Nadd Korea: Was iss letz?

Guder Daag Blog Leser! Well mer kann net die News gucke odder heere mitaus eppes iwwer Naad Korea zu heere odder zu sehne. Awwer was wisse mir eigetlich iwwer dem Land? Ich hab gedenkt ass vielleicht waerr es gut glee bissel iwwer ihre Gschicht des Woch zu schreiwe.

Dem Nadd Korea sei voll Naame iss The Democratic People’s Republic of Korea (DPAK). Es liegt in Asia gschwischich Sudd Korea un Russia. Es hot 25 Millyonen Leit un die Haaptschtadt iss Pyongyang.

1280px-Flag_of_North_Korea.svg

Die Faahne vun Nadd Korea

Vun 1910 bis 1945 waar ganz Korea en Schtick vun der Kaiserreich vun Japan. Nooch dem Zwette Welt Grieg, waar Korea in zwee Schticke gschpalt. Es nadd Schtick waar vun de Soviets gemanaget un es sudd Schtick waar vun Amerikaa gemanaget. In 1950, hen die Nadd Korea Leit browiert es sudd Schtick zu nemme. Des hot der Korea Grieg ausgesetzt un der Grieg iss bis zum 1953 gefochde. Am End hot es yuscht en Fried gewwe awwer ken Treaty. So die zwee Lenner sin so gebliwwe. Es Nadd waar Communist un es Sudd waar en Democracy.

Der aerschde Haaptman vun Nadd Korea waar der Kim Il-sung un er waar an der Macht bis 1994. Nooch sei Dod, sei Soh, der Kim Jong-il, hot die Graft iwwergenumme. Er waar der Haaptman bis sei Dod im 2011.  Die Kims hen viel Geld an die Military ausgewwe un net so viel Geld an ihre Leit gschpendt. Es hot aa ee paar schlechte Yaahre mit viel Hungersnot gewwe. Viel Leit sin gschtarewe. Die Regiering iss arrig oppressive. Es gebt ken Freie Press odder Freiheit vun Schwetze. Alles kummt vun re Regiering. Im Yaahr 2006, hot Nadd Korea sei aerschde Nuclear Test gemacht. Im Diesember 2011, nooch Jong-il sei Dod, iss sei Soh, der Kim Jong-un an die Macht kumme un er iss allsfatt noch datt. Des Yaahr hot der Jong-un viel meh mit sei Nuclear Brogramm gemacht un hot es weiter entwickelt. Des hot viel Stress zu re Welt gebrocht. Mir wisse net was er duhne waerr. Sie saage ass er nau vielleicht en Inter-Continental Ballistic Missile hot! Des Woch hot der Bresident Trump grefdiche Wadde mit Nadd Korea geyuust.

_95387046_a6a0d699-62f8-4eec-9ec4-e8d0047cb3a3

Der Haaptman, der Kim Jong-un

Annere Lenner in re Welt un die United Nations hen viel Sanctions uff Nadd Korea gschtellt, awwer es macht nix aus zu dem Jong-un. Ich bed ass Fried rauskumme waerr un ken Missiles waerre gschosse sei.

Do iss en Audio Klip: 

Published in: on 11/08/2017 at 15:39  Comments (3)  

Widder zerick!

Guder Daag Blog Leser!

Well, ich bin geschder zerick in die Heemet geflogge. Deitschland waar so en echte gudi Zeit. Mir hen viel viel Material gefilmt fer die Movie. Die Movie Kalls saage as sie naegschdes Yaahr faddig mit de Editing sei solle. Ich loss eich wisse so bald as der Movie faddig iss. Awwer bis dann, do iss en Link zu en Teaser Trailer fer der Movie. Sell hot Clips vun unsere Zeit in Kutztown in Tschunn. Loss mich mol wisse wie du es finndscht!

Published in: on 07/08/2017 at 04:37  Comments (1)  

Movie mache!

Guder Daag Blog Leser! Es dutt mir leed as ich net so viel Blog Poschts des Summer gschriwwe hab. Ich muss ehrlich saage as mannichmol geht die Zeit zu schtarrick. Heit, mei Fraa un ich fliege nooch Deitschland fer 8 Daage. Ya, widder zerick in em alte Land. Frieher des Yaahr hawwich iwwer der Documentary Film: Hiwwe wie Driwwe: Pfälzisch in Amerikaa” gschriwwe. Well in Tschunn, die Hochdeitsche Movie Kalls waare do in Pennsylvaania gewest un mir hen 6 Daage gefilmt. Nau geh ich iwwer em Atlantik fer meh filme, awwer des Mol in Deitschland. Wann mir zerickkumme waerr ich Pickders mit eich deele un schreib glee bissel iwwer mei Erfaahring. So bis ich widder die Fiess uff unser Grund hab, mach’s gut, un ich waerr en Bier odder Wei fer eich drinke!

Published in: on 28/07/2017 at 05:23  Comments (2)  

Ken Meh “Yuscht fer Schee”.

Guder Daag Blog Leser! Des Woch waar es Kutztown Folk Fescht un man waar es gut, wie allsfatt. Alle Yaahr uff em Fescht, gebt es en Schreiwers Fescht. Leit die Deitsch schreiwe kenne, bringe en neie Schtick zu lese. Des Yaahr hemmer 11 Leit in es Fescht ghatt…en neie Reckord! Nadierlich hawwich eppes gelese, awwer en guder Freind vun mir, der Kevin Sterner, hot aa widder eppes gschriwwe. Sei Schtick waar so gut, ass ich ihn gfroogt hab eb ich es mit eich deele kennt. Glicklicherweis hot er “ya” gsaat! So do iss, un man iss es gut!

Ken Meh “Yuscht fer Schee”

Paar Yaahre zerick war ich in Manhaetten, un ich hab g’nootisst wie schee viel vun de alde Gebeier waare…un aa wie wiescht viel vun de neie Gebeier waare. Die alde Gebeier henn schee Deckereeschens ghatt ass aus Schtee gemacht waare, odder aus Sement, odder aus Metaal. Die neie Gebeier sinn all yuscht Glaas Kaschde.

Des hot mich gemaahnt vun unsrer deitsche Volkskunscht. En hunnert Yaahre zerick, wann alles vun Hand gemacht waar,  henn die Leit viel meh Acht gewwe wie Sache geguckt henn. Wann du sie gfroogt hettscht, ferwas sie ihre Schtiel schee gemolt henn, odder Schtanne uff ihre Scheier geduh denn, odder wunnerbaare Taufscheine gemacht henn, hedde sie gsaat, “Ei, yuscht fer schee.”

Awwer, graad gleich die schee alde Gebeier, mir duhne selle Dinge ken meh. Unsere Hausrode, unsere Gleeder, un unsere Haussache sin yuscht bleen, wiescht sogaar.

Des iss en Baradox. Ferwas, wann heidesdaags henn mir so viel Freizeit, duhne mir nau so wennich, “yuscht fer schee”?

Ich glaab ass ich es ausgfiggert hab. En hunnert Yaahre zerick, nemmt alles viel Arewet zu mache. Fer eppes schee zu mache, nemmt es yuscht en bissel meh Arewet, ass fer eppes yuscht nitzlich zu mache. Wann es net viel meh koschde deet, ferwas net mache es so schee ass du kannscht? Heidesdaags, alles iss so billich zu mache mit Maschiene, awwer Kunscht koscht noch meh. En schee gemolte Schtuhl koscht arrig viel meh ass der gleiche Schtuhl, unne Deckoreeschens. Daarum, duhne mir sell net. 

Ya, mir sinn viel reicher ass wie en hunnert Yaahre zerick. Awwer, wie henn mir vorgesaat kennde, ass was mir so reich mache deet, deet uns aa so aarem mache?

Gross Dank Kevin fer dei Schtick! Glee bissel Philosophy un Gedanke sin allsfatt gut. Sie mache uns aa uff der Welt mit vielleicht en annere Perspektive gucke.

Do iss en Audio Klip: 

Published in: on 07/07/2017 at 06:04  Comments (2)  

Dem Daadi sei Daag!

Guder Daag Blog Leser! Well des Sunndaag iss Daadidaag do in Amerikaa. Des Woch will ich glee bissel iwwer dem Daag sei Gschicht schreiwe.

Daadidaag iss en Daag um re Daadischaft zu feiere. In Gaddolische Europe, Daadidaag kann sei Gschicht so weit zerick as die Middle Ages finne. Es waar uff em 19. Matz gfeiert as der Feschtdaag vun Sankt Joseph. Der Joseph iss nadierlich dem weltliche Daadi vun dem Herr. Des Fescht waar nooch der neie Welt mit de Schpanisch gebrocht.

Daadidaag waar net in Amerikaa bis em 20. Yaahrhunnert gefeiert. Der aerschde Daadidaag waar in Fairmont, Wescht Virginia uff em 5. Tschulei, 1908 gefeiert. Nooch en schlechde Kohlmein Unglick, mit 361 dode Meinder, der Parre Robert Webb hot gewollt all die dode Daadi zu ehre.

En Bill fer en official Daadidaag waar var der Congress im 1913 gebrocht, awwer es waar net zugebrocht. Im 1916, Bresident Woodrow Wilson hot Congress aa gfroogt, awwer Congress hot gedenkt ass es yuscht en Daag waerr fer Kaarde Kumpanies, wie Hallmark, meh Geld zu verdiene, so sie hot widder nee gsaat.  Bresident Calvin Coolidge hot es widder im 1924 browiert, awwer widder nix iss devunkumme. Im 1966, Bresident Lyndon Johnson hot die aerschde official bresidential Ausruf fer Daadis zu ehre gewwe, un er hot der dritte Sunndaag in Tschunn ass Daadidaag benaamt. Sex Yaahre schpeeder, der Daag waar en feschde National Feierdaag gemacht wann der Bresident Richard Nixon hot es as en Gesetz im 1972 unnergschriwwe. Ya, Daadidaag iss yuscht 45 Yaahre alt! Im Vergleich, der Mudderdaag waar schunn im Yaahr 1914 unnich der Hand der Bresident Woodrow Wilson ausgerufe.

So des Sunndaag, wann dei Daadi nooch am lewe iss, ruf ihn uff un saag ihm wie viel du ihn liebscht un dank ihn fer alles was er geduh hot! Wann dei Daadi schunn nooch Himmel gflogge iss, nemm glee bissel Zeit un denk uff die gude alde Gedechtnisse vun dei Zeit mit dei Daadi.

Do iss en katze Gebet fer Daadis:

Liewer Gott, seg all die Daadis in re Welt. Fiehr sie um gude Role Models zu sei un liebvoll zu all ihre Kinner. Helf sie um en guder Daadi zu sei, wie du bischt. Geb sie Gnaad un Geduld um yede Situation zu handle in en liebreiche Weg. Amen. 

Do iss en Audio Klip: 

 

 

Published in: on 16/06/2017 at 05:03  Comments (1)  

Mei Heemet Land

Guder Daag Blog Leser! Des Wochend waerr ich in en grosse Konzert singe. Do in Pennsylvaania gebt es hochdeitsche Singdruppe. Yedes Yaahr kumme die Druppe zamme um en grosse Konzert zu gewwe. Des Yaahr waar ich gfroogt mit re Drupp aus Williamsport (Gesang Harmonia Verein) mitzusinge. En Lied vun re Konzert heesst “Dear Land of Home” mit Wadde vun dem Charles F. Maney un die Melodei iss Finlandia vun Jean Sibelius. Ich hab die Wadde arrig schee gfunne un Meeningsvoll, so ich hab es ins Deitsch iwwersetzt. Viel Gschpass bei lese, un wann du kannscht, sing es mol!

Mei Heemet Land

Mei Heemet Land, mei Hatz zu dir iss ghalde.

Mit gedreilich Lieb, fer yede bekanntes Blatz;

// Dei Barriye behied’, die Felder vun goldne Frucht,

Dei Rewwer fliess’ darrich Wies vun grien. // (iwwerhole 2 Mol)

Dei Kinner, mir, unser Lieb un Schtolz beichde.

In des schee Land, des blessierlich Blatz vun Heem;

// Un drachde mir, en reicher Sege zu bringe,

Um dich nau zu gron’ darrich die Yaahre. // (iwwerhole 2 Mol)

Do iss en Link zu en Video mit re Melodei un die Englische Wadde.

Do iss en Audio Klip: 

Published in: on 09/06/2017 at 14:07  Leave a Comment  

Mammi Gans!

Guder Daag Blog Leser! Des Woch hot mei Fraa Bicher zu unsere Kinner gelese….wie gewehnt. Mir lese yede Owed Bicher zu unsere Kinner. Ich waar in die Kich un ich hab mei Fraa gheert…es waar Mammi Gans Gedichte. Ich hab graad gedenkt, ich sett mol ee paar uff Deitsch fer mei Blog iwwersetze. Dann hawwich errinert ass epper, der en arrig bessere Schreiwer waar, hot es schunn geduh: der John Birmelin. So des Woch will ich eich ee paar vun dem John sei Iwwersetzing gewwe.

Hei, diddel, diddel.

Hei, diddel, diddel – Die Katz mit de Fiddel – Die Kuh schpringt iwwer der Muun. – Es Hundelche lacht – Un weddelt un blafft; – Die Schissel un Leffel – Die schpringe um’s Effel – Wie ewwe so Schussliche duhn.

Georgie, Porgie, Blaume Boi.

Georgie, Porgie, Blaume Boi, – Bosst die Maed, en ganzi Roi, – Wann sie awwer heile dann, – Ya, do schpringt er was er kann.

Pitter, Pitter, Karbsefresser.

Pitter, Pitter, Karbsefresser, – Hot en Fraa, die weess net besser, – Halt sie in ‘re Karbseschaal, – Gleicht sie datt noch ‘s bescht vun all.

Pitter, Pitter, Karbsefresser, – Meent er gleicht en annri Besser. – Pitter, sell iss gar net schee, – Musscht zu deinre erschte geh!

Pitter, Pitter, Karbsefresser, – Gleicht en annri doch net besser; – Lannt er Lese, lannt er Schreiwe, – Will er bei de Erschte bleiwe.

En aldi Grossmammi die wuhnt imme Schuh

En aldi Grossmammi die wuhnt imme Schuh – Sie hot so viel Kinner un Druwwel dezu; – Sie gebt ‘ne zu esse, doch yo net zu fett, – Sie garbt sie gedichtich un yaagt sie ins Bett.

Yankee Doodle

Yankee Doodle kummt emol – Geritte uff ‘me Pony, – Schteckt en Fedder in der Hut, – Un saagt ‘s waer Macaroni.

Do iss en Audio Klip:

Published in: on 26/05/2017 at 06:02  Comments (2)  

Deitsche Vorfelle fer Summer 2017!

Guder Daag Blog Leser! Des Woch will ich eich en Lischt vun Deitsche Vorfelle fer Summer 2017. Hoffetlich seid dihr net zu busy um eppes zu bsuche.

Tschunn

3 – PA German Society Yaehrliches Fescht – Allison-Antrim Museum, Greencastle, PA

21 – PG Dialect and Kulture Society Picnic, Williamson Lodge, Womelsdorf, PA

24 – Kasche Fescht un Frieh Amerikanische Craft Show, Historic Schaefferstown, PA

Tschulei

1-9 – Kutztown Folk Festival, Kutztown, PA

24-28 – Kinner Camp, PA German Cultural Heritage Center, Kutztown, PA

Aagscht

11-12 – 51st Goschenhoppen Folk Fescht, Antes Plantation, Frederick, PA

26 – Bauerei Fescht, Historic Dreibelbis Bauerei, Virginsville, PA

Published in: on 21/05/2017 at 12:17  Leave a Comment  

Deitscher Gottesdinscht!

Des Woch kumm ich zu eich mit en Bekanntmaching:

Pennsylvaanisch Deitscher Gottesdinscht

Zoar Ludderische Karrich

560 Freeport Schtross

Lebanon, PA 17046

Sunndaag 21 Moi 2017

um Halwer drei Uhr Nummidaag

der Breddicher: der Parre Richard Miller

Frooge? Ruf 717-933-5511 uf odder en Eposcht an pgalice@verizon.net

Published in: on 05/05/2017 at 18:05  Comments (1)  

Eppes vun dem Jake!

Guder Daag Blog Leser! Well, des Woch bring ich eich widder eppes vun en Fan. Der Jake Wentzel hot mir en Gschicht iwwer sei Daadi gschriwwe. Nau, der Jake kann Deitsch lese un verschteh, awwer er kann es net so gut schreiwe. So fer des Blog Poscht duh ich eppes as ich nimmi geduh hab, ich waerr glee bissel Englisch gewwe! Yuscht des Mol! Do iss was der Jake iwwer sei Daadi gschriwwe hot, sell iss uff Englisch, in sei Wadde. Dann kummt die Gschicht. Es waar aa uff Englisch gschriwwe, awwer ich hab es uff Deitsch iwwersetzt. Viel Gschpass bei lese!

I am not good at writing in Dutch but following is a story of my father you may find interesting.  He spent his entire life in Berks County and died there at the age of 100.  He was a scholar with degrees from Franklin & Marshall and Columbia in New York City where he spent several summers learning from John Dewey and other giants of educational philosophy at that time.  He finished his 55-year career teaching senior English at Mt Penn HS.  But he was fluent in PAD and frequently enjoyed speaking it with others including my wife’s Dad.  One of his favorite stories involved a father and son who was prone to get excited and make wild statements.  So his Dad told him that he was to think three times before he spoke.  One day they were burning brush and the father’s pants caught on fire.  The son cried out in alarm saying “Daadi ich denk, Daadi ich denk, Daadi ich denk dei hosse arsch brennt!”  Dad was certified to teach English, German, and Greek but he loved his PAD. My Dad was Jacob Dehart Wentzel and he lived his entire life within several miles of the family farm on which he grew up.  The farm is on Friedensburg Road in Stony Creek Mills

Mei Daadi, der Yaeger

Daadi hen geliebt zu laerne, un hot die Gleenigkeite vun Schprooche arrig gegliche, awwer sei Zarn waar yaage, abaddich Ringneck Fassante. Ass ich en Bu waar, hot es arrig viel Fassante do in Pennsylvaania gewwe. Ich kann gut errinnere, wann mer newwe en frischliche geblugte Feld vorbeigfaahre iss, hot mer 25-30 Fassante zaehle gekennt. Der Daadi hot sie unbarmharzich geyaagt un ee Yaahr hot er sei 12 Veggel mit yuscht 12 Schusse grickt. Er hot allsfatt Englisch Setters ghatt, die waare net so gut abgericht, die en Tendency ghatt hen all die Veggel rauszuschtiwwere zu weit weck vun uns, awwer sell hot ihn net gebaddert.

Der Daadi hot ken Hiesicht fer Private Property wann es en Gelegeheit gewwe hot um en Fassant odder Haas zu finne.  Efders sin mir darrich annere Leit ihre Gaarde odder Blummegebisch gedratscht. Er hot mich gelaernt mei License Nummer zu verschteckele wann epper am greische waar. Ee mol waare mir uff en Ufer newwich en Highway am yaage un en Haas iss midde in die Schtrosse nunnergeschprunge. Ich waar reddi zu schiesse, awwer ich hab net gschosse. Der Daadi waar net so froh deswege. Regel hen ken Rolle gschpielt wann mir uff der Yacht waare. Am End vun en lange Daag, darrich die Felder geloffe un ken Fassante zu sehne, hot er oft en Fersandehinkel gschosse. Dann daet er saage, “Oops, die Sunn waar in mei Aage.” Ee Daag hot er so en “Goof” geduh un as mir heem kumme sin, bin ich ins Haus gange. Ich hab aus em Fenschder geguckt un ich hab der Daadi mit en Game Warden gsehne! Sie waare am schwetze un der Daadi hot Fersandehinkel Feddre aus allebeed Seite vun seim Rock rausgschtocke. Awwer yederman hot der Jake gekennt un er hot nimmi en Schtrof grickt.

Nooch sei Retirement, Hasch yaage hot ihm in Diesember gschefdich ghalde. Er waar en Glied zu en Deer Camp in nadd-Barricks Kaunty, “Die Eck” waar gschwischich Eckville un Hawk Mountain. Er hot net so viel Glick datt ghatt awwer darrich die Yaahre as die Hasch meh suddlich gange sin, hot er Gebliete mit Bauere gemacht. Ee Yaahr, waar er am Wei mit en Bauer an sei Kichdisch am drinke un sie hen en Hasch draus im Feld gsehne. Der Daadi hot sei Woolrich Rock ruhig aageduh, iss drausgange un hot ihn gschosse. Der Bauer iss aa draus mit sei Traktor kumme. Zamme hen sie der Hasch zerick in die Scheier gschleppt. Net en typical Yacht!

Do iss en Audio Klip: 

Published in: on 29/04/2017 at 06:00  Leave a Comment