En neies Buch!

En neies Buch iwwer uns Deitsche!

Selle Woch bin ich zu meim Poschtbax gange un ich hab en gleene Pack grickt. Ich hab gedenkt, was is sell? Ich hab nixs geaddert. So, ich bin ins Haus gange un hab es uffgemacht. Drinn waar en neies Buch des heest “Pennsylvanisch Deitsche Sauwerkeite” un waar vun dem Gerry Kershner gschriwwe. Ich waar verschtaunt un aa arrig froh as ich eppes neies zu lese ghatt hab.

Sell Buch is glee awwer gut gschriwwe. Der Gerry hot iwwer siwwe verschiddliche PA Deitsche Sauwerkeite gschriwwe. Es Buch is in Englisch gschriwwe awwer es hot viele PA Deitsche Ausdricke. Sell Buch is aa voll vun Pickders (Fracktur) die der Gerry selwer abgemolt hot.

Nau waerd ich die siwwe Sauwerkeite un en Ausdrick vun yeder gewwe.

1. Gedreilichkeit – “Der Glaawe dutt viel.”

2. Hattschaffichkeit – “Arewet is arrig gut fer en Mann.”

3. Ehrlichkeit – “Doch waar sei Naame breet un weit in Ehr fer Fleiss un Ehrlichkeit.”

4. Schpaarsamkeit – “Sei schpaarsam awwer net geitzich.”

5. Demut – “Demut lieb un halt eich glee.”

6. Gschpass – “En frehlich Hatz is gut Medizin.”

7. Winsch fer Scheeheit – “Was batt en scheeni Schissel wann nix drinn is?”

Fer yeder Sauwerkeit, hot er aa viel viel meh gschriwwe. Der Gerry hot aa meh Ausdricke gewwe. Sell Buch is gut zu lese un mer kann viel iwwer die Deitsche lanne. Ich find es Buch is aa arrig gut fer non-Deitsche zu lese. In unsere schnell un weckschmissige Gsellschaaft, Deitsche Sauwerkeite, wie die in es Buch, sinn eppes die Leit druff denke sett. Mer kann sell Buch bei www.masthof.com kaafe. Es koschdet $6.99. Es macht en gute Grischtdaag Gschenk!

Do is en Audioklip: En neies Buch

Un aa nooch: Ich winsch all Leser en Freehliche Danksgewwe! Ess net zu viel! Un fer mei Leser die uff em Mundaag yaage geht, viel Glick un sei achtsam!

Published in: on 21/11/2009 at 08:01  Comments (1)  

Bei eener Schlachderei!

Letschde Wochend bin ich Heem gfaahre um mei Daadi zu helfe. Es waar Zeit unsre alde Hinkel zu schlachde. Mei ganze Lewe hemmer Hinkel un Welschhinkel uff unsre Bauerei. So ich bin mit Schlachde uffgwaxe. Selles Mol waar es yuscht zehe Hinkel. Selle Poscht waerr ich die Procedure beschreiwe. Fer viele Deitsche waar die Schlachderei en grosse Schtick ihre Lewe, awwer heitzudaag gebt es net so viel Leit die wisse wie mer en Gedier odder Voggel schlachde.

DSC01903

Datt sin die Hinkel...sie wisse net was los is!

Bevor mer die Hinkel schlachde, is es ganz wichdig heeses Wasser zu hawwe. Sell Wasser waerd en wichdige Paert schpaeder schpiele. Wann es Wasser am koche is, dann kann mer aafange. Erscht muss mer en Hinkel fange dann kummt die schwere Paert: der Kopp abzuschlagge. Bei uns mache mir es mit em Beil. Mei Daadi fangt die Hinkel, die allsfat in em Hinkelhaus sin, dann nehm ich sie zu meim Grossdaadi un er schlagt die Kepp ab.

Die naegschde Paert is die Roppe. Mer nehmt Wasser vun dem Offe un schtellt es in en grosse Eimer. Wann es Wasser 160 Graad is, geht alles los. Mer muss die Hinkel ins Wasser dunke. Nooch baut zwee Minudde kenne sie rauskumme. Dann muss mer all die Fedder abgeroppt waerre. Wann es Wasser gut is, kumme die Fedder leicht aus un die Arewet is net so hatt.

DSC01904

Ich bin schier gaar ready zu dunke...es Wasser waar yuscht vollkumme!

DSC01906

Ich un mei Grossmudder sin am Fedder ausroppe.

Wann all die Fedder abgeroppt sin gehe die Hinkel zu dem Disch. Datt is wu die Daerm, die Lewwer, es Hatz, die Lung, die Gizzard un die Luftrehr rausgnumme sin. Selle Paert is arrig schwer fer viele Leit zu sehne. Wann mer en schwache Bauch hot, soll mer net uffbasse.

DSC01908

Mei Grossmudder un mei Daadi sin am schaffe.

Wann all die Kuddle raus sin dann kann die Hinkel glee bissel ausruhe. Normally schtecke mir die faddiche Hinkel ins Wasser bis sie in der Frier geh. Nau is mer faddig mit re Schlachderei. Ich denk all Leit solle es eemol ins Lewe sehne. Es is viel besser wann mer weesscht wu sei Ess-sach herkummt, Gell?

DSC01927

Nau sin mir faddich. Die Hinkel gucke schee aus, Gell?

Was denkt eich vun Schlachderei? Kaaft eich eier Fleesch im Supermarrick oder frisch vun enem Bauer?

Do is en Audio Klip vun sellem Poscht: Schlachderei

Published in: on 14/11/2009 at 20:50  Leave a Comment  

Es Fuussballeschpiel!

Die Schul wu ich schaffe hot en gute Weibsleit Fuussballe Mannschaft. Selle Yaahr hen sie darrich es regular Season yuscht zwee Schpiele net gewunne. Deswege hen sie fer die District Playoffs qualifiziert. Viele vun de Meed hab ich in mei Hochdeitsch Klaesse. Ich waar sehr froh fer die Meed…sie hen viel ausge-iebt un arrig hart selle Yaahr gschpielt. Sie hen waerricklich die Playoffs verdient.

Eene vun mei Schul is am schiesse.

Eene vun meinre Mannschaft is am schiesse.

Uff em Munndaag hen sie ihres aerschten Playoff Schpiel gege Bellefonte. Bellefonte is aa en gude Mannschaft…so die Meed waerre¬† die Hend voll hawwe. Es Wedder waar arrig kalt awwer ken Rege. Es Schpiel hot um halwer sechs aagfange. All de Schpieler waaren arrig eiferich un es Schpiel waar sehr schnell.

Um Halwezeit waar es zwee zu null fer die Wildekatze (sell is mei Schul). Nooch re Halwezeit hen mei Mannschaft gut gschpielt. Die annere Mannschaft hot versucht en Goal zu schiesse awwer sie hen ken Glick ghatt. Am End es Schpiel waar es nooch zwee zu null. Mei Meed kenne zum naegschde Runde geh un fer die Championschip gege State College schpiele. Ich hoff as die Mannschaft es winne kann.

Nooch em Schpiel...die Mannschaft sin froh as sie gewunne hen.

Nooch em Schpiel die Meed sin froh as sie gewunne hen.

Hett eich en Schport in High Schul gschpielt? Was denkt eich vun Fuussballe?

Do is en Audio Klip vun selle Poscht: Es Fuussballeschpiel

Published in: on 05/11/2009 at 12:21  Comments (1)