Nau is Hockey Zeit!

Ich bin ken grosse Schport Mensch awwer zwee Schports hawwich arrig gaarn. Die sin Fuussball (net Amerikaanisch) un Eishockey. Schunn seit lang hawwich selle Schports gschpielt un im Guckbax aageguckt. Vielleicht waerr ich schpeeder en Schtick iwwer Fuussball schreiwe, awwer heit will ich eppes iwwer Eishockey saage.

Alle Friehyaahr kummt der beschde Zeit es Yaahr: die Stanley Cup Playoffs. Die NHL’s (National Hockey League) Yaahr laaft vun Oktower bis Abril. Darich es Yaahr, en Mannschaft waerd meh as 82 Schpiele schpiele. Die League waerd in Montreal, Kanadaa in 1917 gegrundet. Eishockey is en kanadaaische Schport awwer heitzudaag is es Schport die darich die ganze Welt gschpielt waerd.

Do is die Stanley Cup. Viel Leit saage as es die wichdichschte Schatz in Schport is.

Do in Pennsylvaania hemmer zwee Mannschafts: die Pittsburgh Penguins un die Philadelphia Flyers. As ich in Sudoscht-PA gebore waar, bin ich en grosse Philadelphia Fan. Ich lieb mei Flyers. ‘Sis schunn seit 1975 as sie die Stanley Cup gewonne hat. Die Penguins hen die Cup schunn 3 Mol gewonne. Die waare die beschde Mannschaft letschde Yaahr. Die beschde Mannschaft alle Zeit is die Montreal Canadiens. Sie hen die Cup schunn 22 Mol gewonne!

Sell is der Sidney Crosby. Er schpielt fer die Penguins. Er is eene de beschde Schpielers die Welt.

Selle Yaahr sin die Flyers un die Penguins nooch widder in de Playoffs. Mariyet beginnt die zwette Runde vun de Playoffs. Alle Runde sin die beschde vun siwwe Schpiele. Die Penguins schpiele gege die Montreal Canadiens un die Flyers schpiele gege die Boston Bruins. Wann die Penguins un die Flyers selle Series gewinne, waerre sie enanner dreffe! Sell waerd eppes! Oscht-PA gege Wescht-PA.

Do is der Simon Gagne. Er schpielt fer die Flyers. Er is arrig schnell un gut!

Hockey is schnell un hatt un arrig Gschpass aazugucke. Nemm mol glee bissel Zeit um en Schpiel im Guckbax zu sehne! Sei so gut un greisch mol fer die Flyers!

Do is en Audio Klip: Nau is Hockey Zeit

Published in: on 30/04/2010 at 18:53  Comments (5)  

En luschdige Gschicht!

Selle Woch hawwich gedenkt as ich en luschdige deitsche Gschicht, die ich gheert hab, mit eich deele. Selle Gschicht waar vun dem William Rupp (1911-1966) “der Busch Knibbel” verzaehlt.

En alde Bauer is mol nooch Atlantic City gange fer sich blessiere un hot er een vun dem grosse Wattshaus uffgschlagge. Der ganze Daag is er rumgeloffe uff em Boardwalk un bis Oweds waar er miet un de Fiees henne gebrennt wie alles. Es waar ihm gsaat as salzich Seewasser waerr arrig gut un der hot ausgemacht aa die Fiees mol ins Wasser schtecke fer ee while.

Er is zerick am Wattshaus, hot en Eemer grickt, un is nunner ans Wasser fer dich deel zu hole. Es waare nooch viel Leit in em Wasser un schtickt aa waar der Lifeguard. Er hot sich bekannt gemacht un hot gfroogt eb ams Recht waerr vun en Eemer voll Seewasser zerick nemme in seine Schtubb fer de Fiees zu soake.

Der Lifeguard hot gemehnt ‘sis waerr allrecht mit dem un so es Wasser datt waar, un der Bauer hot ihm gfroogt was koschdet? Der Kaall hot gsaat en Vaddel Dollar waerd sei. Der Bauer hot sei Seewasser bezaahlt, is zerick nooch em Wattshaus, hot die Fiees drin gsoaked, un es hot gut gschafft. Der Bauer hot so gut Gefiel druff as er ausgemacht hot, er geht Mariyets frieh fer nooch en Eemer voll Wasser un denn de Fiees noochemol soake eb er widder an laafe geht fer der Daag.

Maryiets frieh is er naus un nunner an der See gange. Ken Mensch waar datt. Der Lifeguard waar aa net datt. Es Wasser waar arrig nidder, der See waar weit drauss. ‘Sis waar viel weiter drauss als Oweds davor. Darrich die Nacht waar es Wasser nausgange, wie is eppe dutt vun Zeit zu Zeit am See.

Der Bauer hot es Ding mol ee while aageguckt un de Kopp gegrazt. Der Verschtand hot ihm schier gaar schtill gschtanne. Er hot widder gedenkt an em Vaddel das er der Lifeguard gewwe hot Oweds davor vun em Eemer voll Wasser. Er hot der See widder aageguckt. Es Wasser waar nidder un weit drauss. Harriyesses!, hot er gsaat, was seller Kaall awwer nooch en Business geduh hot Gschdrowed!

Do is en Audio Klip: En luschdige Gschicht

Published in: on 25/04/2010 at 11:53  Comments (1)  

Mei Laager!

Selle Wochend bin ich in der Busch gange. Ich bin en Mitglied vun en Yaegerlaager in Clinton Kaunty, Pennsylvaania. Mir hen alle Yaahr zwee Arewetwochende: een in Friehyaahr un een in Schpotyaahr. Selle Wochend waar es Friehyaahr Arewetwochende.

Sell is mei Laager.

Frieher, waar es normal fer viele Deitsche in Sudoscht-Pennsylvaania en Yaegerlaager zu aanemme. Die Deitsche wollte Hasch un Bar yaage un in Sudoscht-Pennsylvaania hen es ken Hasch un Bar gewwe. So die Deitsche sin Nadde gfaahre um zu yaage.

Sell is unsere Grick. Sie is hinnich vun em Laager.

Mei Yaegerlaager waar in de 1920s gebaut. Awwer mir hen es in de 1960s gkaaft. Mei Grossdaadi waar eener vun de aerschte Mitglieder. Nau mei Daadi un ich sin aa Mitglieder. Mir hen baut 14 annere Mitglieder. Alle kumme bei Barricks Kaunty (wu ich uffgewachsen bin). Unser Laager is in de Mitt vun Bald Eagle State Forest. Der Busch is arrig gross. Es hot meh as 198,000 Acker un liegt in fimf unnerschittliche Kaunties: Clinton, Centre, Mifflin, Snyder un Union.

Datt gebt es meh as yuscht Hasch un Bar. Es gebt aa Welschhinkel, Coyote, Grouse, Bieber un viel unnerschittliche Veggel. Es gebt drei Staat Parks, 47 Meils vun Forell Gricke, 340 Meils vun Grundschtroosse, un 27 Vistas. Ich bin arrig froh as es nooch viel Busch im Pennsylvaania gebt. Leit brauche Bletz zu geh, wu mer in re Nadur sei kann.

Sell is unsere Schtrooss.

Mei Laager is zimmlich weit Weck vun annere Leit. Es gebt ken Leckdrick un mer muss in en Briwwi yuuse. Mir hen Wasser in em Haus awwer es kummt vun em Brunne, so es Wasser is arrig kalt un arrig glaar. ‘Sis die beschte Wasser zu drinke, es schmackt so gut! Wann mer datt is, is mer waerricklich “Off the grid.” Ich gleich es arrig viel.

Sell is unser Briwwi.

Gleicht eich aa in der Busch zu laafe? Yaagt eich aa?

Do is en Audio Klip: Mei Laager

Published in: on 18/04/2010 at 09:29  Comments (6)  

Was gleicht eich aazuheere?

Myusick hot allsfat en wichdige Rolle in meim Lewe gschpielt. As ich yung waar hawwich die Saxophone un der Euphonium an der Schul gschpielt. Aa hawwich oft gsunge. Ich hab an der Schul gsunge un aa an meinre Karrich gsunge. As ich an der College gange bin, hawwich mit re Saxophone un dem Euphonium gschtoppt. Ich kann sie nooch schpiele awwer ich schpiel net meh in so en Baend. An der College hawwich gsunge. Ich waar in en grosse Kor un in en gleene Kor un aa in en Mannsleitkor. An der College hawwich richdig gelannt wie mer singt.

Ich kumm vun re myusicalisch Familye. Mei Grossmudder un mei Mudder hen die Glapperbax gschpielt. Mei Urgrossdaadi hot die Geig un die Banjo gschpielt. Mei Daadi hot die Ariyel gschpielt un mei Bruder hot der Trombone gschpielt. Mei annere Grossmudder waar en Saengerin. So as eich sehne kennt, Myusick waar awwer wichdig zu mir. Ich hab neilich en Mandolin gkaaft un ich laern mich es selwer. Ich gleich selle neie Inschtrument zu schpiele…un was arrig gut is, as mit em Mandolin kann mer zur naemliche Zeit schpiele un singe . Sell kennte ich net mit re Saxophone un dem Euphonium duh.

Dazu Inschtrumente zu schpiele un Lieder zu singe, heer ich aa gaarn Myusick. Ich hab en grosse iPod mit meh as 5,000 Lieder druff! Ich weess as sell viel is, awwer ich gleich all de Lieder. Ich heer gaarn Rock-, Volk-, Broadway-, Alderock-, Klassikal-, Inschtrumental- un Chormyusick. Wann ich en schlechde Daag ghatt hab, heer ich glee bissel Myusick un alles is widder OK. Viel Leit saage as Myusick en allgebreichliche Schprooch is, well ich bin eenich. Es macht nix vun wu du herkummscht odder welle Schprooch du schwetzscht. Alle kenne singe, schpiele un danse zu Myusick.

Gleicht eich aa Myusick. Was fer Baends odder Saenger heert eich gaarn?

Do is en Audio Klip: Was gleicht eich aazuheere

Published in: on 11/04/2010 at 12:38  Comments (4)  

Eppes net deitsche!

Heit is Oschdermundaag un sell bedeidet as ich net zu re Arewet gehe muss. Heit waar ich hungrig fer eppes net normal. Wu ich wuhn, gebt es viel unnerschittliche Essbletz, weil es en grosse College Schtadt is. Ich waar hungrig fer eppes exotisch, so ich hab en Freind vun mir aagerufe un hab ihn zu Middaagsesse mit mir eigelaade. Mir hen ausgemacht in en koreanisches Essblatz zu esse.

Datt is wu mir gesse hen.

Es Essblatz heesscht “Kimchi”. Kimchi is en abbadiches Ding in Korea. ‘Sis en gewaerzde Graut. Viel Ess-sache in koreanische Koche sin gewaerzig mit viel Peffer drin. In em Essblatz waar alles uff Englisch un Koreanisch gschriwwe. Sell waar gut weil ich kann ken Koreanisch lese odder schwetze! Wie in annere Aeschian Lenner, muss mer mit de Chopsticks (net en Gawwel) esse.

Wie mer sehne kann, der Esszeddel waar uff Englisch un Koreanisch.

Fer en Voresse hab ich gewaerzige Reiskuche bschtellt. Die waar arrig appeditlich awwer zimmlich hees! Dann hawwich Rinsfleesch Japchae gesse. Sell waar Rinsfleesch mit Reisnoodel un viel unnerschittliche Gaardesaach. Aa in koreanische Koche hot mer allsfatt vier Schissele uff re Seite. Die sin eppes siess, eppes sauwer, eppes gewaerzig un glee bissel Kimchi.

Datt sin mei Reiskuche...arrig hees awwer arrig gut aa!

Die Jessica browiert mit ihre Chopsticks zu esse. Mer kann aa sehne, die vier unnerschittliche Schissele uff re Seite.

Alles waar arrig gut un ich waar arrig satt. Sell is gut ab un zu eppes unnerschittlich zu esse un zu erfaahre. Gleicht eich aa aeschian Ess-sache?

Do is en audio Klip: Eppes net deitsche

Published in: on 05/04/2010 at 14:47  Comments (4)