Zwee waerd eens!

Guder Daag Blog Leser! Selle Woch schreib ich en frohe Blog Poscht. Nooch em naegschden Samschdaag waerr ich nimmimeh leddich sei. Ya, sell is recht…naegschde Samschdaag is mei Hochzichdaag. Selle Woch will ich glee bissel iwwer die Zeremonie schreiwe un unser Fescht.

Mei Maed, die Jessica, hot deitsche Voreldere, awwer sie un ihre Familye kenne die Mudderschprooch nicht meh schwetze un verschtehe. Awwer, Deitsch waerd en wichdige Rolle in re Zeremonie schpiele. Unser Programm is Zweeschproochig getippt un unser Paare (der Hochdeitsch gelannt hot) waerd ee Paar Gebede uff Deitsch saage! Ich bin arrig froh fer sell…un ich glaab mei Grosseldere un mei Familye waerre aa froh sei.

Die Hochzich fangt um elf Uhr in mei Heemets Karrich aa. Sell heesscht: Becker’s Sankt Peters Ludderische Karrich in Molltown, Barricks Kaunty. Ich waerr es fimftes Gschlecht die in sellre Karrich gheiert waerd. Ich denk as sell arrig Eppes is.

Nooch em Hochzich gehne mir alle zerick nooch meim Daadi sei Bauerhof. Datt hemmer en grosse Picknick. Mir waerre Glamme un Wascht esse, mit viel annere ess-sachs. Nadierlich waerrd es aa Bier gewwe…mei Familye un Freinde drinke gaarn Bier! Mei Grossmudder waerd die Kuche backe…so ich weess schunn as es arrig appeditlich sei waerrd!

Mir hen 50 Leit eigelaade un all 50 waerre kumme! Ich bin net naerfich…ich bin ready. Die Jessica un ich hen schunn viel geduh fer die Hochzich un mir sin ready fer die Feiere! Mir mache kenn Heiraatsrees nau. Unser Blan is fer naegschde Summer nooch em Sudd-Wescht USA zu reese!

Do is die Programm fer die Hochzichzeremonie:

1. Argelvorschpiel

2. Der Braut ihr Voraageh

3. Die Bewillkumm

4. Die Mehningaussage

5. Es Daagesbede

6. Es Vorleses: Psalm 100

7. Es Vorleses: Es Evangelium vum Yohannes 15:9-17

8. Die Breddiche

9. Die Schwure

10. Der Zuruf

11. Der Heiraatsege

12. Die Bedes

13. Es Vatterunser

14. Der Sege

15. Die Ausgeh

Hoffetlich waerr ich ee paar Pickders in re Zukunft hawwe. Naegschde Woch waerrd es ken neie Blog Poscht gewwe…ich denk as eich sell verschtehe kennt!

Do is en Audio Klip: Zwee waerd eens!

Published in: on 19/09/2010 at 09:33  Leave a Comment  

Wollt eich Deitsch lanne?

Guder Daag Blog Leser! Selle Woch hawwich viel E-Poschts grickt….un alle hen mit neie Deitsche Klaesse zu duh. So ich hab gedenkt as ich die wichdige Information mit eich deele. Wann du epper kennt der Deitsch lanne will odder, wann du paerseenlich dei Deitsch verbessere odder meh lanne will, dann geh mol un bsuch eene vun de Klaesse!

1. Kutzschteddle University mit Ed Quinter as Schulmeeschder. Es laaft darich es Schpotyaahr. Ruf mol Jane Bennett aa fer meh Information: 610-683-1382.

2. Laengeschder Mennischte Gschichte Center mit Butch Reigart. Do is en Link zu en Flyer: Reigart Klaess

3. Longschwamp Taunschip mit Fred Fritch un Leroy Brown. Es laaft vun 2. September un alle Dunnerschdaag bis Diesember vun 7-8:30pm. Die Klaess koschdet $15. Mer kann meh Information griege: Leroy Brown 610-682-1619 odder Fred Fritch fritch@dejazzd.com

Ich hoff as ee paar vun eich eene vun de Klaesse bsucht. Wann epper macht mit, loss mich mol wisse un dann loss mich mal en Komment uff meim Blog. Un wenn epper vun eich wisse Information fer en annere Klaess, sei so gut un loss mich mol wisse, dann kann ich es uff em Blog schreiwe!

Macht’s gut bis naegschde Woch!

Published in: on 11/09/2010 at 07:29  Comments (2)  

‘Sis widder Kaunty Fescht Zeit!

Alle Yaahr do in Pennsylvaania un in annere Schtaate do in Amerikaa hemmer Kaunty Feschte. Gwehnlich sin sie in Aaguscht. En Kaunty Fescht is en alde Tradition die vun Europa gebrocht waar. In die gudi aldi Zeite waar en Kaunty Fescht yuscht fer die Bauere um ihre Gediere zu zeige un aa fer die Bauerfraa ihre Kuche un Bois un annere Sache zu zeige. Alle hen gewollt en Bloh Bendli zu gewinne. Heit zu Daage sin die Fescht nooch en Kontest fer die Bauere awwer sie sin aa en Blatz fer Leit die nicht Bauere sin. Uff en Kaunty Fescht gebts viel zu esse (gwehnlich is die Iems net so gsundlich awwer verdammtsei appeditlich), Displays aazugucke un aa die Meeglichkeit viele handgemachte Dinge zu kaafe.

Datt is die Midway. Datt is wu mer viel Esse kaafe kann.

Doe Kontest fer Gaardesache.

Die Sei gleiche uff em Fescht zu schlofe!

Do in mei Kaunty (Centre) gebt es aa nadierlich en Kaunty Fescht, awwer unser is glee wennig anners. Unser Fescht heesst: Grange Fescht un ‘sis schunn iwwer 130 Yaahre alt. Grange, as all die Leit do saage, is en Kaunty Fescht, awwer was arrig anners is, as viel Leit kumme zu Grange um zu kampe! Uff em Feschtgrund gebt es hunnert vun griene Zelter. Familyes kumme un lewe in die Zelter fer die ganze Woch! Viel vun de Familys henn die gleiche Zeltblatz ghatt fer meh as 80 Yaahre! Fer die Leit, die en Zelt nicht hot, kumme sie mit ihre grosse RVs. Ich weess net wie viel Leit datt kampe, awwer ich kann saage as es arrig viel is! Fer viel Leit do in Centre Kaunty, Grange is ihre yaehrliche Vacation!

Do sin yuscht ee paar vun die viele griene Zelter.

Grange waar letschde Woch. Ich un die Jessica sin uff em Sunndaag nooch unsre Bsuch in re Karrich gange. Mir hen datt Middaagesse ghatt un dann hemmer viel Zeit mit Freinde bei ihre Zelter gebrocht. Grange is allsfatt en gude Zeit. Ich finn Kaunty Fescht arrig wichdig. Es gebt Leit die Meeglichkeit Gediere zu sehne un aa all die bauerliche Displays aazugucke. Ich denk zu viel Leit wisse gaar nix iwwer Bauere un vun wu ihr Esse kumme.

Hett eich aa eier Kaunty Fescht bsucht? Was hett eich datt gesse?

Do is en Link zu Grange Fescht: Grange Fescht Website

Do is en Audio Klip: ‘Sis widder Kaunty Fescht Zeit

Published in: on 04/09/2010 at 07:21  Comments (1)