bresidents ghat.

4. Der Bresident, der nau in em Weiss Haus wuhnt, hot en Gebottsdaag in Auguscht.

5. Der Munet mit de menschten bresidential Gebottsdaage is Oktower mit sex: der Jimmy Carter, der Rutherford B. Hayes, der Chester Arthur, der Dwight Eisenhower, der Theordore Roosevelt, un der John Adams.

6. Die Munete mit de wennichste bresidential Gebottsdaage sin Tschuun mit dem George H. W. Bush un September mit dem William Howard Taft.

7. Es gebt yuscht een Daag im Yaahr, der zwee Bresidents deele: der Zwette November, un die sin der Warren G. Harding un der James K. Polk.

8. Der eenzichste Bresident vun Pennsylvaania, der James Buchanan, hot sei Gebottsdaag uff em 23. Abrill.

9. Der Schtaat, wu die menschte Bresidents gebore waare is Virginia. Acht Bresidents waare in Virginia gebore: der George Waschington, der Thomas Jefferson, der James Madison, der James Monroe, der William Henry Harrison, der John Tyler, der Zachary Taylor, un der Woodrow Wilson.

Unsere Bresidents hen so viel Gudes un aa mannichmol Schlechdes fer unser Land geduh. Ich hoff as uff em Mundaag, all mei Blog Lesers kenne en Minudde nemme um en Gross Dank zu saage an all unsere Bresidents. ‘Sis en Job, es ich nett duhe wott. Es gebt zu viel Schtress un zu viele grosse Decisions zu mache.

Was denkt eich? Wottet eich Bresident sei?

Do is en Audio Klip: De Bresidents ihr Daag!

 


Published in: on 19/02/2011 at 12:16  Comments (2)  

En grosse Weis fer Schportleit!

Guder Daag Blog Leser! Selle Woch will ich eppes iwwer mei Samschdaag schreiwe. Alle Yaahr gebt es in Harrisburg die greeschte Weis fer Drausschport in Amerikaa. Es heesst: die Eastern Sports and Outdoors Show. Geschder sin ich, mei Fraa un mei Bruder dattgange. Mir all sin Leit die viel Drause duhe. Die Weis hot so viel zu sehne gewwe! Sell waar hart zu glaawe. ‘Sis allsfat bei re Pennsylvaania Farm Show Complex. Die Complex hot meh as sex Gebeier, un alle waare  mit Kumpanies un Leit voll gepackt!

Die zwee greeschde Schports fer die Weis waare Angle un Yaage. Es hot dausende vun Fischgatte un Boots gewwe, un arrig viel Flinte aa gewwe. Es hot aa viel Outfitters vun de ganze Welt gewwe. En Outfitter, is en Kumpanie, die mer yuust fer uff en Yaag odder fer Anglerees zu geh. Die Kumpanies waare vun schier gaar yeder Schtaat un viel vun Kanada un annere Lenner aa. Mer kennt en Safari in Sudd-Afrika odder in Zimbabwe buche, fer Salmon in Alaska angle odder fer Moose in Neifundland yaage. Alles was meeglich is, waare datt.

Do sin ee paar Boots zu kaafe.

Es hot aa viel gleene Kumpanies gewwe. Kumpanies die hot viele Dinge zu verkaafe. Mer kennt Jerkey vun alle Wildgedeier kaafe, viel Camogleeder, Campingmaschiene, Gedierekunscht, Blockheiser, Hausrod fer Drause, Messer un so viel annere Dinge! Es waar warricklich zu viel zu sehne! Ich waar arrig mied wann mir alles darrichgange waare.

Sell is mei Bruder uff em Schockelschtul. Ich weess net wie viel es gekoscht hot.

Es hot zehe Dollar gekoscht reizugeh un mir hen unser Kaarde uff em Internet kaaft. Sell waar gut, wann mir aakumme sin, misste mir net in der Line schtehe. Awwer ich muss ehrlich saage, es waar so voll! Ich weess net wie viel Leit datt waare, awwer es misste Dausende sei. Un in em Parkblatz waare alle die Maschine vun viele verschiddliche Schtaade.

Es hot so viel gschtoffde Gedeier, wie selle Hasch.

Ich un en grosse Grizzlybar. Got sei dank, waar er schon Dot!

Ich hab nix kaaft awwer mei Aage waare gross. Naegschdes Yaahr will ich fer schurr mol widder geh.

Do is en Audio Klip: En grosse Weis fer Schportleit!

Published in: on 13/02/2011 at 13:15  Comments (6)  

En wichdiger Deitscher – Aadeel 2!

Guder Daag Blog Leser! Well, zerick in Oktower hab ich Aadeel 1 vun selle Series gschriwwe. Aadeel 1 hot mit dem Henry Muhlenberg zu duh. Aadeel 2 hot mit annere wichdige Deitsche aus em unserem Land sei frie Yaahre kummt: der Conrad Weiser.

Der Conrad Weiser (gebore Johann Conrad Weiser) hot vun dem 2. November 1696 bis dem 13. Tschulei 1760 gelebt. Er waar en Pennsylvaanisch Deitscher Pioneer, Iwwersetzer un gude Diplomat gschwischich die Pennsylvaania Colony un die Insching. Er waar Bauer, Soldaat, Karrichman, Gaerwer un Richder. Er waar en Emissary in grosse Councils gschwischich Insching un die Colonies, abbadich Pennsylvaaia, darich die 18. Yaahrhunnert un die Siwwe Yaahr Grieg.

Do is en Pickder vun em Conrad.

Der Conrad waar in 1696 in die gleene Schteddel Affstät in Herrenberg, Württemberg gebore. Im 1709, sei Mudder is vum Fiewer gschtarewe. Der Conrad (sei Daadi) un sei Familye waare mit de Dausende vun Refugees, die Deitschland verlosse hen. In em Yaahr 1710, Keenich Anne vun England erlaabt 10 Schiffer mit baut 3,000 Detischer nooch em Nei Yarrick Colony zu faahre.

Der Daadi Weiser hot sei Familye nooch em Schohaire Daal, Nei Yarrick gebrocht. As der Conrad (der Yunger) 16 Yaahre alt waar, hot sei Daadi ya gsaat fer ihn mit de Mohawks zu wuhne. Darich sei Zeit mit de Mohawks hot der Weiser viel iwwer die Mohawk Schprooch un de Iroquois ihre Kustoms gelannt.

Uff em 22 November, 1720 hot der Weiser en yunge Deitsche Maedel, die Anna Feck, gheiert. Im 1723 hen sie die Susquehanna Riwwer Sudd aus Nei Yarrick gfoligt un hot ihre yunge Familye uff re Bauerei in Womelsdorf, Pennsylvaania (net weit Weg vun wu Redding heitzudaag legt) gebrocht. Sie hen varzehe Kinner ghatt, awwer yuscht siwwe davun sin Uffgwaxener gewest.

Dem Weiser sei Colonial Arewet hot im 1731 aagfange. Die Iroqouis hot der Shikellamy, en Oneida Chief, as en Emissary zu de annere Dreibs un die Britisch gschickt. Der Shikellamy hot uff em Susquehanna Rewwer bei Shamokin gewuhnt. Der Shikellamy un der Conrad sin gude Freinde gwaare. As der Shikellamy nooch Philadelfi fer en Council faahre misse, hot er der Conrad mitgebrocht. Die Iroquois hot der Conrad gedraut un hot ihm as en adopted Soh vun de Mohawks konsiddert. Der Weiser hot der Governor un der Council gedallt, un vun sellre Zeit an, hen sich druff seinre Arewet viel verlosse. Der Weiser hot aa en Follow-up Council im 1732 iwwersetzt.

Do is der Shikellamy.

Darich die Treaty in Philadelphi im 1736, der Shikellamy, der Weiser un die Pennsylvaaniers hen en Deed gemacht, wubei die Iroquois ihr Land (vun em Delaware Rewwer un Sudd vun de Blohbarriye) verkaafe misse. Sell hot die Lenapes (die Dreib, die selle Land waricklich besesse hen) bees gemacht. In re Siwwe Yaahre Grieg, hen die Lenapes mit de Franseesich gfochde awwer die Iroquois sin allsfatt mit de Britisch gfochde.

 

Darich der Winder vun 1737, der Weiser browiert en Fried gschwischich die Sudd-Dreibs un die Iroquois zu mache. Er is nooch de Iroquois ihr Haaptschtadt, Onondago, gange. Die Iroquois hot der Conrad as en guder un rechtschafflicher Mann gfunne. Sie hot ihn der Naame Tarachiawagon (Halter der Himmels) gewwe. Im 1742, der Weiser hot en Treaty gschwischich die Iroquois un die Englische Colonies in Phiadelfi iwwersetzt. Vun sellre Treaty sin die Lenape nooch re Ohio Daal gange. Im 1744, waar der Weiser Iwwersetzer fer die Treaty vun Lancaster, gschwischich die Iroquois un die Colonies vun Pennsylvaania, Maryland un Virginia.

Sell is wie der Weiser sei Naame gschriwwe hot.

Der Weiser is uff sei Bauerei uff em 13. Tschulei, 1760 gschtarewe. As er gschtarewe is, hot en Irquois gsaat: “Mir hen en arrige wichdige Mann verlore un nau hocke mir im Dunkel…weil nau kenne mir net so gut mitenanner verschtehe.”

Dem Weiser sei Noochkemmlinge hen arrige wichdige Lewes aa ghatt. Ihre Dochder hot der Henry Muhlenberg gheiert un ihre Seh waare der Peter Muhlenberg, en General in em Continental Army un der Frederick Muhlenberg, waar der aerschde Schwetzer vun em Amerikaanische House of Representatives. En Gross-Grosssoh, der Peter Weiser waar mit em Corps of Discovery mit de Lewis un Clark Rees.

Heitzudaage is der Conrad Weiser allsfatt mit uns. Es gebt vier Bletze die sei Naame henn:

1. Der Conrad Weiser Haus in Womelsdorf, Barricks Kaunty. Sell is aa wu er begraabt is.

2. Camp Conrad Wieser, en 500 Aker YMCA Camp fer Kinner in Barricks Kaunty.

3. Die Conrad Weiser Schul Dischtrikt, in Wescht-Barricks Kaunty.

4. Der Weiser Busch, mit 17,691 Aker in Carbon, Columbia, Dauphin, Northumberland and Schuylkill Kaunties.

Dem Conrad Weiser sei Haus.

Die Conrad Weiser High School.

Wie eich sehne kennt, der Conrad waar en arrige wichdige Deitsche! Ich bin arrig schtolz as er eene vun uns waare!

Do is en Audio Klip: En wichdiger Deitscher – Aadeel 2!

Published in: on 05/02/2011 at 08:56  Leave a Comment