Mei Grossmudder.

Letschde Woch hab ich mei Grossmudder verlore. Sie is am Mundaag der 21 September gschtarewe. Sie waar 93 Yaahre alt un hot die letschde zwee Yaahre in en Alterheem gewuhnt. Sie hot Bruschtfiewer grickt, un ihr Kareber hot es nicht fechde gekennt.

Sie waar die stereotypical deitsche Fraa. Sie waar in 1916 in Nadde-Barricks Kaunty uff re Bauerei gebore. Nadierlich hot sie Deitsch gschwetzt. Sie hot mei Grossdaadi in 1942 gheiert, graad bevor er in dem Grieg geh muss. Gott sei dank is er zerickkumme mitaus en Schaade. Sie hot ihr ganz Lewe deitsche Traditions feschtghowe. Sie waar en wunnerbaar Becker. Ihre Kichli un Kuche waar arrig geliebt. Zum Glick hot sie mir viel vun Backen gelaernt.

Ich weess as sie nau in en bessere Blatz is. Die letschde paar Munet waar sehr hatt fer sie. Ihr Geescht waar gut awwer ihr Kaereb waar net. Ich bin arrig dankbar as mir sie fer so lang ghat hen. Sie waerd nimmi vergesse. Grosseldre hen en abadiches Blatz in unsre Hatzer…gell? Hett eich gudi Aadenke vun deinen Grosseldre? Ich bin schier gaar sicher as dihr mit Ya! antwadde waerdet.

Published in: on 30/09/2009 at 06:56  Comments (1)  

En neie Textbuch fer Deitsch!

Endlich…nooch baut drei Yaahre hatte Arewet is unser neie Deitsch Textbuch faddich un reddi zu verkaafe! Ich un der Josh (Yossi) Brown hen en Textbuch geschriwwe fer Leit die unser Mudderschprooch lanne will. Es Buch is leicht zu lese un begreife. Es hot 12 Kabiddel. Yeder Kabiddel hot dialogs, grammar Exercises, en Kuldur Schtick un en Waddelischt. Mir hoffe as mit sellem neien Buch, meh Leit waerd en Inderesse an Deitsch greige.  Mer kann es bei Masthof Press kaafe. Es koschdet $25.00 un $4.00 fer es auszuschicke.

Do is en Link zu Masthof Press.

Saag eppes an alle dei Freinde un Blutsfreinde!

________________________________________________________________________________________

SCHWETZ MOL DEITSCH!
AN INTRODUCTORY PENNSYLVANIA DUTCH COURSE
by Joshua R. Brown
and Douglas J. Madenford

Schwetz mol Deitsch is an Introductory textbook designed to build skills necessary for the interpretation, negotiation, and reception of Pennsylvania Dutch. Students learn structural language components while being exposed to cultural information, contemporary writing, and contemporary language-use situations. This 280-page textbook includes features such as dialogs introducing grammar in context, cultural information about the Pennsylvania Dutch, communicative activities, resources for exploring Pennsylvania Dutch and accessible language instruction.

Order from: Masthof Press, 219 Mill
Road, Morgantown, PA 19543, telephone:
610-286-0258, fax: 610-286-6860.

______________________________________________________________________________________

ORDER FORM
I enclosed a check for $____________ for _______ copy(ies) of Schwetz mol Deitsch! at $25.00 each plus $4.00 shipping (for each additional book please include an extra $0.75 for shipping). Pennsylvania residents should also add $1.50 sales tax per book.

Name: _______________________________________________________________________

Address: ______________________________________________________________________
_____________________________________________________________________________

Mail to: Masthof Press, 219 Mill Road, Morgantown, PA 19543-9516

Published in: on 24/09/2009 at 06:25  Comments (1)  

Hilf! Die System is grank!

Die grosse Topik heitzudaage hot mit Gsundheitcare zu duh. Der Bresident fechdet mit dem Kongress nau fer en neie System. Viel Amerikaaner sin fer es un viel sin gege es. Es gebt grosse Iwwerschwetzunge un aa Dischbedaate iwwer selle Topik.

Eigetlich bin ich ken politische Man awwer ich bin mit dem Bresident an selle Topik. Ich kann net glaawe as es Leit in Amerikaa gebt, die ken Inschurance hat. Inschurance is deier un viel Amerikaaner kann es net afforde. Viel Arewetsgewwer kenne es aa net afforde. Was nooch schlimmer is, is as en Rees zum Dokder aa arrig deier is. Wann mer ken Inschurance hot, kann die Dokder mer net verbessere.  Un was bassiert wann mer en Operation braucht? Sell is deiere as en Bsuch. ‘Sis leicht en Dausend Dollar beim Dokter auszugewwe un leichter in en Grankehaus.

Oft denk ich as viel Amerikaaner die Inschurance schunn hot, gebts nix drumm die viele Amerikaaner ken Inschurance hen. Is sell recht? Ich denk net! Mir sin en grosse, reiche Land. Unser Leit soll zum Dokder geh daerfe…mitaus Problems. Mir hen die beschde Dokters un Grankeheeser in de Welt. Unser Leit, alle Leit, solle es yuuse.

Ich hoff as ee Daag, selle Problem waerd gefixt sei. Es gebt viel Arewet zu duh….awwer ich glaab mir kenne es besser mache. Was glaabt dihr?

Published in: on 16/09/2009 at 08:34  Comments (3)  

En scheene Owed

Letschde Woch hot en Freind vun mir gfrogt: “Willscht du zum Owedesse geh?” Nadierlich hab ich “Ya!” gsaagt. Owedesse und ich geh gut zamme. Mei Freind un sei Biewel-Drupp gehne alle Yaahr zu re Amische Familye ihr Haus fer en grosse Owedesse zu hawwe. Wann ich sell gheert hab, waar ich arrig froh.

Die Amische Familye wuhnt net weit Weck vun Rebersburg, PA. Selle gleene Schtadt liegt in Brush Valley, Centre Kaunty. Brush Valley hot viel Amische Bauerei, un es Daal is arrig schee. Mir sin um 6 Uhr aakumme. Mir hen in dem Scheierhof ee paar Minudde gschtanne un mir hen einanner kennegelannt. Es waar 26 vun uns.

Dann sin mir in em Haus gange. Der Jonas Yoder, der Daadi, un sei Frau un Dochder hen en grosse lange Disch in ihr Wuhnschtubb. Der Disch waar schunn ready fer uns zu esse.

Fer esse hemmer gerooschde Rinsfleesch un Schmutz. Grummbiere, Nudeln mit Butter, gebackne Graut, Welschkann, frisches Brot un hausgemacht Paschingschmieres. Fer Nooch-esse hemmer Eppelboi, Oicustard un Schokolaadkuche. Alles hot so gut gschmackt.

Nooch em Esse hemmer uns zu dem Jonas bekannt gemacht. Er hot gewollt alle unsere Gschichte wisse. Mir hen aa Amazing Grace gsunge.

Endlich um 8 Uhr sin mir nooch Heem gfaahre. Sell waar en abaddiche Owed. Ich hoff as ich mol widder datthiegeh kann. Es dutt mir Leed as ich ken Pickders hab, awwer dihr schunn wisst as die Amische Pickders net gaarn haawe.

Published in: on 11/09/2009 at 06:51  Leave a Comment  

Alles fangt widder aa!

Well liewe Leser, mei Summer is waericklich vorbei. Geschder hab ich gegrische: “Do kumme die Kinner!”. Ya, Geschder waar die aerschde Schuldaag fer selle Yaahr.

Die aerschde Daag is allsfatt schee. Die Schtudente sin arrig froh alle ihre Freinde zu sehne. Ich muss aa saage, dass die Schulmeeschdern sin aa froh die Kinner widderzusehne…well, net all die Kinner, awwer am menschde!

All die Schtudente schtehe in dem Gang un schwetze iwwer was sie alles im Summer gemacht hen. ‘Sis allsfatt nett all die Gschichte zu heere…well, net all die Gschichte, awwer am menschde! Was sehr schee is, wann ich die Schtudente zum aerschde Mol seit Tschuun seh. Mannichmol sehne sie ganz annerschder aus. Viel hen so viel gwaxe, as ich sie net kenn. Waericklich!

Ich glaab selle Yaahr waerd en gude Yaahr sei. Ich hab zwee Gruppe vun Hochdeitsch I, dann een Gruppe vun Hochdeitsch II, III, IV un V. Selle Yaahr hab ich aa en Gruppe vun AP Hochdeitsch. AP is en abaddiche Klaess. Sell is fer die Kinner die an der College geh wolle. Die Klaess is arrig hatt un gebt viel Arewet. Ich hab yuscht fimf Schtudente in re AP Klaess…un all fimf sin gude un gewissehaft. Ich weess schunn as sie all de Arewet duhe waerre.

Denk mol nooch an deim aerschde Schuldaag. Was fallt eich bei? Waart dihr aa froh widder in September mit re Schul zu aafange? Waart dihr aa froh eire Freinde widderzusehne?

Published in: on 03/09/2009 at 06:33  Leave a Comment