Leckschenzeit!

Guder Daag Blog Leser! Well es Yaahr is schunn bald faddig, un sell bedeitet as es widder Leckschenzeit is. All Yaahr in Nofember gebt es en Leckschen. Alle vier Yaahre gebt es grosse Leckschen, bei so en Leckschen schtimme die Leit fer der Bresident nei. Selles Yaahr is en “Mid-Term” Leckschen. Die sin aa wichdig. An re Mid-Term Leckschen kenne die Leit fer Representatives un Senaadore neischtimme.

Selles Yaahr do in Pennsylvaania gebt es viele grosse Laafe. Pennsylvaania waerd en neie Senaador fer Waschington neischtimme. Mir schtimme aa fer en nei Gowwnier nei. In viele Distrikts in Pennsylvaania waerre aa neie Represantatives fer Waschington un fer Harrisbarrig neigschtimmt.

Selles Yaahr die Republikaaner sin hatt am browiere um die Kongress in Waschington zu gwinne. Die Demokraats hen es nau, awwer mol sehne was es im neien Yaahr gebt! Normally, net so viel Leit schtimme in en Mid-Term Leckschen nei. Awwer, ich glaab as viel Leit selle Nofember neischtimme waerre. Viel Leit hen genung vun re Regiering in Waschington ghatt. Es gebt allsfatt nooch viel Leit die ken Job hen. Un unsere Ekonomie is allsfatt aa schwach.

Normally gebt es yuscht zwee Balladickal Parties in en Leckschen: die Republikaaner un die Demokraats. Selles Yaahr gebt es en neie Drupp: die Tee Party. In viele Gegend do in Amerikaa sin die Tee Party meh un meh bekannt. Es kann sei as selles Yaahr waerre es Representatives in Waschington gewwe, die net vun de zwee Gross Partys sin. Sell waerr eppes.

Es macht nix aus zu mir was eier balladickal Vorzuck seid. Ich hoff yuscht as viel vun uns uff em zwette Nofember neischtimme waerre. Mir sin glicklich do in Amerikaa as all Leit neischtimme kenne. In viele Lenner, hen die Leit net so en Briveledge. So duh eier Deel un schtimme nei!

Do is en Audio Klip: Leckschenzeit

Published in: on 24/10/2010 at 12:03  Leave a Comment  

Sauergraut mache!

Guder Daag Blog Leser!

Well, es is Schpotyaahr. Es gebt so viel zu duh im Schpotyaahr. Mer muss all de Bledder abnemme, es Haus ready mache fer der Winder un nooch eppes wichdig: Sauergraut mache!

Alle Yaahr macht mei Familye Sauergraut. Mir wachse Graut in unser Gaarde un dann in Oktower odder schpot September is es Zeit fer Sauergraut zu mache. Selle Yaahr waar ich net daheem zu helfe awwer meinre Fraa ihre Familye macht aa heemgemachte Sauergraut. Letschde Sunndaag waar Sauergraut Daag fer die Rote Familye.

 

Do sin die Grautkepp...ready zu geh!

 

Um Sauergraut zu mache, braucht mer yuscht ee paar Dinge: ee paar Grautkepp, Salz, en Haffe un en gude Grauthowwel. So leicht is es! Aerscht, mach sicher as dei Graut gebutzt waar…es kann ken Dreck odder Waerm gewwe. Dann muss mer die Grautkepp mit re Grauthowwel schneide. Mer muss net so schtarrick gehe…die Howwel is arrig schaerf un mer kennte en Finger verliere! Fer alle fimf Pfund vun Graut muss mer drei Essleffel vun Salz gewwe. Dann muss mer die Graut un Salz zammeriehre. Mir duhne sell mit re grossen Holzschtange.

Do is der Bob am Graut schneide...bass mol uff dei Finger!

Do is mei Jessica...sie is am zammeriehre.

Graut, Salz, un Aaremgraft...dass macht Sauergraut!

 

Wann mer all de Grautkepp abgschnidde hot, un genunk Salz gewwe is die Zeit um alles zu decke. Gwehnlich yuuse mir Grautbledder fer die Deckel. Dann muss mer yuscht waarde! Mir losse es yaehre fer baut sechs Woch. Wann es Sauergraut faddig is, schteckt mei Familye es in Gwaartglesser. Meinre Fraa ihre Familye yuust Ziplockseck un dann alles in em Frier.

Ich ess so gaarn Sauergraut. Esst eich aa gaarn Sauergraut? Hett eich es aa selwer gemacht? Es is en alde Tradition un ich bin so froh as mei Familye die Tradition nooch duht.

Do is en Audioklip: Sauergraut mache!

Published in: on 16/10/2010 at 07:48  Comments (1)  

En wichdiger Deitscher – Aadeel 1!

Guder Daag Blog Leser! Selle Woch will ich eppes nei duhe. Selle Woch schreib ich eppes iwwer en wichdiger Deitscher. Die Title saagt as es Aadeel 1 is…sell meent as es meh Aadeele gewwe waerd. Uff em siwwede Oktower waar en Yehrlichfescht. Uff em Siwwede Oktower 1787 waar em Heinrich Melchior Muhlenberg sei Dode Daadem. Ich hab gedenkt as er en guder Man is fer mei erschde Aadeel vun mei Wichdiger Deitscher Series.

Der Henry Melchior Muhlenberg (sei Naame in Englisch. Sei deitsche Naame waar Heinrich Melchior Mühlenberg) waar uff em 6. September, 1711 in Einbeck, Deitschland gebore un is am 7. Oktower, 1787 in Trappe, Pennsylvaania gschtarewe. Er waar en Deitsche ludderische Paare der nooch em Nadd-Amerikaa as en Missionsbreddicher gschickt waare.

Do is der Henry Muhlenberg.

Er waar arrig wichdig zu em Grinding die aerschde Ludderische Gemeene in Nadd-Amerikaa. Der Muhlenberg is konsidered re Ludderische Kaarich in Amerikaa ihr Daadi. Der Muhlenberg un sei Fraa, Anna Maria, hen en grosse Familye ghatt. Viele vun ihre Kinner sin aa in re Gschichte Amerikaa wichdig, sie waare Paare, Militz Amtsmenner un Politiker.

Der Muhlenberg waar em Nicholaus un Anna Maria Kleinschmid Muhlenberg ihr Soh in em Deitsche Schtaat vun Hanover. Er hot Theologie uff em Georg-August University in Göttingen schtudiert. As er en Schtudent waar, hot die Pietists ihm geeiflusst. Mit zwee annere Menner, hot der Muhlenberg en Schul in Göttingen gegrindet. Der Muhlenberg waar in Leipzig in 1739 eigsetzt. Er waar der Paare in Grosshennersdorf vun 1739-1741. In em Yaahr 1742 is er nooch Nadd-Amerikaa ausgewandert in en Antwatt vun en Aaschprich vun de Lutteraaner in Pennsylvaania.

Bevor der Muhlenberg kumme is, sin viele ludderische Karriche in Pennsylvaania vun Lay Paare gegrindet. As der Nicholaus Zinzendorf meh un meh Bekehrderen zu re Herrnhuder Karrich gewunne hot, die Lutteraaner hen die Hochdeitsche Karriche in Deitschland fer hoch-gelannde Paare gfroogt.

In 1742, der Muhlenberg is nooch Philadelphi ausgewandert. Sei aerschde Gemee waar re Augustus Ludderische Karrich in Providence, was heit Trappe, Pennsylvaania is. Er hot aa Gemeene in Maryland un Nei Yarrick gfiehrt un hot neie Gemeene gegrindet. In 1748 hot er die aerschde Ludderische Synod in Amerikaa gerufe. In 1786 hot er en Gsangbuch gschriwwe. Die Eiweiding Schtee vun Augustus Ludderische Karrich is an em Muhlenberg eigeweidt.

Do is en Denkmol an Muhlenberg. Es is uff em Campus vun Muhlenberg College.

Der Muhlenberg is efders darrich Nadd-Amerikaa gereest. Darich sei 45-Yaahr Breddichamt, is er vun Nei Yarrick bis Georgia gereest. Er hot net yuscht an deitsche Leit gebreddicht, awwer aa an Leit aus em England un Holland. Er hot Hochdeitsch, Englisch un Hollandisch schwetze kenne.

Der Muhlenberg is in seim Haus in Trappe gschtarewe. Er is in re Augustus Ludderische Karrich mit seinre Fraa die Anna Maria, ihr Soh, Kolonial General Peter Muhlenberg begraawe. Sei Fraa, die Anna Maria Weiser, un der Muhlenberg waare in 1745 geheiert. Die Anna Maria waar em Conrad Weiser sei Dochder. Die Anna un der Henry hen elf Kinner ghatt.

Ihre Kinner waare aa wichdig zu re Gschicht Amerikaa. Ihr Soh, Peter waar en Major General in die Kontinental Armee un nooch em Grieg waar in em US Kongress. Ihr annere Soh, der Frederick, waar der aerschde Speaker of the House in em Amerikaansiche Kongress. Der Henry Jr, waar aa en Paare wie sei Daadi. Der Henry Ernst waar en Wissenschaftler un der aerschde Bresident vun Franklin un Marshall College in Lengeschder. Ihr Gross-soh, der John Schulze, waar en Governor vun Pennsylvaania.

Ee paar Facts iwwer der Muhlenberg:

1. Er is in em Kalenner vun Heilicheren die Ludderische Karrich begegnet uff em 7. Oktower.

2. Die Muhlenberg College in Elsdaun is in sei Naame benammt.

As eich sehne kennt, der Muhlenberg waar en wichdiger Deitscher. Um meh iwwer der Muhlenberg zu lanne, bsuche: http://www.trappehistoricalsociety.org/muhlenberg.html

Do is en Audio Klip: En wichdiger Deitscher – Aadeel 1.

Published in: on 10/10/2010 at 12:42  Comments (2)  

Es muss Schpotyaahr sei!

Geschder bin ich uffwacker, un es waar mir glee bissel kiehl im Haus. Ich bin nausgange fer meie Zeiding zu griege, un ich hab Acht uff  de Bledder ghatt. Sie waare rot, gehl un aarensch. Sell muss schunn Schpotyaahr sei. Ich gleich Schpotyaahr arrig viel. Ich weess net ob es mei Leiblingsyaahreszeit is odder net, awwer ich gleich es.

In em Nummidaag hawwich viel draus in mei Hof geduh. Ich hab mei Graas gemaeht. Ich hoff as sell waar die letschde Mol fer es Yaahr, awwer yuscht mol sehne! Nooch em Graasmaehe, hab ich Bledder vun meine Maebel- un Eechebaam uffgepickt. Es hot net so viel gewwe…die Beem sin nooch voll, awwer ee paar sin schunn nunnerkumme. As ich mit de Bledder am schaffe waar, hawwich die sunderbaare Geruch groche. Die Bledder in Schpotyaahr hen ihr eegne Geruch…un es is siess zu meinre Naas.

As ich faddig mit meine Bledder waar, hawwich in im Blummeland geschafft. Ich hab vier Grisanthymums gkaaft. Die waare arrig voll mit Blumme un sie waare so farewevoll. Ich hab die newwe em Haus geblanst. Ich hab aa ee paar Dullebaane, Oschderblumme un Krokuses geblanst. Ich hoff as die in Friehyaahr uffkumme! Yuscht mol sehne!

Schpotyaahr is aa die Zeit fer Ebbel, Ebbelseider un Karebse. Kiehler Owede un sonnige Daage…die sin so schee, Gell? Nau is aa die Zeit fer die Kinner uff ihre Spuckowed Koschtume zu denke. Ich hab aa en Idea ghatt fer Spuckowed. Ich waerr meh iwwer sell schpaeder schreiwe. Ich hoff as alle vun eich aa Schpotyaahr gaarn hawwe. Schreib mich en Comment un loss mich mol wisse fer was dihr Schpotyaahr gleicht!

Un nooch eppes: Letschde Woch is alles uff meinre Hochzich gut glaafe! Es Wedder waar wunnerbaar un mir hen ken Probleme ghatt!

Do is en Audioklip: Es muss Schpotyaar sei!

Published in: on 03/10/2010 at 12:22  Comments (10)  
Follow

Get every new post delivered to your Inbox.

Join 63 other followers