Die Olympische Schpiele!

As viel vun eich schunn wisst, gebt es en grosse “zu duh” in Vancouver, Kanadaa. Alle vier Yaahre hemmer die Olympische Schpiele. Sell Yaahr hemmer die Winder Schpiele un in 2012 waerr es die Summer Schpiele in London gewwe. Ich paerseehnlich find die Winder Schpiele besser as die Summer Schpiele. Ich gleich die Ski,  Schlittschuh, Curling un Hockey Events zu sehne.

Do is die Logo vun de Vancouver Schpiele.

‘Sis allsfatt schee zu sehne, wann die ganze Welt friedlich zammekumme kann. In Vancouver gebt es meh als 80 Lenner uff de Vancouver Schpiele. Alle Owed kann mer im Guckbax die Schpiele aagucke. Ya, ich bin schtolz en Amerikaaner zu sei, awwer ich find as ich oftmols fer Schportler vun annere Lenner aa unnerschtitze. Sell find ich ok…mir sin alle Mensche, Gell?

Sell is schnelle Schlittschuh laafe. Sie geh arrig schnell!

‘Sis arrig schwer fer mich zu glaawe wie schnell und schtarrig die Schportlers sin (Mannsleit un Weibsleit). Die Downhill Ski Events sin so schnell. Wie kann mer iwwer 80 mph uff zwee schmaale Holzschticker uff em Schnee laafe? Odder iwwer 90 mph uff em gleene Schlitte uff em Eis faahre? Soddiche Leit sin verrickt! Awwer ich glaab as sie viel Schpass hawwe.

Ich wuensch as unsre Welt eftders friedlich zammekumme kennte. Schport bringt uns zamme. Ich wuensch as annere Dinge uns zammebringe kennte. Gleicht eich die Schpiele im Guckbax zu sehne? Was is eier Leiblingsschport bei de Olympische Schpiele?

Nooch eppes: Uff em 6. Matz gebt es en grosse Deitsche Fescht in Lebanon, PA. Do is en PDF File fer die Fescht. Geb Acht, ich waerr aa en Rede uff re Fescht behalde!

PA Germanfest

Do is en Audio Link: Die Olympische Schpiele

Published in: on 25/02/2010 at 06:58  Comments (5)  

En volli Woch…

Guder Daag Blog Lesern! Well mir hen en volli Woch selli Woch, Gell? Es gebt vier wichdige Daage nooch en anner die mir feiere solle. Ich waerr glee wennich iwwer die vier Daage heit schreiwe.

Sunndaag 14. Hanning – Feldi

Feldi is der gross Daag fer die Lieb. Hoffetlich hett eich schunn dei “abaddiche Epper” eppes kaaft. ‘Sis normal do Schokolaad odder Blume fer dei Liewe kaafe. Aa soll mer en rote Kaart mit viele Hatzer druff. Annere Leit geh gaarn ins Essblatz um en scheene Iems zu esse. Yuscht sei gewiss am wennichschtens “Ich lieb dich!” zu saage.

Do is en Hatz fer Feldi.

Munndaag 15. Hanning – Bresidentsdaag

Bresidentsdaag kummt alle Yaahr uff em Munndaag gschwischich dem Washington un dem Lincoln ihre Gebottsdaage. Mir wisse schunn as der Washington waar unser aerschde Bresident un der Lincoln waar der sechszehnde. Der Washington hot unser Land vun de Britisch gewunne. Der Lincoln hot unser Land darrich unser Burgergrieg gfiehrt. Bedrauerlich, hot der Lincoln nooch nicht lang genunk gelebt um es Land widder as een Land gsehne. As mir aa schun wisse, is der Lincoln im Abril 1865 gschosse. Mir solle uff die zwee Bresidents denke, awwer der Daag is aa fer all unsere 44 Bresidents.

Sell is der Mount Rushmore. Es gebt vier Bresidents uff: der Washington, der Jefferson, der Teddy Roosevelt un der Lincoln.

Dinschdaag 16. Hanning – Faasnacht

Faasnacht is der letschde Daag eb Faschtzeit. Faschzeit is die 40 Daage eb Oschder. ‘Sis Tradition uff em Faasnacht viel Faasnachtkuche zu esse. Faasnachtkuche sin glee Kuche die aus Grummbiere Deeg gemacht sin. Viel Leit esse sie mit Budder un Sirrop odder yuscht mit Zucker druff. Es macht nix wie mer sie esst…sie sinn allsfatt appeditlich. In annere Schprooche saage sie “Dicke Dinschdaag” fer Faasnacht un es gebt viele Schtrutze un grosse Partys.

Do sin frische Faasnachtkuche die ich am Samschdaag gemacht hab.

Mittwoch 17. Hanning – Aschermittwoch

Aschermittwoch is der Faschtzeit sei aerschde Daag. Mer soll in die Karrich uff em Aschermittwoch geh. Datt grickt mer Asche uff die Schtanne vun de gedreiliche Leit. Die Asche sin en Aazeiche vun Rei.

Sell is en Pickder vun epper der sei Asche grickt.

As mer sehne kann, gebt’s viel selli Woch zu duh. Ich mach nooch en Checklischt:

1. Saag “Ich lieb dich” zu epper.

2. Denk an unsre Bresidents.

3. Ess en Faasnachtkuche.

4. Griege mol Ascher uff meinre Schtann.

Ich welle mol hoffe as alle vun mei Blog Lesern kenne alle die vier Daage aa feiere! Macht’s gut biz zum naegschde Mol!

Do is en Audioklip: En volli Woch

Published in: on 14/02/2010 at 14:33  Comments (1)  

Der Phil hot Recht ghatt!

Well, der Phil, unser gude bekannde Grundsau, der es Wedder brofeseihe kann, hat widder Recht ghatt. Uff em Dinschdaag is er aus seim Loch kumme un hot sei Schadde gsehne. Sell bedeidet as es sechs Woche meh Winder gewwe waerd.

Der Phil, graad aus seim Loch in Punxsutawny.

Der Phil, graad aus seim Loch in Punxsutawney.

Heit as ich uffwacker waar, hawwich viel Schnee aus meim Fenschder gsehne. Mir hen baut acht Inches do in de Bariye vun Central Pennsylfaania ghatt. Zum Glick hemmer ken Wind…awwer der echde Wettermann saagt as es denowed windig sei waerd. Es waar en kalde Schnee, un sell bedeidet as der Schnee arrig “fluffy” is. Mer weesscht as es hatt is en Schneemann zu baue wann es fluffy Schnee is. Aa, wann mer en fluffy Schnee hot, kann es arrig leicht Drifts gewwe. Hoffetlich, kummt der Wind net. Mir brauche ken Drifts.

Mei Jeep is vun dem Schnee bedeckt.

Ich hab den Mariye mit meim Bruder uff em Telefon gschwetzt. Er wuhnt in Barricks Kaunty, un er hot gsaat as er schier gaar en Fuus Schnee grickt hot. As ich faddig mit meim Schauflen waar, hawwich glee bissel Guxbax gsehne. Es Wedder Channel hot gsaat as mir do in Pennsylfaania meh Schnee am Mittwoch griege waerd…aye aye aye!

Ich bin am Schaufle. As du sehne kannscht, gebt es viel zu schaufle.

As ich sell Blog Poscht am schreiwe waar, hawwich an en alde Deitsche Schpruch gedenkt: “Wann der Hund sich uff der Buckel legt, gebt’s Schnee.” Ich hab kene Hund geschder gsehne…awwer es kann sei, as aryets en Hund uff sei Buckel gelegt hot.

Hett eich aa viel Schnee vun dem Schneeschtorm grickt? Odder hab ich Blogleser die ken Winder hen?

Do is en Audioklip: Der Phil hot Recht ghatt!

Published in: on 06/02/2010 at 11:28  Comments (1)