En Rees nooch Kanada!

Ich bin zerick! Letschde Woch bin ich nooch de Maritime Provinces vun Kanada gange.  Die Maritimes sin New Brunswick, Prince Edward Island, Nova Scotia un New Foundland. Deweil New Foundland so weit Weg is, bin ich nicht datt gange. Awwer ich hab die annere drei Provinces bsucht. Do is en Bericht vun meinre Rees:

Daag 1 – Howard, PA zu Bar Harbor, ME

Am Samschdaag bin ich ganz frieh wacker warre. Ich bin um fimf Uhr schun uff em Schtross gewest! Ich bin darrich NY, CT, MA, NH un endlich ME gfaahre. Ich bin in Bar Harbor abgschtoppt. Datt bin ich in em gleenen Wattshaus herbergscht. Fer Owedesse hab ich nadierlich Lobster gesse. Datt sin die Lobsters frisch aus dem See. In em gleenen Essblatz hab ich es gesse. Die Lobsters waare im Kiehler (lewendig) un en Mann hot mei Lobster graad in heesem Seewasser gschteckt. Nooch baut 15 Minutte waar er faddich. Ich muss saage, sell waar der beschde Lobster der ich in meim Lewe gesse hab.

Datt geht mei Lobster!

Datt geht mei Lobster!

Daag 2 – Bar Harbor, ME zu Charlottetown, PEI

Prince Edward Island is en Eiland un es gebt yuscht eene Brick (mer kann aa en Ferry nemme). Die  “Confederation” Brick is die zwett lengschde Brick in der Welt! ‘Sis iwwer 10 Meil lang! Ich bin nooch Charlottetown, der Haaptschtadt, gange. ‘Sis en gleen Schtaadt, yuscht 39,000 Eiwuhner. Charlottetown is wie Philadelfi do in Amerika. Die “Grunddaadis” vun Kanada hen sich datt in de 1860s versammelt un hen die Provinces vun Kanada zammegebrocht.  

Die Felder an Prince Edward Eiland sin schee....gell?

Die Felder an Prince Edward Eiland sin schee....gell?

Sell is Kanadas Confederation Hall, 'sis wie unser Independence Hall.

Sell is Kanadas Confederation Hall, 'sis wie unser Independence Hall.

Daag 3 – Charlottetown, PEI zu Ingonish, NS

Nova Scotia waar mein grosse Ziel in sellre Rees. Bevor ich datt gange bin, hab ich viel scheene Pickders vun Nova Scotia gsehne. Die waar recht…Nova Scotia is wunnerbaar schee. In Nova Scotia hab ich die Cabot Trail gemacht. Sell is en Schtross die um Cape Breton Eiland geht. ‘Sis ganz hoch in de Bariye un aa uff em See. Cape Breton hot viel Schottische un Franzeesische Leit datt. Sie waare die erschde Europaeische Leit in Nova Scotia. Was sehr gut is, die Leit in Cape Breton hen ihre Mudderschprooche bhalde! In naade Cape Breton die Schtrossschilder sin in Englisch un aa in Gaelig un in wescht Cape Breton die sin in Englisch un in Franzeesisch! Ich winsch as mir do in Pennsylfaania so en Ding schaffe kenne! Ich hab in Ingonish selle Owed gekaempt.

En Schtrossschilder in Englisch un aa in Gaelig!

En Schtrossschild in Englisch un aa in Gaelig!

En Paert vun der Cabot Trail. Sell waar net weit Weg vun meim Kaempingblatz!

En Paert vun der Cabot Trail. Sell waar net weit Weg vun meim Kaempingblatz!

Daag 4 – Ingonish, NS zu Cheticamp, NS

Vun Ingonish bis Cheticamp waar meh vun der Cabot Trail. Selle Paert waar hoch in de Bariye. Net so viel Leit wuhne in naade Cape Breton. Es gebt gleene “Fisching Schteddel”. In Cheticamp, en Franzeesische Schtadt, hab ich en wunnerbaar Owed ghatt. Ich bin zu em gleenen Essblatz gange. Weil ich datt waar, hot es Live Myusick gewwe. Cape Breton is bekannt fer ihre Keltic un Geigemyusick. En yunge Mann un en alde Mann hen traditional highland Myusick gschpielt. Die waar excellent!

En annere Pickder vun der Cabot Trail.

En annere Pickder vun der Cabot Trail.

Daag 5 – Cheticamp, NS zu Truro, NS

Ich hab en Freind der in Truro wuhnt, so hab ich ihn bsucht. Truro is en gleene Schtadt. Mir sin zum Park gange un hen glee bissel gewandert. Er hot mir viel iwwer Kanadas Gschicht ausglegt. Es waar sehr inderessant.

Daag 6 – Truro, NS zu Halifax, NS

Ich bin vun meim Freind sei Haus erscht nooch Peggy’s Cove gange. Peggy’s Cove is in NS sehr bekannt. Es gebt en gleene Lichthaus datt, es sehr oft abgenumme is. Es waar sehr schee. Vun Peggy’s Cove bin ich nooch Halifax, der Haaptschtadt vun NS, gfaahre. Halifax is en grosse Schtadt. Zur Zeit hot es die Tall Ships Fescht gewwe. Sell waar aa schee. Es hot iwwer 35 Schiffer datt im Harbor gewwe. Die Schiffer sin alle sehr alt und gross. Es hot so en Fescht uff em Boardwalk gewwe…viel zu esse un viel zu kaafe. Halifax hot aa en alde Citadel uff em Hiwwel. Es waar vun de Britisch in de 1800’s gebaut.

Es Lichthaus vun Peggy's Cove.

Es Lichthaus vun Peggy's Cove.

En Soldaat bei der Citadel in Halifax.

En Soldaat bei der Citadel in Halifax.

Es hot viel Tall Ships in Halifax gewwe!

Es hot viel Tall Ships in Halifax gewwe!

Daag 7 – Halifax, NS zu St. Martins, NB

Vun Halifax bin ich nooch Nei Brunswick gfaahre. Nei Brunswick liegt uff em Fundy Bay. Die Fundy Bay hot die heechschde un nidderschde Tides in der Welt. In Hopewell Rocks, en gleene Schteddel, wann die Tide aus is, kann mer uff em Seebodde laafe! Die Unnerschitt gschwischich Hoch un Nidder Tide is iwwer 50 Fiess! Ich waar um zwee Uhr datt, die Tide waar raus, so ich hab uff em Seebodde gelaafe, es waar sehr “cool”. Die Tides hen die Felse in luschdige Formations gschnidde.

Hopewell Rocks - die sin die Blummeheffe Felse.

Hopewell Rocks - die sin die Blummeheffe Felse.

Ich uff dem Seebodde.

Ich uff dem Seebodde.

Daag 8 – St. Martins, NB zu Howard, PA

Ich hab der ganze Daag in der Maschien ghockt. Es hot iwwer 14 Schtund ausgdauert bis ich endlich daheem waar.

Ich muss saage, as die Maritime Provinces sehr schee waar, un die Leit datt sin aa sehr freindlich un nett. Die Esse waar sehr appeditlich un die Myusick waar leicht an de Ohre! Ich bin ready widder datt zu geh. Ich kann die Maritime Provinces nett genung empfehle!

* Geb Acht! Es waerd kenn neie Poscht bis die ende Aagscht gewwe. Am Dinschdaag naegschde Woch geh ich uff em vier Woch lang Motorcycle Rees nooch Montana un Wyoming. Ya, ich weess, dihr saagt, heilich Dunnerwedder, der Doug is nimmi daheem! Awwer wann mer en Schulmeeschder is, muss mer im Summer reise…gell? Dann kumm September is mer ready mit de Kinner widder zu schaffe! Ich schreib mol en neie Poscht wann ich widder in PA bin. Bis dann, viel Schpass un mir sehne uns!

Published in: on 20/07/2009 at 08:15  Comments (3)  

Es Kutzschteddel Fescht!

Letschde Woch bin ich heem gfaahre um en ganze Woch mit der Familye zu hawwe. As ich daheem waar, waar es Kutzschteddel Fescht am geh.

Ich hab gedenkt as ich selle Yaahr es Fescht bsuche daet. Es Fescht is selle Yaahr vun der 27 Yuni bis zu 5 Yuli gewest. Es gebt so viel uff em Fescht zu sehne. Es gebt Kunschtler vun alle Satte Kunscht. Es gebt aa viel zu esse un drinke. Mer kann viel datt aa lanne. Es gebt viel “Lebendige Gschichtsleit.” Die hen viel vun der Kuldur un Gschichte die Deitsche ausglegt.

Im Blatz vun viele Wadde, waerd ich Pickders vun meim Daag uff em Fescht weise. Ich muss aagewwe as es Kutzschteddel Fescht en gute Ding is. Es bringt viel Leit vun alliwwer die Naard-Oscht zamme. Ich hab Leit vun Nei Yarrick, Nei Jersey, Maryland un viel annere Schtaate gsehne.  Ich hab aa en Familye vun Kalifornia gedroffe…aye aye aye, sie sin weit kumme! Gell?

Fer meh Information iwwer em Fescht, bsuche selle Website: Kutzschteddel Fescht.

Do sin ee paar Pickders:

Do is en Fraa am Schnerrenschnitte.

Do is en Fraa am Schnerrenschnitte.

Do is en Heffemacher.

Do is en Heffemacher.

Es hot viel Scheier Schtanne gewwe.

Es hot viel Scheier Schtanne gewwe.

Do is en Daadi un sei Sohn. Sie sin am Schtiel mache.

Do is en Daadi un sei Sohn. Sie sin am Schtiel mache.

Meh Scheier Schtanne.

Meh Scheier Schtanne.

Die Grossdaadi Grundsau Lodge waar nadierlich datt.

Die Grossdaadi Grundsau Lodge waar nadierlich datt.

Viel Kariche hen gleene Essbletz uff em Fescht.

Viel Kariche hen gleene Essbletz uff em Fescht.

Do sin en paar Pickders vun der Gwilt Scheier:

Es hot zo viel Gwilts gewwe...es waar unglaablich!

Es hot zo viel Gwilts gewwe...es waar unglaablich!

Do sin en paar Weibsleit am gwilde.

Do sin en paar Weibsleit am gwilde.

Es hot aa en Gwilt Vendu gewwe. Do is en Gwilt fer die Vendu: nidderschte Gebott is $1,000!

Es hot aa en Gwilt Vendu gewwe. Do is en Gwilt fer die Vendu: nidderschte Gebott is $1,000!

Mer kann aa eppes vun unsre Schprooch lanne.

Mer kann aa eppes vun unsre Schprooch lanne.

As eich sehne kennt, gebt es viel zu duh un sehne bei em Fescht. Vielleicht naegschde Yaahr waert eich geh?

* Geb Acht! Es waerd ken Poscht naegschde Woch gewwe. Ich geh am Vacation nooch Kanadaa fer 9 Daage. Die naegschde Poscht waerd iwwer meinre Rees sei.

Published in: on 06/07/2009 at 08:09  Comments (4)