20 Kinner vun Deitschland!

Guder Daag Blog Leser! Well, endlich bin ich widder zerick. Die letschde zwee Woch waare busy un glee bissel stressig awwer ich daet es nimmi abhandle.

Alle zwee Yaahre macht mei Schul un en Schul in Buchen, Deitschland en Schtudentverwexle. Im Schpotyaahr kumme Kinner un zwee Schulmeeschdern vun Deitschland. Sie fliege vun Deitschland nooch Amerikaa. Am Aafang bleiwe sie drei Daage in Washington DC. Datt mache sie alle die touristische Dinge. Dann faahre sie naddlich nooch uns. Normally, bleiwe sie baut 10 Daage do bei uns. Alle Schtudente sin mit en Amerikaaner gepaart. Dann die Deitsche wuhne mit de Amerikaaner un sin en Aadeel vun einre Familye. Fer die 10 Daage lewe die Deitsche wie uns Amerikaaner lewe.

Selles Yaahr is 20 Schtudente kumme! Sell is die meeschde as mir allsfatt ghatt hen. An meinre Schul dann mach ich en Blan fer die 10 Daage. Mir mache drei Field Trips un die Kinner hen drei Schuldaage. Uff de Wochende misse die Familye eppes mit ihre deitsche Soh odder Dochder mache. Selles Yaahr unsre Field Trips waare en Rees nooch Penn’s Cave, en Rees zu re Heisey Museum in Lock Haven un en Tour vun Penn State University. Die Deitsche hen alles gut gfunne. Sie hen der Daag bei Penn’s Cave abbadich gut gfunne. Datt hen sie Gediere gsehne, die sie nimmi vorher gsehne hen. Zum Beischpiel, sie hen Buffalos, Schwarzbare, Panthers, Elk un Hasch gsehne. Mir sin aa nadierlich darrich es Dracheloch aa gange.

Mir gehne runter zum Dracheloch bei Penn's Cave.

Ich finn so en Verwexle arrig gut. Die Deitsche kenne ihr Englisch yuuse un warricklich seh wie es Lewe in Amerikaa is. Un fer mei Kinner, sie kenne seh wie Leit un annere Kinner aus Deitschland sin. In Tschunn fliege mir nooch Deitschland un dann waerre mir mit de Deitsche wuhne. Endlich kenne mei Kinner seh wie es Lewe in Deitschland is un sie kenne ihr Hochdeitsch alle Daag yuuse!

Was kann vun so en Erfaahring rauskumme? Kinner lanne: meh vun ihr Schprooch un die Schprooch die sie in re Schul lanne, sie mache neie Freinde, Stereotypes waerre schtarewe un viel viel meh. Fer mich is die 10 Daag bittersiess. Ich muss so viel vorher duh um alles gut zu laafe un dann wann die Deitsche do sin, bin ich arrig schtressig un allsfatt naerfich as eppes net gut geh waerd. Wann die Deitsche am End abfaahre, dann bin ich leedmiedich. Ich guck frehlich uff unsre Rees in Tschunn nooch Deitschland un ich weess as mei Schtudente gucke aa frehlich uff Tschunn un alle ihre neie Freinde widderzuseh.

Do is die ganze Drupp (20 Amerikaaner, 20 Deitscher un 4 Schulmeeschder) uff re Penn State University Tour.

Hen ennich-epper vun eich en Schtudentverwexle aa schunn geduh? Wie waar es un was hett eich vun es glannt?

Do is en Audio Klip: 20 Kinner vun Deitschland!

Published in: on 29/10/2011 at 08:06  Leave a Comment  

Eppes zu wisse!

Guder Daag Blog Leser. Ich hab gewollt eppes an eich wichdig zu saage. Es waerd ken neie Poscht fer die naegschde zwee Woch gewwe. Ich hab 23 Hochdeitsch Kinner un Schulmeeschdern die kumme um mei Schul un Pennsylvaania zu besuche. Ya, ich muss “der Host” fer die naegschde zwee Woch schpiele. Wann sie widder zerick nooch Deitschland fliege, waerr ich en Poscht iwwer die Erfahring schreiwe. Ich hoff as alles gut geht un as es ken Brobleme gewwe waerrd. Yuscht mol sehne! Bis schpaeder in Oktower, macht’s gut un bleib mol im Kontakt!

-Der Doug

Published in: on 14/10/2011 at 05:53  Leave a Comment  

Supp Owed!

Guder Daag Blog Leser!  Selle Woch will ich eppes schreiwe iwwer en yaehrliches Fescht as mei guder Freind hot: Supp Owed. Alle Yaahr uff en Samschdaag in Oktower hot mei guder Freind Supp Owed bei ihm zu Heem. Awwer was is sell? Sell is yuscht was der Naame saagt: en Owed mit Supp. Wann mer zu Supp Owed eigelaade is, muss mer en Crock Pot voll vun Supp mitbringe.

Datt sin ee paar Crock Pots voll mit gude Supp!

Wann mir alle zamme sin hemmer viele viele verschiddliche Types vun Supp. Selles Yaahr hawwich Sauergraut Supp gemacht…oh sell is yo appeditlich. Dazu mei Supp hemmer aa Grummbier un Kaess Supp, Chili, Gaardesach mit Rinsfleesch Supp, Schunkefleesch un Kaess Supp, un Hinkel un Welschkann mit Nudel Supp ghatt. Mei Freind hot aa ee paar Hot Dogs uff em Grill gemacht un es hot ee paar Leeb frisches Brot gewwe. Wann alles faddig un ready is, dann kann mer Supp esse. Usually is es zimmlich kiehl fer Supp Owed, un die heese Supp schmeckt arrig gut gege es kiehle Wedder. Selles Yaahr waar es Wedder net normal. Es waar zimmlich waarm, awwer die Supp hot so wie so gut gschmackt.

Mir esse nix yuscht Supp, normally gebt es aa Schpiele dabei. Geschder hemmer viel Quoits gschpielt. As viel vun eich schunn weescht, is Quoits en gut bekannte Schpiel fer uns Deitsche. Nadierlich hawwich viel Schpiele gewunne! Was kann ich saage, ich hab en guder Partner ghatt.

Do sin mir bei Quoits schpiele. Ich bin am schmeise.

Ich gleich Supp Owed viel. Es gebt allsfat gude Supp, Quoits, Bier un annere gude Drinke un en gude Zeit mit Freinde. Was is besser als sell?

Do is en Audio Klip: Supp Owed

Published in: on 09/10/2011 at 13:54  Comments (4)  
Follow

Get every new post delivered to your Inbox.

Join 59 other followers