En neies Haus!

Guder Daag Blog Leser! Ich hab mich graad ausgeruugt so ich selle Poscht schreiwe kennt. Zidder letschde Woch bin ich arrig schaffich gewest. Selle Woch hawwich endlich mei neies Haus gkaaft. Ich un mei Verschprochene (die Jessica) hen gewollt en neies Haus kaafe. Zerick im Abrill hemmer schunn unser Such aagfange. Mir hen zwee Heiser aageguckt. Die aerschte hot uns arrig gegliche. So, mir hen en Gebott gemacht. Die Familye vun der Besitzer hot ya gsaat, un mir waare arrig froh.

Zu re gleiche Zeit as mir unser Gebott gemacht hen, hemmer aa viel Zeit mit Wells Fargo rumgebrocht. Heitzudaage is es arrig schwer en Mortgage zu griege. Die Regiering hot alle die Rechte ge-ennert wege alle die Probleme vun die Foreclosures un die Mortgage Kreisis. Mir hen gemisst so viele Babiere auszufille. Ich glaab ich hab mei Naame meh as 500 Mol gschriwwe! Awwer am Ende waar alles gut un mir hen die Mortgage grickt.

Datt is unser neies Haus.

Dann waar es Zeit alle unser Schtofft uffzupacke. Ich hab viel Kaschde vun meinre Schul heem gebrocht. Ich un die Jess hen alles in die Kaschde gepackt. Sell hot net so lang ausgedauert. Uff em Munndaag hemmer alle die law-maessiche Babiere faddig gemacht…es Haus waar endlich unser! Mir sin graad nooch unserem alten Haus gfaahre un hen drei Laschte zu em neien Haus gebrocht. Darich die Woch hemmer meh Laschte gebrocht. Uff em Dunnerschdaag hot unser Freind sei Trailer gebrocht…so mir hen viel Hausrod reigerickt. Freidaag hemmer meh Hausrod reigerickt. Uff em Samschdaag hemmer die letschde vun unsere Schtofft reigerickt. Unser neie Eisbax waar aa delivered.

Ich un mei neie Maehmaschien.

Nau sin mir vollig reigerickt. Mir sin arrig froh so viel Blatz zu hawwe. Geschder hemmer es Graas gemaeht. Es Haus braucht glee bissel BLA (Bleede Liebliche Acht). Mir misse die Schtuwwe aaschtreiche…awwer mer kann fer schurr do wuhne. Ich bin so froh as die Rausricke un die Reiricke schunn vorbei sin. Nau kenne mir unser neie Lewe uffschtelle.

Hinnich unser Haus is Foster Joseph Sayers Lake un die Bald Eagle State Park.

Do is en Audio Klip: En neies Haus

Published in: on 31/05/2010 at 06:47  Comments (5)  

En grosse Seierei!

Es gebt en grosse Seierei do in re Gulf vun Mexiko un ich bin arrig bees. Uff em 20. Abrill 2010 hot es en Explosion bei de Deepwater Horizon Eel Brunne baut 40 Meile vun Lousianna sei Koast gewwe. Nooch re Explosion is die Brunne umgfalle, un es die Eel is graad ins Wasser gschosse. Bevor die Explosion is die Eel aus em Grund in Deichele gflosse. Sell waar ok, dann kennte mer die Eel sicherlich griege. Nau die Deichele sin kaputt un die Eel kummt graad raus.

Do is en Pickder nooch re Explosion.

British Petrolium is die Kumpanie die die Brunne eegnet. Sie saagt as sie browiert alle Daag es Problem zu bessere. Awwer bis nau henn sie gaar nix gebessert. Sie denkt as gschwischich 5,000 un 100,000 Fesser vun Eel alle Daag ins Wasser fliesst! Sell is arrig schlimm! Die Koast Guard un BP browiere die Eel uffzubutze, awwer es gebt zu viel. Un nau die Eel is weit verbreitet. Viel Leit saage as die Eel schunn in die Welle sin un es fliesst nooch Florida.

Do is en Pickder vun Space. Mer kann die Eel in re Gulf sehne.

Viel Eel hot die Koast vun Louisianna, Alabama un Mississippi hergelangt. Es gebt schunn Darrballe uff em Sand! ‘Sis schlimm fer die Koasts, awwer wie schlecht is es fer die Fische un annere Gediere? Die ganze Esskett is vernicht. Es macht mich zum brille wann ich Pickders vun re Eel ins Wasser, un wann ich en Eel gedeckte Voggel seh.

Do is en dode Fisch. Es is uff re Lousianna ihr Koast uffgewesche.

Schunn seit lange, hawwich gsaat as mir meh Windenergie yuuse solle. Awwer Amerikaanern liewe ihr Eel. In Deitschland un in annere Europaische Lenner gebt es viel Erneubare-energie. Heitzudaage misse mir eppes Neies do in Amerikaa duhe. Mir kenne Wind, Solar odder annere Energies yuuse. Dann vielleicht waerre die Fische un Veggel sicher sei.

Ich hoff as BP und die Koast Guard es Problem schnell fixe kenne, awwer ich glaab as es en lange Zeit ausdauere waerd. Un alle Daag flieest meh Eel ins Wasser.

Was denkt eich? Solle mir allsfatt Eel yuuse? Denkt eich as sie es Problem schnell fixe waerre?

Do is en Audio Klip: En groose Seierei!

Published in: on 22/05/2010 at 12:24  Comments (1)  

Achoo….Gsundheit!

Guder Daag Blog Leser! Selle Woch will ich eppes iwwer mei letschde paar Daage schreiwe. Ich hab en grosse Problem. Selle Problem kummt alle Friehyaahr un Schpotyaahr. Weescht eich was es is? Ich saag dir: Allergies. Alle Friehyaahr (baut Moi) un alle Schpotyaahr (baut September) geht es mir arrig schlimm. Mei Allergies sin yuscht nicht schlimm awwer aa retzlich!

In em Freihyaahr hawwich Alleriges vun Blummeschtaab. Selle Friehyaahr waar arrig schlecht. Weess ich net fer was awwer geschder un Freidaag hawwich en Bax vun Schnuppdicher allsfat bei mir ghatt. Ich hab meh as 1,000 Mol geniesst…well es hot so gfiehlt. Un mei Naase waar wie en Zappe. Rotz is raus mei Naase gflosse wie Wasser. Es scheint as ich meh as 250 Schnuppdicher geyuust hab. Un nau mei Naase is arrig rot un es schmatz.

Harriyesses, geschder hab ich so oft geniesst as ich glee wennich daremlich waar! Ich hab mich hocke misst. Heitmariyet hawwich Halsweh un mei Schtimm klangt net richdig aus. Ich sollt heit uff em Karrich singe, awwer ich glaab sell geht net. Die annere Leit in em Chor daete mich rausschmeisse wann ich heit singe daet.

Viel Leit hen mich gfoogt: “Hoscht du eppes fer die Allergies genumme?” “Ya,” saag ich, “awwer mannichmol duht es nix!” Vielleicht soll ich zum Dokder geh. Awwer ich saag allsfat as mei Allergies sin yuscht schlimm zwee Woche im Yaahr. Awwer, die zwee Woche sin wie der Deiwle! Hoffetlich geht es mariye besser…yuscht mol sehne! Zum Glick hawwich Allergies vun yuscht Blummeschtaab. Ich kenn viel Leit die en Haufe vun Allergies vun Ess-sache un annere Dinge hen. Ich bedauere sie arrig viel. Allergies sin eppes die damit mir gebore sin. Ich hab aa gelese as viel Leit Allergies schpeeder im Lewe griege kenne. Hett eich aa Allergies? Wann ya, vun was?

Do is en Audioklip: Achoo…Gsundheit.

Published in: on 09/05/2010 at 07:20  Leave a Comment