Is unsere Gsellschaft nooch nett?

Letschde Woch hot der Reading Eagle en Series vun Ardickeln die iwwer “Common Courtesy” rausgewwe. Es waar in fimf Schticke gschriwwe. Die fimf Topics waare: Der Unnergang vun Civility, En Guck uff unser Schprooch, Wie die Leit heitzudaage aaduh, Was is zu Mannier gschehe un Wie mer zu Incivility antwatte. Die Artickeln waar sehr gut gschriwwe. Die Schreiwere hen waericklich en gute Guck uff die Gsellschaft gemacht.

Ich will yuscht ee paar Comments gewwe vun was ich gelese hab un was ich in mei Lewe gsehne hab. Die erschte Schtick saagt viel iwwer fer was unsere Gsellschaft Civility net meh hot. Manniche Leit saage as mir zu weit gange sin…mir kenne net zerick kumme. Ich hoff as sell net die Waahrheit is.

Die zwette Schtick schwetzt iwwer unser “schlechte” Schprooch. Mer heert Fluchwadde iwwerall: im Guckbax, im Schwetzkaschde, uff em Internet Deswege schwetze die Kinner un aa die Uffgwaxener so schlecht! Ich weess as in Deitsch Fluchwadde normal sin awwer mir schwetze net so in Publik.

Die dritte Schtick waar vun unsere Gsellschaft un unser Gleeder. Fer was draage so viel Leit soddiche Gleeder? Viel Leit hen fast kee Gleeder aa! As Schulmeeschder seh ich es alle Daag! Die Kinner, abbadich die Meed, draage nixs viel. Odder die Kinner draage Gleeder domit die annere Kinner ihre Tatoos sehne kenne. Ich saag allsfat, sei so gut, duh en Sweatshirt aa!

Die vierte Schtick schwetzt vun Mannier un Courtesy. Waericklich, wie unsere Gsellschaft ken Mannier hot. Ich bin so bees wann ich ammenent bin un die Leit schwetze uff em Cell Phone. Letschde Woch waar ich in en Schdor. Ich waar im Line um zu bezaahle. Der Drupp var mich, hot die ganze Zeit uff seim Cell Phone gschwetzt, aa wann er uff em Cash Register waar! Dann hot er bezaahlt un is er fattgange un hot gaar nixs zu dem Verkaafer gsaat! Sell find ich arig! Ich hab aa en Cell Phone, awwer ich weess wann die rechde Zeit es zu yuuse is.

Die letschde Schtick hot ausglegt wie mer zu Incivility antwadde solle. Ich denk as sell die schwerschde Ding zu duh is. Zu viel Leit sehe soddiche Dinge awwer hen zu viel Bang um eppes zu saage. Ich glaab ich waerd meh Mut in der Zukunft hawwe um eppes zu de grobbe Leit zu saage. Epper muss eppes saage un duhe um en Ennerring zu mache.

Henn alle vun eich soddiche Dinge aa gsehne? Was is unser Zukunft? Do is die Link zu der Ardickeln. Ich hab Glaawe in Leit, hoffetlich waerd alles besser sei…un aa es net so lang ausdauert.

Link zu der Artickeln 

Published in: on 28/03/2009 at 14:39  Comments (6)  

PA Deitsch Fescht in Lebnen!

Selle Wochenend bin ich uff em Rutsch gfaahre. Ich bin nooch Lebnen uff em Samschdaag gange. In Lebnen hot es dem varzeht Deitsch Fescht uff em HAAC Campus gewwe. Ich bin um 9 Uhr aakumme un hab graad viel Leit gsehne. Es hot viel Esse gewwe un aa viel Stands. Die Stands hen viel zu verkaafe. Die Esse un Handwerke waar sehr gut. Mer kenn Fraktur, Scheerenschnitte, Scheier Schtaerne un Bicher kaafe. Hitz’s Marrick hen die Middaag-esse ghatt.

Uff em halwe zehe hot der Nei Dolpehock Sanger Chor gsunge. Sie hen viel Lieder gsunge. Sie hen patriodische Myusick wie “Des Land is mei Land” ausgfiehrt. Sie hen aa Volkslieder wie “Heyli Heylo” un Karrichlieder gsunge. Die Chor is vun alde Leit gemacht awwer sie kenne nooch gut singe.

Die Dolpehock Sanger Chor am singe.

Der Nei Dolpehock Sanger Chor am singe.

Nooch der Nei Dolpehock Sanger Chor gsunge hen, hot der Patrick Donmoyer en Rede gewwe. Er hot sei Presentation “Barn Stars: A Photographic Survey and Critical Analysis of PG Folk Art Iconography” gewwe. Er hot gsaat as er schunn Pickder vun iwwer 400 Scheier in Barricks Kaunty gnumme hot. Er hot viel vun der Gschicht  die Scheier Schtaerne ausglegt. Er hot aa ausglegt wie die Sunn die Scheier Schtaerne un die Farewe ennere. Er hot ausgfunne  as die Scheier Schtaerne net bloss uff em Drauss vun Scheier gewwe hot, es gebt aa Scheier Schtaerne drinnen! Am End hot er iwwer die Symbolism vun Scheier Schtaerne gschwetzt.

Der Patrick Donmoyer schwetzt iwwer Scheier Schtaerne.

Der Patrick Donmoyer schwetzt iwwer Scheier Schtaerne.

Der naegschde Vordraager waar der Keith Brintzenhoff. Er hot vun der Myusick die Deitsche gschwetzt. Er hot gsaat as es sechs Satte vun PD Myusick gebt: Karrichlieder, Feierdaagelieder, Kinnerlieder, Mann un Fraa Lieder, Arewet Lieder un Schpassiche Lieder. Er hot viele Instrumente aa mitgebrocht wie: en Gitar, Banjo, Maulariyel, Geig, Zither, Dulcimer un en Autoharf. Er hot viel Lieder gschpielt um die Instrumente zu weise. Am End hot er en PD Version vun Jimmy Buffet’s “Margaritaville” gsunge.

Der Keith mit zwee Zither.

Der Keith mit zwee Zither.

Uff em een Uhr hen die Brethren Heritage Singers en katze Konzert gewwe. Sie hen aldi Bruderische Karriche Myusick gsunge. Sie hen “accapella” (mitaus Instrumente) gsunge. Ihre Schtimme waare ganz schee zu heere. Es waar wie Engel am singe waare! 

Die Heritage Brethren Singers am singe.

Die Heritage Brethren Singers am singe.

Am End der Daag hen die “Schwadore Schalle” gsunge. Sie sin en Kinnerchor vun Lebnen. Die Alice Spayd is die Direktor. Sie hen viel Lieder gsunge. Es waar wunnerbaar gleeni Kinner in die Mudderschprooch singe zu heere! Sie hen aa Props ghatt. Wann sie “Yakob sei Leeder” gsunge hen, hen en paar vun de Kinner die Audience gewisse wie mer mit em Yakobs Leeder schpielt.

Die Schwadore Schalle im Konzert.

Die Schwadore Schalle im Konzert.

Ich kann ehrlich saage, as ich viel Schpass in Lebnen ghatt hab. Ich hab aa viel glannt. ‘Sis allsfatt gut zu wisse as es viel Leit nooch mit der Mudderschprooch am Arewet sin. Ich bin schunn uffgeregt uff em naegschde Yaahr widder nach Lebnen zu faahre.

Do sin meh Pickders vun der Fescht:

En Fraa macht en Scheerenschnitte.

En Fraa macht en Scheerenschnitte.

Do is en echte Schuhmacher.

Do is en echte Schuhmacher.

Published in: on 22/03/2009 at 12:25  Comments (2)  

En Feierdaag fer uns?

Naegschde Woch is der St. Patricks Daag. Sell is en grosse Daag fer all unsere Irische Freinde. As ich so viel vun St. Patricks Daag gheert hab, hab ich gedenkt: Fer was gebt es ken Deitsche Feierdaag? St. Patricks Daag macht Schpass, abaddich wann du gleichscht grien Bier zu drinke un Corned Rinsfleesch un Graut esse! Viel Leit verkleide sich als Leprechauns un draage viel grien. Oh, un es gebt viel Schtrutze in die grosse Schtedt…so viel Leit welle ihre Irische Stolz abweise. Sell find ich gut! Ich denk ‘sis wichdig stolz uff dei Kuldur zu sei.

So uns Deitsche sin aa Stolz, gell? Fer was hemmer ken eigene Feierdaag? Ich schlagge vor, as mir en Feierdaag erschaffe. Was soll es heese? Wann soll es sei? Was waerd unser Fareb odder Farewe sei? Ich froog all die Leit die mei Blog lese. Wann du guti Antwadde hoscht, loss mich en Comment uff em Blog! Ich freu mich schunn uff ihre Antwadde!

Published in: on 15/03/2009 at 11:19  Comments (4)  

Die dunkle Zeite!

Aye, Aye, Aye…die Baenks hen grosse Problems, die grosse Investment Kumpanies hen aa Problems. Viel Leit hen ken Arewet. Viel Leit hen net so viel Geld as sie frieher ghatt hen. Ich saag as mir dunkle Zeit hen. Die Economie is abselutt net gut. Alle Daage geht die Dow Jones nunner.. Ich gschpier as mir in en dunkle Tunnel sin, un mir kenne die Licht net sehne.

Ich bin Schulmeeschder in en Gegend vun PA die sehr economically verleed is. Viel vun de Eldre mei Schtudente hen ken Arewet odder nur en Job das “halwer Zeit” is. Die Kinner saage as es net gut daheem is. Wann ich soddiche Dinge heer, is es hart fer mich uffzunemme. Ich gschpier mich Drauer fer die Kinner un aa fer die Eldre. Es is net alle ihr Schuld as sie ken Arewet hen.

Selle Recession hot mich aa perseenlich gdroffe. Mei Daadi is zidder Oktober mitaus Arewet. Un sei un mei Retirement Plans hen viel Geld verlore. Nau hen mir en neie Bresident do in Amerikaa. Ich well hoffe as der Obama eppes mache kenne. Viel Leit brauche Hilf. Der Obama will eppes duh awwer es waerd net leicht die Problems zu bessere.

Vielleicht is es endlich Zeit as alle die Amerikaaner widder fer alle annere aushelfe. Es waar en Zeit (net so lang weck) wann viel Leit hen uff em Land glebt. So en Lewe is in unser Blut. Blans en Gaarde un geh zamme mit en Nochbar. Zamme kenne mir wedder em Schtaerm fechde.

Published in: on 06/03/2009 at 20:43  Comments (1)