Sei Flu!

Neilich in re Nei-ichkeede lese un heere mir viel vun re Sei Flu. Viele Leit sin grank un viel Leit sin schunn gschtarewe. Es hot in Mexiko aagfange un is arig schnell darrich die Welt gange. Leit sin in Mexiko, USA, Kanadaa, Europa, Asia un in die Mitt Oscht grank. Awwer zum Glick gebt es ken in PA!

Was wisse mir davun? Ich hab glese as es en Flu die am Aafang vun Sei gkumme is. Es waerd vun Leit zu Leit gewwe darrich huuschde un niesse. Wann mer grank is, waerd mer net recht fiehle. Mer waerd fiehle as mir normal Flu hot. Mer waerd Halsweh un en Fiewer hawwe  un mer kann kotze. 

Was sehr schrecklich is, as so viel Leit schunn gschtarewe sin. Es gebt nooch net en Parbleblans fer sell. Die Dokder saage as mer die Hend wesche soll. Es is aa wichdig zu wisse as mer die Flu net darrich Seifleesch esse griege kann! Sell is gut, weil ich gleiche Seifleesch zu esse!

Ich hoff as die Flu bald vorbei sei waerd. Ich fiehl viel Mitgfiehl mit de Familye die Leit verlore hen.  En letschde Watt an alle mei Leser: Bleib gsund un wesch mol die Hend!

Published in: on 29/04/2009 at 17:50  Leave a Comment  

Vier!

Geschder bin ich heem gfaahre um in en Charity Golf Tournament zu schpiele. Alle Yaahr hot mei Cousin en yaahrliche Golf Tournament fer die Amerikaanische Grebs Gsellschaft.

Die Schpieler ready aazufange!

Die Schpieler ready aazufange!

Mei Familye. Deb, die Fraa mit em Kind, waar die Host. Sie is en Iwwerlewer vun Krebs.

Mei Familye. Deb, die Fraa mit em Kind, waar die Host. Sie is en Iwwerlewer vun Grebs.

Selle Yaahr waar die Tournament uff em Rich Maiden Golfblatz in Molltown, Barricks Kaunty. Die Tournament is allsfatt so schee. Selle Yaahr waar es Wedder abbadich perfekt! Sonnig un warm, iwwer 80 Degrees! Fer die Tournament muss mer $65 bezaahle um zu schpiele. Mer kennte aa Lecher schponsore. Ich hab en Loch gschponsort weil mei Mudder vun Grebs gschtarewe is.

Der Phil uff em dritte Loch.

Der Phil uff em dritte Loch.

En Schild fer mei Mudder.

En Schild fer mei Mudder.

Die Tournament hot iwwer 140 Schpieler selle Yaahr! Es hot 32 Mannschafte vun vier Schpieler gewwe. Am Aabeginn sin alle Mannschafte zu en annere Loch gange um aazufange. Mei Mannschaft hot uff em dritte Loch aagfange. Darich die Tournament, hen es viel Meeglichkeete scheene Dinge zu winne! Uff all Par 3 Lecher hot mer en Meeglichkeet eppes mit en Loch en Eener zu winne. Dinge wie $5,000, en grosse Guckbax odder Luftschiff Kaarde! Ich glaab as niemand hot en Loch in Eener gemacht hot.

Der Chris un der Bill waarde um zu schpiele.

Der Chris un der Bill waarde um zu schpiele.

Ich bin am schlagge!

Ich bin am schlagge!

Am End die Tournament hot es en Hinkel BBQ gewwe. Alle hen viel Schpass ghatt. Ich freu mich schunn viel uff re Tournament naegschde Yaahr. Letschde Yaahr hot die Tournament iwwer $9,000 fer die Amerikaaner Grebs Gsellschaft grickt! Ich hoff as es selle Yaahr hen sie meh Geld bekumme. Witt du Geld zu re Gsellschaft gewwe? Klick uff em Link um en Geld Geschenk zu gewwe.

Published in: on 26/04/2009 at 10:54  Leave a Comment  

Schport odder Myusick?

Wie ich schunn gschriwwe hab, bin ich Schulmeeschder uff re zimmlich grosse High Schul. Geschder Owed bin ich zu unser Myusickal gange. Alle Yaahr macht die Schul en Myusickal, selle Yaahr waar es die gut gegliche “Sound of Music.” Es gebt en volles Haus un iwwer 30 Kinner uff em Schtage. Die Show waar gut. Die Kinner hen gut gsunge un gedanst.  Abbadich waar es Maedel, es die Maria gschpielt hot…sie hot so en scheene Schtimm. Ich waar schtolz uff all de Kinner.

Uff mei Schul is Schport sehr wichdig…wie uff annere Schule. Normally is die Myusick un Kunst Programs nicht so hoch uff re Leeder. Viel Geld geht uff de Football, Wrestling un annere Schport Programs. Ich finn Schport gut un aa wichdig awwer Myusick un Kunst is aa eppes gut fer viele Kinner.

Ich muss ehrlich saage, ich bin glee bissel biased. Ich hab Schport gschpielt, as ich en Kind waar, awwer ich waar aa sehr committed zu der Myusick Program. Ich hab in der Schuylkill Valley Chor gsunge, Saxophone un Euphonium in unsre SV Baend gschpielt, waar der Drum Major in die Marching Baend un alle Yaahr hab ich in unsre Myusickal mitgschpielt. 

Wann ich uff mei High Schul Daage denke, bin ich meh schtolz uff mei Myusick as uff mei Schport. Myusick is en Weg fer Kinner sich selwer auszudricke. Ich hab aa viele Freinde gmacht. Selle Freinde sin nooch meine beschte Freinde. As ich en Uffgwaxner, sing ich nooch un schpiel mei Instrumente aa nooch. Awwer, heitzudaag, schpiel ich net so viel Schport. So was is dauerhaft…Myusick! 

Die annere Schulmeeschdere uff mei Schul schwetze allsfatt iwwer Schport, aa viel Leit in re Gsellschaft. Viel Eldre un Leit denke as mir ken Myusick brauche un deswege wolle sie ken Geld fer die Myusick Program gewwe. Ich glaab ich waerd soddiche Gedanke nimmi verschtehe.

Ich saag nooch mol as ich sehr biased bin. Myusick waerd allsfatt en wichdige Rolle in mei Lewe schpiele. Ich hoff as es allsfatt Myusick un Kunst uff High Schule gewwe waerd.  Waarscht du aa myusickalisch? Finndescht du Myusick un Kunst aa wichdig? Schreib mol en Comment!

Published in: on 18/04/2009 at 08:21  Comments (5)  

Oschder!

Yawell, nau en annere Oschder is vorbei. Ich hab gedenk as ich eppes iwwer Oschder schreiwe soll. Oschder wie viel vun eich schunn wisst is sehr wichdig fer uns Deitsche. E gebt viele Traditions fer Oschder aa. Ich waerd eppes iwwer wie mei Familye unsere Oschder gfeiert hot. Loss mich vun de Daage var Oschder aafange. Mei Mudder hot alle Yaahre ich un mei Bruder en neie Outfit fer Oschdersunndaag gkaaft. Mir hen gemisst eppes neies uff re Karrich draage.

Uff em Griedunnerschdaag hen mei Mudder un Grossmudder Oier gfarebt. Sie waare allsfatt so schee wann sie faddig waare. So viele unnerschiddliche Farewe.

Uff em Karfreidaag sin mir uff em Oieryaag der bei der Feier Kumpanie waar. Es hot so viel Kinner gewwe…un alle sin schnell un raubaschdich darrich em Grass gloffe um die Oier zu finne. Wann alles faddig waar, hot es viel Prizes gewwe, wie zu Beischpiel grosse Schoklaade Haasli!

Uff em Samschdaag hen ich, mei Bruder un unser Daadi Pissebett (Biddre Selaat) gyaagt. Mir sin darrich die ganze Hof gange um die griene Blans zu finne. Wann mir faddig waare, hen mir gemisst die Pissebett zu butze. Sell waar net so leicht. Mer muss mol gut gucke um es zu finne. 

Endlich waar es Oschdersunndaag. Sehr frieh waare mir wacker un hen unsere neie Kleidung angeduh. Mir sin in die Kich gange un hen gsehne was der Oschderhaas gebrocht hot. Dann sin mir uff re Karrich gange. Die Karrich waar allsfatt voll mit Blume, abbadich hot es viel Moiblume un Schtannblume gewwe. Alles hot so gut groche. Mir hen haarliche Lieder gsunge iwwer Grischdus Auferschtehung.

Nooch sell sin mir heem gange um en gross Esse zu hawwe. Alle Yaahr fer Oschder hen mir Schunkefleesch, Filse, Pissebett mit hees Schpeck Dunkes, Aerebse, Brot un Brieh gesse. Fer Nooch-esse hot es en Boi un en Kuche gewwe. Nooch em Esse hen mir Kaarde gschpielt.

Dazu Grischtdaag, Oschder waaar un is sehr gut gegliche bei mir. Ich bin allsfatt froh wann ich an Oschder denke. Was hett alle vun eich zu Oschder geduh? Schreib mol dei Oschder Traditions!

Published in: on 14/04/2009 at 17:26  Comments (1)  

Es Friehyaahr Butz!

Well, nau is es schunn Abril! Wann ich an Abril un Friehyaahr denk, denk ich an mei Mudder un ihr yaahrlich Friehyaahr Butz. 

Alle Friehyaahr hen ich un mei Bruder gemisst, unsre Mudder bei Butze zu helfe. Die Mudder saagt as es sehr wichdig waar es Haus en gute Butz zu gewwe. Der Dreck vun Winder hot raus gemisst. Mir hen alle Schtuwwe gebutzt. Mir hen die Schtuwwe gekehrt un mei Bruder un ich hen gemisst, all de Hausrode rumricke domit mir unnich kehre kennte.

Dann hen mir alles gschtaabt. Die Leescht un Fenschderraahme hen gemisst, aa gewescht sei. Aye Aye, Fenschder, mei Bruder un ich hen gemisst, aa die Fenschderglaas zu butze.

Zu letscht hot die Mudder all die Vorhange gewescht. Normally hot es en ganze Daag ausgedauert um alles sauwer zu mache. As ich en Kind waar, hab ich gedenkt alle die Butze waar net notwendig. Awwer nau as ich en Uffgwaxner bin, denk ich as es die richdiche Ding zu duh waar.

Wann mir faddich waare, hot es Haus ganz gut groche. Ich kann es nooch Heit rieche. Ich muss ehrlich saage, nau as ich mei eegene Haus hab, mach ich aa en Friehyaahr Butz. Ich bedank mich mei Mudder as sie sell zu mir gelearnt hot. Hen alle vun eich eier Friehyaahr Butz schunn geduh? Wann nicht, loss mich eppes vun meinre Mutter saage: “Vergess net in die Ecke zu butze…datt gebt viel Dreck!”

Published in: on 03/04/2009 at 20:14  Comments (1)