Do kumme die Ieme!

Selle Woch waerd fer mich glee bissel eiferich sei. Ich un ee paar Freinde vun mir hen schunn im Schpotyaahr entscheidet zwee Iemekaschde zu hawwe. Mei Freinde wuhne uff em Bauerei net so weit Weck vun wu ich wuhn. Sie hen schunn viel Geiere un nau wolle Ieme aa hawwe. Ich bin allsfatt ginderested mit Ieme. Ich gleich Hunnich arrig viel un Ieme zu hawwe is en alde deitsche un Hochdeitsche Tradition.

Geschder bin ich nooch em Haus mei Freinde um die Kaschde zu baue gange. Mir hen zwee Kaschde gebaut un dann mei Freinde henn sie weiss aagschtriche. Nau sin mir ready fer die Ieme. Die Ieme kumme am Dinschdaag odder uff em Mittwoch. En Mann muss nooch Georgia faahre um die Ieme abzuhole. Zwee Iemekaschde hen baut 20,000 Ieme drin plus zwee Keeniche. Ich weess, sell is viel, hoffetlich waerre unsere Ieme nett aggressive sei. Ich will net oftmols gschtoche sei. Ich weess schunn as es bassiere waerre awwer hoffetlich net so oft!

Do sin ich, der Dave un die Joanna. Mir sin am Iemekaschde baue.

Do sin die gebaute Iemekaschde.

Sie sin faddich un ready fer yuuse!

Mir misse een Yaahr waarde bis mir uns Hunnich greige kenne. So selle Yaahr hen mir nix so viel zu duh. Die Ieme misse all die Arewet schaffe! Ich waerr meh vun meine Ieme schpeeder schreiwe.

Wie ich gsaat hab, der Dave un die Joanna hen viel Gediere uff ihre Bauerei. Do bin ich mit en Gees. Er is yuscht 7 Daage alt! Ich gleich selle Pickder arrig viel.

Selle Woch is arrig wichdig fer viele Deitsche. Heit faangt die Karwoch aa. Karwoch is die Woch gschwischich Pallemsunndaag un Oschder. Dunnerschdaag is der Griedunnerschdaag. Tradition saagt as mer eppes grien esse muss…so sei so gut un ess eppes grien! Sell bringt mer Glick im Yaahr. Freidaag is der Karfreidaag…der Daag vun dem Yesus sei Dod. Dann kummt Oschdersunndaag, der Daag vun dem Yesus sei Auferschtehing. Viele Deitsche gehne uff em Karrich un dann esse en grosse Iems mit re Familye. Sell waerr ich aa uff em Oschder duh.

Ich winsch all mei Blog Leser un Halliche Oschder!

Do is en Audio Klip: Do kumme die Ieme!

Published in: on 28/03/2010 at 11:56  Leave a Comment  

Seidel Kuche!

As ich en Kind waar, hab ich viel Zeit mit meine Grosseldre gebrocht. Mei Mudder un Mei Daadi hen gschafft so ich un mei Bruder waare allsfatt mit unsre Grosseldre. Mei Grossmudder, wie viel annere Grossmidder, hot oft gebacke. Ich bin mit gude Deitsche Backwaare uffgwaxe.

Bevor mei Grossmudder gschtarewe is, hab ich zu ihr gsaat as sie all ihre Reseete uffschreiwe soll. Zum Glick kennte sie all die Reseete errinere. Es grosse Problem waar as sie yuscht die Ingredients gschriwwe hot! Sie hot allsfatt gsaat, ich back mit meine Aaage un meinre Naas. Nau wann ich eppes backe will, muss ich aa mit meine Aaage un meinre Naas backe. Sell is net so leicht as man denkt!

Heit will ich en Reseet vun meinre Grossmudder deele. En Seidel Kuche is en Mariye-Esse Kuche. ‘Sis en dicke un schwere Kuche, awwer sell schmeckt arrig gut mit em Koppche Kaffi.

Seidel Kuche:

3 Koppche Braun Zucker

1/2 Koppche Budder

1 Koppche Millich

1 Teeleffel Backpulwer

1 Teeleffel Backsoda

Messerschpritze vun Salz

4 – 6 Koppche Mehl

Back fer baut een Schtund um 350 Grad.

Do sin ee paar Pickders:

Mer muss die Mehl un Braun Zucker zamme mische.

Wann alles zamme is, der Deeg is dick un schteif.

Sell is wie es guckt wann es faddig is. Guckt arrig appeditlich, Gell?

Ich hoff as en paar vun meine Blog Leser selle Reseet browiere. Wann epper es browiert, sei so gut un schreib mol. Es schmeckt arrig gut!

Do is en Audio Klip: Seidel Kuche

Published in: on 20/03/2010 at 17:03  Comments (2)  

Gude Esse un Gude Myusick!

Guder Daag Blog Lesern! Hemmer all die Uhre een Schtund vorgedreht? Ich hab net vergesse.

Well, ich bin graad daheem kumme. Nooch re Karich sin ich un mei Freindin nooch Millheim gfaahre. In Millheim is en gleene Essblatz. Es heesst “Elk Creek Cafe and Aleworks“. Sell waar yuscht es zwette Mol as ich datt waar.

Do is es Essblatz in Millheim.

Elk Creek is abaddich fer viele Grunde. Aerscht: sie macht ihr eigene Bier…un ‘sis wunnerbaar gut. Zwedder: All ihr Ess-sache kumme vun re Gegend. Sie versucht allsfatt yuscht “local” Dinge zu kaafe un zu koche. Dritte: sie henn viel Live Myusick.

Sell is die Bar wu mer gude Bier kaafe kann.

Fer Esse, hab ich en Supp vun Erdschwamm un hab en Schunkefleesch un Kaes Sandwich bschtellt. Fer Drinke hawwe ich zwee Biere ghatt, een waar en IPA un die annere waar en Bitter. Sie waare frisch, kalt un appeditlich!

Do is en Sandwich vun re Kich.

Heit hen sie en Bluegrass Baend (Die Brush Mountain Band) ghatt. Die waare arrig gut. Weil es Sunndaag waar, hen sie yuscht Gospel Myusick gschpielt. Sie hen en Gitarr, Mandolin, Bassgeig, Banjo un Geig in re Baend. Sie hen baut zwee Schtund gschpielt.

Do is die Brush Mountain Baend. Aye aye aye, hen sie gut gschpielt!

Wann du dich in Millheim, PA finnscht, geh mol zu re Elk Creek…ich verschprech as du gude Esse esse waerrscht un aa en gude Zeit hawwe waerscht.

Do is en Audio Klip: Gude Esse un Gude Myusick

Published in: on 14/03/2010 at 15:08  Leave a Comment  

Es Fescht in Lebanon!

Geschder waar es 15. Yaahrliche Pennsylvanisch Deitsch Erbe Fescht in Lebanon. Nadierlich waar ich datt un ich will eich glee bissel vun em Fescht auslege. Es Fescht hot um halwe Zehe aagfange un is bis baut vier Uhr gange. Es Fescht waar uff em Campus vun Harrisburg Community College in Lebanon. Sie hen en scheenes Gebei datt.

Um halwe Zehe hot der Nei Dopelhock Sanger Chor gsunge. Sie sin en Drupp vun Leit die uff Deitsch alde un neie Lieder singe. Geschder hen sie viel Lieder gsunge. Sie hen Heili Heilo, Loss mol Friede Sei, Yesus liebt mir un ‘Sis en gleeni Welt gsunge. Viel Leit in re Audience hen mitgsunge!

Der Nei Dolpehock Sanger Chor am singe.

Um halwe Elf hab ich en Rede gehalde. Mei Presentation war benaamt: “Pennsylvanisch Deitsch im 21. Yahrhunnert.” Ich hab glee bissel iwwer wie mer unsre Schprooch lanne kenne un was fer Resources gebt es um dei Deitsch zu verbessere. Ich hab aa en gude Lischt vun all die Deitsche Resources uff em Internet gewwe.

Ich am schwetze.

Ich hab aa Copies vun meim Textbuch verkaaft un unnergschriwwe.

Um halwe Zwelf hen der Hanswasch (der Bill Meck) un sei Parnter Ischkabibble (der Leroy Brown) ee paar Deitsche Witze gsaat un ee paar luschdige Gschichte ausglegt. Alles was sie gsaat hen waar uff Deitsch un dann uff Englisch gsaat. Sell waar gut, weil viel Leit in re Audience Deitsch net verschtehe kennte.

Der Hanswasch un der Ischkabibble am schwetze.

Um een Uhr hot die Dr. Diane Wenger en Presentation gewwe. Ihr Presentation waar: “der Samuel Rex: Pennsylvanisch Deitsch Verkaafsmann”. Sie hot viel Research in Schaefferschteddel gemacht un nau hot en Buch iwwer der Samuel Rex gschriwwe.

Die letschde Drupp waar um drei Uhr un sie waar die Schwadore Schalle. Die Schwadore Schalle is en deitsche Kinner Chor. Die Kinner sin gschwischich fimf un achtzeh Yaahre alt. Die Alice Spayd hot die Chor die Myusick gelehrt.

Uff em Fescht hot es arrig viel Handwerksmenner un Handwerksweibsleit gewwe. Sie hen viele scheene Dinge zu verkaafe. Alle waare nadierlich Pennsylvanisch Deitsche Handwerke. Es hot aa viel gude Deitsche Iems gewwe, wie Bot Boi, Schnitz un Knepp, Melassichriwwelboi un Barickbier.

En Besemacher.

Es hot scheene Heffnerei gewwe um zu kaafe.

Sell waar en gude Daag fer unser Schprooch un Kuldur.

Do is en Audio Klip: Es Fescht in Lebanon

Published in: on 07/03/2010 at 14:48  Comments (4)