As ich en Kind waar, hawwich viel Glick ghatt. Ich hab zwee Eldere die mei ganze Lewe zamme waare. Mei Kindheit waar frehlich un friedlich. Ich bin uff en gleene Bauerei in Centre Taunschip uffgwaxse. Meinre Mudder ihre Eldere hen yuscht ee Meil vun uns gewuhnt un meim Daadi sei Eldere hen baut 10 Meil weck gewuhnt. Ich hab viel Zeit mit allebeed meine Grosseldere rumgebrocht. Ich hab gekennt drause zu geh un ich hab viel Blatz zu schpiele. Mir hen Gaarde ghatt, so ich hab gelannt wie mer Gaardesache blanst un bauert. Mir hen Hinkel un Siesshinkel ghatt. Ich hab gelannt wie mer uff Gediere uffbasse muss. Es Grass waar grien, die Luft waar frisch un sauwer, die Noochber waare freindlich….es waar so fehlerfrei as es sei kennt.

As ich en Kind waar, hawwich viel Zeit mit meinre Familye rumgebrocht. Ich waar net en Kind der allsfatt mit sei Freinde sei misse daete. Ich hab gemisst in der Gaarde zu schaffe, es Grass zu maehe un aa in es Haus zu helfe. Nadierlich hawwich glee bissel gegrext awwer net zu viel un aa net zu oft. Mei Eldere waare alles zu mir. Mei Mudder hot mich viel in es Haus gelaernt. Ich hab gelannt wie mer kocht un backt un aa wie mer die Wescherei drause haengt. Mei Daadi hot mich alles iwwer Blanse, Umgraut, Tracktors, Yaage un der Gaarde gelaernt. Er hot versucht mich wie en gleene Schreiner zu sei, awwer sell waar net mei Koppche Tee. Mit Holz zu schaffe hot mich gaar net geinderesst. Awwer was mei Daadi un meine Mudder mich am menschde gelaernt hen, iss as hatte Arewet arrig wichdig iss. Es macht nix aus was fer en Tschopp mer hot, yuscht schaff hatt un duh die beschte was du kannscht.

As ich en Kind waar hawwich sell net gewisst, awwer nau as ich en Mann bin, kann ich alles glaar seh. Ich kann sie net genunk bedanke, as sie sell mich gelaernt hen.

Nau hawwich mei eigni Dochder, ya nau bin ich der Daadi. Ich will alles fer mei Dochder gewwe un hawwe. Awwer ich weess aa as alles was Materialistic iss, iss net wichdig. As ich en Kind waar, hawwich net all die modern un neie Dinge ghatt. Un sell waar ok. Ich weess net wie mei Eldere es gemacht hen, awwer ich will aa so en Exempel fer mei Dochder sei. Ich will as sie en gude Schaffethic hot, ich will as sie nett un hofflich iss. Ich will as sie unsere alde Traditions behalde witt. Ich will as sie Deitsch schwetzt un schreibt. Ich will as sie Gsund un frehlich iss. Ich will as sie an der Gott glaabt un aa en schtarricke Glaawe hot.

Zu viele Kinner in unserem Land hen gaar nix. Sie hen ken Eldere, es gebt niemand die sie liebt. Sie wuhne mit verbrochene Famliye. Es gebt net genunk zu esse, es Haus iss alt un ihre Gleeder sin yuscht Lumpe. Fer die Kinner, bed ich oft. Ich bin glicklich as mei Dochder net so lewe muss.

Ich hoff as meine Dochder uff mich gucke un denke waerr as ich uff meim Daadi geguckt un gedenkt hab. Es gebt ken Buch um sell zu lanne. Ich glaab es kummt vun ariyets in unsere Hatze un unsere Kepp. Vun nau aa waerr ich so hatt wie meeglich fer sie schaffe, un ich waerr versuche der beschde Daadi in re Welt zu sei. Ich weess wie so en Mann sei muss, as ich en Kind waar hawwich so eens ghatt.

Do iss en Audio Klip:

Download: nau-bin-ich-draa.m4a

Akt 4 Scene 3: Der Englische Laager

Gloucester:

Wu iss der Keenich?

Bedford:

Der Keenich iss gridde um ihr Schlacht aazublicke.

Westmoreland:

Vun Soldaate hen sie drei Zech Dausend.

Exeter:

Sell macht es fimf zu eens; un sie sin all frisch.

Salisbury:

Em Gott sei Arem globbt mit uns! ‘Sis engschderiche Odds.

Gott sei mit eich, all dihr Keenichssoh: Ich ge zu meim Befehl.

Wenn mir uns net meh dreffe daete, bis mir uns im Himmel dreffe daete,

Dann, frehlich, mei edel Herr vun Bedford,

Mei liewer Herr Gloucester, un mei guter Herr Exeter,

Un mei freindliche Freindschaft, Grieger all, Hatyee!

Bedford:

Mach’s gut, guter Salisbury; un viel Glick geh mit dir!

Exeter:

Faerriwell, freindlicher Herr; fechd tapfer Heit:

Un nooch duh ich dich letz um dich uff es zu meinde,

Fer dich, du bischt gschtellt vun der feschte Waahrheit vun Mut.

Salisbury geht fatt.

Bedford:

Er iss voll vun Mut un aa vun Freindlichkeit.

Keenichsohlich in allebeed.

Der Keenich kummt rei.

Westmoreland:

O, as mir do hett

Awwer yuscht zehe dausend vun de Mannsleit in England,

Die heit net schaffe!

Keenich Henry V:

Wer winscht so eppes?

Mei Gschwischderkind Westmoreland? Nee, mei guter Gschwischderkind:

Wenn mir gemarrickt zu schtarewe sin, sin mir genunk

Unser Land en Verluscht zu duh; un zu lewe,

Die wenniche Mannsleit, die greesere Deel vun Ehr.

Gottes Wille! Ich bed dir, winsch net fer ee Mann meh.

Ich bin net geizich uff Gold,

Un es mach’s nix wer uff mich esst.

Un aa net wenn Mannsleit mei Gleeder draage;

Soddiche ausserliche Dinge lewe net in mei Luschde:

Awwer, wenn es en Sind waerr die Ehr zu hawwe welle,

Bin ich es aaschtossescht Seel am Lewe.

Nee, Gedrei, mei Gschwischderkind, winsch net fer ee Mann vun England:

Gottes Fried! Ich daet net verliere so gross en Ehr

As ee Mann meh, ich denk, daet vun mir deele

Fer die beschde Hoffning hawwich. O, winsch net ee meh!

Eher ruf es ab, Westmoreland, darrich mei Host,

As er, der ken Bauch fer selle Schlacht hett,

Loss ihn fattgeh; sei Pass sett gemacht waerre

Un Geld der sei Rees in sei Backebuch gschteckt waerre:

Mir daete net in sellem Mann sei Gsellschaft schtarewe,

Der faerichdt sei Gmeinschaft mit uns zu schtarewe.

Seller Daag iss es Fescht vun Crispian:

Er, der selle Daag iwwerlebt, un sicher heemkummt,

Waerr graad uffschteh wann der Daag gsaagt iss,

Un erweckt sich uff der Naame Crispian.

Er, der seller Daag iwwerlebt, un en alte Alder seht,

Waerr yaahrlich uff der Wachtfescht sei Noochberschaft,

Un saagt ‘Mariye iss Sankt Crispian’:

Dann waerr er sei Aermel ausziehe un sei Narewe weise.

Un saagt ‘selle Narewe hab ich uff em Crispin sei Daag grickt’.

Alde Mannsleit vergesse: awwer all soll vergesse sei,

Awwer er waerr mit Vaertel erinnere

Was fer Daade er gemacht hot: Dann soll unsere Naame,

Bekannt in sei Mund wie Hauswadde sei

Harry der Keenich, Bedford un Exeter,

Warwick un Talbot, Salisbury un Gloucester,

Sei in ihre fliessende Koppche frisch erinnert.

Selle Gschicht soll der gute Mann sei Soh laerne;

Un Crispin Crispian soll nimme vorbeigeh,

Vun sellem Daag bis re Welt ihr End,

Awwer mir in es solle erinnert sei;

Mir wenniche, mir glickseliche wenniche, mir Band vun Brieder;

Fer er, der sei Blut mit mir heit vergiesst

Soll mei Bruder sei; sei er nimme so nidderbeenich,

Seller Daag soll sei Umschtand gelind mache:

Un Scheenemannsleit in England, die nau in Bett sin,

Solle sich verflucht finne, as sie do net waare,

Un ihre Mannheit billich halde, wann eenichepper schwetzt

Der mit uns uff em Sankt Crispin sei Daag gefochde hot.

————–

Im Yaahr 1989 hot der Kenneth Brannaugh en Movie vun sellem Schtick gemacht. Do iss en Link zu en Klip vun dem Kenneth Brannaugh un wie er selle Red gschpielt hot: Keenich Henry seine Red.

Uff em Mundaag waar der Boston Marathon. Am End der Marathon (bei re Faddig Lein) sin zwee Bombs in die Luft gange. Dausende vun Leit waare do um die Laafer zu seh un ‘Ya, du kannscht es schaffe’ greische. Baut drei Uhr Mundaag iss die aerschde Bomb in die Luft gange un dann baut 15 Minudde schpeeder iss en annere in die Luft gange. Drei Leit waare dodgemacht un 55 Leit waare schwer beschaedicht. Viele davun hen Beh un Erem verlore.  Am Aafang hemmer gaar net gwisst wer sell gemacht hot. Zum Glick iss alles bassiert wu viele Surveilance Kameras waare. Mir hen all die Video un Pickders aageguckt un hen zwee Buwe gsehne. Die zwee hot schwatze Ricksacks aa. Die zwee Bombs waare drin. Die FBI un Boston Polies sin graad uff em Yaag gange um die zwee zu finne.

Mir hen meh Information iwwer die zwee darrich der Woch gelannt. Die waare zwee Brieder, die nooch Amerikaa vun Chechnye, Russland baut 10 Yaahre zerick eigewandert hen. Um halwer elf, Dunnerschdaagowed hen die zwee Brieder en Poliesmann gschosse un sin in en Feierkampf mit annere Polies gewest. Der eldere Bruder, Tamerlan Tsarnev, iss darrich der Kampf gschosse awwer sei yungere Bruder iss weckgeloffe.

Endlich, schpeet Freidaagowed, iss alles zu me End kumme. Der yunge Bruder, Dzhokhar, iss in en Boot gfunne. Die Polies un die FBI hen ihn lewendig gfunne un hen ihn gfange. Mir wisse nooch net ferwas die zwee Mannsleit sell geduh hen. Hoffetlich, as der Dzhokhar nooch am lewe iss, waerr er eppes saage. Wege es Mannyaag iss die ganze Schtadt Boston in Lockdown gange. Leit waare net erlaabt ihre Heiser zu verlosse. Die Busse un Subways sin aa zugemacht. Un unser ganzes Land sin var em Guckbaxe ghockt um alles zu seh.

Nau iss alles vorbei un Lewe kann zerick zu normal kumme. Awwer, do hock ich widder mit viele Frooge un kenne Antwadde. Ferwas? Ferwas muss Leit annere Leit dodmache? Wann die zwee Mannsleit Amerikaa net gut genunk gfunne hen, ferwas sin sie net ariyetsanners gange. Die drei Leit die uff re Marathon dodgemacht sin, waare alle unschuldig. Een waar en 8 Yaahre alt Bu! Sie waare datt yuscht fer die Laafe zu seh un in en Blinse hen sie ihre Lewe verlore.

Fer die letschde 5 Daage iss Amerikaa zammekumme. Mir hen en Feind zu finne un Gerechtkeit zu bringe. Nau iss alles vorbei un ich bin arrig schurr as mir widder zerick zu en aagschplittertes Land gehe waerr. Ich hab schunn heit damariye im Internet glese: “Wann waerr die Regierung saage as alles en “Inside Job” waare?” odder “Der Obama un sei Mannsleit hen alles so gewollt.” WAS? Wie kann soddiche Leit so denke? Mir hen so viele Tragedies in unserem Land, un wann sie bassiere, sin mir allsfatt Een Leit awwer so ball as sie vorbei sin, sin mir allsfatt widder viel Leit un nett meh Een. Mol sehne was von sellre Tragedy rauskumme waerr.

Do iss en Audio Klip:

Download: schlechte-leit-duhe-schlechte-dinge.m4a

Selles Yaahr waerrd es Fescht uff em 2. Tschulei um 1:30 uff em Seminar Stage sei. Schticke solle bis der 1. Tschunn gschickt waerre. Die Schticke solle aa en Englische Iwwersetzung hawwe.

Wann dihr eppes schreiwe wollt, schickt es mol aa:

Der  William Donner

Pennsylvania German Language Exposition

Anthropolgy Department

Kutztown University

Kutztown, PA 19530

Dihr kennt aa ihn aarufe: 1-610-683-4249 odder en E-Poscht schreiwe: donner@kutztown.edu

Nau sei so gut un schreibt eppes!

Sell iss die Faahne vun Nadd Korea.

Nadd Korea iss en Land zidder baut 1948. Sell iss wann die Korea Penninsula in zwee Schticke verdeelt waar. Sudd Korea iss en Demokracie warre un der Nadd Korea iss en Socialist Dictatorschip warre. Der aerschde Vorgenger vun Nadd Korea waar der Kim Ill Sung, dem Kim Jong Un sei Grossdaadi. In sei neie Land waar alles darrich die Regiering gange. Die Regiering waar in voller Graft. Die Leit hen kenne Schtimm. Unnich der Kim Jong Ill, der zwette Vorgenger, hot alles was sei Daadi geduh hot schtarricker gemacht un hot aa en neie Gedenk gebracht: “Songun” sell mehnt: Armee aerscht. Schier gaar alle Mannsleit in Nadd Korea misse in die Armee geh. Zur Zeit ihr Armee hot baut 1 Millyon Soldaate. Das Broblem iss, as der Kim Jong Il sei Armee am baue waar, hot er sei Rick uff sei Leit gedreht. Viel Leit in Nadd Korea sin arrig aarm un viel Leit verhungere sich. Die Regiering hot net genunk Geld fer Ess-sache un Fleesch fer ihre Leit, awwer sie hen genunk Geld fer Flinte un Missiles. Ich kann sell gaar net verschteh. Aa hen sie en grosse Gefaengnis System fer die Leit die eppes gege die Regiering saage. Wann epper eppes gege die Regiering saagt, iss er odder sie un sei odder ihre ganze Familye ins Gefaengnis gschickt un datt bleiwe sie fer drei Generations!

Sell iss en Pickder vun en Military Schtrutz in Pyongyang, die Haaptschtadt.

Sell iss en Pickder vun Kim Jong Un, der Vorgenger.

Der Kim Jong Il iss im Yaahr 2011 gschtarewe un sei Soh, der Kim Jong Un, iss as neier Vorgenger gemacht. Nau hot er die Graft un er will es weise. Er macht viele Drehinge gege uns in Amerikaa un abaddich gege Sudd Korea. Ich hoff as alles kann friedlich ausgefiggert sei. Ich will net en annere Grieg hawwe. Viel hochgelannte Leit saage in de Zeidinge un in em Guckbax as Nadd Korea kann yuscht schwetze, sie hot die Meeglichkeit so en Aagriff net zu duh. Mir welle Hoffe as es so iss.

Do iss en Audio Klip:  Was kummt vun Nadd Korea?

Aus em siwweunzwansichscht un achtunzwansichscht Kabiddle:

Un unnerwegs hen sie en Mann vun Cyrene aagedroffe naamens Simon. Den hen sie gezwunge Yesus sei Greiz zu draage.

Un wie sie zum Blatz kumme sin, as Golgatha heesst – sell mehnt Scheedelbarrick – hen sie em sauerer Wei mit Gall vermischt zu drinke gewwe, un wie er’s gschmackt hot, hot er’s net drinke wolle.

Un noochdem as sie ihn gegreizicht hen, hen sie sei Gleeder unner enanner verdeelt un hen devor gewarfelt.

Dennoh hen sie datt ghockt un hen uff en Wacht ghalde, un iwwer sei Kopp hen sie die Ursach vun seim Dod gsetzt. Datt waar gschriwwe: Des is Yesus der Yuddekennich. Noh hen sie mit em zwee Verbrecher gegreizicht, der eent rechts un der anner links, un die Leit, as verbei gange sin, hen en geleschtert, hen der Kopp gschiddelt, un alsfatt gsaat: Du bischt der Mann, wu der Tempel runnerreisse un in drei Daage widder uffbaue will. Nau helf dir selwert! Wann du Goddes Soh bischt, kumm runner vum Greiz! Der gleiche Weg hen aa die Hohebrieschter en verschpott; un sie un die Schriftgelehrte un die Eldeschde hen gsaat: De annere Leit hot er gholfe un kann sich selwert net helfe. Wann er der Keenich vun Israel iss, soll er vum Greiz runnerkumme, un dennoh wolle mir em glaawe. Er hot Gott verdraut, nau soll dar ihn freimache, wann er ihn hawwe will. Er hot yo gsaat: Ich bin Goddes Soh. So hen en aa die Verbrecher verschpott, as mit em gegreizicht warre sin. Un am zwelf Uhr iss en Finschternis iwwer’s gans Land kumme, as bis drei Uhr gedauert hot. Un am drei Uhr hot Yesus laut gegrische: Eli, Eli, lama sebachtani! Sell mehnt: Mei Gott, mei Gott, fer was hoscht du mich verlosse? Un Yesus hot noochmols laut gerufe un iss gschtarewe.

Un sehnt! Der Vorhang im Tempel iss in zwee Schtick verrisse, vun owed bis unne hie. Un die Aerd hot gewackelt, die Felse sin verschplitt, un die Greewer hen sich uffgeduh.

Awwer wie der Haaptmann un die, as bei em waare un uff Yesus uffgebasst hen, gsehne hen, wie die Aerd wackelt un alles schunscht, was aagange iss, waare sie arrig verschrocke, un hen gsaat: Verhaftich, seller iss yo Goddes Soh gewest.

Un Oweds iss en reicher Mann vun Arimathea beikumme, as Joseph gheesst hot, un aa eener vum Yesus seine Yinger waar. Der Joseph hot der Leichnaam genumme, hot en in en sauwer Leinduch gewickelt, un hot en in sei eege Graab geleegt, as nei waar un imme Felse rausghackt. Var die Dier vum Graab hot er en grosse Schtee hiegerollt, un iss weggange.

Un wie der siwwet Daag verbei waar, sin Maria Magdalena un die annere Maria kumme in der Helling vum aerschde Daag, fers Graab zu sehne. Un sehnt, die Aerd hot aagfange gewaldich zu wackle, en Engel vum Herr iss vum Himmel runnerkumme, iss ans Graab gedrede, hot der Schtee weggerollt vun der Dier un hot sich druffgsetzt. Sei Gschtalt waar so hell wie der Blitz un sei Gleeder waare schneeweiss. Die Wechter waare vergelschtert, un hen wie dod datt gelege. Awwer der Engel hot die Weiwer gsaat: Farricht eich net. Ich weess yo. ass ihr Yesus suche wu sie gegreizicht hen. Er iss net do, er iss vun de Dode uffgschtanne, yuscht wie er’s gsaat hot. Sehnt, do iss der Blatz, wu der Herr gelege hot. Nau geht gschwint un verzehlt seine Yinger: Er iss uffgschtanne vun de Dode, un sehnt, er geht eich varnenaus nooch Galilea hie. Datt sollt ihr ihn sehne.

Do iss en Audio Klip: Meim Glaawe sei Gschicht!

Ich winsch all mei Blogleser en hallicher un friedliche Oschder!

Der ald Baaspscht, der Benedict XVI (en Hochdeitscher), hot die Welt zerick in Hanning iwwerfalle wann er gsaat hot, as er die Tschopp net meh duhe kennt. Er hot gsaat as er in die Ruh setze gewollt hot. Er waar der aerschd Baapscht zidder der Gregory XII, der net in Affis gschtarewe iss. Der Gregory hot sell im Yaahr 1415 geduh! So as dihr sehne kennt, waar sell en langi Zeit! Wann der Benedict sell gsaat hot, hot die Karrich gemisst en neier Baapscht zu finne un zu waehle.

Baapscht Benedict der XVI.

So letschde Woch sin all die Kardinals vun re ganze Welt nooch Rom kumme um en Kollege zu haalde. All die Kardinals hen sich in re Sistien Chapel gsammelt. Datt sin sie gebliwwe bis sie en neier Baapscht gewaehlt hen. Wie wisse mir wann sie ihr Tschopp geduh hen? Mir misse fer der Schmok gucke. Ya, der Schmok! Es gebt zwee Schmoke: schwatz un weiss. Wann der Schmok schwatz iss, iss die Antwatt Nee, awwer wann der Schmok weiss iss, gebt’s en neier Baapscht.

Der weiss Schmok: mir hen en neier Baapscht.

Uff em 13. Matz iss en neier Baapscht gewaehlt. Die Kollege vun Kardinals hen, Jorge Mario Bergoglio aus Argentina gewaehlt. Er iss der aerschd Baapscht vun Suddamerikaa. Sei neier Naam iss Baapscht Francis. Er iss der 266. Baapscht in re Katholische Karrich ihre Gschicht. Sei Motto iss: Miserando atque eligendo (Niddrich, awwer gewaehlt). Er iss en grosser Fechder fer die aarme Leit. Mol sehne in wellre Richting er die Karrich fiehre waerrd. Ich winsch ihn viel Glick mit seinre neie Tschopp.

Der nei Baapscht: der Francis.

Do iss en Audio Klip: En eneir Baapscht!

Der Joseph Hiester as Governor.

Hiester waar dem John un Maria Epler Hiester ihr Soh. Er iss uff re Familye Bauerei uffgewaxse un iss zu en Een-schtubb Schulhaus gange. Schpeeder waar en Schtorkipper in dem Adam Whitman sei Schtor in Reading. Im Yaahr 1771 waar er dem Adam sei Parnter gemacht un aa im Yaahr hot der die Elizabeth, dem Whitman sei Dochder, gheiert.

Wann der Freiheits Grieg ausgebroche iss, hot er en Kumpanie vun Soldaate aagfackelt un hot sie aa gerecht. Er un sei Kumpanie hen in die Schlachde vun Long Island un Germantown gfochde. Vun sei Erfolg iss er Kolonel genaamt waerd. Schpeeder im Grieg waar er gfange un waar uff em Schiff “Jersey” ins Gefaengis gschteck. Schpeeder waar er nooch Nei Yarrick gebracht wu er ausgewexselt waar.

En Schild in Barricks Kaunty fer der Hiester

Er waar en Mitglied vun re Versommling vun 1776, die die Articles of Confederation gschriwwe hot. Er waar aa en Mitglied vun re Constitutional Convention vun 1790, die die Pennsylvaanische Constitution un die Amerikaanische Constitution bschtaeticht hot. Er waar en Mitglied in em Haus vun Verdreder vun 1787-1790 un in re Senaat vun 1790-1794 vun Pennsylvaania. Im Yaahr 1807 waar en General benaamt in re Pennsylvaania Militia. Er waar in em Amerikaanische Haus vun Verdreder vun 1797 bis 1805 un widder vun 1815 bis 1820.

Im Yaahr 1817, iss er fer Governor gange, awwer er hot zu dem William Findlay verlore. Im 1820 iss er widder gege dem Findlay geloffe awwer selle Mol hot er gewonne. Er hot sei Patreimiglieder erschtaunt as er Governor waar, weil er hot Bolitical Appointments gemacht uff Merit in Blatz vun re Patrei Mitgliedschaff. Heit zu Daage iss der Hiester erinnert mit en Schtudentehaus uff em Kampus vun re Pennsylvaania Schtaat University in State College mit seim Naame.

Dem Hiester dei Schtudentehaus uff em PSU Campus.

Do iss en Audio Klip: En wichtiger Deitscher – Aadeel 5!

Wie Rege vun de Wolke

Wie Rege vun de Wolke, waerrd dei Watt zu re Aerd kumme,

wie Schnee vun dem Himmel es Land ufffrischt.

Dann mach unsre Grund weech, so as der gude Saame waxse kann,

un reife reiche Obscht um zu deinre Hand zerickzukumme.

Mir lowe dich, unser Gott, fer deinem Watt der Daa;

mir bedanke uns, guder Gerdler, fer dei bleede Miese.

Mir segne dich, beschde Bauer, fer die hunnertmol Eidraage,

fer Arn vun Gnaade in unsrem eemol darrigen Bau.

Wie Saame, der gschpreddelt sin, iss dei Watt aa geblanst,

uff Felse un uff Schtroosse, in gudem Grund un Sand.

Mach unser Grund fruchtbaar, so der gude Saame waxse kann,

un reife reiche Obscht um zu deinre Hand zerickzukumme.

Mir lowe dich, unser Gott, fer deinem Watt der Saame;

mir bedanke uns, guder Gerdler, fer dei bleede Miese.

Mir segne dich, beschde Bauer, fer die hunnertmol Eidraage,

fer Arn vun Gnaade in unsrem eemol darrigen Bau.

Wie re Sunn ihre Schtraahle, soll dei Watt die Welt erlichte,

mache wacker un waerme un heele unser Land.

Dann schein in unsre Hatzer, so as der gude Saame waxse kann,

un reife reiche Obscht um zu deinre Hand zerickzukumme.

Mir lowe dich, unser Gott, fer deinem Watt die Licht;

mir bedanke uns, guder Gerdler, fer dei bleede Miese.

Mir segne dich, beschde Bauer, fer die hunnertmol Eidraage,

Fer Arn vun Gnaade in unsrem eemol darrigen Bau.

Nooch eppes, uff em Freidaag (der aerschde Matz) waar ich widder daheem in Barricks Kaunty. Ich waar in em Guckbax widder, uff em BCTV un die Pennsylvaanisch Deitsche Schtunn. Ich hab iwwer was ich neilich fer die Mudderschprooch geduh hab gschwetzt, Do iss en Link zu re Program. Viel Gschpass bei gucke. Die Pennsylvaanisch Deitsch Schtunn.

Do iss en Audio Klip: En Gedicht!

Ich hab aa viel E-Poschts vun all iwwer Amerikaa un Deitschland aa grickt. Viel Leit sin froh as es endlich eppes uff re Internet gebt, wu sie eppes vun re Grammatik lanne kenne. Ich winsch as ich meh Geld hett um bessere (meh Professional) Videos zu mache, awwer ich bin aa froh mit was ich gemacht hab.

All die Videos un die Power Points fer die Lessons sin all in ee Blatz: padutch101.wikispaces.com. Seid so gut un saagt eppes an all eiere Freinde die Deitsch lanne wolle. Bsucht die Website un losst mich mol en Comment!

Naegschde Freidaag, der aerschde Matz, waerr ich widder daheem in Barricks Kaunty sei. Ich bin eigelaade uff em Pennsylvania German Hour uff em BCTV zu sei. Ich waerr iwwer die Videos schwetze un aa iwwer wie die Internet unsere Schprooch helfe kann. Naegschde Woch waerr ich en Link zu re Show poschde. Bis dann, macht’s gut un bleibt gsund!

Do iss en Audio Klip: Videos sin faddig, nau saagt eiere Freinde!