Ich bin fatt!

Guder Daag Blog Leser. Ich will eich wisse losse, as ich fer die naegschde zwee Woche fatt bin. Ich flieg nooch Deitschland mit 13 vun meine Schtudente. Wann ich zerickkumm, waerr ich fer schurr en lange Blog Poscht mit viele Pickders schreiwe. Macht’s gut bis ich widder in Amerikaa bin!

Published in: on 15/06/2010 at 15:48  Comments (1)  

Ich waar im Guckbax!

Ee Mol im Munet gebt es en Pennsylvaanisch Deitsch Programm im Guckbax. Baerricks Kaunty TV (BCTV) weist die Pennsylvaanisch Deitsch Schtunn die aerschde Freidaag im Munet aa. Sell is en ee Schtunn lang Program mit re Doppelbock Saenger Chor. Die Chor singt ee paar deitsche Lieder un dann gebt es allsfat en Interview mit epper der eppes mit Deitsch zu duh hot.

Well, selle Munet waar ich der Gast bei re Programm. Die Programm laaft lewendig vun 10 Uhr am Mariyets bis 11 Uhr. Dann weist sie es widder uff em Samschdaagowed un widder uff em Sunndaag Mariyiet aa.

Du kannscht BCTV's Website bsuche! http://www.bctv.org

Uff em Freidaag Mariyets bin ich schunn uff em Schtross baut 6 Uhr. Ich bin nooch Reading gfaahre, sell is wu die Schtudio is. Die Rees hot baut 3 Schtunn ausgedauert. Ich hab mei Jeep in en Parking Garage in die Mitt vun re Schtadt geparkt. Dann bin ich in die Schtudio gange. Datt waar en gleene Schtubb wu die Chor schunn am hocke waar. Es hot drei Kamera gewwe un drei Leit, die all die technical Dinge geduh hen.

Graad uff em 1o Uhr hot die Programm aagfange. Die Chor hot baut fimf odder sechs Lieder gsunge. Dann hot der Francis Kline un die Joyce Hassler ee paar Bekannte gemacht. Dann waar ich draa. Die Dale Schwoyer (die Producer) hot mich geinterviewed. Sie hot mich ee paar Frooge iwwer mei Kindheit un fer was ich Deitsch schwetze kann. Sell waar all uff Deitsch. Dann hemmer ins Englisch gschwetzt. Mir hen iwwer mei Textbuch gschwetzt un was ich denk iwwer die Zukunft vun unsre Schprooch is. Mei Interview hot baut 20 Minudde ausgedauert. Awwer ich muss saage, as die Zeit arrig schnell geloffe is.

Nooch em Taping, bin ich widder heem gfaahre. Sell waar en abbadicher Daag fer mich. Un ‘sis allsfat schee heem zu kumme.

Do is en Link zu re Programm: Tschunn Programm

Do is en Audio Klip: Ich waar im Guckbax

Published in: on 06/06/2010 at 11:50  Comments (4)