Der Advent!

Guder Daag Blog Leser! Well, nau is es Danksfescht vorbei…hett eich genunk gesse? Ich hab ya schunn. Der aerschde Yaagdaag fer Hasch is aa verbei…hett eich en grosse Hasch gschosse? Ich hab yuscht zwee im Busch gsehne awwer die waar net gross genunk zu schiesse!

Die Zeit gschwischich es Danksfescht un der Grischtdaag is aa en wichdige Zeit fer uns Deitsche. Die vier Woch in Dezember is der Advent. Es Watt Advent kummt aus em Latin Schprooch un bedeidet “kumme”. Der Advent is en Zeit vun erwaartede Waarting un Eirichding uff es Fescht vum em Grischt sei Geburt. In de Karriche, der Advent dauert vier Sunndaage. Bloh is em Advent sei Farb weil bloh Hoffning bedeidet. Viele Karriche hen en Adventkrans. Der Krans hot vier Kerze: drei sin bloh odder purple un eene is pingscht. Die pingschde Kerz is fer der dritte Woch im Advent (Gaudete Sunndaag). Die verdredet die Ros die uff em Laetare Sunndaag geyuust waar. Viele Karriche hen aa Advent Vesper Gottesdienscht. Normally, sin sie uff em Mittwoch Owed un die Gottesdienschte sin fer Gebeder. En dypical un bekaandes Karrichelied fer der Advent is “O kumm O kumm Emmanuel”.

Sell is en dypische Advent Krans.

En annere Advent Tradition die uns Deitsche feiere is der Advent Kalenner. Die hochdeitsche Lutteraaner hen Advent Kalenner schunn am Aafang es 19. Yaahrhunnert ghatt. En Advent Kalenner is en Kalenner fer die 24 Daage vun em aerschde Dezember bis Grischtowed. Yeder Daag macht mer en Schtick vun em Kalenner uff un drin kann en schtick Schokolaad odder en gleene Schpielsach sei!

Die Advent Zeit is aa en Zeit wann viel Leit ihre Heiser beschmucke. Die Leit duhe viel Lichter uff de Bortsche un uff de Beem in ihre Vedderschthef. ‘Sis allsfatt schee rumzufaahre um die scheene Grischtdaaglichder zu begucke. Viel Leit henke aa Beinekrans mit rode Benner. Die sin aa schee!

Hett eich aa Advent Kalenner odder Adventkrans da heem? Hett eich aa schunn eier Heiser beschmuckt?

Do is en Audio Klip: Der Advent

Published in: on 30/11/2010 at 11:59  Leave a Comment  

Halliches Dankfescht!

Guder Daag Blog Leser! Well, ‘sis widder die dritte Woch in Nofember un mir alle wisse was sell bedeidet: Dankfescht is bald do. Ya, uff em Dunnerschdaag is es Dankfescht. Es Dankfescht is en Daag fer Familye un nadierlich viele gude Ess-sache!

Ich gleich Dankfescht arrig viel, nicht yuscht fer der Iems awwer aa fer die Zeit mit meinre Familye zu hawwe. Alle Yaahr kummt mei Familye zu meim Daadi sei Haus un graad uff em zwelf Uhr esse mir. Mei Familye bauert Hinkel un Siesshinkel…so alle Yaahr hemmer en frisches Siesshinkel uff em Disch. Dann esse mir aa Filse, Aerebse, gedatte Welschkann, Brieh, Brot mit Butter un meinre Grossmudder ihr Kaerbsekuche. Alles is so appeditlich!

Ich denk as zu viel Leit denke yuscht uff em Iems an Dankfescht. Awwer, is der Iems die Ursach fer es Daag? Ich glaab net. Es Dankfescht is aa en Daag an der mir diefer denke solle. Mir solle an alles fer was mir Dankbaar sin denke. Selles Yaahr hawwich viele Ursache Dankbaar zu sei. Aerscht, ich un mei ganze Familye sin Gesund, in September bin ich zu meinre beschten Freind gheiert, in Moi hawwich en neies Haus gkaaft, un ich hab en gude Job. Uff em Dunnerschdaag waerr ich viele Danks gewwe fer alles was ich Dankbaar bin. Ich hoff as alle mei Blog Leser henn aa vieles uff was sie Dankbaar sei kenne.

Ich winsch eich en halliches Dankfescht un esst genunk awwer net zu viel!

Do is en Audio Klip: Halliches Dankfescht

Published in: on 20/11/2010 at 15:18  Leave a Comment  

De Soldaade ihr Daag!

Guder Daag Blog Leser! Uff em Dunnerschdaag sell Woch waar en Feierdaag do in Amerikaa. All Yaahr uff em elfde Nofember is Soldaade Daag. Es is en official Feierdaag, es gebt ken Poscht un viele Gschefde sin zu.

Soldaade Daag waar aerscht in 1919 as Armistice Daag benaamt awwer in 1938 hot der Bresident Roosevelt der Naame verennert zu Soldaade Daag. Der 11. Nofember 1918, waar der Aerschde Welt Grieg sei letschde Daag: wann Fried endlich zu Europa kumme is. Deitschland, Amerikaa, England und Frankreich hen die Schiesserei gschtoppt.

Schunn zidder 1938 gebt es all Yaahr Schtrutze un Gedechtnis Zeremonies in vielen Schtedt. All Druppe vun de Amerikaanische Soldaade sin erinnert: die Armee, die Navy, die Marines, die Luftarmee un die Koast Bewaare. As ich en Kind waar, bin ich all Yaahr uff meiner Schtadt sei Zeremonie gange. Es hot allsfatt viel Soldaade aus re Zwette Welt Grieg un Soldaade aus em Korean un Vietnam Griege gewwe. Heitzudaage hemmer neie Soldaade do in Amerikaa: Mannsleit un Weibsleit die in Irak un Afghanistan gfochde hen.

Do is die neie Soldaade Memorial in re Schtadt wu ich wuhn.

Mir sin all so dankbaar fer all die Leit die fer unser Land gfochde hen. Mitaus was sie gemacht hen, waerre unser Land net was es heit is. Unser Freiheit is vun selle Soldaade ihre Kurasche un ihre Aagschtalde versichert. Soldaade Daag is zu mir wichdig weil mei Grossdaadi hot in re Navy in re Zwette Welt Grieg in re Pazifick gfochde un meinre Grossmudder ihr Bruder waare in re D-Day Invasion umkumme. Ich bin arrig schtolz auf was mei Voreldere gemacht hen.

Ich hoff as uff em Dunnerschdaag all vun meine Blog Lesers en Soldaat bedankt hen. Wann dihr es nooch net gemacht hett, sei so gut un macht es so schnell wie meeglich. Die Soldaade bedaerfe es.

Do is an Audio Klip: De Soldaade ihr Daag.

Published in: on 13/11/2010 at 19:19  Leave a Comment  

Der Schtruwwelpitter!

Guder Daag Blog Leser! Selles Woch hab ich eppes gudes mit eich abzudeele! En neies Buch in Pennsylvaanisch Deitsch is rauskumme. Der Alt Brofessor, der Earl C. Haag, hot neilich die bekannde Gschicht: Der Struwwelpitter ins Deitch iwwersetzt.

Do is es neie Buch!

Fer die Leit, die Schtruwwelpitter net kenne, waerr ich glee bissel iwwer es Buch saage. Der Schtruwwelpitter: Gschpassiche Gschichde un lecherliche Pickders is en aldes Buch, es arrig bekannt in Hochdeitsch is. Schtruwwelpitter (Struwwelpeter uff Hochdeitsch) waar im Yaahr 1845 vun dem Heinrich Hoffmann gschriwwe un gedruckt. Es waar en Kinnerbuch mit lecherliche Pickders.

Selles Yaahr hot der Earl Haag es ganze Schtruwwelpitter ins Deitsch iwwersetzt…un ich muss ehrlich saage, er hot en wunnerbaar Job geduh! Es Buch is en Sammling vun 10 Gschichde. Die Gschichde sin luschdig awwer, mer kann eppes vun alle laerne. Die alle hen en Moral fer die Kinner. Eene, die ich arrig gaarn hawwe is “Die Gschicht vum Daumesuckler.” Selle Gschicht is vun en Bu, der sei Daume allsfatt am suckle is. Sei Mudder saagt as es nett gut is wann er sei Daume suckelt. Sie saagt as wann er net schtoppt, kummt der Schneider verbei un waerr sei Daume abschneide! Es Kind suckelt sei Daume, un dann uff em naegschde Page is der Schneider datt un schneidet sei Daume ab mit grosse Schere! Die Pickders sin so lecherlich!

So wann dihr en neies Buch uff Deitsch hawwe wollt, bsucht mol Edition Tintenfass un kaaft mol selles Buch! Es koschdet yuscht €13.90!

Do is en Audio Klip: Schtruwwelpitter

Published in: on 08/11/2010 at 19:03  Comments (3)  

Keenich Froscht!

Guder Daag Blog Leser! Heit will ich eppes iwwer der Keenich Froscht Schtrutz in Humbarrig schreiwe. Seitdem ich en gleene Kind waar, bin ich alle Yaahr uff em Keenich Froscht Schtrutz gange. As ich in der High Schul waar, hawwich in die Schtrutz marschiert…ich waar in der Baend. Mei Onkel hot en Haus graad uff em Schtrutz Route, so alle Yaahr gebt es en grosse Fescht datt. ‘Sis allsfatt schee mit re Familye datt zu schtehe um die Schtrutz zu lauere.

Ich un ee paar vun mei Familye uff re Schtrutz.

Do is en gleene Gschichte iwwer die Schtrutz:

Die Humbarriger Keenich Froscht Schtrutz is die greesste Schpotyaahr Schtrutz in re Oscht. Der Keenich Froscht Karnival (as es frieher bekannt waar) is schunn seit 1910 am laafe. Es hot ken Schtrutz gschwischich die zwee Welt Griege gewwe. Die Schtrutz hot viele High Schul Baends un annere Myusik Drupps vun all iwwer Pennsylvaania.

Datt is der Keenich Froscht!

Die Schtrutz is allsfatt uff em letschde Samschdaag in Oktower, so viele vun de Schtrutz Leit sin in Schpuckowed Kostumes. Selles Yaahr gebt es net so viele Schpucke awwer es gebt nooch baut fimf Schule Baends un viel annere Floats. ‘Sis allsfatt schee zu sehne, wie die Kinner laafe um es Zuckergschleckes vun de viele Floats zu griege.

Do is en Mummer Baend aus Ellsdaun.

Die aerschte Float is allsfatt Keenich Froscht un der letschde Float is der Bellschnickel. ‘Sis en scheene Owed fer die Familye bei re Keenich Froscht Schtrutz. Seid eich aa uff em Keenich Froscht Schtrutz gewest?

Ich un en Schpucker!

Do is en Audio Klip: Keenich Froscht


Published in: on 01/11/2010 at 18:47  Leave a Comment