Die Holz Industry do in Pennsylvaania!

Letschde Woch hawwich en Poscht iwwer mei Reess nooch Nadde-Pennsylvaania gschriwwe. Selle Woch will ich glee bissel iwwer die Holz Industry do in Pennsylvaania schreiwe. As ich datt in Nadd-Pennsylvaania waar, hawwich die Pennsylvaania Holz Museum bsucht. Sell waar arrig inderessant un ich hab viel gelannt.

Datt is wu mer eifaahrt!

In Barricks Kaunty, wu ich uffgewaxne bin, hawwich gaar nix vun re Holz Industry in re Schul gelannt. Nau, wuhn ich in Nadd-midde-Pennsylvaania, un sell is en wichdige Schtick vun re Gschichte do. So, ich hab gewollt eppes iwwer es lanne.

Nooch em Burgerkrieg in de 1860s, hot die Holz Industry in Pennsylvaania aagfange. Pennsylvaania hot meh as 1.7 Millyon Aker vun Busch. Mir hen viel Weiss Beintbaame un viel annere Hatt Baame. Die Weiss Beintbaame waare fer Schiffe gebreicht. Un die annere Baame waare fer die Industrial Revolution gebreicht. Gschwichich 1870 un 1910, Pennsylvaania hot ihre Busch verlore. Alle die Baame waare nunnerghakt. Die meiste Leit waare net Deitscher, die waare Leit aus Schottland un Eierland. Die hen arrig schwer Arewet gemacht datt in de Busch un sie hen wie Diere gelebt. Die Arewet waar hatt un gfarlich. Die waare “Woodhicks” benaamt. Viel vun de Baame sin nunnerghakt un dann waare sie in die Susquehanna Rewwer gschmisse. Vun datt, sin sie nooch Williamsport gfaahre. Williamsport hot die grosse Saegmiehle. Es gebt Pickders vun sellre Zeit, die Susquehanna hot so viel Baame as mer iwwer die Rewwer laafe kennte un es Wasser nimmi aareeche!

Die Gleeser fer der Draen uff em Museum. Die Gebeier uff em rechte Seite waare wu die Woodhicks gelebt hen.

Nooch em Boomzeit, waar Nadd-Pennsylvaania mitaus Baame. Viel Leit hen gedenkt as sell net gut is, un mir solle neie Baame aablanse. Die Pennsylvaania Schtaat Busch Department mit Helfe vun de Civilian Conservation Corps (CCC) hot meh as 2.1 Millyon Aker Baame aageblanst. Un heit viel vun selle Baame sin in unsere Schtaat Busch odder in unsere Schtaat Parks. Pennsylvaania hot Hochdeitsche Reforrestation Idees in ihre Blan geyuust.

Baame uff em Susquehanna!

Wann mer meh iwwer selle Zeit in Pennsylvaanias Gschichte lanne witt, sei so gut un bsuche die Holz Musuem in Galeton. Es koschdet yuscht $6.00! Die Musuem hot so viel zu sehne. Sie hen en guti Display vun Dinge un viel Pickders. Sie hen aa viel Gebeier vun de Zeit. Sie hot en Saegmiehl un en widdergebaute Laager. Der Laager zeigt graad wie die Woodhicks un schpeeder wie die CCC Buwe gelebt hen.

Do is en Link zu re Museum: Pennsylvaania Holz Museum

Do is en Audio Klip: Die Holz Industrie

Published in: on 29/08/2010 at 19:59  Leave a Comment  

Penn’s Busch!

Weescht eich was Pennsylfaania mehnt? Ich bin schurr as viel vun eich schunn weescht, awwer fer die Leit die es net weescht, do is die Andwatt: Penn’s Busch. Ich denk as die Naame arrig gut basst. Viel Land in Pennsylfaania is Busch…un net yuscht Busch, awwer scheene Busch!

Uff em letschder Freidaag hab ich den Itch gahtt in der Busch zu geh, so bin ich gange! Wu ich wuhn in Midde-Pennsylfaania, gebt es viel viel Busch. Viel vun de Busch do sin “Staat Busch” odder en “Staat Park”. Ich denk as net genung Leit yuuse unsere Busch un Parks. Die sin so arrig schee un friedlich. Pennsylfaania hot baut 2.5 Millyunn Acker vun Staat Busch! Un es gebt 117 Staat Parks.

Well, uff em Freidaag bin ich nadde gfaahre. Mei aerschte Schtopp waar Ole Bull Staat Park. Ole Bull waar en bekannde Man do in Midde-Pennsylfaania in de frieher 1800’s. Er waar vun Norway un er wott en Neie Norway do in dem Busch vun Midde-Pennsylfaania grunde. Er hat es browiert, awwer es is yuscht een paar Yaahre ausgedauert. Nau, wu sei Haus waar is en scheene Staat Park. Mer kann do campe geh, fische, un uff viele Wege in die Busch laafe.

Die Kettle Grick in Ole Bull Staat Park.

Nooch em Bsuch bei Ole Bull, bin ich nooch dem “Groose Schneit” vun Pennsylfaania gfaahre. Was? Es gebt en Grosse Schneidt in Pennsylfaania? Ich hab gedenkt as sell waar in Arizona! – Well, ya, der groos Groose Schneidt is in Arizona, awwer Pennsylfaania hat en Grosse Schneidt aa. Sell is net so gross un breet as der in Arizona, awwer es is aa schee un eppes zu sehne. Der Grosse Schneidt finnet mer in Tioga Kaunty, yuscht een paar Meils vun re Schtadt Wellsboro. Es gebt nadierlich en Staat Park datt, es heesscht Leonard Harrison Staat Park. Der Grosse Schneidt is 1,450 Fuus dief un en Meil breet. Pennsylfaania’s Grosse Schneidt waar vun en Glacier dausend un dausende Yaahre zerick gemacht. Nau, heitzudaage fliesst die Beint Grick darrich der Schneidt. Es gebt en Laaf Weg vun em Reef nooch unner bis zu em Bodde un die Beint Grick. Der Weg heescht “die Welschhinkel Weg”.

Der Grosse Schneidt vun PA, im Richting Nadd gucke.

Der Grosse Schneidt vun PA, in Richting Sudd gucke.

En Hasch uff em Weslschhinkel Weg.

Die Staat Parks un Staat Busch koschdet nix zu bsuche. So, pack en Picknick un geh mol nooch en Pennsylfaania Staat Park odder Staat Busch, hock dich datt unner en grosse Beint Baam un ruh dich aus! Odder geh fer en Buschlaaf, odder fisch fer en Forell, odder yaag en Hasch im Schpotyaahr. Es gebt viel zu duh in en Pennsylfaania Staat Park odder Staat Busch.

Naegschte Woch waerr ich en Blog Poscht schreiwe iwwer die Holz Industrie in die schpeeder 1800’s in Pennsylfaania.

Do is en Link zu re Staat Parks Website: Pennsylfaania Staat Parks

Do is en Link zu re Staat Busch Website: Pennsylfaania Staat Busch

Do is en Audio Klip: Penn’s Busch

Published in: on 22/08/2010 at 07:24  Comments (4)  

En Bsuch zum Butscher!

Letschde Wochend bin ich heem (Barricks Kaunty) gange um mei Familye zu bsuche. Allsfatt wann ich heem geh, muss ich eikaafe geh. Es gebt Sache in Barricks Kaunty, die ich net in Central Pennsylfaania kaafe kann. Fer was kannscht du net in Central Pennsylfaania kaafe as du in Sudoscht Pennsylfaania kaafe, du froogscht? Aye yummer, es gebt viel! Gudi Chips, echde Fleesch, deitsche Kaes un meh un meh. All die Sache vun mei Kindheet die ich so gaarn ess.

Well selle Mol sin mir nooch dem Butscher gange um gude deische Fleesch zu kaafe. Mei ganze Lewe hot mei Familye viel Fleesch bei Peters Brothers Butscher Schop gkaaft. Peters Brothers is in Lenhartsville. Lenhartsville is en dypische deitsche Schteddel in nadd-Barricks Kaunty. Es legt gschwischich Humbarrig un Ellsdaun un is uff em Fuuss vun em Blohbariye.

Datt is es...Paradies uff em Aerd: en deitsche Butscher Schop.

Wann mer in en Butscherschop geht, riecht mer graad eppes so wunnerbaar. En deitsche Butscher schmokt viel Fleesch, un mer kann es Schmok rieche. Datt in Peters Brothers kann mer so viel unnerschittliche Ess-sach kaafe, un all sin appeditlich zu mir. Fer Beischpiel kann mer: Wascht (gschmokt un mitaus Schmok), Schteak, Humbarrigerfleesch, Schunkefleesch, Galleraa (Sei Fuuss Jelly), Kuddelfleck, Sackwascht un Lewwer kaafe. Mer kann yuscht net Fleesch kaafe, mer kann aa Kaes, Selaatbrieh un viel annere Sache kaafe.

Datt is viel unnerschittliche Fleesch zu kaafe.

Yumm, Kuddelfleck ess ich gaarn fer en Schnack.

Wann ich bei Peters Brothers bin, dann fiehl ich as ich fer schurr widder daheem bin. Un so is was fer en Gfiehl, gell? Uff selle Mol, hawwich Galleraa, Gschmokte Wascht, Kaes un Sackwascht gkaaft. Ich hab alles in mei Kooler gschteckt un bin heem gange. Nau kann ich recht esse!

Datt is die Kaes!

Was gleicht eich bei em Butscher? Esst eich aa viel Fleesch, odder gebt es aa Gaardesachesser die mei Blog lese?

Do is en Audio Klip: En Bsuch zum Butscher

Published in: on 17/08/2010 at 07:46  Comments (5)  

Mei Rees nooch Neifundland!

Guder Daag Blog Leser! Well, ich bin endlich zerick…yuscht mol Zeit, Gell? As ich in mei letschde Poscht gschriwwe hab, bin ich widder uff meim Motorraad gfaahre. Selle Mol sin ich un mei Freind vun Pennsylvaania nooch Neifundland, Kanadaa gange! Was fer en Rees! Selle Woch will ich eppes iwwer mei Rees auslege.

Ich un mei Freind, der Jake, sin uff em 23 Tschulei losgfaahre. Mir sin vun PA nooch Maine gange, un datt hemmer gecampt. Der naegschde Daag sin mir nooch Truro, Nova Scotia gfaahre. Datt hemmer mit en Freind vun mir geherbergscht. Mir hen kenni Problem uff em Grenz mit Kanadaa ghatt. Dann vun Truro, hemmer die Cabot Trail gfaahre, sell waar arrig schee. Die Schtross laaft uff em Koast mit dem Atlantische See. Nau waare mir ready nooch Neifundland zu faahre.

En Blick vun re Cabot Trail in Nova Scotia.

Neifundland is en Insel un mer misse em Ferry nemme um es zu erreiche. Die Ferry dauert baut 5 Schtunn vun North Sydney, NS zu Port aux Basques, NL aus. Die Iwwergang waar gut, es Wasser waar schtill…Gott sei Dank! Mir waare endlich uff em 26 Tschulei in Neifundland. Mir sin graad uff em Boot gfaahre un nooch Nadde gange. Was ich graadeweck Acht ghatt waar wie schee Neifundlands Landschaft waar. Die Bariye sin really anders als do in Amerikaa. Mir misse viel Acht gewwe vun Moose. Epper hot uns verzaehlt as es meh Moose uff em Insel gebt as Leit!

Unser Motorraade in re Ferry. Mir hen gemisst die Motorraade fest nunnerzubinne.

Western Brook Fjord in Gros Morne National Park.

Wie ich gsaat hab, es gebt viel Moose!

Der zwette Daag sin mir nooch Lanse aux Meadows gfaahre. Datt is wu in 1000 AD Vikings henn en Arewetslager gebaut! In 1970 hen sie en widdergebaute Viking Siedlung gebaut. Nau kann mer sehne, wie die Vikings datt in Neifundland gelebt henn. Vun datt sin mir nooch St. Anthony’s gfaahre. St. Anthony’s is en Fischschteddel. Es waar arrig glee awwer arrig freindlich. In St. Anthony’s sin mir “Screeched In”. Wann epper nooch Neifundland reest, kann mer “Screeched In” sei. Screeching In is en Zeremony un wann mer faddig is, is mer en “Official Newfie” gewest sei! Awwer was fer en Zeremony! Aerscht hemmer gemisst  Fischgleeder zu draage. Dann hemmer gemisst ee paar Schpruche in Neifundland Englisch saage. Die waar arrig hatt. Neifundland hot sei eegne Englisch (un mannichmol hemmer viel Probleme die Leit datt zu verschtehe). Dann hemmer gemisst Melassichbrot un Neifundland Sachwascht esse. Dann hemmer gemisst en dote gfrorne Cod bosse! Dann hemmer gemisst en Schluck Screech drinke. Screech is en bekanndes Neifundland Rum. Dann hemmer gemisst en Jigg zu danse. Endlich waare mir faddig. Am End hemmer en Official Zertifikat grickt. Mir waare “Newfies”!

Der Viking Siedlung in Lanse aux Meadows.

Mir sin ready "Screeched In" zu sei!

Dann sin mir nooch em Oscht Koast gange. Datt hemmer en Nacht in St. John’s (die Haaptschtadt) gebliwwe. Selle Schtadt is arrig alt un aa schee. Ich muss ehrlich saage, as die Leit in Neifundland sin die alle beschde! Alle sin nett, paersehnlich un hilfreich. Ihr Gastfreindlichkeet is meh als Wadde saage kenne. Noch baut 5 Daage uff em Insel sin mir widder mit em Ferry zerick nooch Nova Scotia gesegelt. Selle Mol sin mir vun en annere Port gfaahre un es Iwwergang hot meh as 12 Schtunn ausgedauert. Mir hen nadierlich uff em Boot gschlofe. Mir sin endlich uff em zwette Auguscht widder in Pennsylvaania aakumme. Mir henn meh as 4,200 Meile uff unsere Motorraade gfaahre. Die Rees waar arrig wunnerbaar. Ich will graad umdrehe un widdergeh!

Blick vun St. John's un sei Hafen.

Do is en Audioklip: Mei Rees nooch Neifundland

Published in: on 04/08/2010 at 07:33  Comments (2)