En grosse Verschtauning aus Hollywood!

Guder Daag Blog Leser! Selle Woch iss en grosse Verschtauning aus Hollywood kumme. Ya, du hoscht sell recht gelese, aus Hollywood. Nau was kann Hollywood un en Blog uff Pennsylvaanisch Deitsch in gleiche hawwe? Well, loss mich mol die Gschicht verzaehle.

Selle Woch sin die Uffnemminge fer die Oscars rauskumme. Die Oscars, fer die Leit die sell net kenne, sin die grosse Schetze fer Movies. Es gebt viele verschiddliche Oscar Deele wie beschde Schpieler, beschde Zwetteschpieler, beschde Gschicht, beschde Lichde, beschde Lied un beschde Movie. Amerikaa hot en grosse Lieb fer die Movies un fer die Oscars. Mannichmol sin gleene Movies uffgenumme fer Oscars, un dann saagt die Zeitdinge un die Guckbax Leit viel iwwer sie. “Fer was iss so en gleene Movie uffgenumme?” “Nimmi hot der Movie gsehne!” “So odder so henn uffgenumme solle.” Un so weider. Well, sell iss widder selles Yaahr gschehne.

Uff em Dinschdaag waar en arrig gleene Movie uffgenumme fer beschdes Lied. Es Lied kummt vun em Movie, “Allee awwer net allee.” Ya, du hoscht sell recht gelese. Vielleicht hoscht du nix vun sellem Movie gheert? Du bischt net allee, viel Leit henn gaar nix vun sellem Movie gheert. Un sell iss fer was so viel Leit in die Media so bees waare. Ok, so vielleicht denkscht du allsfatt nooch “fer was schreibt der Doug iwwer sell?” Well, was arrig inderessant fer uns Deitsche iss, as seller Movie mit en Schtick vun unsre Gschicht zu duh hot.

Alone-Yet-Not-Alone-Christian-Movie-Film-on-DVD-Jenn-Gotzon-CFDb

“Allee awwer net allee” kummt vun en echde Gschicht. Die Tracy Leininger Craven hot en Buch mit em gleichen Naame gschriwwe un die Gschicht folyt en Familye bei eenre wichdige Blatz in re Amerikaa ihr Gschicht. Am weckschpringe vun karrichliche Verfolging in Deitschland, die Leininger Familye guckt fer en neie Aafang in en unbekanndes Land – Amerikaa. ‘Sis in die mitt 1700s un Britische un Franzeesische Soldaade sin am fechde fer es Land, reich mit Grund, Busch un Schetze.

Unbescheedt vun die Fechde um sie, die Leiningers gebt Dank un Lob fer es glaares Wasser un der grosse Busch um Penns Grick un am meescht fer ihre Freiheit aazubeede. Ihr Lewe uff em Frontier waar net leicht awwer sie hen alles mit Freed geduh. Dann iss es Undenkbaar gschehne: in en Aagriff, Delaware Inschinge hen die zwee yungere Leininger Dochdere weckgenumme un hen browiert sie in ihre Kuldur reizubringe. Darrich de Dochdere ihre Gschicht, waere sie ihre Hoffining niemols verliere un ihr Glaawe waerr ihre Freiheit sei.

Es Lied, es uffgenumme fer en Oscar waar, heesst “Alle awwer net allee”, graad wie dem Movie sei Naame. Es iss vun re Joni Eareckson Tada gsunge. Der Dennis Speigel hot die Wadde gschriwwe un der Bruce Broughton hot die Myusick gschriwwe. Do iss en Link zu re Myusick Video:

Alle awwer net alle – Es Lied

Do iss en Link zu re Trailer fer der Movie:

Alle awwer net alle – Der Movie

Do iss en Link zu de Oscars ihr Website.

Die Oscars

Die Oscars waerre uff em 2. Matz, 2014 rausgewwe. Ich hoff as sell gleener Movie gewinne waerr, awwer wie viel Leit uff em Oscars saage: “”Sis en Ehre yuscht uffgenumme zu sei.”

Do iss en Audio Klip:

Published in: on 19/01/2014 at 12:55  Comments (2)  

The URI to TrackBack this entry is: http://deitscheblog.wordpress.com/2014/01/19/en-grosse-verschtauning-aus-hollywood/trackback/

RSS feed for comments on this post.

2 CommentsLeave a comment

  1. Allein und doch nicht ganz alleine/bin ich in meiner Einsamkeit,/Denn wenn ich ganz verlassen scheine,/vertreibt mir Jesus selbst die Zeit./Ich bin bei Ihm und Er bei mir,/So kommt mir gar nichts einsam für.

    Seller Lied isch vun d’r Regina Hartmann g’sunge worre: se isch vun dene Indianerle g’numme un uffg’zoge worre. As die awwer vun dene Soldate wiederg’funne worre isch, hot ma’ däs Liedle g’sunge, un s’isch offe’bart, dass es allerdings die Regina Hartmann gwä isch…so haww i sell’re G’schichtle g’hört, un däs haww i au in ‘m Büchle vun Pennsylvaanisch-Deitsche G’dichtle un G’schichtle aus aldre Zeet. Seller Büchle haw i vor meh als 20 Johr’ bei d’re Universitätsbuchhandlung in Pittsburgh g’funne, seller Büchle isch awwer schö: G’dichte vun John Birmelin un viele annere Leit senn drinne, un i glaub i haww bloss e poor Dollar dofür b’zahlt! Dezu haww I au e Büchle in d’r Mundart vun Earl Haag-dem sei Lesebüchle, un dezu e Wörterbüchle. I haww sellre G’schichde vun Regina Hartmann ger‘ un denk oft, in mei’m Lewe wär no viel meh schiefgange, wenn i net Jesus hätt! Nomols Beschde Dank für Dei Blog, liewwer Deitschfreind Doug, un i hoff ja, in dei neier Stellung gaht älls ganz gut.
    Beschde Grüsse unbekannterweise au a’ Dei Familie sendet
    Jim Kramer
    Seller Pittsburgher Kerl

  2. Übrigens: John Birmelin hat ein Gedicht über Regina Hartman und ihre Geschichte geschrieben-es ist in derSammlung Pennsylvanischer Gedichte, welches ich vor vielen Jahren ganz preiswert gekauft hatte.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Follow

Get every new post delivered to your Inbox.

Join 57 other followers

%d bloggers like this: