Nei Yaahr 2010!

Yawell, do sin mir widder! Ee paar Daage davor em Nei Yaahr…aye aye aye ‘sis schwer zu glaawe as der 2009 schier gaar faddig is. ‘Sis arrig schnell glaafe…Gell? Nau gucke mir in der Future. Was waerd 2010 bringe? Ich hoff as 2010 besser fer viel Leit sei waerre. Viel Amerikaaner sin mitaus Arewet. Vielleicht gebt es meh Jobs in 2010. Mir sin nooch im 2 Griege in Irak un Afghanistan. Vielleicht gebt es Weltfriede in 2o1o.

Nau is die Zeit as viel Leit ihr Lischt vun Nei Yaahr Resolutions mache. Hett eich schunn eier Lischt gemacht? Ich nooch net, un vielleicht duh ich aa keene. Yuscht mol sehne. Awwer fer die Leit die saage: In Nei Yaahr will ich meh mit Deitsch duhe, saag ich Yippee! Ich hoff as all vun mei Leser eppes mit re Mudderschprooch in 2010 duhe. Es macht nix eb es meh im Internet lese, odder mit en Deitscher schwetze odder uff em Volksfescht gehe. Duh eppes! Unser Schprooch braucht es!

In 2010 gebt :”En Friehyaahr fer die Mudderschprooch”. Sell is en grosser Fescht fer unsre Mudderschprooch. Es waerrd viele glenne Feschte in PA die alles mit re Mudderschprooch behandle gewwe. Ich hab en Blann fer die Fescht do uff meim Blog geposchdet. Sei so gut un druck es mol raus. Dann hett eich en Blann mit all de gleenre Feschte. Dann geh mol zu re Fescht! Unnerschtitze unsre Mudderschprooch un unsre Kuldur!

Mudderschproochfescht 2010 _PG Events February – July 2010_

Endlich: Ich winsche eich viel Gschpass uff em 31. Dezember. Drink net zu viel un net vergesse uff em Mitnacht en Flint in der Luft zu schiesse!

Do is en Audio Klip: Nei Yaahr 2010

Published in: on 30/12/2009 at 09:06  Leave a Comment  

Mei Grischtdaag Winsch un Video Gruss!

Selle Poscht browier ich eppes Neies. Ich hab en Video Poscht gemacht. Do is en Link zu re Video as ich gemacht hab. Ich hab es uff YouTube geposchdet. Do is der Link: http://www.youtube.com/watch?v=K7fSZtzyqts

Do is mei Poscht schriftlich:

Guder Daag Blog Lesern!

Ich hab gedenkt as es Zeit waar fer en Grischtdaag Video Poscht. Ich hab selle Blog schier gaar en Yaahr un hab meh as 3,000 Hits. Sell is en wunnerbaar Ding. Ich bin arrig froh as so viel Leit mei Blog bsucht.

Bevor ich mei Gruss saag, will ich een Ding aus em Heilige Schrift vun Matthaeus lese: “En Yungfraa soll en Kind unnich em Hatz draage un soll en Bu in die Welt bringe. Un sie solle em der Naame Immanuel gewwe. Sell heescht in Deitsch: Gott mit uns.” Ich hoff as mei Lesern net vergesse fer was Grischtdaag is.

Un nau winsch ich eich en hallicher Grischtdaag un en gutes Nei Yaahr 2010! Ich hoff as der Belschnickel bringt uns alle scheeni Gschenke, Gsundheit, Glick un Freehlichkeit.

Hallicher Grischtdaag an alle!

Published in: on 20/12/2009 at 11:57  Comments (2)  

Endlich…du bischt uff Facebook!

Guder Daag Leser! Der Naame vun sellre Wochs Blog Poscht is en Satz as ich oft selle Woch gheert hab. Wie eich schunn weesscht, bin ich en Freind vun Techonology. Ich yuus mei Computer oft un gaarn. Ich schreib selle Blog un ich yuus Wikispaces fer mei Hochdeitsch Klaesse. Ich hab en iPod mit arrig viel Myusick druff. Ich hab en Cellfone un ich schreib viel Text Messages. Awwer fer en langi Zeit hab ich NEE zu Facebook gsaat.

Facebook is en Website die mer yuuse kann mit Freinde im Kontakt zu bleiwe.

Frieher hab ich allsfat gsaat as Facebook der Deiwel waar. “Es macht meh Probleme as gudi Dinge” (hab ich gedenkt). Leit henn liewer¬† mit Facebook gschwetzt as Gsicht zu Gsicht. Sell hab ich dumm gfunne. Ich bin en grosse Fan vun Paerson zu Paerson Communication. All mei Freinde henn allsfat zu mir gsaat…ferwas hoscht du ken Facebook Blaat? Was is letz mit dir? ‘Sis en wunnerbaare Ding…du settscht mol en Facebook Blaat hawwe.

Nooch en lange Schleggelrei mit selle Idea hawwich endlich “ok” gsaat un hab en Facebook Blaat gmacht. Nau hab ich mich bekehrt. Ich yuus Facebook alli Daag. ‘Sis en gudi Weck mit viele Leit zu schwetze. Mer kann Pickders uffloade un dei Freinde uff Facebook kenne Comments datt losse. Es gebt aa viele PA Deitsche Facebook Drupps. Ich hab schunn efters eppes uff Deitsch uff Facebook gelese un gschriwwe. Was ich am beschde finn, is mer kann alde Freinde vun re ganze Welt finne un mit ihr “catch up”. Mer kann lese was Neies in ihr Lewe is un Pickders un Video vun ihr aa sehne.

So nau bin ich en Facebooker, un ich muss ehrlich saage as ich gleich es viel. Hett eich aa en Facebook Blaat? Wann ya, kenne mir Freinde sei?

Do is en Audioklip: Facebook

Published in: on 09/12/2009 at 10:37  Comments (1)  

Ich bin uffgschnitte!

Ich hab so viele Ideas vun Blog Topics selle Woch ghat, awwer dann is eppes zu mir gschehe! Zidder Samschdaag hab ich Schmatze in mei Bauch ghat. So, uff em Dinschdaag bin ich zur Dokdor gange. Er hot uff mei Bauch gedrickt. Er hot gsaat as ich en Cat Scan griege soll. Ich bin graad zum Grankenhaus gfaahre. As ich aakumme bin (5 Uhr), hab ich gemisst, en rode Drink zu drinke.  Nooch baut zwee Schtunn, hawwich en Cat Scan ghat.

Die Dokdors hen graad die Results grickt. Der eene Dokdor hat gsaat, as ich en Operation hawwe muss…mei Appendix muss rauskumme…un denowed schunn! So um 9 Uhr bin ich zu Pre-Operation Schtubb gange. Nooch baut en Schtunn schpeeder bin ich zur Operating Schtubb gange un hab mei Appendix verlore! Aye aye aye. Alles is so schnell gange. Nooch der Operation bin ich zu meim Schtubb in Grankehaus gnumme. Sell waar baut 11 Uhr am Oweds as ich endlich in mei Schtubb waar.

Ich hab die Nacht do im Grankehaus gschlofe. Die Schmatz vun der Operation waar viel awwer ich hab Medizin fer die Schmatz gnumme. Ich hab gemisst der ganze Daag datt im Grankehaus zu bleiwe. Der Wunddokdor is zu mir kumme um mei Schnitt zu sehne. Er hot gsaat as alles gut guckt un ich waar erlaabt nooch Heem zu geh. Ich waar arrig froh sell zu heere! Der Dokdor saagt as ich muss gaar nix fer ee paar Daage schaffe.

So nau bin ich daheem. Ich graddel rum wie en alde Mann. Die Schmatz kummt und geht. Mei Schnitt is baut 4 Inches lang un ich hab 6 Staples (im Blatz vun Schtiche) in mei Bauch. Ich hoff as ich schnell besser fiehle…awwer ich muss yuscht waarde. Hett eich aa so en Operation schunn ghatt?

Do is en Audioklip: Ich bin uffgeschnitte

Published in: on 03/12/2009 at 09:40  Leave a Comment