En Friehyaahr fer die Mudderschprooch 2012!

Guder Daag Blog Leser! Well, Geschdrowed hemmer baut vier Inches Schnee grickt. Nau, wann ich uff em Thermometer guck, saagt es 25 Graad Fahrenheit. ‘Sis aa arrig schee do bei mir. ‘Sis yo Winder do in Midde-Pennsylvaania. Ich gleich der Winder un der Schnee. Ich weess as viel Leit es arrig net gleiche, awwer ich gleich es. Schunn sidder mir en gleene Bu waar, hab ich der Winder gaarn ghatt.

Awwer mei Poscht fer selle Woch hot mit em Friehyaahr zu duh. Selle Woch hab ich en EPoscht vun dem Ed Quinter grickt. Er hot mich gfroogt eb ich mei Poscht selle Woch iwwer es “Friehyaahr fer die Mudderschprooch Fescht” schreiwe kennt. Nadierlich hawwich “ya” gsaat. Selles Yaahr gebt es ken gedruckde Program, es Fescht hot sei eegne Facebook Seit! Ya, mir Deitsche sin gut mit re Technology.  2010 waar es aerschde Yaahr fer es, un es waar arrig glicklich. “En Friehyaahr fer die Mudderschprooch” is en Series vun Events die alles mit Pennsylvaanisch Deitsch Kuldur un Schprooch zu duh hen. Es laaft vun em zwette Hanning bis Tschulei. Es Fescht kummt zu en End im Tschulei bei em Kutzschteddel Folk Fescht. En Highlight vun sellem Fescht is die Mudderschprooch Schreiwer Kontest. ‘Sis yuscht Yenner, dihr hett genunk Zeit fer en Schtick zu schreiwe. Browier mol dei Hand mit re Schprooch un kummt mol nooch Kutzschteddel un dann kennt dihr eiere Schticker laut lese! Dihr kennt all eiere Freinde beeidrucke!

Do is en Link zu re Facebook Drupp Seite

Ich hoff as viel vun meine Blog Leser en Event bsuche kenne. Ich waerr fer schurr uff ee Paar vun de Events sei.

Bis naegschde Woch, bleibt waarm un gsund!

Do is en Audio Klip: En Friehyaahr fer die Mudderschprooch 2012!

En Mann der hot schier gaar alles geduh!

Guder Daag Blog Leser! Mariye is en Feierdaag do in Amerikaa. ‘Sis dem Martin Luther King Jr. sei Daag. Sell finn ich arrig recht as er en Daag hot. Er hot warricklich viel Gudes in Amerikaa geduh. Var zwee Yaahre hawwich en Blog Poscht iwwer sei Daag gschriwwe. Guck mol do um es zu lese: Der Martin Luther King Jr..

Awwer selles Woch will ich iwwer en annere bekannte Amerikaaner schreiwe: der Benjamin Franklin. Er hot aa sei Gebottsdaag selles Woch! Wann mer uff der Benjamin Franklin denkt, denke viel Leit yuscht iwwer der Mann der uff em $100 Bill is odder uff der Mann der mit em Aussaage vun Unabhengichkeet gholfe hot. Ya, die zwee Dinge sin wichdich, awwer der Benjamin hot so viel anneres aa geduh!

Do is unser Mann!

Der Benjamin Franklin waar uff em 17. Yenner im Yaahr 1706 in Boston gebore un er is in Philadelphia uff em 17. Abrill im Yaahr 1790 gschtarewe. Er is een vun unseren Grinderdaadi vun Amerikaa. Er waar en Schreiwer, en Drucker, en Bolitiker, der Poschtmeeschder, en Wissenschaftlicher, en Myusicker, en Erfinder un en Diplomat. Er hot warricklich alles im Lewe geduh!

As Erfinder un Wissenschaftlicher hot er viel mit Leckdrick geduh. Er hot die Gewidderrut, Bifocals, der Franklin Offe, die Odometer und die Glaas Armonica erfunne. Er hot es aerschde bublick Bicherhaus in Amerikaa un die aerschde Feierkumpanie in Pennsylvaania gegrindt. Vun 1785 bis 1788 waar er Gowenier vun Pennsylvaania. Am End sei Lewe hot er all sei Schklaafe ihre Freiheit gewwe un er waar een vun der bekanndeschde Abolischunists in Amerikaa.

Der Franklin hot viel mit Leckdrick geduh.

As Drucker hot er die Pennsylvaania Gazette gedruckt wu in er viel iwwer die Unrechdichkeete vun England un ihr Keenich do in Amerikaa gemacht hen. Er waar een vun de aerschde Amerikaaner der fer Unabhengichkeet vun England gerufe hot. Er hot aa Aarme Richard sei Kalennar gedruckt. Selles Buch waar arrig bekaant in Kolonial Amerikaa. Sell waar voll mit viel gude Information iwwer blanse un aa mit viel guder Gedanke un Schprichwatte.

Ee paar vun sei beschde Schprichwatte sin:

“En Bens der gschpaart is, is en Bens der verdient.”

“Fisch un Bsucher schtinke in drei Daage.”

Der Benjamin waar net en grosse Fan vun uns Deitsche in Pennsylvaania. Er hot warricklich gedenkt as unser Schprooch luschdig waar un mir waare alle dumme Bauere. Awwer er hot aa sell gsaat:

“Amerikaa bauert was die Deitsch dohiegebracht hen.”

As dihr sehne kennt, der Benjamin Franklin waar un is allsfat nooch en wichdiger Mann in Amerikaa. Ich bin schtolz as er aa en Pennsylvaanier waar. Er is en Christ Church Karrichhof in Philadelphia begraawe. Un es gebt der Benjamin Franklin Institute wu en Gedechtnis schteht.

Der Benjamin Frankling Gedechtnis in Philadelphia.

Do is en Audio Klip: En Mann der hot schier gaar alles geduh!

Es Yaahr 2012!

Guder Daag Blog Leser! Well nau is es widder Yenner do in Pennsylvaania, awwer ‘sis schwer zu glaawe! Es Wedder selle Winder is arrig lecherlich. Mir hen keen Schnee ghatt un die Temperadure sin waarm. Geschder hemmer 50 Graad ghatt…in Yenner?! So faangt es Yaahr 2012 aa.

Alle Yaahr in Diesember kaaf ich en Baer’s Bauern Kalenner. Sell is voll mit viel gude Information iwwer wann mer eppes blanse soll. ‘Sis aa voll mit Information iwwer die Sunn un der Muun. Sie hen aa Information iwwer Tipps fer es Haus un Gaarde un sie hen allsfat en gude Ardickel iwwer all die Yehrlichfeschde. Selles Yaahr is em Baer’s ihr 187. Kalennar. Ich hab gedenkt as ich eppes iwwer die grosse Yehrlichfeschde fer 2012 schreiwe soll.

Yaahr 1612 – Es 400 Yehrlichfescht: Die aerschde Landkaart vun Virginia waar vun dem Captain John Smith rausgewwe un die aerschde glickliche Duwack Blanze sin datt aageblanst.

Yaahr 1712 – Es 300 Yehrlichfescht: Uff em 7. Tschuun hot die Pennsylvaanisch Regiering die Eibringe vun schwatze Gschlaafe nooch Pennsylvaania unrechtmaessich gemacht.

Yaahr 1762 – Es 250 Yehrlichfescht: Pennsylvaania hot en Weg fer en Kanaal vun der Susquehanna Rewwer bei Middletown nooch der Schuylkill Rewwer bei Reddin abgemesse. Selle Kanaal hot Handel mit Land im em Wescht uffgeduh. Aa, die Herrnhuder hen en Versammling vun Karrichlieder fer die Delaware Insching rausgewwe.

Yaahr 1812 – Es 200 Yehrlichfescht: Der Grieg vun 1812 gege England is aagfange. Der Schtaat Louisianna is eikumme as der 18. Schtaat. Nau hot Amerikaa baut 75,000 Birger. Der James Madison is widder gewaehlt as Bresident.

Yaahr 1862 – Es 150 Yehrlichfescht: Der grosse Schlacht gschwischich der Monitor und die Merrimack in em Birgergrieg is gfochde. In Abril is der grosse Schlacht bei Shiloh gfochde, wuh meh as 24,000 Soldaade bschaedicht waare. In September hot der Bresident Lincoln sei Emancipation Proclamation rausgewwe. Un die Julia Ward Howe hat die “Battle Hymn of the Republic” gschriwwe.

Yaahr 1912 – Es 100 Yerhlichfescht: Nei Mexiko is die 47. Schtaat gewest. In Abrill hot der bekannte Schiff, der Titanic, en Eisbarrick gedroffe un is in em Nadd-Atlantik nunnergange. 1,502 Paersons hen ihr Lewwe in em kalde Wasser verlore. In November is der Woodrow Wilson as Bresident gewaehlt.

Yaahr 1962 – Es 50 Yehrlichfescht: Der Nobel Breis fer Arznei is vun dem James Watson un zwee annere Menner gewonne. Sie hen die Double-Helix vun DNA ausgfunne. Der Gregory Peck hot der Oscar fer beschde Schpieler fer es Movie “To Kill a Mockingbird” gewonne. Un der Johnny Carson hot aagfange as Host vun der Tonight Show zu sei.

As mer sehne kann, gebt es viel  im Yaahr 2012 zu erinnere. Ich hoff as eier Yaahr gut aagfange is. Bis naegschde Woch, macht’s gut un schreib mich eppes!

Do is en Audio Klip: Es Yaahr 2012!

Was, dihr wollt Deitsch lanne?

Guder Daag Blog Leser! Well, nau is es 2012! Selle Woch will ich eppes katz schreiwe um alli-epper eppes wisse zu losse. Heit hawwich en E-Poscht vun der Alice Spayd grickt. Sie hot gsaat as ich eppes uff mei Blog schreiwe sott iwwer en Broblem in Kutzschteddel.

Alle Yaahr gebt es Klaesses uff der Kutzschteddel University fer Deitsch zu lanne. Selles Friehyaahr gebt es widder en Klaess. Der Brofessor is der Ed Quinter, en arrig guder Mann un en guder Schulmeeschder. Die Klaess is die zwette Semester Klaess, awwer ich bin gsaat as mer braucht die aerschde Semester net zu gnumme hot. Es Semester beginnt uff em 23. Yenner un laaft bis Moi. Ich weess net wann die Klaess dreffe will awwer mer kann der Ed Quinter en E-Poscht schreiwe un er kann dihr alles saage.

Bis heit gebt es net genunk Schtudente fer die Klaess zu gschehe. Mir brauche Leit! Wann du die Klaess net paersehnlich nemme witt, vielleicht kennt dihr epper die Deitsch lanne will. Sei so gut un saag eppes! Nadierlich, koschdet es eppes fer die Klaess, selle Nummer weess ich net. Awwer wann du schunn in die Ruh setzt, koschdet es nix! Mer muss yuscht Noochweis gewwe as mer schunn retired is.

Fer meh Information, schreib der Ed Quinter en E-Poscht an: equinter@kutztown.edu odder du kannscht aa an die Alice Spayde schreiwe: pgalice@verizon.net

Naegschde Woch kumm ich widder zerick mit en neie Poscht iwwer es Nei Yaahr! Bis dann, macht’s gut un schreib eppes!

Grischtdaag 2011 un Nei Yaahr Winsch Video!

Guder Daag Blog Leser! Well ‘sis widder Zeit fer mei yaehrliche Grischtdaag un Nei Yaahr Winsch Video. Klick mol uff die Link un viel Gschpass! Mir sehne uns widder im Yaahr 2012!

Grischtdaag Poscht un Nei Yaahr Winsch Video!

 

Grischtdaag Movies!

Guder Daag Blog Leser! Well as ich letschde Woch gschriwwe hab, is es Adventzeit. Nau zaehle mir die Daage bis Grischtdaag! Nau is aa die Zeit fer viel Leit Partys zu hawwe, ihr Haus schee zu mache, en Baam in es Haus zu bringe, Kichli zu backe, un Grischtdaag Lieder zu singe un heere. Was aa bekannt zu sellre Zeit is as viel Grischtdaag Movies im Guckbax sin. Alle Owed kann mer es Guckbax aaduh un es gebt fer schurr een odder meh Grischtdaag Movies. Ich hab gedenkt as selle Woch waerr ich iwwer ee paar schreiwe.

1. A Christmas Carol (En Grischtdaag Lied) – Die Gschicht is alt un alle kenne der Ebeneezer Scrooge. Der Charles Dickens hot en arrige gude Gschicht gschriwwe vun em alde greiziche Mann. Der gleicht der Grischtdaag gaar net un saagt allsfatt “Grischtdaag, bah humbug!” Dann uff em Hallicher Owed, is er vun drei Schpucke bsucht. Die drei Schpucke weise der Ebeneezer as sei Lewe gaar net gut waar un wann er sei Wege net verennert, will er viel Kedde in em Noochlewe draage misse. Nadierlich hot der Ebeneezer sei Lewe verennert un is zu en gude Mann hiegewennt.

2. National Lampoons Christmas Vacation (De National Lampoons ihr Grischtdaag Vacation) – Sell is en luschdige Movie. Mei Fraa liebt es. Es is iwwer en Familye die versucht en abbaddiche Grischtdaag zu hawwe. Awwer es gebt allsfatt Probleme mit ihre Freindschaft, ihr Haus…alles. ‘Sis arrig luschdig.

3. Miracle on 34th Street (En Wunner uff em 34 Schtrooss) – Selle Movie is aa arrig beliebt. Sell is iwwer en Maedel die Santa Claus drefft. Awwer all die annere Leit glaawe as er net der echde Santa Claus is, weil es gebt ken echde Santa Claus. Am End is es rauskumme as er waar der Echde. En gude Gschicht mit guden schpiele.

4. It’s a Wonderful Life (‘Sis en wunnerbaare Lewe) – Nau kumme mir zu re beschde Grischtdaag Movie. Selle Movie hot es all: en wunnerbaar Gschicht, gude Schpieler un es ziegt uff dei Gfiehle. Ich muss ehrlich saage as yedes Mol as ich selle Movie seh, brill ich viel. Der Jimmy Stewart schpielt der George Bailey. Er is en Mann der browiert allsfatt zu duh was recht is. Dann is eppes bassiert un er will sich dotmache. En Engel kummt um ihn zu schtoppe, un dann der Schpuck (der Clarence) weist der George as sei Lewe zu wichdig is weckzuschmeise.

Es gebt nicht yuscht Movies, es gebt aa viel Cartoonschtiker die viel Leit liewe. The Grinch who stole Christmas, Rudolph the Rednosed Reindeer un A Charlie Brown Christmas sin drei Schticker die arrig beliebt sin. Ich weess as fer mich sin alle drei wichdig…sell is net Grischtdaag wann ich die drei noch net gsehne hab. Ich glaab ‘sis aa so mit viel vun eich, gell?

So sei net wie der Ebeneezer! Lauert mol een vun selle Movies un dihr waerrt arrig schnell in es Gemiet vun Grsichtdaag seid!

Do is en Audio Klip: Grischtdaag Movies!

Die Adventzeit!

Guder Daag Blog Leser! Well ich hoff as alle vun eich en gude Danksfescht ghatt hett. Mei waar gut un nadierlich hawwich zu viel gesse! Alles waar so appeditlich. Dann bin ich in der Busch gange um en Hasch zu schiesse, awwer sell waar nix so gut gange. Ich hab ken gsehne! Nau sin mir schunn in Diesember un sell meehnt as es widder Advent is.

Der Advent is die Zeit in em Karrichyaahr bevor dem Grischtdaag. Der Advent is en Zeit fer die Leit zu rischde un waarde fer em Yesus sei Gebott uff em Grischtdaag. ‘Sis aa em neien Karrichyaahr sei Aafgang.

Die Zeitlaaf kann mit em Adventkalenner gezaehlt. Sell is en Iewing die vun Hochdeitsche Ludderaaner geintroduced waar. Der Advent faangt uff em viert Sunndaag var Diesember 25^th aa. Es gebt allsfatt vier Sunndaage in Advent. Viel Leit hen aa en Adventsgranz mit vier burbel Kerze un en rosa Kerz in em Mitt.

In em Latin Schprooch heesst es Adventus, un sell kummt vun em Griesche Watt parousia, sell waar normally fer die Zwette Kumme vun Grischt geyuust. Fer Grischde, der Advent is en Denkseckli fer allebeed die Waardezeit vun em Hebrews fer es Gebott vun ihrem Erlesser un aa fer die Waardezeit vun Grischde fer em Grischt sei Zerrickkum.

Die Lesungen un die Laerne darich der Advent is eft uff der Zwette Kumme zu rischde un aa uff der aerschde Kumme vun Grischt aazudenke. Sei aerschde Kumme is er as Erlesser kumme, un sei zwette Kumme waerd er as Richder kumme.

En dypical Karrichlied fer die Adventzeit is O Kumm O Kumm Emanuel. Ich hab gedenkt es waer schee wann ich die aerschde Vaersch ins Deitsch iwwersetz, so do is es:

O Kumm O Kumm Emanuel 

Un errede gfangene Israel

Die do drauere in leedmiedichliche Exil

Bis em Gott sei Soh scheint

Frehe! Frehe! Emmanuel

Soll zu dir kumm, O Israel.  

Do is en Audio Klip: Die Adventzeit!

 

Welschhinkel Daag!

Guder Daag Blog Leser! Well selle Woch bringt een vun meinen Leibfeierdaage: es Danksfescht. Nooch em Grischtdaag is es Dankfescht Nummer zwee fer mich. Wie is es bei eich? Aa so?

Unsre Gschicht verzaehlt uns as es aerschde Danksfescht  im Yaahr 1621 waar mit de Pilgrims in Plymouth Kolonie. Sie hen en grosse Iems ghatt in Dank fer es Yaahr 1620-1621 iwwerzulewe un as sie en gude Ern grickt hen. Nadierlich hen die Pilgrims viel fer Dankbaar so sei. Awwer viel vun de Pilgrims ihr Glick is vun de Inschings kumme, vun wem sie viel vun ihrem neien Land gelannt hen. Zum aerschden Danksfescht in Plymouth hot Welschhinkel, Grummbiere un annere Gaardesache gewwe. Sie hen viel vun unsere Traditions aagsetzt.

Danksfescht as en National Feierdaag is net bis em Yaahr 1863 kumme. Der Bresident Lincoln hot der letschde Dunnerschdaag in November gewaehlt fer der Feierdaag. Un ‘sis allsfatt so gebliwwe. Heitzudaage feiere viele Familye Danksfescht mit em grossen Iems. Es gebt allsfatt nooch Welschhinkel, Grummbiere un viele annere Gaardesache, graade wie es mit de Pilgrims waar. Was aa Tradition nau is Footbaal im Guckbax zu seh un aa die Macy’s Danksfescht Schtrutz vun Nei Yarrick Schtadt zu seh.

Ich hoff as all mei Blog Lesers en hallicher Danksfescht hen. Esst net zu viel awwer genung, un net vergesse  Blatz zu losse fer Karebsekuche! Naegschde Woch waerr es ken neie Blog Poscht gewwe. Ich waerr in em Busch sei um Hasche zu yaage. Mol sehne eb ich een finne kann!

Do is en Audio Klip: Welschhinkel Daag

En volle Woch!

Guder Daag Blog Leser! Well ich muss saage as selle Woch en arrige volle Woch waar! Do in Amerikaa hemmer zwee wichdige Daage ghatt. Uff em Dinschdaag waar der Lekschendaag un dann uff em Freidaag waar de Soldaate ihr Daag.

Ya, mir hen widder Leckschen do ghatt. Selles Yaahr waar es net en arrige grosse Leckschen. Mir hen ken Bresident gewaehlt. Do in Pennsylvaania hemmer haaptsechlich fer Richder un Kaunty Kommissioners gewaehlt. Oh ya, mir hen aa ver Schulraad Leit geawehlt. Mannichmol denk ich as die sin wichdiger as viel annere Gewaehlte Leit. En Schulraat gebt all dei Landtax Geld aus, un sie mache die Decisions fer der Lanning unser Kinner! Alles is widder gut geloffe. Zum Glick wuhne mir in en Land wu mir allsfatt friedliche Leckschens hawwe. Ich weess as es net so in annere Lenner is un ich bin arrig froh as es so do is! Naegschdes Yaahr waerrd en wichdige Leckschen gewwe. Mir misse fer der Bresident waehle…sell is allsfatt uffgeregt.

Freidaag waar aa arrig wichdig do in Amerikaa. Der 11. November is allsfatt Soldaatedaag. Sell is en Daag an wem mir an unsere Soldaate denke solle. Mir sin un solle dankbaar sei fer alles was all die Soldaate in all die Griege geduh hen. Viel Soldaate sin net widder heem kumme, sie hen der grosse Preis bezaahlt fer unsere Freiheit un fer Gerechdigkeit in der Welt. Do hemmer Ceremonies un Aadenkes in Karrichhoffe, in VFWs un in Legions. Ich saag oft zu meine Schtudente as sie allsfatt Dankeaa saage sett zu yeder Soldaat der sie dreffe!

Nau kenne mir uff Danksfescht do in Amerikaa denke. Awwer was ich arrig schlecht finne is as all die Schtors schunn ihr Grischtdaag Sache aushen! Un ich heer schunn Grischtdaag Myusick in em Schwetzbax un uff em Guckbax!  Yawell, so geht es, gell? Bis zum naegschde Mol, macht’s gut un schreibt mich mol eppes!

Do is en Audio Klip: En volle Woch!

Karebs Schmeise!

Guder Daag Blog Leser! Alle Yaahr baut sellre Zeit gebt es viele Feschde do in Amerikaa. Die Feschte sin entwedder fer Schpotyaahr, Schpuckowed, odder Feschde fer yuscht Handwarricke fer Grischtdaag zu verkaafe. Baut zwee Woch zerick hot es en neie Fescht fer uns do in Midde Pennsylvaania gewwe: Karebs Schmeise! Nau ich weess as es so en Fescht in annere Aadeele vun Amerikaa schunn lang gebt, awwer fer uns waar es eppes Nei.

Die Leit uff re Fescht!

Die Naame saagt graad was es is: Karebs waerre lang un weit gschmisse. Awwer, wie un fer was? Well, loss mich mol so aafange: Es Fescht waar bei re Bald Eagle Schtaat Park do in Howard, PA. Datt gebt es en grosse See mit en Beach un en Blatz fer Picknicke zu mache. Unsre Feierkumpanie hot es Fescht gschponsert. Uff Englisch hot es “Punkin’ Chunkin” gheesst.

Es hot Live Myusick gewwe. Selle Baend hot Bluegrass gschpielt.

Es Fescht is vun 10 bis 4 Uhr gewest. Sie hen viel Essblatze, Leit die Handwarricke verkaaft hen, Live Myusick un nadierlich hen sie viele Karebs gschmisse. Die Esse waare dypical Feschtesse wie Dreche Kuche, Waschtbrot, Pizza, Kuchle, Kaffi, un warmes Eppelseider. Die Live Myusick waare alle Druppe die Local waare. Viel Leit hen ee paar Grischtdaag Gschenke fer Familye kaaft.

Der grosse Katapult!

Nau zu de Karebs Schmeise! Die Feierkumpanie hot en grosse Katapult gebaut un dann hot es en annere Mann gewwe, der sei eegne Katapult gebrocht hot. Seinre waar gleener as die Feierkumpanis. Sie hen en grosse Haufe vun Karebs. Alle fimf Minudde odder so hen sie en annere Karebs gschmisse. Wann sie ready waare, hen all die Leit datt vun 5 bis 1 gezaehlt, dann wann mir zu 0 kumme sin, sin die Karebs weit, lang un hoch geflogge! Aye yummer sin sie weit gange! Ich waar arrig iwwerfalle wie weit sie gange sin! Wann sie es Wasser gedroffe hen, sin sie sofort uffgeblose. Dann hen all die Leit so laut gegrische! Es hot arrig viel Gschpass gemacht. Die Kinner datt hen es arrig viel gegliche!

En Karebs drefft es Wasser.

Der Daag waar eppes abbadiches, un ich hab net gemisst zu bezaahle rei zu geh! Die Feierkumpani hot schunn gsaat as naegschdes Yaahr will sie es widder duh! Ich kann net waarde!

Do is en Audio Klip: Karebs Schmeise