En Laagerfeier!

Do in Mittepennsylfaania hemmer viel Bariye un Busch. Deswege geht viel Leit gaarn kampe. Gschdrowed waar ich un die Jessica eigelaade zu mei Freinds fer en Laagerfeier zu hawwe. Ich bin schurr as viel vun eich aa in em Summer Laagerfeier hett, Gell? En Laagerfeier is arrig schee, mer hockt sich drausse um es Feier un dann kann mer eppes koche odder yuscht datt hocke un schwetze odder eppes singe.

Es Wedder Gschder waar arrig heess un schmodich. Mir sin nooch em Campingblatz schpeeder in em Owed gange, so die Sunn waar schunn am Sunneunnergang un es waar net so heess. Mei Freind hot en grosse Campingwaage un er un sei Familye waare in en Campingblatz net so weit Weck vun unser Haus. As mir aakumme sin, hot dem Bill sei Soh mich gfroogt eb ich Scooter mit ihm faahre will. Sell waar die aerschde Mol as ich en Scooter gfaahre hab, awwer sell waar Gschpassich! Es Campingblatz hot zwee groose Greese voll mit Campingwaage. Ich un der Jakob, sei Soh, sin um de zwee Greese uff unsre Scooters gfaahre.

Sell is mei Freinds Campingwaage.

As mir zerickkumme sin, waar es Feier schunn am brenne. Nau waar es Zeit zu esse. Do in Mittepennsylfaania gebt es en bekannte Laagerfeieress-sach: Bariyeboi. In Barricks Kaunty, wu ich uffgwaxse bin hot es selle Ding net gewwe. Awwer ich muss verhafdich saage as sie arrig appeditlich sin! En Bariyeboi is en heese Sandwich die in en abbadiche Eisepress (sell heesst Bariyeboieise) gemacht is. Mer schteckt es Press in die Feier un nooch baut zwee odder drei Minudde sin sie faddich! Die Meeglichkeete sin endlos. Zum Beischpiel, kann mer Pizzabariyeboi, Schunkefleesch un Kaes, Obscht un Grundnissbutter mit Marschmallow mache. Ich hab en Pizzabariyeboi mit Kaes, Pepperoni un  Tomaetdunkes gemacht un gesse. Sell hot so gut gschmackt!

Sell is en Pizzabariyeboi - es hot zwee Schticke Brot, Tomaetdunkes, Kaes un Schpeck. Mer legt es in re Bariyeboipress.

Um es zu koche, muss mer die Press in die Feier schtecke.

Un nau is es faddich...schlagt nei Buwe!

Die Jessica esst gaarn Bariyebois!

Schpeeder hawwich en paar Schticke vun Sackwascht iwwer re Feier gekocht.

Nooch de Bariyebois hemmer aa Schmores gemacht. Dann sin mir yuscht datt um re Feier gehockt un hen die Nadur eifach gegliche. Macht eich aa gaarn Laaagerfeier?

GEBT ACHT: Es waerrd ken Poscht fer die naegschde zwee Woche gewwe! Uff em Freidaag der 23. Yuli faahr ich uff meim Motorcycle nooch Neifundland, Kanadaa! Ich kumm uff em dritte Auguscht zerrick. Dann waerrd ich nadierlich en langi Poscht mit viel Pickder iwwer mei Reess schreiwe.

Do is en Audioklip: En Laagerfeier

Published in: on 19/07/2010 at 06:47  Leave a Comment  

En Gebottsdaag Iwwerfalle!

Well Blog Leser, heit bin ich een Yaahr elder. Ya, heit is mei Gebottsdaag un nau bin ich 30 Yaahre alt! Sell Yaahr, mei Fraa hot mich waerricklich iwwerfalle. En Freind vun ihr hot en Luftmaschien un sie hot uns en een Schtund lang Flugrees gkaaft. Ich gleich viel zu fliege, so ich bin arrig frehlich.

Ich hab gaar nix davun gwisst. Heit Mariyet hot sie mir gsaat: “Ok, nau gehne mir nooch Lock Haven. Dei Gschenk is datt.” Mir sin in ihre Maschien ghockt un sin nooch Lock Haven gfaahre. Mir sin graad zu em Flugblatz gange. Lock Haven hot en Flugblatz weil die Piper Luftmaschien Factory waar datt. Wann mir aakumme sin, hab ich dann gwisst was los waar. Datt war der Tom Kerstetter, en Mitschaffer vun meinre Jessica. As mir aakumme sin, waar er am Pre-Flight Check mache. Er hot en 1969 Piper Cherokee Luftmaschien. Sell waar arrig schee un er waar aa ready in die Luft zu geh.

Der Tom is am Pre-Flight Check mache.

Ich in em Co-Pilot Schtuhl.

Nooch em Pre-Flight Check sin mir in die Luftmaschien neigegraddelt. Er hot mir alles ausgelegt, was all die Dials un Gnepp waare. Dann sin mir uff em Runway gange un ab waare mir! Die Flug hot baut een Schtund ausgedauert. Mir sin iwwer Lock Haven, unser Haus, die Susquehanna Rewwer un all die scheene Bariye die mir do in Central PA hen gfloge. Der Tom is en guder Pilot un ich hab viel vun Fliege glannt. Glicklicherweess waar es Luft glaar un net so drieb. Die ganze Zeit hen mir gemisst Headphones zu draage, dann kennte mir mitenanner in die Luftmaschien schwetze.

Die scheene Bariye do in Central Pennsylfaania.

Nooch een Schtund sin mir widder an die Lock Haven Flugblatz kumme. Der Tom hot en wunnerbaar Landing gemacht. Alles waar so schee heit…was en Gschenk! Ich muss mich der Tom un abbadich die Jess bedanke fer so en wunnervolle Zeit!

Do kummt unsere Landing.

Um meh iwwer Piper Luftmaschiene zu lanne guck mol nooch: Piper Aviation Gschichte

Do is en Audio Klip: En Gebottsdaag Iwwerfalle

Published in: on 12/07/2010 at 14:36  Leave a Comment  

Es Schreiwer Fescht!

Guder Daag Blog Leser!

As ich selle Poscht schreib is die Mercury in re Thermometer schier gaar am koche! Mir hocke graad in en Hitzwelle! Heit soll es 100 Graad gewwe! Harriyesses, sell is zu heess, Gell? Un was aa schlimm is, as es arrig darr is. Die Felder un Grass sin braun. Mir misse Rege griege, awwer der Weddermann hot heit gsaat, as es kenn Rege selle Woche gewwe waerd! Alli-epper solle en Gebet fer die Bauern heit saage.

Geschder waar ich uff em Kutzeschteddel Folk Fescht. Alle Yaahr geh ich datt um alle die scheene Dinge zu sehne.  Normally, seh ich aa viel Leit die ich gut kenn. Un dann gebt es gute Deitsche Esse zu gleiche. Aa gebt es wunnerbar Folkkunscht wie Qwilte, Scheierschtanne, Heffnerei un annere Dinge. Alles is vun deitsche Handwerksleit selwer gemacht.

Datt kennte mer Scheierschtanne kaafe.

Selles Yaahr in Verbinding mit re Deutsch-Pennsylvaanisch Arbeits Kreis DPAK hot es uff em Folks Fescht en Deitsche Schreiwers Fescht gewwe. So en Idee gebts schunn in verschiddliche Gegende in Deitschland. Leit schreiwe eppes in ihre Dialekt un dann lese sie es zu en Drupp vun Leit. Selle Yaahr, as viel vun eich schunn weesst, gebt es “En Friehyaahr fer die Mudderschprooch” – en Yaahr lang Blan vun Events die eppes mit unsre Schprooch behandelt. Es Schreiwer Fescht waar en Schtick vun sellem Blan. DPAK is en Drupp vun Leit in Deitschland un in Amerikaa. Ihr Ziel is so viel wie meeglich fer die Mudderschprooch zu duh.

Zerick im Abrill is en Ruf ausgange fer Leit eppes in re Dialekt zu schreiwe, as es uff em Fescht gelese kennte. Geschder hot es acht Paersons die eppes gschriwwe hen. Manniche Leit hen Gedichte gschriwwe, annere hen Gschichte vun ihre Kindheit ausglegt un annere hen luschdige Witze gsaat. Ich hab en alde Poscht vun meim Blog iwwer Oscher gelese. Alli-epper hen ihr Schtick uff Deitsch gelese un dann hot en Iwwersetzing in Englisch aa gelese. Es Fescht waar arrig schee weil es so viel gude Schticke uff Deitsch gewwe hen.

Ich un der Michale Werner (vun DPAK) uff em Schreiwer Fescht.

Ich welle hoffe as es aa naegschde Yaahr so en Fescht aa gebt. Es is wichdig as mer die Dialekt in re Publik schwetze kann. Geschder waar en gude Advertisement fer uns un fer unsre Schprooch. Hoffetlich hot epper, der in der Crowd waar, glee bissel Uffregung fer die Schprooch grickt un nau will eppes lanne.

Do is en Audio Klip: Es Schreiwer Fescht

Published in: on 06/07/2010 at 06:46  Comments (1)  

Zerick vun altem Deitschland.

Guder Daag Blog Leser! Well, ich bin endlich zerick in Amerikaa. Fer die letschde 12 Daage waar ich mit 13 vun meine Schtudente in Deitschland. Die Rees waar arrig gut gange un nau meecht ich glee bissel vun ihr schreiwe.

Alle zwee Yaahr macht mei Schul un die Burghardt Schul in Buchen, Deitschland en Rumwexele Program. Zerick in Oktower waar 13 Deitsche Schtudente do in Pennsyilvaania un sie hen mit meinen Amerikaanische Schtudente gewuhnt. Nau, selle Tschuun sin mir riwwergfloge un hemmer mit de Hochdeitsche gewuhnt. Ihr Schtadt, Buchen, is in Suddwescht Deitschland. Die Landschaft seht gleich wie Pennsylvaania aus. Die Leit do schwetze aa en deitsche Dialekt die net so weit vun unserer Deitsch is. Sie saage: Gell, hoscht un annere Wadde die mir yuuse.

Ok, nau fer was mir geduh hen:

Freidaag 18. Tschuun: Mir sin vun State College, PA nooch Waschington DC un dann nooch Frankfurt, Deitschland gfloge. Die Fliege waare gut mitaus Problems.

Samschdaag, 19. Tschuun: Mir sin um baut Middaag in Frankfurt aakumme. Unsere Freinde hen uns mit em Bus aagedroffe. Mir sin baut een un en halwer Schtund gefaahre nooch Buchen. Uff em Samschdaagowed hen die Kinner Zeit mir ihrer Familye ghaat. Ich un die Jessica waare zu en Owedesse eigelaade. Die Esse waar arrig gut mit echde Hochdeitsche Esse.

Die Hauptschtrooss in Buchen

Sunndaag, 20. Tschuun: Die Kinner hen widder en Familye Daag. Ich un die Jessica sin nooch Neustadt an der Weinstrasse gange. Ich hab en Freind vun College der datt wuhnt. Er hot uns die Weinstrasse un all die Drauwe aagewisse. Mir sin aa uff em Hambacher Schloss gange. Sell schpielt en wichdige Rolle in em Deitschland sei Gschichte. Dann sin mir arrig schnell uff em Autobahn gfaahre un widder zerick nooch Neustadt. Dann hemmer der Riggelweg nooch Buchen gnumme.

Es Hambacher Schloss. Do waar die aerschde Deitsche Revolution fer Democracy.

Mundaag, 21. Tschuun: Sin mir nooch Rothenburg ob der Tauber gange. Selle Schtadt is arrig geliebt vun Tourists. ‘Sis en Schtadt graad aus em Middle Ages. Mir sin rum die Schtadt geloffe un hen viel gsehne. In Rothenburg, in der Sankt Yakob Kaarich is en wichdige Altar. Der Altar heesst: Der Haaliche Blut un waar gschwischich 1500 un 1505  vum em Tilman Riemenschneider gschnidde waerre. Sell is so was zu sehne.

Do is yuscht en gleene Schtick vun em Hallicher Blut Altar.

Dinschdaag, 22. Tschuun: Sell waar en Schuldaag. Die Kinner hen die gaanze Daag in die Schul gebrocht. Am Nummidaag hemmer der Bariyemeeschder vun Buchen gedroffe. Er waar sehr nett un hot uns gnaedichliche gewillkummet.

Mittwoch un Dunnerschdaag, 23 – 24. Tschuun: Mir hen en gleene Rees gemacht. Mir sin nooch Munich mit em Bus gfaahre. Aerschtens hemmer die Concentration Lager in Dachau gsehne. Sell waar arrig hatt fer viele meine Schtudente awwer sie waare froh as mir en Bsuch gemacht hen. Dann sin mir nooch die gross Schtadt Munich gange. Mir hen Owedesse in es gude gewissene Hofbäuhaus gesse. Nadierlich hab ich en Mass vun ihrem Bier browiert. Mir hen aa in Munich Deitschland gege Ghana in em World Cup Fuussballe Schpiel gsehne. Sell waar gut fer die Schtudente zu erfaahre…die Deitsche liewe ihr Fuussballe. Uff em Dunnerschdaag sin mir nooch Sudddeitschland gange um die Neuschwannstein Schloss zu sehe. Sell waar aa gut, weil es Wedder waar perfekt un die Kinner hen die Alps gsehne. Der Keenich Ludwig der Zweeter hen en scheene Schloss datt in de Alps gebaut.

Es Neuschwannstein Schloss...sis schee, Gell?

Freidaag, 25. Tschuun: Sell waar nooch widder en Schuldaag. Ich hab mit ee paar Deitsche Schtudente gedroffe un hab iwwer Amerikaa un Pennsylvaania gschwetzt. Die Kinner waare arrig neigierig, abbaddich hen sie viele Frooge iwwer die Amische, Yagen un Flinte in Amerikaa un fer was mer 21 Yaahre alt sei misse um Bier zu drinke!

Samschdaag, 26. Tschuun: Die Wochend waar fer mei Schtudente Familyezeit. Ich un die Jessica sin nooch Heidelberg gange. Mir hen die Schloss uff em Hiwwel gsehne un dann sin mir iwwer die alde Brick geloffe. Heidelberg is allsfatt arrig schee, awwer es gebt so viel Tourists aus Amerikaa un Yapan. Aye yummer, die Yapaner waar iwwerall mit ihr Kameras. Sie waar wie Moschgieder.

Ich un die Jessica uff em Alde Brick in Heidelberg.

Sunndaag, 27. Tschuun: Ich un die Jessica sin in die Karrich in Buchen gange. Die Karrich waar in de 1400s gebaut waerre. Ich find es schee in so en alde Karrich Goddesdienscht zu feiere.

Munndaag, 28. Tschuun: Sell waar unser letschde Schuldaag. Ich find es arrig gut as mei Schtudente viel Zeit in einer deitsche Schul gebrocht hen. Die Unnerschitte gschwische unser System un die Deitschen sin viel.

Dinschdaag, 28. Tschuun: Unser letschde Daag. Mir hen Buchen baut acht Uhr gelosse un sin mit em Bus nooch Frankfurt gange. Mir hen zwee Schtund in die Alt Schtadt in Frankfurt ghatt un dann sin mir nooch em Flugblatz gange. Um fimf Uhr sin mir widder in em Luftschiff gewest. Endlich sin mir baut halwer Zwelf am Owed widder in Pennsylvaania gewest. Die Rees waar arrig gut un die Kinner hen viel gelannt un erfaahrt.

Nau fer eppes Anneres: Net vergesse as die Kutzschteddel Folks Fescht laaft vun em 3. bis em 11. Tschulei. Ich waerr uff em Munndaag der 5. datt fer es Schreiwer Fescht. Wann du aa datt sei waerrscht, sei so gut un saagt “Guder Daag” zu mir! Do is en Link zu em Fescht: http://www.kutztownfestival.com/

Do is en Audio Klip: Zerick vun altem Deitschland

Published in: on 01/07/2010 at 06:29  Leave a Comment