En iwwerfallige Rees!

Selles Wochend sin ich un mei Freindin nooch Cleveland, Ohio gfaahre. Ich hab en Wochend “Getaway” fer ihr Gebottsdaag ausgemacht. Fer en paar Woch hab ich schunn alles ausgemacht: en Schtubb gebucht, Reservations bei en Essblatz gebucht un aa en paar Bletz gfunne zu bsuche. Alles waar en Iwwerfalle fer mei Freindin, die Jess. Sie hot gaar nix gwisst…yuscht as mir nooch en Schtadt faahre.

Am Samschdaag sin mir schunn um fimf Uhr losgfaahre. Mir hen Mariyets-esse bei en gleene Essblatz uff em Ohio-Pennsylfaania Grenz gesse. Dann sin mir weiter nooch Cleveland gefaahre. Unser aerschte Schtopp waar es Rock un Roll Hall of Fame un Museum. Sell waar arrig schee. Es hot viel zu sehne un viel zu lanne. Ich un die Jessica sin Myusickleit so mir hen es arrig gegliche. Sie hen der Elvis’s Maschine un dausende vun Gitaare….harriyesses, es gebt so viel zu sehne!

Ich vanne em Rock un Roll Museum

Ich vanne em Rock un Roll Museum

Nooch em Museum sin mir nooch em Kunscht Museum vun Cleveland gfaahre. Mei Freindin is en Kunschtschulmeeschderin so Kunscht is zu ihr sehr wichdig. Es Museum waar zimmlich gross un hot en wunnerbaar Sammling vun Kunscht. Es hot Bilder vun Van Gogh, Dali, Goya, Monet, Oldenburg, Dix, Rodin, Rembrandt un viel annere. Ich un die Jess waare erschtaunt! Mir hen net gewisst as es Museum in Cleveland so viel gude Kunscht hot.

Wann mir faddig mit em Museum waare, sin mir nooch em Wattshaus gange. Unser Wattshaus waar graad in de Mitte vun re Schtadt…sell waar schee. Mir misse net so weit laafe um meh zu sehne. Fer Owedesse hab ich Reservations bei en sehr gude un feine Essblatz. Es heesst Lola un waar vun Michael Simon (eener vun der Eisener Kochs uff em Food Network) besesse. Es Essblatz waar deier awwer es Iems waar meh as Wadde ausdricke kenne. Fer en Appetizer hen mir en Riewe un Beer Selaat un mir hen en Boddel Wei vun Austria geaddert. Fer unser Hauptgrichte hot die Jess Ent Bruscht un ich hab Arktik Char (en Fisch) ghatt. Fer Nooch-esse hen mir French Toast mit Maebel un Schpeck Eis Raahm. Es Eis Raahm waar eppes was ich net bevor gesse hab. Es waar appeditlich!

Der Riewe un Beer Selaat...schee Gell?

Der Riewe un Beer Selaat...schee Gell?

Nooch em Esse sin mir zerick zu unsrem Wattshaus gange un graad in die Nescht gange. Heit sin mir frieh uffgschtanne un zerick nooch Pennsylfaania gfaahre. Es waar en scheene Wochend un mir hen viel Gschpass in Cleveland ghatt. Die Jess hot gsaat as es ihr Leibsgebottsdaag war!

Do is en Audio Klip vun sellem Poscht! En iwwerfallige Rees

Published in: on 25/10/2009 at 16:03  Leave a Comment  

Schnee….im Oktower?!

Schnee uff die Baame in State College.

Schnee uff de Baame in State College.

Yuscht guck mol! Ich wuhn in Pennsylfaania un am Dunnerschdaag der 15. Oktower hab ich schunn Schnee grickt! Yawell, ich weess as es alle Yaahr meeglich is, Schnee in Oktower zu griege, awwer normally wann mer Schnee im Oktower griege is es yuscht en “dusting”. Net selle Yaahr. Mei Haus hot schier gaar 2 Inches. Naadlich vun mir hot es iwwer 7 Inches gewwe.

Die Schnee waar so nass un schwer as viel Baame sin runnerkumme. Viel Leit hen ihr Leckdrick verlore. En Freind vun mir hot sei Leckdrick Freidaag um 4 Uhr mariyets verlore un hot es net bis 8 Uhr Oweds widderzerick grickt! As ich do uff mei Computer hocke, schneit es nooch widder. Die Wettermannsleit saage as es heit Flurries gewwe solle. Sell guckt wie Yenner drauss….harriyesses! Ich bin ready fer Spuckowed un Danksgewwe, net ready Schnee zu schaufle un Schlidde zu faahre.

Schnee bei dem Beaver Stadium uff em Penn State Campus.

Schnee bei dem Beaver Stadium uff em Penn State Campus.

Viel vun meine Schtudente hen geschder gsaat: “Ich hab gedenkt, as mir Global Warming hen! Was is mit dem Schnee letz?” Vielleicht is sell en guti Froge. Ich hab in dem Kalenner gelese as der Winder vun 2009-2010 en ganz schlechte Winder sei soll. Normally hot der Kalenner Recht. Yuscht mol sehne!

Hett eich aa schunn Schnee grickt? Was denkt eich, waeret der Winder ganz schlecht sei?

Do is en Audio Klip vun sellem Poscht: Schnee in Oktower

Published in: on 17/10/2009 at 07:04  Comments (6)  

Die Deitsche kumme!

An mei Schul, wo ich Schulmeeschder bin, hemmer en Austauschprogramm mit re Schul in Deitschland. Es Programm is schunn iwwer 30 Yaahre alt! All zwee Yaahre in Oktower kumme deitsche Schtudente do un dann die naegschde Tschuun geh unsere Schtudente nooch Deitschland. Well ‘sis mol Zeit fer die Deitsche widder do zu kumme!

Sie fliege am Samschdaag un kumme in State College um 2 Uhr aa. Mei Schtudente waere nadierlich datt im Aerport. Dann geh die Deitsche mit ihre neie “Amerikaanische” Familye. Die Deitsche waerre do fer 10 Daage bleiwe. Sell Yaahr gebt es 15 Deitsche Schtudente. All mei Schtudente sin arrig froh un uffgeregt ihre Partner zu begegne. Viel Schtudente hen schunn ihre Partner im Internet begegnet! Mit Facebook un annere Dinge is es leicht neie Leit kennezulerne…Gell?

Mir hen viel fer die Deitsche ausgemacht. Sie waere uff en paar gleene Rees geh un nadierlich waere sie ee paar Daage do in unsre Schul beibringe. Die Deitsche kumme bei Buchen in Odenwald (Baden-W├╝rttemberg)…vielleicht kenn ee paar vun de Schtudente unsre Deitsch verschteh…yuscht mol sehne.

Naegschde Woch waerd ich en Update schreiwe. Mir welle hoffe as alles gut geht, un as es ken Probleme gebt. Ich weess schunn as es viel Gschpass waerd. Hot eenichepper vun eich en Austasch im High Schul ghatt odder gemacht?

Published in: on 08/10/2009 at 06:35  Comments (3)