Alles fangt widder aa!

Well liewe Leser, mei Summer is waericklich vorbei. Geschder hab ich gegrische: “Do kumme die Kinner!”. Ya, Geschder waar die aerschde Schuldaag fer selle Yaahr.

Die aerschde Daag is allsfatt schee. Die Schtudente sin arrig froh alle ihre Freinde zu sehne. Ich muss aa saage, dass die Schulmeeschdern sin aa froh die Kinner widderzusehne…well, net all die Kinner, awwer am menschde!

All die Schtudente schtehe in dem Gang un schwetze iwwer was sie alles im Summer gemacht hen. ‘Sis allsfatt nett all die Gschichte zu heere…well, net all die Gschichte, awwer am menschde! Was sehr schee is, wann ich die Schtudente zum aerschde Mol seit Tschuun seh. Mannichmol sehne sie ganz annerschder aus. Viel hen so viel gwaxe, as ich sie net kenn. Waericklich!

Ich glaab selle Yaahr waerd en gude Yaahr sei. Ich hab zwee Gruppe vun Hochdeitsch I, dann een Gruppe vun Hochdeitsch II, III, IV un V. Selle Yaahr hab ich aa en Gruppe vun AP Hochdeitsch. AP is en abaddiche Klaess. Sell is fer die Kinner die an der College geh wolle. Die Klaess is arrig hatt un gebt viel Arewet. Ich hab yuscht fimf Schtudente in re AP Klaess…un all fimf sin gude un gewissehaft. Ich weess schunn as sie all de Arewet duhe waerre.

Denk mol nooch an deim aerschde Schuldaag. Was fallt eich bei? Waart dihr aa froh widder in September mit re Schul zu aafange? Waart dihr aa froh eire Freinde widderzusehne?

Published in: on 03/09/2009 at 06:33  Leave a Comment