Wann kummt es Friehyaahr?

In der letschde Woch, hab ich mich selle Froog oftmols gfroogt! Ich weess, es is nooch Hanning …un ich  weess as Matz kalt un schneeich sei kann. Awwer, letschde Woch hemmer ee Paar scheene warme Daage ghatt. Dunnerschdaag waar es 55 Grad bei mir do in State College. Sell waar awwer schee! Die Sunn waar draus un ich hab graad an es Friehyaahr gedenkt. Ich kennt die Blume schunn rieche!

Selle Winder hemmer viel Schnee un Eis ghatt. Es waar aa sehr kalt do in midde Pennsylfaania. In Yenner (ich weess der Daadem net meh) waar es -21 Grad bei mir da heem…sell is ersetzlich kalt, gell? Ich gleich der Winder un ich gleich aa Schnee…awwer ich bin ready fer es Friehyaahr. Ich saag oftmols zu meine Freinde as ich vun PMS in Hanning erleid. Dann frooge sie: “Was mehnscht du PMS?” Ich saag dann “Parked Motorcycle Syndrom”. Ich waerre meh schpeeder iwwer Motorcycles in en annere Poscht schreiwe.

Der Grundsau Phil hot gsaat zerick am 2. Hanning as es 6 Woch meh Winder gewwe daet. Ich glaab ich muss yuscht waarde. Ich weess es Friehyaahr kummt…awwer es kummt net schnell genunk. Wann du aa “Cabin Fiewer” odder “Parked Motorcycle Syndrom” hoscht, schreib mir eppes. Vielleicht  kenne mir yede anner helfe. Ich winsch eich en scheene End zu Hanning!

Published in: on 27/02/2009 at 17:10  Leave a Comment  

Faasnachts!

Selle Woch waar es widder Zeit Faasnachts zu mache. Faasnachts sin gleene Kuche, die aus en Grummbieredeeg gemacht sin. Mann esst Faasnachts uff em Dinschdaag eb Ascher Mittwoch. Faasnachts kenne deieckich odder viereckich sei. Mann saagt as die dreieckiche represente die Dreieenichkeit un die viereckiche represente die vier Effengelien.

Wann mann Faasnachts mache will, braucht mann Grummbiere, Millich, Oier, Salz un Satz. Vun selle Dinge macht mann der Deeg. Dann muss mann der Deeg uffkumme losse. Wann der Deeg uffkumme is, dann muss mann der Deeg ausdreele, dann kann man der Deeg schneide. Nooch man der Deeg ausgedreelt hot, un die Faasnachts gschnidde hot, kummt die Brodezeit.

Mann muss die Faasnachts in heese Eel brode, bis sie goldebraun sin. Wann alles faddich is, kann man die Faasnachts endlich esse! Es gebt zwee Wege Faasnachts zu esse, mann kann sie in vermaahlde Zucker decke odder mitaus Zucker. Die traditionele Weg is mitaus Zucker, un dann in halb schneide un mit Butter und Sirrop esse. Mmmm…es gebt nichts besseres odder so appeditliche as frische Faasnachts!

Mir sin ready der Deeg auszudreele.

Mir sin ready der Deeg auszudreele.

Der Kevin dreelt der Deeg aus. Die Jess is ready die Faasnachts auszuschneide.

Der Kevin dreelt der Deeg aus un die Jess is ready die Faasnachts auszuschneide.

Die Faasnachts in heese Eel.

Die Faasnachts in heese Eel. Sie sin nooch net ready auszukumme.

Ich un die Peggy am Brode.

Ich un die Peggy am Brode. Mir hen schunn ee Paar Faasnachts die faddich sin.

Die Faasnachts sin faddich!

Do sin die Faasnachts. Nau is es Zeit zu esse!

Published in: on 22/02/2009 at 14:06  Comments (1)  

En Gebottsdaag Fescht!

Letschtes Wochend bin ich heem gfaahre. In Hanning hen mei Daadi un Grossdaadi Gebottsdaag. Alle Yaahr hen mir en Gebottsdaag Esse fer allebeed. Selle Yaahr waar es net anners. Am Samschdaag bin ich zu mei Grosseldere gange um en guti Zeit zu hawwe. Mir hen um fimf Uhr gesse. Es gebt gereeschte Ginnihinkel mit Brieh, Filse, Aerbese, gedatte Welschkann, Siessgrummbiere un Grautselaat. Es Esse waar wunnerbaar appeditlich. Alles was mir gesse hen kummt vun die Bauerei meim Daadis…ken “processed food” selle Owet!

Zum Noochesse gebt es Landis Kuche mit Eiscream. Landis Kuche is en weisse Kuche . Die Grossmudder  saagt as die Reseet arich alt is. Mir hen en Kerze druff em Kuche gschteckt un mir hen “Haerrliche Gebottsdaag” gsunge. En Kerze waar net genug…der Grossdaadi is vierunachtzig un der Daadi is fimfunfuffzig Yaahre alt, awwer en Kerze is was mir hen! Nooch en Winsch, hen der Daadi un Grossdaadi die Kerze rausgeblose. Dann hen Alliepper der Kuche mit Vanilla Eiscream gesse. Mir hen aa gute Kaffi gedrunke.

Nooch die Esse hen die Gebottsdaag Buwe ihre Gschenke uffgemacht. Allebeede waare froh fer alle die scheeni Gschenke zu griege. Schpeeder hen mir Haasenpfeffer gschpielt. Haasenpfeffer odder “Haasie” is en altes deitsches Kaarteschpiel. Mir hen viel glacht darich es Schpiel. Endlich um zehe Uhr waar es Zeit heem zu gehe. Ich hab mei Grossmudder und Grossdaadi en Boss gewwe un hab sie aa umaarmt. Es is allsfatt schee Zeit mit re Familye rumzubringe. Ich guck mich schunn uff naegschte Yaahr un unsere Hanning Gebottsdaage!

Published in: on 16/02/2009 at 08:16  Leave a Comment  

Skype!

Ich hab neilich en Skype Account uffgemacht! Nau du kannscht mit mir schwetze. Mei Skype Naame is: dmadenford

Wenn du Skype schunn hoscht, dann schreib mir eppes! Wenn du ken Skype Account hoscht, geh mol zu: www.skype.com. Sell is leicht zu duh, koschdet nix un is aa viel Schpass!

Published in: on 10/02/2009 at 17:23  Comments (4)  

Es grosse Football Schpiel!

Geschder waar en grosse Daag do in Pennsylfawnia. Der ganze Schtaat waar uffgeregt. Die Pittsburgh Steelers un die Arizona Cardinals hen in die Super Bowl gschpielt. Es Schpiel waar in Tampa Bay, Florida gschpielt. Es Wedder waar viel besser als do in Pennsylfawnia. In Florida waar es 60 Graad awwer in Pennsylfawnia waar es viel kiehler un aa nett so sunnig.

Super Bowl Sundaag is allsfatt verrickt do in Amerikaa. Viel Leit hen Partys um sell Schpiel aazugucke. Es waar abaddich verrickt selle Yaahr deweil en Mannschaft aus Pennsylfawnia in sell Schpiel waar. Ich glaab sell wichdichste Essach fer Super Bowl Sundaag is Pizza. Ich winsch ich hett en Dollar fer alle Pizza die in Amerikaa geschder verkaaft waar. Ich glaab viel Bier un Wei waar aa gedrunke.

Ich personlich bin ken grosse Footballmensch…awwer alle Yaahr guck ich die Super Bowl aa. Was ich am beschde finn sin die Commercials. Sie sin arrig voll Schpass. Sie solle voll Schpass sei, wenn man en million Dollar fer dreissig Segunde bezaahle! Die Halftime Show is aa eppes zu sehe. Selle Yaahr hot der Bruce Springsteen un sei Baend gschpielt.

Sell Schpiel waar arrig uffgeregt. Die allebeede Mannschafte hen gut gschpielt. Am End sell Schpiel waar es 27 – 23. Die Mannschaft vun Pennsylfawnia hen gewunne! Die ganze Schtadt Pittsburgh waar froh. Leit hen in die Schtroosse gfeiert. Sell waar die sechsde Mol as die Steelers die Super Bowl gewunne hot. Nau is der Football Season widder vorbei bis naegscht Aaguscht.

Do is die Logo vun sellem Schpiel

Do is die Logo vun sellem Schpiel

Published in: on 02/02/2009 at 18:39  Leave a Comment