Dem Sankt Patrick sei Daag!

Guder Daag Blog Leser! Well uff em Mundaag iss en arrig bekannter Feierdaag do in Amerikaa. Fer uns Deitsche iss es yuscht en annere Daag, odder vielleicht en Daag wu mer en Bier drinke kennt. Mundaag iss dem Sankt Patrick sei Daag. Fer die irische Leit iss es ihr Daag im Yaahr. In sellre Poscht will ich glee bissel iwwer der Mann, Sankt Patrick, schreiwe.

Der Patrick as Bischoff.

Der Patrick as Bischoff.

Sankt Patrick iss een vun de bekannteschde Heilichi in re Welt. Er iss der Apostel vun Irland. Er waar bei Kilpatrick, net weit Weg vun Dumbarton, Schottland in em Yaahr 387 gebore. Er iss uff em 17. Matz im Yaahr 461 bei Saul, Downpatrick, Irland gschtarewe. Sei Eldere waare Caplurnius un Conchessa, allebeed waare Reemer die im Reemische Britain gewuhnt hen.

As der Patrick 14 Yaahre alt waar, waar er nooch Irland as en Schklaaf genumme. Zu re Zeit waar Irland en Land vun Druids un Heide. Er hot ihre Schprooch un ihre Kuldur gelannt. As er en Schklaaf waar, iss er nooch Gott gedreht. Er hot gschriwwe:

“Dem Gott sei Lieb un sei Bang in mir sin meh un meh gwaxse, so as mei Glaawe, un mei Seel  nuffgange iss. Ich hab in em Busch un uff de Bariye gebet. Ich hab ken Schnee, ken Eis odder ken Rege gfiehlt.”

Dem Patrick sei Gfangnerzeit iss bis er 20 Yaahre alt ausgedauert. Er hot en Draam, in dem die irische Leit gsaat hen “Mir beddle dir, heiliche Yung, kumm un laaf um uns rum.” Awwer der Patrick iss vun Irland fattgange un hot aagfange mit sei Lanning fer en Briescht zu sei. Schpeeder iss der Patrick en Bischoff aagsetzt un iss zerick nooch Irland gange um re Watt vun Gott an die irische Leit beizubringe.

Der Patrick hot viele irische Leit bekehrt. Er un sei Yinger hen oft gebreddicht un hen dausende bekehrt. Viele Karriche sin darrich es Land uffgebaut. Keeniche un ihre ganze Familyes sin zu Grischt bekehrt as sie dem Patrick sei Wadde gheert hen.

Der Patrick hot gebreddicht un hot es ganze Irland fer 40 Yaahre bekehrt. Er hot viele Wunner geduh un hot viel iwwer sei Lewe mit Gott gschriwwe.

Ferwas en Glee? Der Patrick hot der Glee geyuust um die Dreieenichkeit auszulege un nau iss es en bekannte Aazeeche vun Irland.

En Glee, en Aazeeche fer die Dreieenichkeit: Gott, der Soh un der heiliche Geischt.

En Glee, en Aazeeche fer die Dreieenichkeit: Gott, der Soh un der heiliche Geischt.

Der Patrick waar en demiedicher, frommer, sanfter Mann, der sei Lieb un Andenk an Gott en Beischpiel fer all vun uns sei soll. Er hot gaar nix gefarricht, aa net dem Dod. Sei Verdrauer an Gott waar so vollschtendich as es hatt iss fer uns zu verschteh.

So uff em Mundaag, denkt glee bissel an der Mann der an so viel Leit denke….un drink mol glee bissel Guiness in sei Ehr.

Do iss en Audio Klip:

 

 

Published in: on 15/03/2014 at 06:26  Comments (4)  

The URI to TrackBack this entry is: http://deitscheblog.wordpress.com/2014/03/15/dem-sankt-patrick-sei-daag/trackback/

RSS feed for comments on this post.

4 CommentsLeave a comment

  1. Liewwer Doug,

    Nomols beschde Dank für Dei Forschung un sellre schöne Artikele uff Dein’re Blogseite! Vum St. Patrick zu lerne isch au scho eppes. E Vorschlag: v’leicht kannscht eppes üwwer die 3 Eisheilige im Mai schreiwwe! Sell wär scho eppes für viele, wu se net kenne, gell?!

    Glaubscht nu, die Frau Holle hört endli‘ uff mit’m Ausschüttle vun dene Federbette? Mer saage in Pittsburgh, däs reicht scho!

    I hoff, es gaht Di un Dei Familie nur beschdens, un bitte begrüsse se unbekannterweis‘ von mi!

    Alles Gute un e frohe St. Padraic-Feier
    Duht Di un Dei Liewwe wünsche
    Jim Kramer
    Seller Pittsburgher Kerl

  2. Hi Doug,
    Arrig interessanter Poscht iewwer St. Paddy! Ich hob allsfatt g’heert, er hot die Schlangen aus Irland gedriwwe, ob’s waahr isch oder net, kann ich net saage. Ich weess a net, ob’s Schlange in Irland giwwt.

    Hi Jim,
    Ich hoffe aa, die Frau Holle heert endlich mit’m Ausschuettle aaf! Aa in Georgia reicht’s uns scho mit sellem Winderwedder! V’leicht waerre die Eisheiligen uns heier in Ruhe laasse!

  3. Hallo Jack, Hallo Doug!

    Ja, sellre 3 Eisheilige duhne o’g’fähr am 11., 12., un 13. Mai in Deitschland drüwe durchs Ländle gehe, hier awwer am 12., 13. un am 14. Mai duhne se „hi’durchwehe“ haww’ i g’hört—un dernach kummt’s heesse Wetter! I hoff, d’r Sommer wird net zu schlimm sei! Nooch’m Wint’r wie dies’r wär däs e bissele viel, gell net? :)

  4. Ferschur, Jim! Mir hen zwar keen Sauwedder g’grickt wie’n nordlichen Staaten awwer trotzdem war’s arrig schlimm. Viel Geaest noch’m Eisschturm flocken iewwerall hie. Gottseidank hemmer kee Schaaden ans Haus g’grickt! Obwohl ich in Pennsilfania g’bore un aafg’wachse bin, gleich ich keen Winderwedder gar nit!


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Follow

Get every new post delivered to your Inbox.

Join 58 other followers

%d bloggers like this: