Singe mir en Lied…

Geschder bin ich uff em gleene Rees gange. Alle Yaahr die PMEA (Pennsylfaania Myusick Schulmeeschder Drupp) hen District, Regional un Staat Feschte fer Baend, Chor un Orchester. As ich en High Schul Schtudent waar, hawwich in soddiche Feschte mitgemacht. Nau bin ich Schulmeeschder un mei Schtudente mache aa mit.

Mei Schul is en Mitglied vun District 4. District 4 is arrig gross. Es geht vun re Grenz mit Maryland bis zu Nadd Clinton Kaunty. Es gebt 27 High Schule in District 4! Geschder waar es Konzert fer die District 4 Chor. Die Gastgeber Schul waar Sudde Fulton High Schul in Warfordsburg, PA. Sell is iwwer zwee un en halwer Schtun vun mir weg!

Es Konzert waar um elf Uhr datt. Acht vun meine Schtudente hen in em Konzert gsunge. Es Konzert waar arrig gut. Mer kennte heere as die Schtudente viel ausge-iebt hen. Die Direktor waar en Brofessor vun re University Delaware. Die Chor hot meh as 120 Saenger drin!

Do is die Chor. Wie mer sehe kenne, es gebt viel Saenger.

Die Schtudente hen 13 Lieder gsunge. Sie hen yuscht een Lied in Hoch-Deitsch gsunge. Sell waar en Lied vun dem Johannes Brahms: “Wie schee sin dei Wuhninge”. Sie hen aa en Spanisch un zwee Latein Lieder gsunge. Es Rest waar in Englisch.

Ich denk as Myusick so wichdig fer die Schul un aa fer die Schtudente is. Es waar arrig wichdig fer mich as ich en Schtudent waar. Ich hoff as all vun meine Blog Leser aa Myusick Unnerschtitzer sin. Oft wann en Schul Geld braucht, losse sie die Myusick Programm wegfalle. Sell soll net gschehe awwer leider geht es so.

Well, sell muss genunk fer heit sei. Net vergesse as uff em Dinschdaag kummt der Punxsutawney Phil aus em Loch. Mal sehne was er iwwer es Wedder un dem Winder zu saage hot.

Do is en Audio Klip: Singe mir en Lied

Published in: on 31/01/2010 at 17:02  Comments (4)  

Solle mir danse?

Solle mir danse? Sell is en Froog as mer net so oft heert. Frieher waar es popular uff em Dans zu geh. Heitzudaag gebt es net so viel Danse. Sell is yo baremlich. Frieher waar es normal uff em Freidaag odder Samschdaag Owed uff en Dans zu geh. Mannichmol waare die Danse in en Danshall un mannichmol waare sie in en Scheier. Es hot allsfat Live Myusick gewwe, weil iPods un Stereos nooch net gemacht waare.

Viel Leit hen gewisst wie mer danst un kennt meh als eene Dans danse. Sell is en Tradition der lang vorbei is. Neilich uff em Guckbax gebt es Danse Schows wie “Danse mit em Schtanne” un “So du denkscht as du danse kennscht?” Die Schows sin arrig popular un viel Leit hocke sich un gucke sie aa. Mei Froog an soddiche Leit is: ferwas wollt eich net danse lanne? In Blatz vun yuscht aagucke, kennt eich selwer danse! Sell macht meh Schpass as yuscht im Guckbax sehne.

Danse macht Schpass un is aa gsund. Wann mer danst, dei Hatz geht schneller un dei Blut waerd darrich die Karebe fliesse. ‘Sis aa Gschpassig mit en annere Paerson zu danse. Es macht nix aus was fer Danse mer danst…yuscht as mer uff em Dansbodde is! ‘Sis normal fer en Mann odder yunge Bu zu saage: “Ich dans net…sell ist net mennlich.” Well, loss mich soddiche Leit eppes saage: Wann en Mann odder Bu danse kenne, geh all die Maed verrickt. Die Maed gleiche es wann en Mann danse kenne…sell is die Waahrheit! Ich hab es selwer erfaahrt!

Ich bin nooch yung awwer ich kann danse, un ich gleich sell arrig viel. Frieher hawwich der Waltz, Foxtrott un Swing gelannt un nau lanne ich die Latin Danse wie der Rumba, Cha Cha un Salsa. Am Aafang is es schwer die Schritte zu lanne, awwer wann mer sie ausiewt, geht es besser un mer kann es schneller duh. Dann fiehlt mer as mer eppes gut gemacht hot un aa gut gelannt hot. Es gebt mer en Glicksgfiehl.

Kennt eich aa danse? Danst eich gaarn? Sei net scheie, geh un lann en neie Dans….du waerrscht net Sorry sei!

Do is en Audioklip: Solle mir danse

Published in: on 24/01/2010 at 16:25  Comments (8)  

Soll en gut bekannte Deitscher en Daag hawwe?

Mundaag, der 18. Yenner 2010 is en Feierdaag do in Amerikaa. Sell is der Daag as mer an der Dr. Martin Luther King Jr. denke un erinnere solle. As viel vun eich schunn wisse, der Dr. King hot versucht unsre Gsellschaft zu refermiere. Un er hot es aa gemacht. Er hot fer menschliche Rechte gfochde un hot versucht en End zu Segregation in Amerikaa zu bringe. Er waar im Yaahr 1968 erschosse. Er waar en echt gude Man un hett lenger lewe solle. Er hot viel wichdige Rede gewwe, awwer die beschde davun is: “Ich hab en Draam.” Er hot selle Rede in 1963 in Washington DC gewwe un hot im Yaahr 1964 die Nobel Friede Preiz gewunne. Er waar waerricklich eppes!

Der Dr. King hot viele gude Eidies ghatt.

Der dritte Yenner is allsfatt der Martin Luther King Jr. Daag. Alle Baenke, Rigieringsgebeier un Poschtaffises sin net uff. Viele Schule hen aa kenne Klaess. Ich hoff as all mei Leser waerre am Mundaag en paar Minudde nemme un glee bissel an der Dr. King denke.

As ich uff em Dr. King gedenkt hab, hab ich gedenkt: Welle gut bekannte Deitscher kennt mir en Daag dafer hawwe? Es gebt so viel wichdige Deitsche in unsre Gschichte. Wenn mir yuscht eens waehle misst, wer daet es sei? Der eschte Naame der zu mir kumme is, waar der Conrad Weiser (1696-1760). Der waar arrig wichdig in Colonial Amerikaa. Er kennt mit de Insching do in Pennsylfaania schwetze un er hot viel Friede Vertraage mit de Insching gemacht.

Der Conrad Weiser hot viel zu duh mit re Erschaffing vun Pennsylfaania, as mir es kenne.

En annere Naame waar der Henry Melchior Muhlenberg (1711-1787). Er waar en Ludrische Parre, der en grosse Rolle in friehe Pennsylvaanische Gschichte gschpielt hot. Sei Soh, der Peter, waar en General in der Continental Armee un sei annere Soh, der Frederick, waar der erschte Speaker vun de Amerikaanische Haus vun Representatives.

Der Parre Muhlenburg hot versucht es Watt vun Gott in Colonial Amerikaa zu saage un laerne.

Der Conrad un der Henry sin yuscht zwee Naame. Allebeed waare arrig wichdig in frieh amerikaanische Gschichte un kennte en Daag hawwe. Hett eich Gedanke vun annere Deitsche, die en Daag hawwe sott?

Do is en Audio Klip: Soll en gut bekannte Deitsche en Daag hawwe?

Published in: on 17/01/2010 at 13:29  Comments (3)  

Kaffi un Myusik!

Do in Central Pennsylfaania, wu ich wuhn, gebts en gude Cafe. Es Cafe is in Lock Haven un es heesst Avenue 209. ‘Sis net gross awwer ‘sis schee un freindlich. Mer kann viel unnerschittliche Kaffis un Tees drinke. Sie henn aa appeditliches gebackne Ess-sache. ‘Sis en gudi Blatz zu geh um en heesse Drink zu griege un in alle Ruh en Buch odder Zeitding lese.

Do is es Cafe in Lock Haven.

‘Sis aa en typical Kaffihaus. Ich meen as sie henn aa Live Myusik, zimmlich oftmols. Uff em Dinschsdaagowed un Mittwochowed henn sie “Open Mic”. Normalerweise beginnt es um 7 Uhr un es geht bis 9 Uhr. ‘Sis normal fer iwwer 20 unnerschittliche Leit zu kumme un singe un Instrumente schpiele. Was ich arrig gut finne, is as viel vun de Leit bei en Open Mic Owed schpiele, sinn yuunge Leit. Es gebt viel High School Schtudente die kumme un singe un ihre Gitarre schpiele. Sell is yo eppes. Die Schtudente henn en Blatz zu geh un var annere Leit auszufiehre. ‘Sis aa gut weil es gebt en Blatz fer yunge Leit zu geh, domit sie net in dem Druwwel kumme!

Ich waar datt Gschtrowed um en ehmalige Schtudent zu heere. Er hot sei Gitarre gschpielt un hot viel Lieder gsunge. Es waar baut 20 Leit datt um ihn zu heere. Er hot arrig gut gemacht un die Leit henn en gudi Zeit ghatt.

Datt is der Chris. Er hot Geschdrowed gschpielt un gsunge.

Ich bin aa en myusikalische Bu. Myusik hot allsfatt en wichdige Rolle in mei Lewe gschpielt. Heitzudaage schpiel un sing ich in en gleene Baend. Mir schpiele Volksmyusik…abbadich, irische Myusik. Mir schpiele aa traditionell amerikaanische Myusik. Mir henn meh als ee Mol datt bei Avenue 209 gschpielt. Ich muss ehrlich saage, as es gut is, as es en Blatz gebt wu Leit Live Myusik frei heere kenne.

Do is en Pickder vun meinre Volkbaend. Mir hen en Mandolinschpieler (Matt), Gitarrschpieler (Von) un ich sing un schpiel Akkordion un es irische Schlagding.

Gebt es so en Cafe bei eich? Was fer Myusik heert eich? Drinkt eich gaarn Kaffi odder Tee? Aye aye aye, ich hab viel Frooge selle Woch, Gell? Oh, as ich selle Poscht schreib, is es 15 Grad mit Wind do in Central PA. Ich hoff as mei Leser waarem bleiwe!

Do is en Audio Klip: Kaffi un Myusik

Published in: on 09/01/2010 at 09:46  Leave a Comment