En Daag in Hershey!

Am Sunndaag sin ich un drei Freinde vun mir nooch Hershey gfaahre. Unser grosse Ziel waar en Daag in Hersheypark zu hawwe. Mir sin um zwee Uhr do in Howard losgfaahre un sin um vier Uhr in Hershey aakumme. Mir hen in en Comfort Inn Wattshaus herbergt.

Fer Owedesse Sunndaag sin mir nooch Mt. Joy gfaahre um in Bube’s Brewery zu esse. Bube’s is en Brauerei un Essblatz mit gude Esse un Bier. Es Gebei is arig alt un sehr gut drinn decorated. Nooch em Esse sin mir widder zerick zu em Wattshaus gfaahre um in die Nescht zu geh.

Sie hen gude Bier un Esse datt.

Sie hen gude Bier un Esse datt.

Mir sin um siwwe Uhr am Mundaag uffgschtanne. Mir hen Mariye-esse im Wattshaus gesse. Dann sin mir um halwer nein nooch Hersheypark gfaahre. Ich lieb Hersheypark. As ich en Kind un Teenager waar, bin ich oft nooch Hershey gange. Ich lieb die Rides, abaddich die Roller Coasters! As mir in Hersheypark aakumme sin, sin mir in Chocolate World gange.

In Chocolate World gebt es en Ride die auslegt die Gschicht vun Hersheys un wie sie ihre schmackhaft Schokolaad mache. Alles riecht wie Schokolaad drinn! Ich bin allsfatt Stolz zu heere as Hersheys Schokolaad is so gut weil es vun PA Deitsche Millich gemacht is!

Do is wu mer neigeht.

Do is wu mer neigeht.

Nooch unsere Bsuch bei Chocolate World, sin mir in der Park gange. Es Wedder waar abselutt perfekt. Sunnich awwer net so hees. Es hot net so viel Leit gewwe, so die Lines waare net so lang. Mir hen gemisst yuscht ee Paar Minudde fer die Rides zu waarde.

Hersheypark hot viel Roller Coasters, un ich lieb sie zu reide. Sie hot ee Paar neie Coasters, die heese Fahrenheit un Storm Runner. Allebeed sin arig schnell un gut. Sie schlenkere un schiddle dei Kareber eppes wunnerbaar uff. Die Storm Runner laaft iwwer 70 Meils per Schtund in yuscht drei Segunde! Heillich epper sell is schnell! Die Fahrenheit hot en Hiwwel die meh as 90 Graad runnerkummt. Ich hab gekennt mei Bauch in mei Hals fiehle. Waerricklich! Mir hen die ganze Daag datt in Hershey rumgebrocht. Mir sin um sex Uhr widder nooch Heem gfaahre. Alle hen viel Schpass ghatt. Mir hen viel uff em Roller Coasters gegrische un viel uff em annere Rides gelacht.

Sell is der erschde Hiwwel fer der Fahrenheit.

Sell is der erschde Hiwwel fer der Fahrenheit.

Sell is der Storm Runner...mer kann sehe, wie es dich uffschiddlet.

Sell is der Storm Runner...mer kann sehne, wie es dich uffschiddlet.

Ya, Hersheypark is net billig, awwer ‘sis en gude Blatz un Zeit fer en Familye un ‘sis aa net so weit weck. Fer meh Information klick uff em Logo vun Hersheypark:

images-2

Published in: on 24/06/2009 at 09:41  Comments (11)  

Deitsche Kunscht an der Schul!

En gude Freind vun mir ist Kunschtschulmeeschdern. Sie arewet an en annere Schul as mir. Sie laernt Kinner vun Kindergarten bis Zwelfde Yaahr. En Owed waar sie bei mir fer Owed-esse. Sie hot en Daafschein vun meim Gross-Gross-Grossdaadi gsehne. Sie hot gedenkt as es so schee waar. Ich hab sie glee bissel iwwer Fraktur ausglegt. Sie hot graad gsaat, sell is eppes as ich mit mei Kinner mache kann.

Sie hot entscheidt as sie en Fraktur / PA Deitsche Unit mit ihre Fimfde bis Achdel Yaahr Klaesse mache waerd. Sie hot aagfaange mit en Paar Frooge. Sie hot wisse gewollt wie viel vun ihre Kinner Deitsche waar odder was die Kinner vun de Deitsche schunn wisse. Sie hot en Lesson iwwer die Deitsche un Amische gewwe. Sie hot die Kinner viel Beischpiele vun Fraktur gewisse. Sie hot viel iwwer die Farewe un Images gschwetzt. Sie hot aa iwwer Scheier-Schtaerne gschwetzt. Sie hot aa entscheide as die Fimfde un Sechsde Yaahr Scheier-Schtaerne mache daete un die Siwwede un Achdel Yaahr Heiraat-/Gebotsdaagscheine mache daete.

Sie hot ihre Kinner viel Practice-Schticke mache ghatt. Am End hot sie gsaat as yeder Kind sei eegene Fraktur Schtick erschaffe waerd. Die Unit hot iwwer vier Woche ausgedauert. Die Kinner hen gemisst Wasser-Farewe un Farewe-Bleipensils zu yuuse. Die Kinner waare zugschproche ihr eegene Images un Farewe zu yuuse, die ihr eegene Glaawe un Familye schpiggle.

Wann alles faddig waar, hen sie en Mini-Museum in die Klaessschtubb ghattt. All de Kinner hen die annere Kinners Kunscht gsehne.  Nooch die Mini-Museum, hot all de Kinner Melassichriwwelboi un Whoppy-Pies gesse. Die Schulmeeschdern waar sehr froh mit alles. Sie hot gsaat as die Kinner sehr gut geduh hot. Ich bin froh as die Kinner eppes neies gelannt hen, abaddich eppes iwwer uns Deitsche un unser Kunscht!

Do sin Pickders vun de Scheier-Schtaerne: (Es dutt mir leed, awwer ich kann die Pickders net umdrehe!)

En Bu is am zeichne.

En Bu is am zeichne.

Es Maedel is am aaschtreiche.

Es Maedel is am aaschtreiche.

En annere Maedel is aa am aaschtreiche.

En annere Maedel is aa am aaschtreiche.

Do sin Pickders vun de Fraktur:

En Heiraatssche

En Heiraatsschein

En Heiraatsschein

En Dodschein

En Dodschein

En Heiraatschein

En Daafschein

En Daafschein

Ich denk die Kinner hen sehr gut geduh! Sie sin aa sehr creative. Ich hoff as eene Daag die Kinner kennt die Kunscht aa in Deitsch duhe. Awwer, fer nau, die Englisch is besser als nix! Wie hoscht du die Kunscht gfunne?

Published in: on 17/06/2009 at 08:41  Comments (4)  

Faddich mit der Schul!

Geschdrowed hot mei Schul ihr yaahrliche Graduation Ceremony  ghatt. Es Wedder waar net so gut, so sin mir in der Schportschtubb gewest. Sell waar arig hees do drinn!  Ich hab viel gschwitzt…aye aye aye.

Die Senior Klaess selle Yaahr hot schier gaar 300 Schtudente. Ich muss ehrlich saage as ich habe yuscht 40 odder so gkennt. Es is allsfat hatt “Macht’s Gut!” zu meine Schtudente zu saage. Awwer ich weess as es mol Zeit is fer die Schtudente weiter zu geh.

En Schwetzer, der Superintendent, hot en gute  Rede gewwe. Er hot gsaat as es en schweri Zeit fer die Schtudente waerd: die Economie is net gut un mir sin nooch im Grieg. Awwer er (un ich) weess as sie viel Glick hawwe waerre.

Die Valedictorian un Salutatorian hen aa gut gschwetzt. Sie hen Gschichte vun ihre Zeit an die High School ausglegt. Die Salutatorian hot gsaat, as die Seniors eppes im Lewe finne solle, as sie glicklich mache.  Sie waare bedauerlich “Macht’s Gut” zu saage, awwer sie sin aa ready die naegschde Kabiddel ihre Lewe domit aazufaange.

Do is vier Seniors. Es Maedel uff der linke Seit waar en Hochdeitsche Schtudente vun mir. Sie waar aa die Salutatorian.

Do sin vier Seniors. Es Maedel uff der linke Seit waar en Hochdeitsche Schtudente vun mir. Sie waar aa die Salutatorian.

Ich winsch alle die Seniors in gaanze Amerikaa viel Glick mit ihre Zukunft. Hett eich Rot fer die Klaess zun 2009? Schreib mol en Comment!

Published in: on 10/06/2009 at 17:26  Comments (1)  

Eppes net digital zu lese?

Ich bin sehr dankbaar as so viele Leit mei Blog alle Woch lese. Awwer hett eich gwisst as es viele Bicher uff Deitsch gebt? In den letschten paar Yaahre sin viele guti Bicher rausgewwe. Viele Leit vielleicht wisse net wu mer sie kaafe kann. Ich hab gedenkt as selle Wochs Blog Poscht waerd iwwer die Meeglichkeet Deitsche Bicher zu kaafe.

Mer hot die Meeglichkeet Bicher im Internet un aa per Poscht kaafe. Ich waerd iwwer annerschdere Blatze schreiwe, un was fer Bicher sie hen zu verkaafe.

Die erschte Blatz is Edition Tintenfass. Sell is es Kumpanie in Neckarsteinach, Deitschland. Sie hen viele Bicher wie: Hans un Yarick, Mammi Gans, Die Nacht eb Grischtdaag un Der Glee Prins. Mer kann selle Bicher vun ihre Website kaafe: www.verlag-tintenfass.de

Hans un Yarick - Sell is en gschpassiche Buch!

Hans un Yarick - Sell is en gschpassiche Buch!

En sehr gute Website um Deitsche Bicher zu kaafe is Masthof Press: www.masthof.com Masthof Press is in Morgantown, PA. Sie hen viele Bicher in Deitsch un meh Bicher in Englisch die iwwer die Deitsche, Mennischte, Amische un Pennsylvaanische Gschichte sin. Mer kann viel vun ihre Website bschtelle.

Die letschte Blatz heesst The Family Album. Sie is en gleene Schdor un hot ken Website. Ihre Addresse is 4887 Newport Road, Kinzers, PA 17535 un ihre Fonnummer is (717) 442-0220. Bei The Family Album kann mer Mit Pennsylvaanisch-Deitsch darich’s Yaahr kaafe. Sell Buch is en “Reader” voll mit katze Schticke zu lese.

Mit PD darich's Yaahr - Sell hot so viele Schticke, es is hatt zu glaawe!

Mit PD darich's Yaahr - Sell hot so viele Schticke, es is hatt zu glaawe!

Wie eich sehne kennt, es gebt viele Meeglichkeete eppes in Deitsch zu kaafe. Blos mol der Schtaab aus dei Backebuch un kaaf eppes neies zu lese!

Published in: on 04/06/2009 at 17:42  Comments (3)