Grischtdaag Gschenke un Nei Yaahr Winsche!

Guder Daag Blog Leser! Well, der Grischtdaag is widder vorbei. Ich hoff as alle vun eich eppes gudes vun em Belschnickel grickt hett. Ich hab Grischtdaag mit meinre Familiye gebracht. Uff em Nacht vor Grischtdaag sin mir uff em Karrich gange. Der Gottesdinscht waar arrig gut mit viele gude Lieder un der Karrich waar voll brennend vun viele Kerze. Nooch em Gottesdinscht sin mir nooch em Haus mei Bruder gange fer en gleene Fescht. Mir hen gudes Esse gesse un viel gudes Bier gedrunke.

Ich, mei Daadi un mei Bruder bevor em Gottesdinscht.

Uff em Grischtdaag waare mir alle zamme uff em Bauerei mei Daadi…sell is wu mir Grischtdaag allsfatt feiere! Mir hen Mariyets-esse datt gesse un dann waar es Zeit fer die Gschenke uffzumache. Es Wuhnschtubb waar voll mit scheene Kaschde. Ich un mei Fraa hen viele Dinge fer unser Haus grickt. Een Gschenk die ich arrig gut gefunne hab is en Brotmaschiene. Mir hen es vun meim Daadi grickt. Ich hab net geglaabt as es eigentlich glappe waerre, awwer ich waar letz gewest. Mir hen es Geschdrowed zum aerschte Mol geyuust…un es Brot waar so appeditlich. Was ich net verschtehe kann is as mer yuscht die Ingredients reinschmeisse, alles zamme: Wasser, Budder, Mehl, Salz, Zucker un Satz. Mer macht es Deckel zu un druck mol der Gnopp. Drei Schtunnd schpaeder hemmer frisches Brot! Unglaablich, awwer waahr! Ich glaab as es in em Nei Yaahr ich viel Brot mache waerd!

Grischtdaag Middaagesse: Welschhinkel un viel annere gude Ess-sache!

Nau is es Zeit fer es Nei Yaahr zu feiere. Es gebt zwee grosse Traditions fer uns Deitsche mit em Nei Yaahr. Die aerschde is fer en Nacht bevor Nei Yaahr. Es is en Tradition as mer es Nei Yaahr eischiesse soll. Graad uff em Mitternacht soll mer drausse gehe un mit seinre Flint es Nei Yaahr richdig eischiesse. Mei Daadi hot das alle Yaahr geduh. Ich weess net ob ich es selles Yaahr duhe kann odder nicht. Mir sin zu em Fescht in en Schteddel eigelaade…ich glaab as ich datt net schiesse darf!

Die annere Tradition, kann ich fer schurr duhe! Fer Nei Yaahrs soll mer Seifleesch un Sauwergraut esse. Ich hab em Daadi un re Mammi mei Fraas zum Middaagesse eigelaade. Ich hab schunn mei Schtick Seifleesch gkaaft un es Sauwergraut hemmer schunn in Oktower gemacht…vun unser Graut, nadierlich! Mir Deitsche glaabe, as es gut Glick bringt wann mer Seifleesch un Sauwergraut uff em Nei Yaahr esst. Was macht eich fer es Nei Yaahr? Esst eich aa Seifleesch un Sauwergraut? Schiesst eich aa es Nei Yaahr ei?

Ich winsch all mei Blog Leser en gudes Nei Yaahr 2011! Do is en guder Beschluss zu mache: In 2011 waerd ich meh Deitsch schreiwe un schwetze!

Do is en Audio Klip: Grischtdaag Gschenke un Nei Yaahr Winsche!

Published in: on 28/12/2010 at 10:41  Comments (2)  

The URI to TrackBack this entry is: https://deitscheblog.wordpress.com/2010/12/28/grischtdaag-gschenke-un-nei-yaahr-winsche/trackback/

RSS feed for comments on this post.

2 CommentsLeave a comment

  1. Mer henn aa immi Sauwwegraat mit Seifleesch un Schnitz gesse un’s waar aa fer Glick bringe. Die Tradition vun em NeiYaahr reischiesse waar bloos in de Bungaarde geduh — die Eldre henn gsaat ass ‘s ebbes zu duh hot ghot mit der Ebbelbaampescht abzerschrecke. So, mei Cousin, Bob Young un sei Paep, Onkel Charlie Janney, un der alt Brock hot’s NeiYaahr eigschosse (sie alle henn Bungaarde ghot).

    Uff mei Gremmpaep sei Bauerei hot’s bloos 2 Ebbelbeem gewwe un mei Gremmpaep selewe waar der eensichscht Peschtabschrecker!

    In NM sell Gebraach iss bloos im SO NM wu fiele gleeni mennischde Gemeinschefte sinn.

    Deheem in NO NM mache mer Posole (Hominie mit Seifleesch un Chili), Tamales, un ne Salsa wu aus gekochte Black-eye Peas mit Lime-saft, Jalapenos, Zwiwwele, Gnowwelaach, un Silantro scheht fer die Tortillatschips neidunke.

    Un NeiYaahrdaag? Menudo (Posole mit Kuddelfleck un ee bissel meh Chilis) fer der Kater wechdreiwwe! 😉

    der Bil aus NM

  2. Joh, ich hab heit aescht zugheert 😀 Du hoscht ne Brotmaschien griggt. Sell iss gut awwe ich hab eens besseres: gude deitsche Saawedeich Schtaerder. Ich hab sell Rezept in en aldes Buch gfunne un die Schtaerder uffgerichtet.

    Sie iss schtaerrick mussich saage. Fun Sept. bis zum yetz hawwich ferschiddene Laebe gbacke fer die Schtaerder browwiere. Ich kenn gudes deitsches Brot wie im Aldeland backe sinn watt, un yetz browwierich Brot mit ee bissel Satz. Ich lieb deitsches Brot (wie aus Hamburg) backe (sell duhich fer mich selwer — ee bissel hatt finnich) awwe die meenschte Leit gleicht’s Brot ee bissel weecher.

    Yetz fersuchich fer en weecher Laeb awwe imminoh sauer. Ferleicht en Roggebrot mit Kimmel wu arrich sanft iss.

    Un weescht, ich die Leeb backe inre alde Offe wu ich aazinde misse. Ebwohl ich en Waddefresser hab, mei Kich, abbadich mei Offe, iss aus die 1940s. Kee Glaemmer awwe en schtaerrickes, gudes Deitschbrot mache kenn mit bloos Sauerdeeg, Salz, Mehl un Wasser wie Oma ‘s gduh hot!

    Ich hab gheert, awwe, ass mer Sauerdeegbrot inre Maschien mache kenn un wann Du ee bissel Schtaerder hawwe will, loss mer ‘s wisse!

    😀 der Bil aus NM (mitme gude, echte Brot)


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: