Em Grundsau sei Daag!

Guder Daag Blog Leser! Well, Dinschdaag is en wichdige Daag fer uns Deitsche! Uff em Zwette Hanning is Grundsaudaag. Ich hab gedenkt as selle Wochs waerr ich glee bissel vun re Gschichde selle Feierdaag schreiwe.

Grundsaudaag is en Feierdaag, der uff em zwette Hanning in Amerikaa gfeiert is. Die Gschichde geht so: wann es drieb is un der Grundsau aus seinem Loch kummt, waerrd er sei Loch verlosse. Sell meehnt as der Winder schunn bald vorbei is. Awwer wann es sunnich is, waerrd der Grundsau sei Schadde sehne un zerick ins Loch laafe, un der Winder waerrd fer sechs Woch meh ausdauere.

Heitzudaag gebt es viele Feschte frieh am Mariyet um der Grundsau zu sehne. In Sudd-oscht Pennsylvaania, Grundsau Lodges feiere es Feschtdaag mit Versommlinge. Versommlinge sin Feschde wu es en Iems gebt, Redde sin ghalde, un vielleicht glee bissel Muysick in em Mudderschprooch sin gschpielt un gsunge. Uff soddiche Feschde gebt es yuscht Deitsch, wann epper en Englische Wadde saagt, muss mer Geld bezaahle!

Der Feierdaag hot as en Pennsylvaanisch Deitsche Kustom in Sudd-oscht Pennsylvaania in em 18. un 19. Yaahrhunnert aagfange, hot sei Aafang in alde Europaische Wedder Gschichde. Datt hot es en Badger es Wedder gsaagt. Es greeschde Grundsau Fescht is in Punxsutawney, Pennsylvaania. Der Grundsau datt heest Punsutawney Phil. Der Haaptmenner vun Punxsutawney draage Tuxedos un Schtitzhiet fer es Fescht!

Der Phil un eener vun em Haaptmenner.

Der Grundsau (Marmota monax) is en Freindschaft vun re Eechhaas Familye! Sell hab ich net gwisst! Der Winder bis nau is arrig kalt gewest un es hot viel Schnee schunn gewwe. Ich hoff as uff em Dinschdaag, der Phil  sei Schadde net sehne waerrd! Was denkt eich?

Do is en Audio Klip: Em Grundsau sei Daag!

 

 

Published in: on 30/01/2011 at 13:01  Comments (4)  

En Friehyaahr fer die Mudderschprooch!

Guder Daag Blog Leser! Well, Geschdrowed hemmer drei Inches Schnee grickt. Nau, wann ich uff em Thermometer guck, saagt es 18 Graad Fahrenheit. ‘Sis aa arrig windig do bei mir. ‘Sis yo Winder do in Midde-Pennsylvaania. Ich gleich der Winder un der Schnee. Ich weess as viel Leit  es arrig net gleiche, awwer ich gleich es. Schunn sidder mir en gleene Bu waar, hab ich der Winder gaarn ghatt.

Awwer mei Poscht fer selle Woch hot mit em Friehyaahr zu duh. Selle Woch hab ich en EPoscht vun dem Michael Werner grickt. Domit hot er en Attachment mitgleimt. Es waar der Program fer “En Friehyaahr fer die Mudderschprooch 2011”. 2010 waar es aerschde Yaahr fer es, un es waar arrig glicklich. “En Friehyaahr fer die Mudderschprooch” is en Series vun Events die alles mit Pennsylvaanisch Deitsch Kuldur un Schprooch zu duh hen. Es laaft vun em zwette Hanning bis Tschulei.

Do is en PDF File vun em Programm: EFFDM Program 2011

Sie henn aa en Facebook Drupp Seite

Wann eppes gebt, das net uff em Programm schteht, waerr ich es uff mei Blog poschde. Ich hoff as viel vun meine Blog Leser en Event bsuche kenne. Ich waerr fer schurr uff ee Paar vun de Events sei.

Bis naegschde Woch, bleibt waarm un gsund!

Do is en Audio Klip: En Friehyaar fer die Mudderschprooch

Published in: on 21/01/2011 at 17:51  Comments (4)  

Mir hen en guder Deitscher verlore.

Selle Woch hab ich gelannt as en guder Deitscher un en guder Freind vun mir gschtarewe is. Der Lee Thierwechter vun Belleville, Mifflin Kaunty, waar en echder guder Mensch. Er is am Mundaag der 10. Yenner in seinem Haus gschtarewe. Er waar sanft, ruhig, gscheidt, un allsfatt en Scheenerman.

Er waar uff em zwelfde Tschulei (sell is aa mei Gebottsdaag) 1929 in Nadd-Lebanon Taunschip gebore. Er waar em Robert un re Edna Thierwechter ihr Soh. Er hot die Neda Kreide in Auguscht 1956 gheiert. Er hot drei Seh ghatt un fimf Kinskinner ghatt. Er hot vun re Fredericksburg High Schul in 1947, re Lebanon Valley College in 1951 un vun re Penn State University in 1956 mit Degrees in Biology un Agriculture gegraduated. Er waar en Medik in der Army in em Korean Grieg vun 1951-1953.

Er hot Agriculture an der Milton Hershey Schul gelaernt. Dann hot er fer Eastern States Farmers Exchange gschafft. Er waar mit seinre Luddrische Karrich in Reedsville gschefdich. Er waar en Scholar, Schreiwer un Schulmeeschder vun Pennsylvaanisch Deitsch un Kuldur.

Der Lee hot ich un der Yossie mit unserem Deitsch Textbuch arrig viel gholfe. Er waar eener vun unsere drei Editors. Ich hab viele Samschdaag-mariyets in seinre Kich ghockt un uff em Textbuch gschafft. Selle Zeit waar allsfatt blassierlich. Selle Zeit waar aa arrig wichdig fer mich. Mir hen hatt gearewet awwer aa viel gelacht. Der Lee hot luschdige Schtories aus seinre Kindheit verzaehlt, un alles waar in Deitsch nadierlich. Ich kann mich gut erinnere as er en scheene Bild in seinre Kich hot. Es waar en Bild, as er selwer gemolt hot. Es waar vun em Haus un Bauerei wu er uffgewaxne is. Er waar arrig schtolz uff sellre Pickder.
Mir waerre der Lee arrig viel vermisse. Mei Gedenke un Gebete sin mit seinre Familiye. Macht’s gut Lee!
Do is en Audio Klip: Mir hen en guder Deitscher verlore.
Published in: on 13/01/2011 at 18:42  Leave a Comment  

Is unsere Gsellschaft verhaust?

Heit hab ich in die Zeiting gelese as es nooch widder en Schiesserei do in Amerikaa gewwe hot. Selles Mol waar es in Arizona gewest. En Kongressfraa hot en Town Meeting ghatt un en yunge Mann is uff em Stage glaafe un hot die Kongressfraa in ihrem Kopp gschosse, dann hot er sich rumgedreht un hot in die Crowd gschosse. Wann alles vorbei waar, waare 6 Leit Dot, 19 beschaedicht un nau die Kongressfraa liegt in Grankehaus un es guckt net gut fer sie aus.

Die Kongressfraa, die Gabrielle Giffords, waar en Demokraat un der Schiesser, en 22 yaahrige Bu, waar arrig bees weeich Fraa Giffords Bolitikal Ideas. Ich kann net verschtehe was is letzt mit soddiche Leit. Ya, ich hab mei bolitikal Ideas un sie sin net die gleiche vun annere Leit, awwer sell is keen Grund rum zu laafe mit en Flint un Leit schiesse! Ich hab gedenkt as Amerikaa en Freies Land waare, un en Demokratie wu Leit frei sin zu denke was sie wolle. Mei Amerikaa is en Land wu verschiddliche Ideas vun verschiddliche Leit zammekumme kenne um en besseres Land zu schaffe. Unsere Founding Daadis waerre aa so denke, Gell?

Wer hot Schuld? Ich weess net was zu saage, es gebt zu oft Schiesserei do in Amerikaa. Is es die Medias Schuld? Is es die Bolitikal Parties Schuld? Alle Parties saage Sache die unfreindlich weeich die annere Parties sin…sell verschteh ich schunn. Awwer wann mer in Angscht lewe muss, weeich seine Ideas…sell is net mei Amerikaa. Ich hab gedenkt as Amerikaa waar en Land wu mer Freiheit zu schwetze un zu denke kennte…mitaus Angscht davun zu hawwe. Vielleicht is mei Amerikaa vorbei? Ich hoff net.

Unsere Leit misse zammekumme um unsere Brobleme zu fixe. Ich weess schunn as es viele Brobleme do in Amerikaa gebt. Viel Leit sin mitaus Arewet, viel Leit hen net genunk Geld um Ess-sache zu kaafe odder ihre Rechlinge zu bezaahle. Viel Leit sin mit em Kongress un die Regiering bees. Awwer, unseres Land un unsere Constitution gebt uns die Meeglichkeit unsere Brobleme zu fixe, mitaus Gwalt. Ich frooge mei Mitbrieder zu bede fer unseres Land un fer die Leit die Gschder gschosse waare. Nau is die Zeit fer unseres Land endlich zammezukumme un zammeschaffe fer die bessere Gut.

Do is en Audio Klip: Is unsere Gsellschaft verhaust?

Published in: on 09/01/2011 at 12:46  Comments (1)