Sauergraut mache!

Guder Daag Blog Leser!

Well, es is Schpotyaahr. Es gebt so viel zu duh im Schpotyaahr. Mer muss all de Bledder abnemme, es Haus ready mache fer der Winder un nooch eppes wichdig: Sauergraut mache!

Alle Yaahr macht mei Familye Sauergraut. Mir wachse Graut in unser Gaarde un dann in Oktower odder schpot September is es Zeit fer Sauergraut zu mache. Selle Yaahr waar ich net daheem zu helfe awwer meinre Fraa ihre Familye macht aa heemgemachte Sauergraut. Letschde Sunndaag waar Sauergraut Daag fer die Rote Familye.

 

Do sin die Grautkepp...ready zu geh!

 

Um Sauergraut zu mache, braucht mer yuscht ee paar Dinge: ee paar Grautkepp, Salz, en Haffe un en gude Grauthowwel. So leicht is es! Aerscht, mach sicher as dei Graut gebutzt waar…es kann ken Dreck odder Waerm gewwe. Dann muss mer die Grautkepp mit re Grauthowwel schneide. Mer muss net so schtarrick gehe…die Howwel is arrig schaerf un mer kennte en Finger verliere! Fer alle fimf Pfund vun Graut muss mer drei Essleffel vun Salz gewwe. Dann muss mer die Graut un Salz zammeriehre. Mir duhne sell mit re grossen Holzschtange.

Do is der Bob am Graut schneide...bass mol uff dei Finger!

Do is mei Jessica...sie is am zammeriehre.

Graut, Salz, un Aaremgraft...dass macht Sauergraut!

 

Wann mer all de Grautkepp abgschnidde hot, un genunk Salz gewwe is die Zeit um alles zu decke. Gwehnlich yuuse mir Grautbledder fer die Deckel. Dann muss mer yuscht waarde! Mir losse es yaehre fer baut sechs Woch. Wann es Sauergraut faddig is, schteckt mei Familye es in Gwaartglesser. Meinre Fraa ihre Familye yuust Ziplockseck un dann alles in em Frier.

Ich ess so gaarn Sauergraut. Esst eich aa gaarn Sauergraut? Hett eich es aa selwer gemacht? Es is en alde Tradition un ich bin so froh as mei Familye die Tradition nooch duht.

Do is en Audioklip: Sauergraut mache!

Published in: on 16/10/2010 at 07:48  Comments (1)  

The URI to TrackBack this entry is: https://deitscheblog.wordpress.com/2010/10/16/sauergraut-mache/trackback/

RSS feed for comments on this post.

One CommentLeave a comment

  1. Schtinkichi Esssache. Heisse Grummbiere Sellaat, Sauergraat, un Limbarriche Kees.

    Nau, ich ferschteh die aerschte Zwett, awwe Limbarriche Kees? Ach, mei Vadder waar schlimm derfer un ich aa. Mer henn imme en Schtickli Limbarriche im Schank. Vannich 2 Munete hawwich en Schtickli Limbarriche kaaft un muss saage ass ‘s schtinkt awwe ich gleich sie imminoch. ‘S iss en Kumfertfuht, finnich.

    Nau ich hab all die Witze driwwe gheert awwe sie schmeckt doh awwe guut. Zidder ich 6 Yaahr alt waar hawwich die Kees gegliche — mit Zwiwwele un Moschdert. Ee Schtickchli uffme Trisket Krecker iss am Beschte! Sie schtinkt to guut!

    Die Froog iss mer vun hinnich aagkroche: ferwas sinn die Deitsche so nah an schtickiche Esssache gbliwwe wie Heisse Grummbiere Sellaat, Sauergraat, un Limbarriche Kees? Ich ferschtehne ass mer wisse was gudi, schmeckichi Esssache sinn un mer henn unser Feewritts (fer sell simmer aa dick un fett), awwe wie iss’s ass mer so an die Schtinkiche gezoge sinn warre? Ee Froog anne Andwatt, denkich. Mer misse zergewwe ass Limbarriche Kees graad wie ferdaerewwe Schtrimfe schtinke, awwe mer esse sie nooch. Was iss dermit?

    Weescht ass Limbarriche Kees waar frieher iwweall gmacht un waar fer kaafe (‘Kraft’ hot Limbarrichi Kees uffmol gmacht – awwe die Gesellschaft hot’s uffgewwe bekaas Velveeta riecht besser aus (odde so hot mei Graempaep’s mir gsaagt).

    Heitesdaags esse die normale Leit was siess odde blah iss (wie McDonald’s) awwe mer Deitsche liewwe was sauer, bidder, odde schtinkich iss. Limbarrichi Kees! (Heitesdaags bloos in Monroe, Wisconsin gemacht watt.)

    bloos mei Gdanke driwwe,
    der Bil aus NM


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: